Mangin Balanse kag Simple sa Kabuhi

“Tan-awa sing mainandamon kon paano ang paggawi ninyo indi subong nga dimaalam kundi subong nga mga maalam . . . bangod nga ang mga adlaw malaut.”​—⁠EFESO 5:​15, 16.

1, 2. Ano gid ang matuod nga hangkat karon, kag sa ano ini mahimo nga mapaanggid?

ISA ka hangkat ang pagpili sang mga prioridad, pag-organisar sang mga responsabilidad, kag paghugod sang tion kag enerhiya sa importante nga mga bahin sang kabuhi sa makatarunganon nga paagi. Isa man ka hangkat ang paglikaw sa mga pagpasobra kag paghupot sing kalig-onan sa hunahuna kag balatyagon.​—⁠Efeso 5:​17; 1 Timoteo 4:​8; 1 Pedro 1:⁠13.

² Ini nga hangkat mahimo mapaanggid sa hangkat nga ginaatubang sang isa ka akrobata nga nagatinguha sa paglatay sa manipis kag mataas nga alambre. Ang pagkawasi sing balanse mahimo nga makahalalit sa iya. Sing kaanggid, ang pagkawasi sing espirituwal nga balanse mahimo nga makahalalit sa aton. Ang tawo nga nagalatay sa mataas nga alambre wala gid nagapabug-at sang iya kaugalingon sing madamong butang. Nagadala sia sang mga kinahanglanon lamang. Busa, agod huptan ang aton espirituwal nga balanse, dapat kita magkabuhi sing simple kag wala ginabug-atan.​—⁠Hebreo 12:​1, 2.

3. Ano ang dapat nga himuon naton agod mangin simple sa kabuhi?

³ Agod mangin simple sa kabuhi, dapat kita magmasako sa mga butang lamang nga kinahanglanon sa pagmentinar sing makatarunganon nga palangabuhian. Kabaliskaran sa kon ano ang dapat pangitaon sang iya mga disipulo​—⁠ang Ginharian sang Dios kag ang Iya pagkamatarong​—⁠si Jesucristo nagpamulong nahanungod sa “mga butang nga ginapangita sang mga pungsod.” (Mateo 6:​32, 33) Gani si Jesus naglaygay sa aton nga likawan ang pagtipon sing madamo sining mga butang. Ngaa? Bangod magapabudlay ini sang aton kabuhi kag magapatalang sa aton. (Lucas 12:​16-21; 18:25) Maayo ini nga laygay, manggaranon man kita ukon imol, edukado ukon indi.

Kon Ngaa Importante Gid Karon

4. Ngaa ang pagkabuhi sing balanse kag simple importante gid sa karon?

⁴ Ang balanse kag simple nga kabuhi importante gid karon bangod si Satanas kag ang iya mga demonyo yari diri sa duta kag nagapanikasog nga pabug-atan kita kag ipahilayo ang aton igtalupangod gikan sa pag-alagad sa Dios. (Bugna 12:​7-12, 17) Busa, ang sugo sang Biblia nagakaigo gid: “Tan-awa sing mainandamon kon paano ang paggawi ninyo indi subong nga dimaalam kundi subong nga mga maalam, nga nagahimulos sang kahigayunan, bangod nga ang mga adlaw malaut.” (Efeso 5:​15, 16) Huo, nagakabuhi kita sa malaut nga kalibutan ni Satanas, indi sa bag-ong kalibutan sang Dios. Busa, indi mahimo nga magpabuyanbuyan kita.​—⁠2 Corinto 4:​4; 2 Pedro 3:​7, 13.

5. Paano nagpahamtang sing maayong halimbawa ang mga alagad sang Dios sang dumaan nga tion?

⁵ Ang mga alagad sang Dios nga nagkabuhi anay sa sining ginagahoman sang Yawa nga kalibutan sang dumaan nga mga tion nagpahamtang sa aton sing maayo nga halimbawa. Sila “nakatu-ad nga mga dumuluong kag mga manlulugayaw sila sa duta.” Busa, “nagahandum sila sang duta nga maayo pa, nga amo, ang langitnon.” (Hebreo 11:​13-16) Ang ila katutom yara sa langitnon nga Ginharian sang Dios, subong nga kita amo man. Bangod sini, gintawag ni apostol Pedro ang mga Cristiano nga “mga dumuluong kag mga manlulugayaw.” (1 Pedro 2:​11; Filipos 3:20) Sa katunayan, si Jesus nagsiling nga ang iya matuod nga mga sumulunod “indi bahin sang kalibutan.” Nagakahulugan ini, subong sang ginsiling ni apostol Pablo, nga ang mga Cristiano indi dapat ‘maggamit sing bug-os sang kalibutan.’​—⁠Juan 17:​16; 1 Corinto 7:⁠31.

6. (a) Ano ang kinahanglan nga dumdumon naton, kag sa ano naton mapaanggid ang aton kahimtangan? (b) Anong nagapaandam nga halimbawa ang dapat nga dumdumon naton tanan?

⁶ Gani dapat naton pirme dumdumon nga ining kalibutan ni Satanas isa ka makatalagam nga teritoryo puy-an. Ang sayop nga tikang mahimo nga magakahulugan sing kapahamakan. (1 Juan 5:​19; 1 Pedro 5:8) Ang aton kahimtangan mahimo mapaanggid sa kahimtangan sang isa ka tawo nga nagalakat sa wayang nga may ginlubong nga mga bomba. Nagahatag sing nagapaandam nga halimbawa para sa mga Cristiano, si apostol Pablo nagsugid nahanungod sa mga Israelinhon nga handa na sa pagsulod sa Ginsaad nga Duta. Madamo ang nadulaan sang ila espirituwal nga balanse, nakahimo sing imoralidad, kag ginpatay sang Dios. “Busa,” sulat ni Pablo, “ang nagahunahuna nga nagatindog sia mag-andam basi kon [madula ang iya espirituwal nga ­pagkabalanse kag] mapukan sia.”​—⁠1 Corinto 10:⁠12.

Kon Ngaa Isa Ini ka Pangamlig

7. Anong pag-usisa sa kaugalingon ang dapat naton himuon sing maalamon?

⁷ Ang balanse kag simple nga kabuhi magaamlig sa imo bangod magahatag ini sa imo sing dugang nga tion kag enerhiya para sa espirituwal nga mga butang. Gani pamangkota sing maalamon ang imo kaugalingon: Ginapasimple ko bala ang akon kabuhi, ukon ginapabudlay ko ini? Ano gid bala nga mga butang ang una sa akon kabuhi? Siling sang iban diutay ang ila tion sa pagtuon sa Biblia ukon sa pagpakigbahin sa pag-alagad sa latagon. Apang ano ang rason? Ayhan, bangod sang indi balanse kag indi simple nga kabuhi. Ngaa indi mo pag-ipaanggid ang kadamuon sang tion nga ginahinguyang mo sa paglingawlingaw, subong sang pagtan-aw sing telebisyon, sa tion nga ginahinguyang mo sa pag-alagad kay Jehova sa lainlain nga patag sang Cristianong hilikuton? Balanse bala ang paggamit mo sang tion? Ang pagpasimple sang imo kabuhi magahatag sa imo sing tion para sa mas importante nga mga butang, nga nagalakip sang pagpakigbahin sing labi pa sa importante gid katama nga espirituwal nga pagpangani.​—⁠Filipos 1:​9, 10; Mateo 9:⁠37.

8. Paano ginatuman sang isa ang laygay ni Jesus nga pangitaon anay ang Ginharian, kag ano ang nagalaragway sa pagkaimportante sang abante nga dalagan?

⁸ Sa pagkamatuod, ang imo espirituwal nga hilikuton isa ka takus kon bala ikaw balanse kag simple sa kabuhi. Ang mga Cristiano nga nagasunod sa laygay ni Jesus nga pangitaon anay ang Ginharian sang Dios may maayo nga pag-uswag sa tayuyon nga pagtuon sang Biblia, pagtambong sa mga miting, kag pag-alagad sa latagon. Inang pag-uswag isa gid ka proteksion batok sa pagkapukan. Mahimo ini mapaanggid sa pagsakay sa bisikleta. Yadtong nakatilaw sa pagbalanse sang bisikleta nga mahinay ang dalagan tubtob halos nagdulog na nagaapresyar sang importansia sang abante nga dalagan. Sing kaanggid, tubtob may maayo ka nga pag-uswag sa rutina sang espirituwal nga hilikuton, naamligan ka gikan sa pagkawasi sang imo balanse kag pagkapukan.​—⁠Filipos 3:⁠16.

9. (a) Ano ang maayo nga pahanumdom para sa aton tanan? (b) Kon nagabinagbinag sang isa ka proyekto, anong mga pamangkot ang mahimo naton ipamangkot sa aton kaugalingon?

⁹ Apang, kinahanglan nga mangin mabinantayon, nagadumdom nga ang indi pagpabug-at sa aton kaugalingon nagahatag sing dugang pa nga tion sa pagtuon, sa paghanda para sa mga miting, kag sa pagbulig sa iban. “Sa tion nga ginasulay ako sa pagbakal sang butang nga wala ko ginakinahanglan, ukon sa pagpangabudlay nga wala ko ginakinahanglan,” siling sang isa ka Cristianong negosyante, “nagadulog ako upod ang pahanumdom nga mangin simple. Kon kaisa dapat ako mangin prangka sa akon kaugalingon.” Indi bala ina isa ka maayo nga pahanumdom para sa aton tanan? Kon nagabinagbinag sang isa ka proyekto, ayhan sa pagpasugpon sang imo balay ukon sang iban pa, ngaa indi pagpamangkuton ang imo kaugalingon: Magaamot bala ini sa akon espirituwalidad kag sa espirituwalidad sang akon pamilya ukon magaupang bala ini? Kinahanglan ko gid bala ang tanan nga mga butang nga ginahimud-osan sang katawhan sang kalibutan, ukon indi?

10. Paano ipaanggid ang pagtamod sang “pisikal nga tawo” sa pagtamod sang “espirituwal nga tawo”?

¹⁰ Apang, ang isa mahimo nga magapamatok: ‘Kinahanglan gid bala ang pagsakripisyo sa kaugalingon? Kinahanglan bala nga mangin balanse kag simple ako sa kabuhi?’ Ti, si Pablo nagpamulong nahanungod sa “mga butang sang tawo” kag sang “mga butang sang Dios” kag nagsiling: “Ang pisikal nga tawo wala nagabaton sang mga hiyas sang espiritu sang Dios, kay kabuangan sila sa iya; kag indi sia nakahangop sa ila bangod nga ginatalupangod sila sa espirituhanon nga bagay. Apang, ang espirituwal nga tawo nagausisa sang tanan nga mga butang.” (1 Corinto 2:​11, 14, 15) Madali ka mangin “pisikal nga tawo” paagi sa pagpangita kag sa pag-agom sang dikinahanglanon nga mga butang nga may materyal nga kinaugali. Sa sina nga hitabo, ang pagsakripisyo sa kaugalingon sobra tan-awon, makahalam-ot pa gani. Apang pagtamod ina sang “pisikal nga tawo,” indi pagtamod sang “espirituwal nga tawo.”

11. Ano kuntani ang nangin dibalanse nga dalanon para kay Noe, kag paano kita magakabuhi sing balanse sa karon?

¹¹ Ang espirituwal nga tawo amo ang isa nga nagatamod sang mga butang paagi sa mata sang pagtuo. Ginatan-aw niya ang mga butang gikan sa punto-de-vista sang Dios. Binagbinaga si Noe. Balanse bala sia kon, sa tapos mahibaluan ang katuyuan sang Dios nga laglagon ang kalibutan paagi sa anaw, naghinguyang sia sang iya tion sa pagtukod sang mas daku kag mas matahom nga puluy-an kag nagtigayon sing madamo pa nga materyal nga pagkabutang? Siempre indi! Ang arka amo ang tunay niya nga kalig-onan. Para kay Noe, ang mangin balanse kag simple sa kabuhi naglakip sang paghugod sang bug-os nga igtalupangod sa pagtukod sing arka kag mangin “manugbantala sang pagkamatarong,” walay sapayan sang pagyaguta sang walay pagtuo nga ‘pisikal nga mga tawo.’ (2 Pedro 2:​5; Mateo 24:​37-39) Sing kaanggid, sanglit nasanagan kita nahanungod sa pagkalapit sang katapusan sang kalibutan, ang lamang balanse nga pagkabuhi para sa aton amo ang paghugod sang aton igtalupangod sa paghimo sang kabubut-on sang Dios kag sa pagbantala sang maayong balita, bisan pa nga mahimo ini magadalahig sang ginatamod sang madamo nga pagsakripisyo sa ginatawag nga normal nga pagkabuhi.​—⁠1 Juan 2:⁠17.

Gintudluan Kita ni Jesus Kon Paano

12. (a) Ano ang ginsiling ni Jehova nga dapat naton untatan nga himuon, kag sa baylo ano ang dapat naton nga himuon? (b) Ngaa kinahanglan ining pagbalhin sing katuyuan?

¹² Sa iya Sermon sa Bukid, si Jesus naghatag sing matahom nga laygay nahanungod sa pagkabuhi sing balanse kag simple. Nagsiling sia: “Mag-untat sa pagtipon sa inyo kaugalingon sing mga bahandi sa duta, diin ang sipit kag ang tuktuk nagapapas, kag diin ang mga makawat nagaguhab kag nagapangawat.” Gingamit ni Jesus ang tinaga nga “mag-untat” bangod ang mga tawo masami nga padayon lamang nga ‘nagatipon’ sing materyal nga mga butang para sa ila kaugalingon. Apang indi na ina mahimo sang isa nga nangin disipulo ni Jesus. Ang iya kabuhi may lain na nga katuyuan, subong sang ginpakita sang masunod nga sugo ni Jesus: “Kundi, magtipon kamo sa inyo kaugalingon sing mga bahandi sa langit, diin walay sipit kag tuktuk nga nagapapas kag diin ang mga makawat indi magguhab kag magpangawat.” Nagahatag sang rason kon ngaa kinahanglan ining pagbalhin sang katuyuan, si Jesus nagsiling: “Kay kon diin ang inyo bahandi, didto man ang inyo tagipusuon.”​—⁠Mateo 6:​19-21.

13. Kon magatipon ka sing bahandi sa langit, sa ano ka dapat mangin kombinsido?

¹³ Ang imo bahandi amo ang ginakabig mo nga importante gid. Materyal nga mga pagkabutang bala ang imo bahandi? Ukon ang pagpakabalaan bala sa ngalan ni Jehova nga Dios kag sa iya ginsaad nga padya? Agod ihinguyang ang imo kabuhi sa pagtipon sing mga bahandi sa langit sa baylo sang sa duta, dapat nga kombinsido gid ikaw sa pagkatunay sang Ginharian. Ang bag-ong kalibutan dapat nga matuod gid sa imo sa bagay nga sarang mo ini makita sa mata sang imo hunahuna kag makita ang imo kaugalingon didto nga nagapangabudlay para matuman ang mga katuyuan ni Jehova sa duta. Kaangay ni Moises, dapat mo ‘makita ang Isa nga dikitaon’ kag makombinse gid nga ‘padyaan niya yadtong hanuot nga nagapangita sa iya.’​—⁠Hebreo 11:​6, 27.

14. Ano ang mga resulta kon ang aton tagipuson yara sa materyal nga mga butang?

¹⁴ Apang kamusta kon ang imo tagipusuon, nga nagalakip sang imo mga handum kag mga luyag, yara sa materyal nga mga bahandi? Ang Biblia nagasiling: “Ang gugma sa kuwarta amo ang gamot sang tanan nga kalainan, kag paagi sa sining mainit nga handum ang iban nagtalang gikan sa pagtuo kag nagsuntok sang ila mga tagipusuon sing madamong kasakitan.” Ang paghingamo sa materyal nga mga butang nga sarang mabakal sang kuwarta wala nagahatag sing matuod kag mapinadayunon nga kaayawan. (1 Timoteo 6:​10; Manugwali 5:10) Apang sing malain pa sa tanan, ang gugma sa kuwarta kag materyal nga mga butang magahalit sang imo kaangtanan sa Dios, nga nagapaabot nga alagaron naton sia sa “bug-os nga tagipusuon.”​—⁠1 Cronica 28:⁠9.

15. (a) Ano nga ilustrasyon ang ginhatag ni Jesus nahanungod sa mata? (b) Sa pisikal kag espirituwal nga kahulugan, paano mahuptan sang isa ang simple nga mata? (c) Kon ang aton mata simple, paano mangin kaangay sa tatlo ka apostoles ni Jesus ang aton espirituwal nga panan-aw?

¹⁵ Agod buligan kita sa paglikaw sa siod sang materyalismo, si Jesus naghatag sing duha ka ilustrasyon. Una, sia nagsiling: “Ang suga sang lawas amo ang mata. Busa, kon ang imo mata simple, ang bug-os mong lawas mapuno sang kapawa; apang kon ang imo mata malain, ang bug-os mong lawas mapuno sang kadulom.” (Mateo 6:​22, 23) Sa pisikal nga kahulugan, ang “simple” nga mata amo ang isa nga napukos, nagaliton sang maathag nga larawan sa hunahuna. Ang wala mapukos nga mata nagaliton sang magamo kag buron nga mga larawan. Sing kaanggid, ang espirituwal nga mata nga “simple,” ukon napukos, nagaliton sang maathag nga larawan sang Ginharian sang Dios, indi sang buron, wala mapukos nga larawan nga nagahimo sa bag-ong kalibutan nga daw kaangay lamang sang ora engkantada ukon mito. Kon ang imo espirituwal nga mata napukos, ang ginsaad sang Dios nga bag-ong kalibutan mangin matuod gid sa imo subong nga ang Ginharian matuod gid sa tatlo ka apostoles nga may pribilehiyo sa pagtan-aw sing una nahanungod sini sa milagruso nga palanan-awon sang pagbaylo dagway ni Jesus.​—⁠Mateo 16:​28⁠–​17:​9; Juan 1:​14; 2 Pedro 1:​16-19.

16. Sa ikaduha nga ilustrasyon, paano ginapakita ni Jesus ang pagkakinahanglanon sang pagkaisa sing katuyuan?

¹⁶ Si Jesus naghatag sing ikaduha nga ilustrasyon. “Wala sing tawo nga makaalagad sa duha ka agalon,” siling niya, “kay magadumot sia sa isa kag magahigugma sa isa, ukon magadampig sia sa isa kag magatamay sa isa.” Sing maathag, ginpadaku niya sa liwat ang kinahanglanon sa pagpakita sing isa ka katuyuan, sa pagsiling: “Dili kamo makaalagad sa Dios kag sa Manggad.” (Mateo 6:24) Indi lamang amo sina ang kinahanglan. Gani si Jesus nagpadayon: “Busa nagasiling ako sa inyo: Mag-untat sa paghimud-os nahanungod sang inyo mga kalag sa kon ano ang inyo kaunon ukon ano ang inyo imnon, bisan pa nahanungod sang inyo lawas sa kon ano ang inyo ipanapot. . . . Kay ang mga pungsod nagapangita sini tanan nga butang. Kag ang inyo Amay nga langitnon nakahibalo nga kamo may kinahanglan sini tanan.”​—⁠Mateo 6:​25-32.

17. (a) Ano ang punto ni Jesus sang naghatag sia sing mga instruksion nahanungod sa materyal nga mga butang? (b) Ano ang ginapadaku diri ni Jesus, kag ano ang ginalakip sang balanse kag simple nga kabuhi?

¹⁷ Indi buot silingon ni Jesus nga itugyan na lamang sang iya mga sumulunod ang pag-aman sang materyal nga mga kinahanglanon sa pagkanataboan ukon nga sila magatinamad kag magadumili sa pagtrabaho agod mabuhi ang ila kaugalingon kag ang ila mga pamilya. (1 Timoteo 5:8) Indi, kundi ang punto amo nga ining materyal nga mga butang nga ginapangita sang mga pungsod indi dapat unahon. Sa baylo, subong sang ginlaygay ni Jesus: “Padayon, nian, nga pangitaa ninyo ang ginharian kag ang iya pagkamatarong, kag tanan ini nga butang idugang sa inyo.” (Mateo 6:33) Gani ginahambalan diri ni Jesus ang nahanungod sa mga tulumuron sa kabuhi kag ginapadaku ang pagkawalay pulos sang pagpangita sing materyal nga mga butang. Ang pagkabuhi sing balanse kag simple nagadalahig sang pagpukos sang aton mga mata sa mga interes lamang sang Ginharian, nagahimo sang tanan iban pa nga butang nga segundaryo.

Huwaran ni Jesus kag sang Iban

18. Paano si Jesus naghatag sing maayo nga halimbawa sa aton?

¹⁸ Sang nagalaygay sa mga Cristiano nga ‘isikway man ang tagsa ka kabug-atan kag ang sala [sang kakulang ukon pagkawasi sang pagtuo] nga nagatapik gid,’ si Pablo naglaygay: “Magdalagan kita nga may pagbatas sang dalaganon nga ginabutang sa aton atubang, nga nagatulok kay Jesus nga Pangulong Ahente kag Manughimpit sang aton pagtuo.” (Hebreo 12:​1, 2) Si Jesus himpit gid nga nahugod sa mga interes sang Ginharian sa bagay nga ang iya kahimtangan kasubong sang ginlaragway niya: “Ang mga ido nga talonon may mga lungib kag ang mga pispis sa langit may mga haponan, apang ang Anak sang tawo wala gid sing olonlan sang iya ulo.” (Mateo 8:20) Sa amo man nga tion, si Jesus indi asetiko. Ginapakita sang Kasulatan nga nalipay sia sa maayo nga pagkaon kag panapton, apang ang iya panguna nga tulumuron sa kabuhi amo ang pagtuman sang iya ministeryo. Busa si Jesus nagkabuhi sing balanse kag simple.​—⁠Lucas 5:​29; Juan 19:​23, 24.

19, 20. (a) Ano nga halimbawa ang ginhatag ni Pablo nahanungod sa materyal nga mga butang? (b) Anong leksion ang naton-an sang madamo sa karon, kag paano nila ginatamod ang ila dalanon sang kabuhi?

¹⁹ Si apostol Pablo nag-areglo man sing nagakaigo sang iya mga prioridad. Sia nagsiling: “Wala ko pagkabiga ang akon kalag nga mahal sa akon kaugalingon, agod nga matapos ko ang akon dalaganon kag ang hilikuton nga akon nabaton kay Ginuong Jesus, sa pagpanaksi sang maayong balita.” (Binuhatan 20:24) Huo, agod matuman ang pinakaimportante nga ministeryo, kontento na si Pablo sa pangunang mga kinahanglanon apang nalipay sia nga nakaagom sing kabuganaan kon kaisa. Nagsulat sia: “Sa tanan nga kahimtangan naton-an ko ang tinago sang pagkabusog kag pagkagutom, sang kabuganaan kag kinawad-on.”​—⁠Filipos 4:⁠12.

²⁰ Literal nga linibolibo ka tawo ang nakatuon sina man nga leksion karon. Madamo sa ila ­bug-os tion nga mga ministro sang mga Saksi ni Jehova, lakip ang mga misyonero, mga payunir, nagalakbay nga mga manugtatap, kag ang mga nagaalagad sa internasyonal nga ulong-talatapan kag mga sanga talatapan sang organisasyon. Pagkaligad sang mga tinuig sa bug-os tion nga pag-alagad, ang kalabanan nagasiling: “Kon ­liwaton ko ini, indi ako magahimo sing tuhay.”

Mga Pagpakamaayo nga Sarang Mo Maagom

21, 22. (a) Anong mga padya ang maagom bisan sa karon kon magkabuhi kita sing balanse kag simple? (b) Anong palaabuton nga mga pagpakamaayo ang sarang mo maagom?

²¹ Samtang nagakabuhi sing balanse kag simple nga nagalakip sang sakripisyo, ang mga pagpakamaayo kag mga kalipay indi mapaanggiran. Busa may dugang ka nga tion sa pagpauswag sang mga interes sang Ginharian kag may daku pa nga oportunidad sa pagpangita sa mga interesado kag sa pagtudlo sa ila nahanungod sa mga katuyuan sang Dios. Mangin imo ang matuod nga kaayawan kag pagkakontento, lakip ang kalinong sa hunahuna kag ang pasalig nga ginapahamut-an mo si Jehova nga Dios. Amo ina ang padya nga matigayon mo bisan karon.​—⁠Filipos 4:​6, 7.

²² Apang ang palaabuton nga mga pagpakamaayo mas daku pa, nagahimo sa karon nga mga sakripisyo nga ginahimo mo nga diutay kon ipaanggid. Ang mga pagpakamaayo ni Jehova nagalakip sang “kabuhi tubtob sa tion nga dinapat-od.” Huo, mangin imo ina nga pagpakamaayo​—⁠ang dayon nga kabuhi sa kalipay sa matarong nga bag-ong kalibutan ni Jehova. Mangin balanse kag simple sa kabuhi, wala nagatugot sa mga butang sining kalibutan nga indi magbalanse sa imo. Dumduma nga ang Dios magahatag sa imo sang mga pangabay sang imo tagipusuon.​—⁠Salmo 21:​3, 4; 37:​4; 133:⁠3.

Mga Pamangkot sa Repaso

◻ Anong mga halimbawa kag mga ilustrasyon ang natalupangdan mo nga makabulig sa imo sa pagkabuhi sing balanse kag simple?

◻ Paano kita maamligan sang balanse kag simple nga kabuhi?

◻ Kon ang aton espirituwal nga mata simple, ano ang kahulugan sini sa aton?

◻ Paano kita gintudluan ni Jesus sa pagkabuhi sing simple?

◻ Ano ang mga pagpakamaayo sang balanse kag simple nga kabuhi?