PAGBALIK SA MGA INTERESADO
LEKSION 8
Mangin Mapinasensiahon
Prinsipio: “Ang gugma mapinasensiahon.”—1 Cor. 13:4.
Ang Ginhimo ni Jesus
1. Tan-awa ang VIDEO, ukon basaha ang Juan 7:3-5 kag 1 Corinto 15:3, 4, 7. Dayon binagbinaga ang masunod nga mga pamangkot:
Sang primero, ano ang reaksion sang mga utod ni Jesus sa iya mensahe?
Ano ang nagapakita nga padayon nga ginbuligan ni Jesus ang iya utod nga si Santiago?
Ano ang Matun-an Naton kay Jesus?
2. Dapat kita mangin mapinasensiahon kay ang iban wala dayon nagabaton sang maayong balita.
Iluga si Jesus
3. Testingi ang iban nga paagi. Indi pagpilita ang isa kon indi pa niya gusto magpa-Bible study. Kon nagakaigo, puede mo gamiton ang mga video ukon artikulo nga makabulig sa iya nga maintiendihan kon paano ginahimo ang pagtuon sa Biblia kag ano ang mabenepisyo niya sa sini.
4. Indi magkumparar. Lainlain ang kada isa. Kon ang imo miembro sang pamilya ukon ang interesado nga imo ginbalikan nagaduhaduha magpa-Bible study ukon wala nagapati sa isa ka panudlo sang Biblia, hunahunaa ang posible nga rason. Importante gid bala sa iya ang iya ginapatihan? Indi bala gusto sang iya pamilya ukon kaingod nga magtuon sia? Hatagi sia sing tion nga pamensaran ang iya natun-an kag marealisar nga importante ang ginasiling sang Biblia.
5. Ilakip sa imo pangamuyo ang interesado. Mangamuyo kay Jehova nga buligan ka nga mangin positibo kag mainayuhon. Mangayo sing paghangop para mabal-an mo kon san-o untatan ang pagbalik sa mga daw indi man interesado.—1 Cor. 9:26.