Mga Amot nga Nagapahalipay sa Tagipusuon
SA KAHON sa ubos amo ang duha ka tipiko nga sulat nga ginapadala sang mga relihion sang Cristiandad sa pagpangita sing pundo. Nalipay ka bala sa sina? Indi gid! Apang, ang pundo kinahanglanon sa madamong paagi karon agod magbulig sa pagsakdag sang pagsimba nga ginakahamut-an sang Dios. Gani paano ginapangita sang isa ka Cristianong organisasyon ang kinahanglanon nga pundo agod himuon ang kabubut-on sang Dios?
Ang sabat sarang masapwan paagi sa pag-usisa sang kinabatasan sang Cristianong kongregasyon sang unang siglo kag sang mga pulong sang Tagtukod sini, si Jesucristo. “Buhata ang paghatag, kag ang mga tawo magahatag sa inyo,” laygay ni Jesus sa Lucas 6:38. “Ibubo nila sa inyo sabak ang sukob nga maayo, dinasok, naligoligo kag nagaawas. Kay sa talaksan nga ginataksan ninyo takson kamo liwat.” Daw ano ka nagakaigo inang ilustrasyon sa mga dulunggan sang nagapamati sadto kay Jesus. Ang ila Oriental nga mga panapton may bulsa agod sudlan ukon tagoan sing mga butang. Ang tinaga nga “sabak” (Griego, kolʹpos), nagapatuhoy sa lupyak nga ginaporma sang pilo sang hugak nga panapton sa ibabaw lamang sang paha, kag sa sini ginabubo sang mga manugbaligya ang gintakus nga butang nga ginbakal.
Pila ka negosyante ang magadasok anay kag dayon ligoliguon pa ang binakal agod nga madamo ang makasulod sa lupyak sang panapton sang bumalakal, bisan tubtob sa punto nga mag-awas ini? Pila gid lamang, kon may yara! Apang, ang mga Cristiano, paagi sa maalwan nga pag-amot sing mga buhat sang kaluoy sa mga nagakinahanglan pagabayaran sing maalwan sa kaluoy. Ang talaksan sang aton pagtratar sa iban, kon bala maalwan ukon kuripot, gamiton sa pagtakus sang aton anihon bilang balos, indi lamang gikan sa mga tawo, kundi, labi ka importante, gikan kay Jehova nga Dios.—Ipaanggid ang 2 Corinto 9:6; Galacia 6:7.
Si Jesus, paagi sa maalwan nga pag-amot sang iya kaugalingon kag sang iya manggad, nakaeksperiensia sang kamatuoran sini nga prinsipio. Sia ang personipikasyon sang kaalwan. Sing makugi kag dimakagud ginbantala niya ang maayong balita sang Ginharian sang Dios sa mga imol. Wala niya ginpabayaran ang iya mga serbisyo ukon nagpaabot sing suweldo para sa sini. Wala niya ginhandum ang bisan ano. Ang mga tawo maalwan kag kinabubut-on nga nagsakdag sang iya ministeryo.—Lucas 7:22; 8:1-3.
Ang paghatag ni Jesus nag-inspirar sa iban—Simon Pedro, Santiago, Juan, kag sa nabilin sang 12—nga magpakita sing kaangay nga kaalwan paagi sa pagbiya sang tanan nga butang agod makapakigbahin sa ministeryo. (Lucas 5:10, 11; 9:1-6) Ina nga sahi sang pag-amot nagabunga sing pareho man nga mga resulta karon. Ang mga Saksi ni Jehova nagahatag sang ila tion, kusog, kag manggad agod ang iban makabati sang maayong balita sang Ginharian sang Dios. Bilang balos, samtang nagapakita sila sing kaalwan paagi sa pagbantala, ang iban pa ginapahulag sa pagpabutyag sing kaalwan paagi sa pagpakigbahin sa ila sa pagpalapnag sang maayong balita.—Hulubaton 11:25.
Apang, may butang pa dugang sa aton pag-amot paagi sa pagbantala nga nagapahalipay sa tagipusuon. Ang pag-amot sing kuwarta upod ang husto nga motibo kag para sa matarong nga mga rason bahin man sang matuod nga pagsimba. (2 Corinto 9:9-14) Paano ini ginahimo sang mga Cristiano sang unang siglo?
Kon Paano Ini Ginhimo sang Unang mga Cristiano
Sa una nga adlaw sang pagkabun-ag sang Cristianong kongregasyon sang tuig 33 C.E., ang ‘paghiambitay, pagtipiktipik sang tinapay kag ang mga pangamuyo’ ginbuhat sang 3,000 ka bag-o mabawtismohan nga mga kombertido. Bangod sang anong maayong rason? Agod mapalig-on ang ila bag-o nga pagtuo paagi sa ‘pagpadayon sing malig-on sa pagtolon-an sang mga apostoles.’—Binuhatan 2:41, 42.
Ang mga Judiyo kag mga proselita nagkadto sa Jerusalem nga nagplano sa pagtener didto para lamang sa tion sang Piesta sang Pentecostes. Apang ang mga nangin Cristiano naghandum sa pagpabilin sing malawiglawig pa agod makatuon sing dugang pa sa pagpalig-on sang ila bag-o nga pagtuo. Nagtuga ini sing problema tuhoy sa emerhensia nga kalan-on kag ilistaran. Ang iban nga mga bisita kulang sing kuwarta, samtang ang iban may sobra. Gani natabo ang temporaryo nga pag-amotay kag pagpanagtag sing materyal nga mga butang sa mga nagakinahanglan.—Binuhatan 2:43-47.
Paano sila napakaon kag nahatagan sing ilistaran? Gin-organisar sang mga apostoles, nga amo ang nagahikot subong nagadumala nga hubon, ang pagpangolekta kag pagpanagtag sing inamot nga mga butang. Sa amo, ang una nga laragway sang Cristianong kongregasyon nagapakita sing mga katapo nga wala nagakabig sang ila materyal nga mga butang subong ila kaugalingon kundi subong butang nga gamiton para sa kaayohan sang bug-os nga kongregasyon. (Binuhatan 2:44; 4:32) Dugang pa, “ang tanan nga may mga duta ukon mga balay nagbaligya sini, kag gindala ang mga bili sang nabaligya kag ginbutang ini sa tiilan sang mga apostoles. Kag ginpanagtag sa tagsatagsa suno sa iya kinahanglan.”—Binuhatan 4:34, 35.
Ang pagbaligya sang mga duta kag mga balay kag ang pagpaambit sang tanan nga butang boluntaryo gid. Wala sing isa nga gin-obligar sa pagbaligya ukon sa pagdonar; indi man ini pagsakdag sa kaimulon. Ang ideya nga ginpabutyag indi nga ginbaligya sang manggaranon nga mga katapo ang tanan nila nga pagkabutang kag sa amo nangin imol sila. Sa baylo, bangod sang kaluoy sa mga masigkatumuluo sa idalom sang mga kahimtangan sadto nga tion, ginbaligya nila ang propiedad kag gin-amot ang tanan nga bili agod mahatag ang kinahanglanon sa pagpauswag sang mga interes sang Ginharian.—Ipaanggid ang 2 Corinto 8:12-15.
Sa karon man, ginhatag sang mga indibiduwal ang ila propiedad sa Watch Tower Society ukon ginhingadlan ining organisasyon sa ila mga testamento, paagi sa amo ginapagamit sa Nagadumala nga Hubon sang mga Saksi ni Jehova ang pundo sa kon diin daku gid ang kinahanglanon sang Ginharian. Ina tanan nga paghatag nagabulig sa pagpalapnag sing espirituwal nga kasanagan subong sang natabo sang Pentecostes. Wala sing bisan ano sini nga ginasugo.
Pagkaregular ang Sekreto
Mga 20 ka tuig pagligad sang Pentecostes sang 33 C.E., ginpahanumdom ni apostol Pablo ang kongregasyon sang Corinto nahanungod sa ginakinahanglan nga amot. “Karon nahanungod sa amot nga sa mga balaan, subong sa ginsugo ko sa mga kongregasyon sa Galacia, amo man ang himuon ninyo,” sulat niya. Dayon nagdugang sia sing laygay: “Sa nahaunang adlaw sang tanan nga semana, ang tagsatagsa sa inyo magpain sa iya balay nga supton niya, suno sa iya pagkabugana, agod nga sa pag-abot ko handa na ang mga amot. Kag sa pag-abot ko, ang bisan sin-o nga pakamaayuhon ninyo ipadala ko sila nga may mga sulat sa pagdul-ong sa Jerusalem sang inyo dulot.” Ang desisyon kon pila ang ihatag daw naglakip sa bug-os nga pamilya, manggaranon man ukon imol, kay natabo ini sa ila “balay.”—1 Corinto 16:1-3.
Ang panugda ni Pablo tuhoy sa paagi sang pag-amot sarang maaplikar sang mga katapo sang kongregasyon karon. Paano? Ang pagkaregular amo ang sekreto. Kon ang inyo kongregasyon nagabayad sing binulan nga arkila kag sang mga gasto sa pagtipig sang inyo tiliponan ukon Kingdom Hall, kinahanglan ang “pag-amot, indi ang daku nga kantidad, kundi ang regular nga pagpain sing kantidad kada semana ukon bulan para sa mga interes sang Ginharian,” sulat sang sanga talatapan sa Peru. Luyag mo bala ini nga ideya? Bisan ang kabataan matudloan sa pag-apresyar kon paano ang pagkaregular sa pag-amot bahin sang ila pagsimba.
Busa, kon ang mga amot ginahimo upod ang husto nga motibo kag husto nga rason, nagapahalipay ini sa tagipusuon sang Dios kag sang tawo. Ang 2 Corinto 9:7 nagasiling: “Maghimo ang tagsa ka tawo suno sa gintuyo niya sa iya tagipusuon, indi nga nagaduhaduha ukon sa pagpilit, kay ang Dios nagahigugma sa manughatag nga malipayon.”
[Kahon sa pahina 28]
Mga Metodo nga Ginagamit sang Cristiandad
“Ang Ginuo naghambal sa akon nga sulatan kamo sini nga sulat . . . Indi ako magsulat sa inyo sing subong sini para sa bisan anong butang sa kalibutan kon ang Ginuo wala maghambal sa akon nga sulatan kamo kag sugiran nga kon magpadala kamo dayon sing $20.00 agod ibulig sa akon karon pakamaayuhon niya kamo subong sang wala pa gid ninyo mabaton sang una.”—Sulat gikan sa taga-Canada nga klerigo ginpirmahan, “Ang inyo ministro kag Kaupod.”
“Buksi ining Balaan nga Lana nga Ihalaplas, (indi mag-usik sing bisan isa ka tulo). Si Jesus yari sa sining lana sang pagtuo. Paagi sa sini manguros sa imo agtang, nian paagi sa pagtuo kadto ka sa imo hulot nga ikaw lamang kag magkuha sing bisan ano nga kantidad sang kuwarta nga yara sa imo kag krusi ang tagsa ka papelon nga kuwarta agod ayuhon sang Dios ang imo problema sa kuwarta, kag padamuon ang imo kuwarta subong sang sa Lucas 6:38 . . . Kon haplasan mo ang imo kuwarta paagi sa sining balaan nga lana nga ihalaplas, haplasi ang tagsa ka papelon nga kuwarta nga sa imo. Krusi ang tagsa ka papelon nga kuwarta, nian, ang pinakadaku nga kuwarta nga yara sa imo, kon bala $20.00, $10.00 ukon $5.00, krusi paagi sa lana nga ihalaplas kag ipadala sa hilikuton sang Dios.”—Sulat gikan sa isa ka “reverend” sa Estados Unidos ginpirmahan, “Manalagna sang Dios sa 30 ka tuig.”
[Kahon sa pahina 30]
Kon Paano ang Iban Nagaamot sa Hilikuton sang Ginharian
◆ MGA REGALO: Ang kuwarta nga donasyon mahimo ipadala sing direkta sa Watch Tower Bible and Tract Society of Pennsylvania, 25 Columbia Heights, Brooklyn, New York 11201, ukon sa lokal nga sanga talatapan sang Sosiedad. Sarang man madonar ang propiedad. Ang malip-ot nga sulat nga nagasiling nga ina isa ka boluntaryo nga donasyon dapat ilakip sa sining mga amot.
◆ MAY KONDISYON NGA KAHIMUSAN SA PAGDONAR: Ang kuwarta, stocks, bonds, kag propiedad mahimo ihatag sa Watch Tower Society sa kondisyon nga sa kaso sang personal nga pagkinahanglan, ibalik ini sa nagdonar. Paagi sa sini nga metodo, malikawan ang gasto kag pagkawalay kasigurohan sang testamento, samtang nagapasalig sa Sosiedad nga mabaton ang propiedad sa kaso sang kamatayon.
◆ SIGURO: Ang Watch Tower Society mahimo hingadlan subong amo ang beneficiary sang isa ka polisa sang life insurance. Ang mga tinago sa banko sarang matugyan sa Sosiedad. Bisan diin man sa sining duha ka kaso, dapat pahibaluon ang Sosiedad.
◆ MGA TESTAMENTO: Ang propiedad ukon kuwarta mahimo mapapanubli sa Watch Tower Society paagi sa legal nga testamento. Dapat padalhan ang Sosiedad sing kopya sini.
Ang dugang pa nga impormasyon ukon laygay tuhoy sini nga mga bagay mahimo matigayon paagi sa pagsulat sa Watch Tower Bible and Tract Society of Pennsylvania, 25 Columbia Heights, Brooklyn, New York 11201, ukon sa lokal nga sanga talatapan sang Sosiedad.
[Mga Laragway sa pahina 31]
Mga paagi nga ginagamit sang Nagadumala nga Hubon sang mga Saksi ni Jehova sa pagpanagtag sang inyo mga amot sa pagpauswag sang mga interes sang Ginharian sa nagligad nga duha ka tuig:
Pagsakdag sa kapin sa 12,700 ka misyonero kag mga espesyal payunir
Pagtukod ukon pagpasangkad sang 40 ka pasilidad sang sanga
Pagsakdag sa kapin sa 5,000 ka nagalakbay nga manugtatap kag sa ila asawa
Pagbakal sing walo ka bag-o high-speed nga rotary presses
Pag-aman para sa kapin sa 8,400 ka Bethelites
Pagbulig sa mga biktima sang mga kalamidad