May Nakakita Na Bala sa Dios?

ANG bantog nga patriarka nga si Abraham, nga nagkabuhi sing kapin sa 1,900 ka tuig sa wala pa matawo si Jesucristo, mahigugmaon nga gintamod sang aton Manunuga sa bagay nga gintawag sia nga “abyan sang Dios.” (Santiago 2:​23, Byington) Kon may isa nga ginhatagan sing pribilehiyo nga makita ang Dios, pat-od nga si Abraham ina nga tawo. Ti, sang isa ka okasyon, nagkadto sa iya ang tatlo ka bisita nga may balaan nga mensahe. Gintawag ni Abraham ang isa sa ila nga si Jehova. Nagakahulugan bala ini nga nakita sing aktuwal ni Abraham ang Dios?

Makita ini nga kasaysayan sa Genesis 18:​1-3. Didto aton mabasa: “Si Jehova nagpakita sa iya sa luyo sang mga terebinto ni Mamre, sang nagalingkod sia sa ganhaan sang iya layanglayang sa kainit sang adlaw. Ginbayaw niya ang iya mga mata kag nagtulok, kag yari karon, ang tatlo ka lalaki nagtindog sa atubangan niya. Sang nakita niya sila nagdalagan sia gikan sa ganhaan sang layanglayang sa pagbaton sa ila kag nagyaub sia sa duta. Kag nagsiling sia: ‘Jehova, kon karon nakapahamuot ako sa imo itololok, indi pagligari ang imo alagad.’ ”

Sang ulihi, sang ginatan-aw ni Abraham kag sang iya tatlo ka bisita gikan sa mataas nga lugar ang Sodoma, naglakat ang duha sa pagduaw sa siudad. Nian ang bersikulo 22 nagasiling: “Apang tuhoy kay Jehova, nagtindog pa sia sa atubangan ni Abraham.” Gikan sa sini daw subong bala nga ang Dios yadto didto kaupod ni Abraham sa nagmateryalisar nga undanon nga lawas. Amo sini ang pangatarungan sang iban nga nagapati nga ang Dios kag si Jesucristo isa kag pareho nga persona.

Nahanungod sa Genesis 18:​3, ang eskolar sang Biblia nga si Melancthon W. Jacobus nagsulat: “Diri ang Dios nagpakita sa una nga tion nga narekord subong tawo sa tunga sang mga tawo, sa pagpakita sang pagkamatinuoron sang Iya Persona, kag sang Iya kaangtanan sa tawo, kag paagi sining tipiko nga buhat sa pagpasalig sa patriarka sang Balaan nga pagkaisa kag pagpakig-upod.” Yadtong may amo sini nga punto-de-vista mahimo magahinakop nga aktuwal nga nakita ni Abraham si Jehova paagi sa iya pisikal nga mga mata kag nga ang mga tawo nga nakakita kay Jesucristo nakakita man sa Dios. Apang nahisanto bala ini nga konklusion sa Biblia?

Kon Ano ang Ginsiling ni Jesus

Sa baylo nga ipahibalo nga isa sia ka Dios sa unod, si Jesucristo nagsiling: “Ako Anak sang Dios.” (Juan 10:36) Subong himpit nga Tiglawas ni Jehova nga Dios, si Jesus nagsiling man: “Ako sa akon kaugalingon indi makahimo sing bisan ano; suno sa ginapamatian ko, nagahukom ako; kag ang akon paghukom matarong, bangod nga wala ako nagatinguha sang akon kaugalingon nga kabubut-on, kundi sang kabubut-on sang nagpadala sa akon.” (Juan 5:30) Sang si Jesus yadto sa usok sang pag-antos, nagpangamuyo sia sa daku nga Manunuga sang mga langit, nagatawag sa iya subong “Dios ko, Dios ko.” (Mateo 27:46) Sa tapos sang iya pagkabanhaw, ginsilingan ni Jesus si Maria Magdalena: “Makayab ako sa akon Amay kag inyo Amay kag sa akon Dios kag inyo Dios.” (Juan 20:​1, 17) Bangod kay si Jesucristo indi ang nagmateryalisar nga Dios, wala sing isa nga nakakita kay Jesus ang makasiling nga sa amo nakita niya ang Dios.

Si Juan, ang apostol nga ginhigugma sing labi ni Jesus, naglig-on sang kamatuoran nga ang mga apostoles wala makakita sa Dios sang nakita nila si Jesus. Sa idalom sang inspirasyon si Juan nagsiling: “Wala gid sing tawo nga nakakita sa Dios.” (Juan 1:18) Sin-o, nian, ang nakita ni Abraham? Ang eksperiensia ni Moises nagabulig sa aton sa paghibalo sang sabat.

Kon Paano Nakita ni Moises ang Dios

Nagpabutyag anay si Moises sing handum nga makita ang Dios. Sa Exodo 33:​18-20, aton mabasa: “ ‘Ginaampo ko [Moises] sa imo, ipakita sa akon ang imo himaya.’ Kag nagsiling sia [Dios]: ‘Paagihon ko ang bug-os nakon nga pagkaayo sa atubangan mo, kag ibantala ko sa atubangan mo ang akon ngalan nga si Jehova; kag magamaayo ako sa pagaayuhan ko, kag magakaluoy ako sa pagakaluoyan ko.’ Kag nagsiling sia: ‘Indi ka makakita sang akon nawong, kay wala sing tawo nga makakita sa akon kag mabuhi.’ ”

Ang gintugut sang Dios kay Moises nga makita amo ang Iya nagaagi nga himaya. Ang mga bersikulo 21-23 nagasiling: “Kag si Jehova nagsiling: ‘Yari karon may duog sa luyo ko diin magtindog ka sa igang. Kag sang nagaagi ang akon himaya ibutang ko ikaw sa litik sang igang, kag tabunan ikaw sang akon kamot tubtob nga ako makaligad. Nian kuhaon ko ang akon kamot, kag makita mo ang akon likod. Apang ang akon nawong indi makita.’ ”

Nahisuno sa ginsiling ni Jehova kay Moises kag sa ginsiling ni apostol Juan, wala sing nakita si Moises nga materyalisasyon ukon materyal halin sa Dios. Ang nakita lamang ni Moises amo ang himaya sang balaan nga presensia nga nagaagi. Apang kinahanglan pa sia amligan sang Dios. Sing maathag, indi ang Dios mismo ang nakita ni Moises.

Sang makighambal si Moises sa Dios sing “nawong sa nawong,” subong sang ginasiling sa Exodo 33:​11, wala niya makita si Jehova. Ini nga ekspresyon nagapakita sa kon paano nakigsugilanon si Moises sa Dios, indi sa kon ano ang nakita niya. Ang pagpakigsugilanon sa Dios sing “nawong sa nawong” nagapakita sing bukas nga paghambalanay sang duha. Sing kaanggid, ang indibiduwal sarang makapakigsugilanon sing bukas paagi sa telepono nga indi makita ang tawo nga ginasugilanon niya.

Sang nakigsugilanon si Moises sa Dios kag nakabaton sing mga instruksion gikan sa iya, ang komunikasyon indi paagi sa mga palanan-awon, subong sang masunson nga nagakatabo sa iban nga mga manalagna. Makita ini sa Numeros 12:​6-8, diin aton mabasa: “Kag sia nagsiling: ‘Pamati ang akon mga pulong. Kon may manalagna sa tunga ninyo, ako nga si Jehova nagapakilala sa iya sa palanan-awon. Nagapakighambal ako sa iya sa damgo. Indi subong sini ang akon alagad nga si Moises! Matutom sia sa bug-os kong balay. Sa baba kag baba nagapakighambal ako sa iya, sing maathag gid, kag indi sa mga paktakon; kag nakita niya ang dagway ni Jehova.’ ” Sa anong kahulugan nga nakita ni Moises “ang dagway ni Jehova”?

Nakita ni Moises “ang dagway ni Jehova” sang sia, si Aaron, kag ang iban nga lalaki yadto sa Bukid nga Sinai. Sa Exodo 24:​10, ginsulat ini: “Nakita nila ang Dios sang Israel. Kag yara sa idalom sang iya mga tiil ang daw nabanigan sang bato nga zafiro, nga daw langit gid katin-aw.” Apang paano ‘nakita [ni Moises kag sang iban nga lalaki] ang Dios sang Israel,’ bangod kay ginsilingan sia sang Dios, “Wala sing tawo nga makakita sa akon kag mabuhi”? Ang bersikulo 11 nagapaathag, kay nagasiling ini: “Wala niya pagtakdungi sang iya kamot ang mga puno sang katawhan sang Israel, sila nagtulok sa matuod nga Dios kag nagkaon kag nag-inum.” Gani ang dagway sang Dios nga nakita ni Moises kag sang iban pa amo ang paagi sa palanan-awon.

Angheliko nga mga Tiglawas

Indi kinahanglan para sa daku nga Manunuga sang uniberso nga magpanaug gikan sa iya mataas nga lugar sa mga langit agod ipadala ang mga mensahe sa pila ka tawo. Luwas sa tatlo ka ginrekord nga mga hitabo nga ang tingog mismo sang Dios nabatian samtang yari pa sa duta ang iya Anak, si Jehova pirme naggamit sang mga anghel sa pagpaalinton sang Iya mga mensahe. (Mateo 3:17; 17:5; Juan 12:28) Bisan ang Kasuguan nga ginhatag sang Dios sa pungsod sang Israel sa Bukid nga Sinai ginpaalinton paagi sa mga anghel, bisan pa ginlaragway si Moises subong nga daw nagapakighambal sing direkta sa Dios mismo. Nahanungod sini, si apostol Pablo nagsulat: “Nian, ano bala ang Kasuguan? Gindugang ini bangod sang mga paglapas, tubtob nga mag-abot ang binhi nga iya nahimo ang saad; kag gintangdo ini paagi sa mga anghel sa kamot sang isa ka manugpatunga.”​—⁠Galacia 3:⁠19.

Nga si Moises aktuwal nga nakigsugilanon sa isa ka anghel nga personal nga nagarepresentar sa Dios ginapakita man sa Binuhatan 7:​38, nga nagasiling: “Ini amo sia ang yadto sa katilingban sa kamingawan kaupod sang anghel nga nagpamulong sa iya sa Bukid nga Sinai kag kaupod sang aton mga ginikanan.” Yadto nga anghel amo ang personal nga humalambal ni Jehova nga Dios, nga Manunuga, kag gani nakighambal sia kay Moises subong nga daw ang Dios mismo ang nagahambal.

Ang anghel nga nagdala sang mensahe sang Dios kay Moises sa dabdab sang kalayo sa tunga sang sapinit isa man ka humalambal. Ginpakilala sia subong anghel ni Jehova sa Exodo 3:​2, diin ginasugiran kita: “Nagpahayag sa iya ang anghel ni Jehova sa dabdab sang kalayo sa tunga sang sapinit.” Ang bersikulo 4 nagasiling: “Sang nakita ni Jehova nga naglipas sia sa pagtan-aw, ang Dios nagtawag sa iya gikan sa sapinit.” Sa bersikulo 6, ining angheliko nga humalambal tungod sa Dios nagsiling: “Ako ang Dios sang imo amay, ang Dios ni Abraham, ang Dios ni Isaac kag ang Dios ni Jacob.” Gani sang nagapakighambal sa sining personal nga tiglawas sang Dios, si Moises daw nagapakigsugilanon kay Jehova mismo.​—⁠Exodo 4:⁠10.

Sa ika-6 nga kapitulo sang Mga Hukom, makita naton ang isa pa ka halimbawa sang isa ka tawo nga nakigsugilanon sa Dios paagi sa angheliko nga tiglawas. Ginapakilala sang bersikulo 11 ang manugdala sang mensahe subong “anghel ni Jehova.” Didto aton mabasa: “Karon nag-abot ang anghel ni Jehova kag naglingkod sa idalom sang terebinto nga yara sa Ofra, nga naigo kay Joas nga Abiezernon, kag ang iya anak nga si Gideon nagawaswas sang trigo sa linasan sang ubas sa pagtago sini sa mga Midianhon.” Ining mensahero, ang “anghel ni Jehova,” pagkatapos sina ginrepresentar subong nga daw si Jehova nga Dios mismo. Sa bersikulo 14 kag 15, aton mabasa: “Gintulok sia [si Gideon] ni Jehova kag nagsiling: ‘Lakat ka sini nga imo kusog kag luwasa ang Israel sa kamot sang Midian. Wala ko bala ikaw pag-ipadala?’ Kag nagsiling sia sa iya: ‘O Jehova. Paano bala nga pagluwas ko sang Israel?’ ” Gani ang nagmateryalisar nga anghel nga nakita ni Gideon kag nga sa iya nakighambal sia ginarepresentar sa kasaysayan sang Biblia subong nga daw sia amo ang Dios mismo. Sa bersikulo 22, si Gideon nagasiling: “Nakita ko ang anghel ni Jehova sa nawong kag nawong!” Ang anghel naghambal sang tanan nga ginsugo sa iya sang Dios nga ihambal. Busa, si Gideon nakighambal sa Dios paagi sining angheliko nga humalambal.

Binagbinaga man ang natabo kay Manoa kag sa iya asawa, ang mga ginikanan ni Samson. Ini nga kasaysayan nagapamulong man tuhoy sa angheliko nga mensahero subong “anghel ni Jehova” kag “anghel sang matuod nga Dios.” (Hukom 13:​2-18) Sa bersikulo 22, si Manoa nagsiling sa iya asawa: “Sa pagkamatuod mapatay kita, bangod nga nakita naton ang Dios.” Bisan pa nga wala niya makita sing aktuwal si Jehova nga Dios, amo sina ang pagbatyag ni Manoa bangod nakita niya ang nagmateryalisar nga personal nga humalambal tungod sa Dios.

‘Wala sing Tawo ang Nakakita sa Dios’

Karon posible na mahangpan kon ngaa gintawag ni Abraham ang nagmateryalisar nga angheliko nga humalambal sang Dios subong nga daw nagapakighambal sia kay Jehova nga Dios mismo. Bangod kay ini nga anghel naghambal sang tanan nga luyag ihambal sang Dios kay Abraham kag personal nga nagarepresentar sa Iya, ang rekord sang Biblia sarang makasiling nga “si Jehova nagpakita sa iya.”​—⁠Genesis 18:⁠1.

Dumduma nga ang angheliko nga humalambal tungod sa Dios sarang makapaalinton sang Iya mensahe sing subong kasibu sa pagpaalinton sang telepono ukon radyo sa aton mga pulong sa iban. Busa, sarang mahangpan kon paano si Abraham, si Moises, si Manoa, kag ang iban pa nakighambal sa nagmateryalisar nga anghel subong nga daw nagapakighambal sa Dios. Samtang nakita sinang mga tawo ining mga anghel kag ang himaya ni Jehova nga ginapabanaag sini, wala nila makita ang Dios. Busa, wala ini nagasumpakil sa ginsiling ni apostol Juan: “Wala gid sing tawo nga nakakita sa Dios.” (Juan 1:18) Ang nakita sining mga tawo amo ang angheliko nga mga tiglawas kag indi ang Dios mismo.