Magsalig sa Hatag-Dios nga Kusog

Mga Pangunang Punto Gikan sa Ikaduhang Timoteo

SI Jehova nagahatag sing gahom sa iya mga alagad agod mabatas ang mga pagtilaw kag paghingabot. Kag kinahanglan gid ni ­Timoteo kag sang iban nga mga Cristiano ang hatag-Dios nga kusog! Nasunog ang Roma sang 64 C.⁠E., kag ginasiling nga si Emperador Nero kuno ang may salabton. Agod protektahan ang iya kaugalingon, ginbasol niya ang mga Cristiano, kag amo ini ang kabangdanan sang paghingabot. Sadto man nga tion (mga 65 C.⁠E.), nabilanggo liwat si apostol Pablo sa Roma. Bisan pa nagaatubang sing kamatayon, ginsulat niya ang iya ikaduhang sulat kay Timoteo.

Ang sulat ni Pablo naghanda kay Timoteo nga mabatuan ang mga apostata kag magtindog nga malig-on sa atubang sang paghingabot. Nagpalig-on ini sa iya nga mag-uswag sa espirituwal kag magsugid nahanungod sa kahimtangan ni Pablo sa bilanggoan. Nagabulig man ini sa mga bumalasa nga magsalig sa hatag-Dios nga kusog.

Mag-antos kag Magtudlo nga May Kalulo

Ang Dios nagahatag sing kusog agod mabatas ang paghingabot subong mga manugwali sang maayong balita. (1:​1-18) Wala gid pagkalimti ni Pablo si Timoteo sa iya mga pangamuyo, kag gindumdom niya ang iya disalimpapaw nga pagtuo. Ang Dios wala maghatag kay Timoteo ‘sang espiritu sang katalaw, kundi sang gahom, gugma, kag kabut-anan.’ Gani indi niya ikahuya ang pagpamatuod kag pag-antos tungod sa maayong balita. Ginlaygayan man sia nga ‘sundon ang huwaran sang maayong mga pulong’ nga nabatian kay Pablo, subong nga dapat kita manguyapot sa Cristianong kamatuoran bisan pa ang iban nagatalikod sa sini.

Ang mga gintudlo ni Pablo dapat ituyan sa mga tawo nga matutom nga sarang makapanudlo sa iban. (2:​1-26) Si Timoteo ginlaygayan nga mangin maayong soldado ni Cristo, matutom kon nagaantos. Si Pablo mismo nabilanggo bangod sang pagbantala sang maayong balita. Ginlaygayan niya si Timoteo nga himuon ang bug-os niya nga masarangan sa pagpakita sang iya kaugalingon nga kalahamut-an nga manugpangabudlay sang Dios, nagalikaw sang dibalaan nga pagwakal. Kag ginsilingan sia nga ang ulipon sang Ginuo dapat magtudlo sa iban nga may kalulo.

Ibantala ang Pulong!

Ang hatag-Dios nga kusog kinahanglanon agod maatubang ang katapusan nga mga adlaw kag makapabilin sa Makasulatanhon nga kamatuoran. (3:1-17) Sa tunga sang mga didiosnon magalutaw ang mga tawo nga ‘pirme nagapamati apang wala nagadangat sa paghibalo sang sibu nga ihibalo.’ Ang ‘malaut nga mga tawo kag mga impostor magalain kag magalain pa, nga nagadaya kag ginadaya.’ Apang, si Timoteo ‘magapadayon sa natun-an niya.’ Gani amo man kita, nakahibalo nga ‘ang tanan nga Kasulatan ginbugna sang Dios kag mapuslanon sa pagpanudlo, sa pagsabdong, sa pagsaway, kag sa paghanas sa pagkamatarong, agod nga ang tawo sang Dios mahimpit, nga masangkapan nga sa tagsa ka maayong buhat.’

Si Timoteo dapat magbatu sa mga apostata kag magtuman sang iya ministeryo. (4:​1-22) Mahimo niya ini paagi sa ‘pagbantala sang pulong’ kag pagpabilin sa sini. Importante ini, bangod ang kongregasyon nagaatubang sing “mabudlay nga panag-on” kay ang iban nagatudlo sing butig nga pagtulun-an. Ang mga Saksi ni Jehova nagapabilin man karon sa Pulong sang Dios, nagabantala sing madagmit sa kongregasyon kag sa mga tagaguwa, bisan sa dimaayo nga kahimtangan. “Natipigan [ni Pablo] ang pagtuo,” bisan pa ginsikway sia sang iban. Apang ‘ang Ginuo nagpabakud sa iya, agod nga paagi sa iya ang pagbantala matuman.’ Kabay nga kita man magasalig sa hatag-Dios nga kusog kag magapadayon sa pagbantala sang maayong balita.

[Kahon/Laragway sa pahina 31]

Maayo nga Soldado: Si Pablo naglaygay kay Timoteo: “Mag-ambit ka sang imo bahin sang pag-antos subong nga maayong soldado ni Cristo Jesus. Walay soldado nga yara sa pag-alagdan nga nagapasaw-id sa mga palangitan-an sang pagkabuhi, sanglit nga ang iya katuyuan amo ang pagpahamuot sa naglista sa iya.” (2 Timoteo 2:​3, 4) Ang Romanong soldado nga nagalakat ‘nagaantos’ kon nagabitbit sing mabug-at nga mga hinganiban, wasay, alat, rasyon para sa tatlo ka adlaw, kag iban pa. (Wars of the Jews ni Josephus, Tolon-an 3, kapitulo 5) Wala sia nagapasaw-id sa palangitan-an sang pagkabuhi, kay indi sina mahamuot ang iya superyor, kag ang iya mga gasto ginatakpan. Sa kaanggid, ang Cristiano nagaantos sing mga pagtilaw nga kaanggid sa “maayong soldado ni Cristo.” Bisan pa magapamugon sia agod matuman ang Makasulatanhon nga mga obligasyon, indi sia dapat magpasaw-id sa materyal nga mga butang nga mahimo magpauntat sa iya sa pagpakig-away sa espirituwal. (1 Tesalonica 2:9) Sa pagpanaksi sa pamalaybalay, nagauyat sia sang “espada sang espiritu, nga amo, ang Pulong sang Dios,” kag nagabulig sa paghilway sa mga tawo gikan sa relihioso nga sayop. (Efeso 6:​11-17; Juan 8:​31, 32) Bangod ang kabuhi nabutang sa katalagman, kabay nga ang tanan nga Cristianong mga soldado padayon nga magapahamuot kay Jesucristo kag kay Jehova nga Dios sa sining paagi.