Hupti ang Imo Pagtuo kag Espirituwal nga Kapagros
“Sunda ang huwaran sang maayong mga pulong nga nabatian mo sa akon upod sa pagtuo kag gugma nga may kaangtanan kay Cristo Jesus.”—2 TIMOTEO 1:13.
1. Ngaa ang mapagros nga lawas isa ka hamili nga pagkabutang nga dapat huptan?
ANG maayong lawas isa ka hamili nga pagkabutang. Kon mapagros kita, makahimo kita sing madamo nga butang kag malipay kita sing kapin sa kabuhi. Apang kon pirme lang kita nagamasakit ukon maluya, ang kabuhi kapin kabudlay. Sa pagkamatuod, dapat huptan ang kapagros. Madamo ang nagapatumbaya sa ila lawas ukon nagahimo sing mga butang nga ginabangdan sang balatian. Apang, ang mga nagaatipan sa ila lawas masami nga mapagros kag mabakod sa daku nga bahin sang ila kabuhi.
2. (a) Ngaa kapin ka hamili ang espirituwal nga kapagros sa pisikal nga kapagros? (b) Ano ang kinahanglanon agod magpabilin nga mapagros sa pagtuo?
2 Ang espirituwal nga kapagros kapin ka importante sa pisikal nga kapagros. Ang labing maayo nga panglawas indi makadala sing dayon nga kabuhi nga regalo sang Dios. Ang espirituwal nga kapagros nagaresulta gikan sa matinlo nga pagsimba kag pagtuo nga napasad sa sibu nga ihibalo. (Juan 17:3; Hebreo 11:6; Santiago 1:27) Si apostol Pablo nagsiling: “Laygayi ang tigulang nga mga lalaki nga maghaganhagan, talahuron, maligdong, mapagros sa pagtuo, sa gugma, sa pagbatas.” (Tito 2:2) Ang bisan sin-o nga nagahandum nga mangin mapagros sa pagtuo dapat magpanikasog sing maukod kag magbantay pirme. Ang mga katalagman sa espirituwal nga kapagros mahimo nga maggikan sa sulod ukon sa guwa. Dapat kita mangin alisto sa sining mga katalagman kon luyag naton mahuptan ang pagtuo kag espirituwal nga kapagros sa sining nagabalatian nga kalibutan.
Daw Ano ka Balatianon Ining Kalibutan?
3, 4. Paano ang balatian sa moral ginapakita sa sining kalibutan kag sa mga buhat sang mga tawo?
3 Indi maduhaduhaan nga ang kalibutan may balatian gid sa moral. Makita naton ang makamamatay nga balatian sa tanan nga “organo” sining kalibutan—sa mga relihion sini, politikal nga mga sistema, komersial nga mga institusyon, mga kalingawan. Pila lamang ang may pagtahod sa Dios kag sa kasuguan nga iya ginhatag para sa kaayuhan sang katawhan. Kag subong ginapakita sang maragtas, ang pagkalusod sa moral nagadul-ong sa pagdugang sang mga balatqan kag mga diperensya sa lawas. Sing makahalam-ot, indi luyag sang kalabanan nga bulngon ining may balatian nga kahimtangan sa moral bangod ginahigugma nila ang mga butang nga ginabangdan sini.
4 Daw ano ka balatianon ining kalibutan! Sa pagtinguha sing kakunyag ukon sa pagtinguha nga likawan ang kamatuoran, ginpierdi sang madamo ang ila kabuhi paagi sa alkohol kag pag-abuso sa droga. Ang kasingki yara bisan diin, ang kabuhi barato, kag nagaawas ang mga kriminal sa mga bilangguan. Sa madamo nga pungsod, katunga sang tanan nga pag-asawahay ang nagakabugto paagi sa diborsio. Ang kabataan nga kulang sing nagakaigo nga pagbantay sang mga ginikanan nagadaku subong mga delingkwente. Bangod lapnag ang seksuwal nga imoralidad, ang AIDS kag ang iban pa nga mga balatian nga ginapaliton paagi sa sekso madasig nga nagalapta.
5. Paano ginlaragway ni Isaias ang mga kahimtangan sa dumaan nga Juda?
5 Sarang masiling sang Dios sa sining nagabalatian nga kalibutan ang gin-inspirar niya kay Isaias nga ipabutyag sa balingag nga Juda: “Kailo sa pungsod nga makasasala, katawhan nga nalulanan sing kalautan, binhi sang mga manughimo sing malaut, mga anak nga dunot! Ginbayaan nila si Jehova, gintamay nila ang Balaan sang Israel, nagpalayo sila kag nag-isol. Ngaa bala nga sakiton pa kamo, nga nagaribok kamo sing labi kag labi pa? Ang bug-os nga ulo nagabalatian, kag ang bug-os nga tagipusuon ginapunaw. Kutob sa dapadapa sang tiil bisan tubtob sa ulo, wala sa iya sing maayo.”—Isaias 1:4-6.
6. Sa dumaan nga Juda kag sa aton adlaw, ano ang sabat sa pangabay ni Jehova nga magtuon sa paghimo sing maayo?
6 Ang pangabay ni Jehova nga maghinulsol kag “magtuon sa paghimo sing maayo” wala pagpamatii sa Juda. (Isaias 1:16-20) Nagdul-ong ini sang ulihi sa kalaglagan sang Jerusalem kag sa pagkabihag sang mga Judiyo sa Babilonia. Pila lamang ka matutom ang nakaagom sang pagpakamaayo sang Dios kag pagluwas sa tunga sang nagabalatian nga pungsod. Sa karon man, sa sining kalibutan nga nagabalatian kutob sa ulo tubtob sa dapadapa, pila lamang ang nagahandum sa pagtuon sa paghimo sing maayo. Ining matutom nga mga alagad ni Jehova nagapanikasog sing maukod sa paghupot sing pagtuo kag espirituwal nga kapagros karon, nga nagalaum nga makatigayon sing himpit nga lawas kag dayon nga kabuhi sa ginsaad sang Dios nga bag-ong kalibutan.—2 Pedro 3:13; Bugna 21:1-4.
Espirituwal nga mga Katalagman sa Sining Nagabalatian nga Kalibutan
7. (a) Ano ang mga katalagman sa aton pagtuo kag espirituwal nga kapagros? (b) Ano ang ginasiling sang Kasulatan nahanungod sa paglandas sa tatlo ka dakung elemento nga nagabutang sang espirituwal nga kapagros sa katalagman?
7 Ang paghupot sing pagtuo kag espirituwal nga kapagros isa ka hangkat bangod ang balatian sa moral sining kalibutan makalalaton gid. Dapat man awayon sang mga Cristiano ang ila napanubli nga dikahimpitan. (Roma 7:21-25) Dugang pa, nahibaluan ni Satanas, “ang manuggahom sang kalibutan,” ang mga kaluyahon sang unod kag lantip sia sa pagsulay. (Juan 14:30; 1 Juan 5:19) Ining tatlo ka daku nga katalagman sa pagtuo kag espirituwal nga kapagros—ang unod, ang kalibutan, kag ang Yawa—makahaladlok. Apang posible nga mangin “indi bahin sang kalibutan,” bisan pa nagapuyo kita sa sini. Mahimo kita ‘maggawi sa espiritu sang Dios kag indi magtuman sa kailigbon sang unod.’ Kag upod sa bulig sang Dios ‘makatindog [kita] sing malig-on batok sa mga daya sang Yawa.’ (Juan 17:15, 16; Galacia 5:16; Efeso 6:11; 2 Corinto 2:11) Apang binagbinagon naton karon kon paano naton malandas ining tatlo ka daku nga elemento nga nagabutang sang pagtuo kag espirituwal nga kapagros sa katalagman.
8. Paano ginalaragway ni Jesus ang mga puwersa sa sulod naton nga nagapanghikot batok sa espirituwal nga kapagros?
8 Sa sulod sang aton dihimpit nga pagkatawo, may yara mga puwersa nga mahimo magresulta sa sala kag bangdan sang aton pagbalatian sa espirituwal. (Santiago 1:14, 15) Matuod ini labi na sa sulod sang aton malaragwayon nga tagipusuon. Si Jesus nagsiling: “Gikan sa sulod, gikan sa tagipusuon sang tawo, nagaguwa ang makahalalit nga mga pangatarungan: pakighilawas, pangawat, pagpatay, panglahi, kaibog, kalautan, kaulag, limbong, kahisa, pasipala, palabilabi, kabuangan. Tanan ining malaut nga butang nagagikan sa sulod kag nagadagta sa tawo.”—Marcos 7:21-23.
9. (a) Anong mga kailigbon ang nagapanggamot sa malaragwayon nga tagipusuon? (b) Suno sa Hulubaton 4:20-23, paano naton maamligan ang tagipusuon?
9 Bisan pa ang tagipusuon amo ang ginahalinan sang malaut nga mga kailigbon, sa diosnon nga mga tawo amo man ini ang lingkuranan sang pagtahod kay Jehova kag gugma sa kon ano ang matarong. (Mateo 22:37; Efeso 4:20-24) Ang pagdaug sang maayo ukon malain nasandig sa kon ano ang aton ginapasulod sa aton tagipusuon. Ang Pulong sang Dios nagalaygay: “Anak ko, talupangda ang akon mga pulong. Ilingig ang imo igdulungog sa akon mga ginasiling. Dili sila pagpahalina sa imo mga mata. Tipigi sila sa tunga sang imo tagipusuon. Kay sila kabuhi sa mga makakita sa ila kag ikaayo sa tanan nila nga unod. Labaw sa tanan nga dapat bantayan, amligi ang imo tagipusuon, kay sa sini nagaguwa ang mga ilig sang kabuhi.”—Hulubaton 4:20-23.
10. Paano ang aton undanon nga mga kaluyahon nagaapektar sa aton mga emosyon kag mga handum?
10 Ang aton undanon nga mga kaluyahon nagaapektar sa aton mga emosyon kag mga handum. Sin-o ang wala kon kaisa ginasalot sang kaluyahon, pagkataka, kag pagkasaklaw? Kon tadlungon naton sa gilayon ining undanon nga mga huyog, ang espirituwal nga kapagros sarang mahuptan. Apang ang bugal kag ambisyon madali manggamot sa tagipusuon. Ang kakagod kag handum sa sobra nga kalipay kag kinasadya mahimo magbulos. Kag ang kailigbon sa sekso, samtang kinaugali ini bangod sang pagkahuman sang Dios sa aton, malalangon nga makapatalang sa aton. Agod mapunggan ang pagtubo sa sulod naton sinang espirituwal nga balatian, dapat naton palambuon ang mga bunga sang espiritu sang Dios sa aton kabuhi kada adlaw, nga ginahanas ang aton kaugalingon nga ‘kangil-aran ang malaut’ kag “magkapyot sing malig-on sa maayo.”—Roma 12:9; Galacia 5:22, 23.
Ang mga Ginahalinan sa Guwa sang Espirituwal nga Balatian
11. (a) Anong kalibutanon nga mga panimuot kag mga buhat ang tuman ka makalalaton? (b) Suno kay Jesus, sa anong mga bahin dapat kita maghatag sing igtalupangod sa aton tagipusuon?
11 Ang espirituwal nga impeksion mahimo maggikan sa guwa. Mahimo ini maglapta sa aton gikan sa mga tawo nga patay sa espirituwal. (Efeso 2:1-3) Kon tuman kita ka suod sa ila, mahimo naton mailog ang ila mga panimuot kag mga estilo sang kabuhi. Ang kadalag-an sa kalibutan, paghigugma sa kuwarta, pag-agom sang labing maayo nga mga materyal, kag ang paglipaylipay amo ang dalagku nga mga butang sa kabuhi sang katawhan sa sining kalibutan. Apang ang handum para sa sina nga mga butang tuman ka makalalaton, kag bisan ang limitado lamang nga pagkanadayag sa sini makapahinay sa aton sa espirituwal. Si Jesus nagpaandam: “Bantayi ang inyo kaugalingon nga ang inyo tagipusuon indi mabug-atan sang sobra nga pagkaon kag lakas nga pag-inom kag sang mga paghimud-os sang kabuhi, kag sa hinali yadtong adlaw magaabot sa inyo sing hinali subong sang siod. Kay magaabot ini sa tanan nga nagapuyo sa nawong sang bug-os nga duta.”—Lucas 21:34, 35.
12. Paano ang sayop nga mga ideya kag mga panudlo mangin makatalagam sa espirituwal nga kapagros?
12 Ang sayop nga mga ideya kag mga panudlo sining kalibutan mahimo man makalaton sa aton. Si Pablo nagpaandam: “Magaabot ang tion nga indi sila magbatas sa maayong panudlo, kundi, nahisuno sa ila kaugalingon nga mga kailigbon, magatipon sila sing mga manunudlo para sa ila kaugalingon agod pakalamon ang ila mga dulunggan; kag ipahilayo nila ang ila mga dulunggan gikan sa kamatuoran, apang magaliso sila sa patopato nga mga sugilanon.” (2 Timoteo 4:3, 4) Ang dimatuod nga mga panudlo kaangay sang kalamayo. (2 Timoteo 2:16, 17) Kon magsugod ini, ang isa ka bahin sang imo unod nagakapatay bangod ang nagahatag sing kabuhi nga dugo gin-utod gikan sa sina nga bahin sang lawas.
13. Kon ang espirituwal nga balatian nagsugod kaangay sang kalamayo, ano ang dapat himuon?
13 Madasig gid maglapta ang kalamayo! Agod mapunggan ang kamatayon, mahimo nga utdon sang doktor ina nga bahin sang lawas. Gani, kon ang imo espirituwalidad yara sa katalagman bangod sang mga pagduhaduha, mga reklamo, ukon apostasya, utda ina sa gilayon! (Ipaanggid ang Mateo 5:29, 30.) Mangayo sing bulig gikan sa mga gulang sa kongregasyon. Indi pag-iluga ang mga tawo nga ginlaragway ni Pablo subong “may balatian sa hunahuna sa mga kasuayon kag sa binanggianay nahanungod sa mga pulong” bangod ‘wala [sila] nagasugot sa maayong mga pulong.’—1 Timoteo 6:3, 4.
14. Ano ang mahimo masapwan sang mga gulang nga kinahanglanon nga himuon agod maamligan ang espirituwal nga kapagros sang kongregasyon?
14 Agod amligan ang espirituwal nga kapagros sang kongregasyon, ang mga gulang dapat ‘maglaygay suno sa maayo nga panudlo kag magsabdong sa mga nagasumpong.’ (Tito 1:9, 13, 16; 2:1) Ayhan ina nga mga tawo sarang mapasag-uli sa isa ka mapagros nga kahimtangan sa espirituwal. (2 Timoteo 2:23-26) Apang ano kon sila dimahinulsulon nga nagasakdag sang dimatuod nga panudlo? Nian, daw subong bala nga dapat sila ikuwarentina. Ginasikway (disfellowshipped) sila, kag nagapalayo kita sa ila agod nga indi maglaton sa aton ang ila espirituwal nga impeksion.—Roma 16:17, 18; 1 Corinto 5:9-13; Tito 3:9-11.
15. Sa pagtinguha nga paluyahon ang espirituwal nga kapagros sang katawhan sang Dios, anong duha ka daku nga paagi ang ginagamit sang Yawa?
15 Ang ikatlo nga ginahalinan sang katalagman sa pagtuo kag espirituwal nga kapagros amo ang Yawa. (Efeso 6:11, 12) Tubtob sa aton gid adlaw, nagatinguha sia sa pagpaluya sang pagtuo sang katawhan ni Jehova paagi sa paghingabot, lakip ang pag-atake sang akig nga grupo, pagpanakit, pagbilanggo, kag pamahog nga kamatayon. (Bugna 2:10) Sanglit talagsa lang nagamadinalag-on si Satanas paagi sa sini nga mga taktika sa pagbungkag sa integridad sang isa sang mga alagad sang Dios, ginagamit niya ang mga pangganyat sining kalibutan, nga sia ang dios sini, sa panikasog nga pukanon ang iban.—2 Corinto 4:4; 11:3, 14.
16. Ano ang aton mga depensa sa pagbatas sa mga pag-atake sang Yawa sa aton pagtuo kag espirituwal nga kapagros?
16 Paano naton mabatas ang mga pag-atake sang Yawa? Paagi sa pagsuklob sang espirituwal nga hinganib gikan sa Dios. Labi na nga dapat naton ‘gamiton ang daku nga taming sang pagtuo, nga paagi sa sini sarang naton mapalong ang tanan nga nagadabadaba nga baslay sang malauton’ nga ginahaboy sa aton ni Satanas. Dapat man kita mangamuyo nahisuno sa mga pulong ni Jesus: “Dili kami pagdalha sa panulay, kundi luwasa kami sa malaut.” (Efeso 6:11-18; Mateo 6:13) Kon mangamuyo kita sa sina nga paagi kag maghikot nahisuno sa aton mga pangamuyo, mapaabot naton ang bulig sang aton langitnon nga Amay sa pagpalong sa tanan nga nagadabadaba nga mga baslay ni Satanas.
Pagpabilin nga Mapagros sa Pagtuo
17. Sa paghupot sang espirituwal nga kapagros, daw ano ka importante ang “pagkaon sa nagakaigo nga tion” kag ang regular nga pagpakigbahin sa Cristianong mga hilikuton?
17 Ang pagtapna isa ka daku nga butang sa paghupot sang mapagros nga lawas. Importante ang masustansya nga pagkaon, nagakaigo nga ehersisyo, kag pag-atipan sa hunahuna kag lawas. Ang kinaugali nga mga depensa batok sa balatian mabaskog sa isa ka mapagros nga lawas. Sing kaanggid, agod mahuptan ang espirituwal nga kapagros, importante nga sundon ang pagkaon nga ginaresita sang Dios kag apresyahon ang masustansya nga espirituwal nga “pagkaon sa nagakaigo nga tion” nga ginaaman paagi sa “matutom kag mainandamon nga ulipon.” Ginasikway ang walay pulos nga espirituwal nga pagkaon sining kalibutan, dapat naton tun-an ang Biblia kag ang Cristianong mga publikasyon kag makigtipon sing regular upod sa katawhan sang Dios. (Mateo 24:45-47; Hebreo 10:24, 25) Kinahanglan man naton ang ehersisyo nga resulta sang ‘paghikot pirme sing bugana sa hilikuton sang Ginuo’ sa ministeryo kag sa iban nga Cristianong mga hilikuton.—1 Corinto 15:58.
18. Ano “ang huwaran sang maayong mga pulong,” kag ngaa dapat naton huptan ini sa tagipusuon kag hunahuna?
18 Agod magpabilin nga mapagros sa pagtuo, gamita sing bug-os ang espirituwal nga mga aman sang Dios. Subong ginsiling ni Pablo kay Timoteo: “Sunda ang huwaran sang maayong mga pulong nga nabatian mo sa akon sa pagtuo kag gugma nga may kaangtanan kay Cristo Jesus. Bantayi ining gintugyan sa imo paagi sa balaan nga espiritu nga nagapuyo sa aton.” (2 Timoteo 1:13, 14) Ang isa ka hambal may huwaran sang mga pulong. Sing kaanggid, ang “putli nga hambal” sang kamatuoran sang Biblia may huwaran nga napasad labi na sa tema nga pagbindikar kay Jehova paagi sa Ginharian. (Sofonias 3:9) Dapat naton huptan ining huwaran sang maayong mga pulong sa tagipusuon kag sa hunahuna kon luyag naton huptan ang aton pagtuo kag espirituwal nga kapagros. Kay kon indi, madula ang importansia sini sa aton. Mahimo nga natabo ini sa kongregasyon sa Corinto, nga sa diin ang iban “maluya kag masakiton” bangod kulang sila sing espirituwal nga paghangop.—1 Corinto 11:29-32.
19. (a) Kon nagtubo ang espirituwal nga balatian, ano ang dapat himuon? (b) Ano ang sarang mahimo sang mga gulang kon ang isa ka tawo may balatian sa espirituwal?
19 Ano ang dapat himuon kon ikaw may espirituwal nga balatian? Ang mahigugmaon nga bulig kinahanglanon gid kag sarang matigayon, kay si Santiago nagasiling: “May nagamasakit bala sa inyo? Magpatawag sia sang mga gulang sang kongregasyon, kag pangamuyuan nila sia, nga ginahaplasan sia sing lana sa ngalan ni Jehova.” (Santiago 5:14) Huo, ipatawag ang mga gulang. Subong espirituwal nga mga manugbulong, makabulig sila sa imo nga mahibaluan ang ginabangdan sang imo espirituwal nga balatian. Sila may kalulo apang epektibo nga magahaplas sang bulong nga lana sang Pulong sang Dios. Kon nakahimo ka sing mga sala apang naghinulsol ka, saligi nga si Jehova nagapatawad gid. (Salmo 103:8-14) Samtang ang mga gulang nagapangamuyo upod sa imo kag para sa imo, ano ang sarang mapaabot? Si Santiago nagasabat: “Ang pangamuyo sang pagtuo magaayo sang nagamasakit, kag si Jehova magabangon sa iya. Subong man, kon nakasala sia, patawaron ini sa iya.”—Santiago 5:15.
Ang Espirituwal nga Kapagros Nagadul-ong sa Dayon nga Kabuhi
20. (a) Anong laygay ang ginhatag sang nahaunang-siglo nga nagadumala nga hubon nahanungod sa paghupot sang espirituwal nga kapagros? (b) Ano ang magabulig sa aton samtang ginahulat naton ang mga pagpakamaayo sang bag-ong kalibutan?
20 “Maayong lawas sa inyo!” Paagi sa sina nga mga pulong, gintakop sang nahaunang-siglo nga nagadumala nga hubon sang katawhan ni Jehova ang sulat sini nga nagasambit sang “kinahanglanon nga mga butang” nga ginapatuman sa mga Cristiano. Dapat sila “maglihi sa mga butang nga ginhalad sa mga diosdios kag sa dugo kag sa nakuga kag sa pagkamakihilawason.” (Binuhatan 15:28, 29) Ina nga resita para sa mapagros nga espirituwalidad naaplikar gihapon karon. Kag samtang ginahulat naton ang mga pagpakamaayo sang bag-ong kalibutan, mahuptan naton ang aton pagtuo kag espirituwal nga kapagros kon makugihon nga ibantala naton ang maayong balita sang Ginharian kag sakdagon ang ngalan ni Jehova sa sining nagabalatian nga kalibutan. Ang pagpabilin nga masako sa sining paagi magaamlig sa aton nga indi matak-an sa paghulat sang mga pagpakamaayo sang bag-ong kalibutan nga tuman na kalapit. Matuod, “ang paglaum nga napalantang nagapasakit sang tagipusuon, apang kon mag-abot ang handum, ini kahoy sang kabuhi.”—Hulubaton 13:12.
21. Anong mga pagpakamaayo ang ginatigana para sa mga magamadinalag-on sa paghupot sang ila pagtuo kag espirituwal nga kapagros sa sining nagabalatian nga kalibutan?
21 Indi pagwasiha ang daku nga mga pagpakamaayo nga ginatigana ni Jehova para sa mga nagahigugma sa iya. Ang tanan nga pagpamatok sa kalibutanon nga mga impluwensia, ang tanan nga pagpakig-away batok sa imo undanon nga mga kaluyahon, ang tanan nga pagsagang sa nagadabadaba nga mga baslay sang Yawa indi mangin walay pulos. Sa bag-ong kalibutan ni Jehova, makita gid sang imo mga mata ang tion nga “wala sing pumuluyo ang magasiling: ‘Nagamasakit ako.’ ” (Isaias 33:24) Mangin matuod ini bangod sang aman sang Dios paagi sa halad nga gawad ni Jesucristo, ang isa nga “nagkuha sang aton mga kasakitan kag nagdala sang aton mga balatian.” (Mateo 8:17; Isaias 53:4) Magainom kamo gikan sa simbuliko nga “suba sang tubig sang kabuhi” kag magakaon gikan sa “mga kahoy sang kabuhi” nga may mga dahon “para sa pagbulong sa mga pungsod.” (Bugna 22:1, 2) Ang dayon nga kabuhi sa kahimpitan kag kalipay mangin imo padya sa paghupot sang imo pagtuo kag espirituwal nga kapagros sa sining nagabalatian nga kalibutan.
Nadumduman Mo Bala?
◻ Ngaa ang mapagros nga pagtuo kapin ka importante sa mapagros nga lawas?
◻ Ano ang tatlo ka daku nga katalagman sa pagtuo kag espirituwal nga kapagros?
◻ Ano ang kaangtanan sang mapagros nga espirituwalidad sa malaragwayon nga tagipusuon?
◻ Kon ang isa nagamasakit sa espirituwal, ano ang dapat himuon?
[Mga piktyur sa pahina 16]
Bisan sa isa ka nagabalatian nga kalibutan, posible nga mahuptan ang mabaskog nga pagtuo kag mapagros nga espirituwalidad
[Mga piktyur sa pahina 18]
Ang mapagros nga espirituwalidad nasandig sa makugi nga Cristianong pagpanghikot kag regular nga pagkaon sing espirituwal nga pagkaon sa nagakaigo nga tion