Ginbalusan Nila sing Dimakagod ang Gugma sang Dios
“Kabay nga pasalamatan sang mga tawo si Jehova bangod sang iya mahigugmaon nga kaluoy kag sang iya makatilingala nga mga buhat sa mga anak sang mga tawo.”—SALMO 107:8.
1. Paano ginapadaku ni apostol Juan ang kinaiya sang gugma sa iya nahauna nga sulat?
“ANG Dios gugma.” Daw ano ka puno sing kahulugan ining mga pulong! Indi katingalahan nga ginbatyag ni apostol Juan nga kinahanglan suliton ini sa iya nahauna nga sulat. (1 Juan 4:8, 16) Indi lamang nga si Jehova Dios sang gugma kundi sia man ang larawan, ukon personipikasyon sang gugma.
2. Sa anong mga paagi nagpakita ang Dios sing gugma sa pagtuga sa lalaki kag babayi kag sa pag-aman para sa ila?
2 Hunahunaa ang gugma nga ginpakita sang Dios kon paano niya kita gintuga. Nagakaigo gid ang mainapresyahon nga mga pulong ni David. Subong isa ka inspirado nga salmista, sia nagsiling: “Dayawon ko ikaw kay ginhimo ako sing makahalangawa kag makatilingala.” (Salmo 139:14) Agod magkabuhi kita sing mapagros kag malipayon, gin-aman sang Dios ang wala sing katapusan nga mga kalalipayan paagi sa aton lima ka sentido—pagtan-aw, pagpamati, pagdimdim, pagpanimaho, kag pagbatyag. Daw ano nga katahom ang makita naton sa mga tinuga sa palibot naton! Daw ano ka dalayawon ang madamo kag nanuhaytuhay nga mga tanom kag mga sapat, indi na pagsambiton pa ang katahom sang tawhanon nga mga porma kag mga bahin! Nag-aman man ang Dios sing labing makalilipay nga mga sari sang mga prutas, mga ulutanon, kag iban pa nga mga kalan-on. (Salmo 104:13-16) Sa maayo nga rason, ginpahanumdom ni apostol Pablo ang mga pumuluyo sang dumaan nga Listra nga ang Dios ‘naghimo sing maayo, kag naghatag sa inyo sing ulan sa langit kag mga panag-on nga mapatubason, nga nagpuno sang inyo mga tagipusuon sing pagkaon kag kasadya.’—Binuhatan 14:17.
3. Anong dalayawon nga mga ikasarang ang ginsangkap sang Dios sa aton?
3 Hunahunaa man ang tanan nga pagpakamaayo nga may kaangtanan sa malipayon nga pagkabuhi sang pamilya. Kapin pa sa sina, binagbinaga ang tanan nga kalipay nga posible para sa aton bangod sang mga ikasarang sang aton hunahuna kag emosyon: imahinasyon, pangatarungan, memorya, konsiensia, kag labi na ang ikasarang sa pagsimba—tanan ini nagahimo sa aton nga labaw sa mga sapat; indi man naton dapat kalimtan ang kalipay nga mahatag sa aton sang musika. Ini kag ang madamo nga iban pa nga mga regalo mga pamatuod sang gugma sang Dios para sa aton.
4. Ano nga mga pagpahayag sang gugma sang Dios ang naeksperiensiahan sang mga tawo kutob sang paglapas sang ila nahauna nga mga ginikanan?
4 Indi gid maduhaduhaan nga si Adan kag si Eva nakatigayon sing madamo nga kalipay sa ila himpit nga kahimtangan sa hardin sang Eden. (Genesis 2:7-9, 22, 23) Apang sang wala nila ginbalusan sing dimakagod ang tanan nga pamatuod sang balaan nga gugma nga ila ginaagom, ginsikway bala sang Dios ang kaliwatan sang tawo? Wala gid! Naghimo sia sa gilayon sing aman sa pagtadlong sang tanan nga sayop, nga resulta sang paglapas sang aton nahauna nga mga ginikanan. (Genesis 3:15) Nagpakita man si Jehova sing gugma paagi sa pagpailob sa dihimpit nga mga anak ni Adan. (Roma 5:12) Tubtob san-o? Ti, sa mga 6,000 ka tuig na tubtob karon! Ang Dios labi na nga nagpakita sing gugma sa iya pagpakig-angot sa iya mga alagad. Matuod gid ang mga pulong: “Jehova, Jehova, Dios nga maluluy-on kag mainayuhon, mahinay sa pagpangakig kag bugana sa mahigugmaon nga kaluoy kag pagkamatutom, nga nagatipig sing mahigugmaon nga kaluoy sa mga linibo, nga nagapatawad sang kalautan kag sang paglapas kag sang sala.”—Exodo 34:6, 7.
5. Paano si Jehova nagpakita sing mahigugmaon nga pagpailob sa pagpakig-angot sa pungsod sang Israel?
5 Huo, daku gid sa pagkamatuod ang pagpailob ni Jehova nga Dios sa iya mga pagpakig-angot sa mga Israelinhon kutob sang tion nga ginbun-ag niya sila subong isa ka pungsod sa tiilan sang Bukid Sinai tubtob napilitan sia nga sikwayon sila sing bug-os bangod sang ila pagkamalalison. Subong mabasa naton sa 2 Cronica 36:15, 16: “Si Jehova nga Dios sang ila mga ginikanan nagpadala sa ila paagi sa iya mga manugbalita, nga nagabugtaw kag nagapadala, bangod nga naluoy sia sa iya katawhan kag sa iya puluy-an. Apang gin-uligyat nila ang mga manugbalita sang Dios kag gintamay ang iya mga pulong kag ginyubitan ang iya mga manalagna, tubtob nga nag-ibwal ang kasingkal ni Jehova batok sa iya katawhan, tubtob nga wala na sing tambal.” Apang may nagbalos sing dimakagod sa gugma ni Jehova nga Dios. Agod mahibaluan kon paano nila ginhimo ini, usisaon naton karon ang kabuhi sang pila sini nga mga indibiduwal. Magahatag ini sing sulundan kon paano naton mabalusan ang gugma ni Jehova sa praktikal gid nga mga paagi.
Kon Paano si Moises Nagbalos sing Dimakagod
6. Sa anong mga paagi talalupangdon ang huwaran ni Moises, kag sa anong mga ikasarang naeksperiensiahan niya ang gugma sang Dios?
6 Si Moises isa ka talalupangdon nga huwaran sang isa ka tawo nga nagbalos sing dimakagod sa gugma sang Dios. Daw ano nga mga kahigayunan ang yara sa atubangan ni Moises subong gin-adoptar nga anak sang anak nga babayi ni Paraon! Apang ginpili niya nga ‘pintasan upod sa katawhan sang Dios sa baylo nga agumon ang umalagi nga mga pagpangalipay sang sala, kay ginkabig niya ang pagtamay nga gin-antos tungod kay Cristo nga daku pa nga manggad sang sa mga bahandi sa Egipto.’ (Hebreo 11:25, 26) Sang isa ka tion, gintinguhaan ni Moises nga luwason ang iya mga utod, ang mga Israelinhon, gikan sa pagkaulipon sa Egipto. Apang wala nila pag-apresyaha ang iya panikasog, kag indi pa sadto ang nagakaigo nga tion sang Dios sa pagluwas sa ila. (Binuhatan 7:23-29) Apang, pagligad sang mga dekada, bangod sang pagtuo kag dimakagod nga handum ni Moises sa pagbulig sa iya mga utod, ginhatagan sia ni Jehova sing gahom sa paghimo sing madamo nga milagro kag sa pag-alagad sa mga Israelinhon sa 40 ka tuig subong Iya manalagna, hukom, manughatag sing kasuguan, kag manugpatunga. Sa sining mga ikasarang, naeksperiensiahan ni Moises ang madamo nga okasyon sang gugma ni Jehova sa iya kag sa iya mga masigka-Israelinhon.
7. Paano ginbalusan ni Moises ang gugma sang Dios?
7 Paano ginbalusan ni Moises ang gugma kag dibagay nga kaluoy sang Dios? Iya bala ‘ginbaton ang dibagay nga kaluoy ni Jehova kag ginwasi ang katuyuan sini’? (2 Corinto 6:1) Wala gid! Dimakagod nga ginbalusan ni Moises ang gugma nga ginpakita sa iya ni Jehova paagi sa bug-os nga pagkadiosnon. Nagsandig sia kay Jehova sa tanan nga tion kag may suod sia nga kaangtanan sa iya Magbubuhat. Daw ano gid ka daku ang pagtamod sang Dios kay Moises sang ginsabdong niya si Aaron kag si Miriam bangod ginmulay nila ang ila utod! Huo, nakighambal si Jehova sing ‘baba sa baba’ kay Moises kag gintugutan niya sia nga makita “ang dagway ni Jehova.” (Numeros 12:6-8) Walay sapayan sang madamo nga pribilehiyo ni Moises, nagpabilin sia nga amo gihapon ang pinakamahagop sa tanan nga tawo kag gintuman niya ang mga sugo ni Jehova sing ‘amo gid.’—Exodo 40:16; Numeros 12:3.
8. Paano ginpakita ni Moises nga diosnon gid sia?
8 Ginpakita man ni Moises nga sia dimakagod nga diosnon paagi sa iya pagkabalaka sa ngalan, kadungganan, kag putli nga pagsimba ni Jehova. Sa amo, sa duha ka okasyon madinalag-on nga nakitluoy si Moises kay Jehova nga kaluy-an ang Israel bangod nadalahig ang ngalan sang Dios. (Exodo 32:11-14; Numeros 14:13-19) Sang madalahig ang mga Israelinhon sa idolatroso nga pagsimba sa tinday nga baka, nagpakita si Moises sing kakugi para sa putli nga pagsimba paagi sa pagsinggit: “Sin-o ang dampig kay Jehova! Magkari sia sa akon!” Sa tapos sadto, ginpatay ni Moises kag sang iya mga kaupod ang 3,000 ka sumilimba sa idolo. Nian, sa sulod sang 40 ka tuig nagpailob sia sa reklamador kag rebelyuso nga katawhan. Indi gid maduhaduhaan nga si Moises dimakagod nga nagbalos sa gugma nga ginpakita sa iya sang Dios, nga nagahatag sing maayo nga huwaran para sa aton karon.—Exodo 32:26-28; Deuteronomio 34:7, 10-12.
Ang Maayo nga Balos ni David
9. (a) Paano ginbalusan ni David ang gugma ni Jehova nga Dios? (b) Kaangay ni David, paano naton mapadunggan si Jehova paagi sa bilidhon nga mga butang?
9 Ang isa pa ka talalupangdon nga tinawo sa Biblia nga naghatag sing maayo nga huwaran sang dimakagod nga pagbalos sa gugma sang Dios amo si salmista David, ang ikaduha nga hari sang Israel. Ang iya kakugi sa ngalan ni Jehova nagpahulag sa iya nga makig-away batok sa nagayaguta nga Filistinhon nga higante nga si Goliat, nga batok sa iya ginhatag sang Dios ang kadalag-an kay David. (1 Samuel 17:45-51) Ina gihapon nga kakugi amo ang nagpahulag kay David nga dalhon ang kaban sang katipan sa Jerusalem. (2 Samuel 6:12-19) Kag indi bala ang handum ni David nga patindugan si Jehova sing isa ka templo isa pa ka pamatuod sang iya kakugi kag apresasyon sa gugma kag pagkaayo sang Dios? Amo gid sa pagkamatuod. Ang pagdingot sina nga pribilehiyo kay David wala magpaluya sa iya gikan sa paghanda para sa sini nga proyekto kag pagpadungog kay Jehova paagi sa personal nga pag-amot sing bulawan, pilak, kag bilidhon nga mga bato nga may daku gid nga bili. (2 Samuel 7:1-13; 1 Cronica 29:2-5) Ang amo man sini nga dimakagod nga pagbalos sa gugma sang Dios dapat magpahulag sa aton nga ‘padunggan si Jehova paagi sa aton bilidhon nga mga butang’ paagi sa paggamit sang aton manggad sa pagpauswag sang mga interes sang Ginharian.—Hulubaton 3:9, 10; Mateo 6:33.
10. Sa anong paagi ang dalanon ni David takus ilugon?
10 Bisan pa nakahimo si David sing daku nga mga sala, ginpamatud-an niya sa iya bug-os nga kabuhi nga sia ‘isa ka tawo nga kalahamut-an sa tagipusuon ni Jehova.’ (1 Samuel 13:14; Binuhatan 13:22) Ang iya mga salmo puno sing pag-apresyar sa gugma sang Dios. Ang The International Standard Bible Encyclopædia nagasiling nga si David “puno gid sing pagpasalamat sang sa bisan kay sin-o nga ginsambit sa Balaan nga Kasulatan.” Ang salmista nga si Asap nagsiling nga ‘ginpili [sang Dios] si David nga iya alagad kag ginkuha sia gikan sa mga palasudlan sang mga karnero. . . . Gindala niya sia agod mangin manugbantay kay Jacob nga iya katawhan kag sa Israel nga iya panublion. Kag ginbantayan niya sila suno sa integridad sang iya tagipusuon.’ (Salmo 78:70-72) Sa pagkamatuod, ang dalanon ni David takus nga ilugon naton.
Si Jesucristo, ang Aton Himpit nga Huwaran
11, 12. Paano ginpakita ni Jesus nga diosnon gid sia?
11 Sa pagkamatuod, si Jesucristo amo ang pinakamaayo nga Makasulatanhon nga huwaran sang isa ka tawo nga nagbalos sing dimakagod sa gugma sang Dios. Ano ang ginpahulag sini nga himuon ni Jesus? Una sa tanan, napahulag sia nga hatagan si Jehova sing eksklusibo nga debosyon. Indi gid maduhaduhaan nga si Jesus bug-os gid nga diosnon. Ang apresasyon sa gugma kag pagkaayo sang iya langitnon nga Amay nagpahulag sa iya nga mangin espirituwal gid nga tawo. May malapit sia kag suod nga kaangtanan sa Dios. Si Jesus isa ka tawo nga mapangamuyuon, kag naluyag sia magpakighambal sa iya langitnon nga Amay. Sa liwat kag liwat, mabasahan naton nga si Cristo nagapangamuyo. Sang isa ka okasyon nangamuyo sia sa bug-os nga gab-i. (Lucas 3:21, 22; 6:12; 11:1; Juan 17:1-26) Bilang balos sa gugma sang Dios, ginpamatud-an ni Jesus ang kamatuoran nga ‘indi lamang sa tinapay mabuhi ang tawo kundi sa tagsa ka pulong nga nagaguwa sa baba ni Jehova.’ Sa kamatuoran, ang paghimo sang kabubut-on sang iya Amay nangin kalan-on para sa iya. (Mateo 4:4; Juan 4:34) Indi bala nga dapat amo man sini ang ibalos naton sa gugma sang Dios, nga ginahatagan sia sing eksklusibo nga debosyon?
12 Bilang dimakagod nga balos sa gugma sang Dios, pirme ginpatuhoy ni Jesucristo ang igtalupangod sa iya Dios kag Amay. Sang gintawag sang isa ka tawo si Jesus subong “Maayong Manunudlo,” namatok sia kag nagsiling: “Wala sing bisan sin-o nga maayo, kundi ang Dios lamang.” (Lucas 18:18, 19) Makapila nga ginpadaku ni Jesus nga wala sia sing mahimo sa iya kaugalingon lamang nga pagbuot. Wala gid niya ginpaligad ang kahigayunan nga pakadakuon ang ngalan sang iya Amay, kag nagakaigo gid nga ginsugdan niya ang iya modelo nga pangamuyo sing pangabay nga: “Pakabalaanon ang imo ngalan.” Nangamuyo sia: “Amay, himayaa ang imo ngalan.” Kag antes sia mapatay, si Cristo nagsiling sa iya Amay: “Ginhimaya ko ikaw sa duta, sang natapos ko ang buluhaton nga nahatag mo sa akon nga himuon.” (Mateo 6:9; Juan 12:28; 17:4) Sa pagkamatuod, bilang balos sa gugma sang Dios, dapat naton tinguhaan nga himayaon si Jehova, nga nagapangamuyo para sa pagpakabalaan sang iya balaan nga ngalan.
13. Paano ginpahulag sang gugma sang Dios si Jesus sa paghikot?
13 Talupangda karon, palihog, ang ikaduha nga paagi nga sa diin ang dimakagod nga balos sa gugma sang Dios nagpahulag kay Jesus. Nagpahulag ini sa iya nga higugmaon ang pagkamatarong kag dumtan ang kalautan, subong gintagna sa Salmo 45:7. (Hebreo 1:9) Sia “balaan, wala sing kasawayan, wala sing dagta, napain sa mga makasasala.” (Hebreo 7:26) Ginhangkat ni Jesus ang iya malaut nga mga kasumpong nga pamatud-an kon sa ano sia nakasala, apang wala sila sing makita. (Juan 8:46) Sa duha ka okasyon, ang iya pagdumot sa kalautan nagtiklod sa iya nga tinluan ang templo gikan sa sakon nga mga relihionista. (Mateo 21:12, 13; Juan 2:13-17) Kag daw ano kasakit nga ginpakamalaut ni Jesus ang salimpapaw nga relihiosong mga lider, ginsilingan pa gani sila nga sila iya sang Yawa!—Mateo 6:2, 5, 16; 15:7-9; 23:13-32; Juan 8:44.
14. Bilang balos sa gugma ni Jehova, paano si Jesus nakig-angot sa iya mga disipulo?
14 Ang isa pa ka paagi nga sa amo ginpahulag sang gugma ni Jehova si Jesus sarang makita sa iya mga pagpakig-angot sa iya mga apostoles kag sa iban pa nga mga disipulo. Daw ano ka mahigugmaon, mapailubon, kag mainantuson sia sa ila! Pat-od gid nga gintilawan nila sia paagi sa ila pagpaindisanay, nga nagabaisay pa gani tubtob sang gab-i gid nga sia gintugyan sa kon sin-o ang labing daku sa ila. (Lucas 22:24-27) Apang, ginpamatud-an ni Jesus nga sia pirme malum-ok sing panghunahuna kag mapainubuson sa tagipusuon. (Mateo 11:28-30) Matuod, gintugyan ni Judas si Jesus, ginpanghiwala sia ni Pedro sing makatlo, kag ang iban nga mga apostoles nalagyo sang mag-abot ang isa ka magamo nga grupo agod dakpon sia. Apang wala gid sia maakig ukon masaklaw. Paano naton nahibaluan? Ti, sang makita niya liwat ang mga apostoles sa tapos sia mabanhaw, wala sila ginsabdong ni Jesus bangod nagpadaug sila sa kahadlok. Sa baylo, ginlugpayan niya kag ginpalig-on sila para sa dugang pa nga pag-alagad sa Ginharian.—Juan 20:19-23.
15. Paano si Jesus dimakagod nga nag-alagad sa pisikal nga mga kinahanglanon sang katawhan?
15 Binagbinagon naton ang isa pa ka paagi nga sa diin si Jesucristo dimakagod nga nagbalos sa gugma sang Dios. Ginhimo niya ini paagi sa paghalad sang iya kaugalingon para sa iban, tubtob sa makahuluya kag masakit nga kamatayon sa usok sang pag-antos. (Filipos 2:5-8) Nag-alagad si Jesus sa pisikal nga mga kinahanglanon sang mga tawo paagi sa milagruso nga pagpakaon sa kadam-an kag pag-ayo sa madamo. (Mateo 14:14-22; 15:32-39) Gin-una niya pirme ang mga interes sang iban sang sa iya kaugalingon. Amo kon ngaa sia nakasiling: “Ang mga ido nga talunon may mga lungib kag ang mga pispis sa langit may mga hapunan, apang ang Anak sang tawo wala gid sing ulunlan sang iya ulo.” (Mateo 8:20) Sensitibo si Jesus sa pagpanghikot sang espiritu sang Dios samtang nagailig ini gikan sa iya sa paghimo sing milagruso nga pagpang-ayo. Apang wala gid sia magtinguha nga ganansiahan sa materyal nga paagi ang paggamit sining labaw sa kinaugali nga gahom subong sang ang isa ka babayi nga ginatagasan sing dugo sa 12 ka tuig nagtandog sang iya panapton nga may pagtuo kag napaayo. (Marcos 5:25-34) Dugang pa, wala gid paggamita ni Jesus ang labaw sa kinaugali nga gahom para sa iya kaugalingon.—Ipaanggid ang Mateo 4:2-4.
16. Sa anong mga paagi si Cristo nag-alagad sa espirituwal nga kinahanglanon sang katawhan?
16 Bisan pa dimakagod nga gin-atipan ni Jesus ang pisikal nga mga kinahanglan sang katawhan paagi sa pag-ayo sang ila mga balatian kag pagpakaon sa ila sing milagruso, ang una nga motibasyon sang iya ministeryo sa duta amo ang ibantala ang maayong balita sang Ginharian sang Dios, magtudlo, kag maghimo sing mga disipulo. Walay sapayan sang tanan nga makatilingala nga mga pagpang-ayo nga ginhimo niya, wala sia makilal-an subong ang Daku nga Manugbulong ukon Manugmilagro kundi subong Maayong Manunudlo. (Mateo 4:23, 24; Marcos 10:17) Gintawag ni Jesus ang iya kaugalingon subong Manunudlo, subong man sang iya mga disipulo kag bisan sang iya mga kaaway. (Mateo 22:16; 26:18; Marcos 9:38) Kag daw ano nga mga kamatuoran ang gintudlo niya, subong sang iya Wali sa Bukid! (Mateo 5:1–7:29) Daw ano ka nagakaigo ang iya mga ilustrasyon, kag daw ano ka talalupangdon ang iya matagnaon nga mga parabola kag ang iban pa nga mga tagna! Indi katingalahan nga wala sia pagdakpa sang mga soldado nga ginpadala sa pagdakop sa iya!—Juan 7:45, 46.
17. (a) Paano si Jesus naghatag sa aton sing himpit nga huwaran sang gugma? (b) Ano ang binagbinagon sa masunod nga artikulo?
17 Sing indi maduhaduhaan, naghatag si Jesucristo sa aton sing himpit nga huwaran sang dimakagod nga pagbalos sa gugma nga ginpakita sang Dios sa aton. Gin-una ni Jesus ang iya langitnon nga Amay sa iya kabuhi kag gugma. Ginhigugma gid niya ang pagkamatarong, mahigugmaon nga nagpakig-angot sia sa iya mga apostoles kag iban pa nga mga disipulo, kag naghinguyang sang iya kabuhi sa pag-alagad sa espirituwal kag materyal nga mga kinahanglanon sang katawhan. Bilang katapusan, ginkoronahan ni Jesus ang iya ministeryo paagi sa paghatag sang iya kabuhi subong gawad. (Mateo 20:28) Apang kamusta naman kita? Matuod, mga dihimpit kita, kaangay ni Moises kag ni David. Apang, subong ipakita sang masunod nga artikulo, may yara praktikal nga mga paagi nga sa diin sarang naton mailog ang aton Huwaran sa pagbalos sing dimakagod sa gugma sang Dios.
Paano Mo Sabton?
◻ Ngaa masiling nga ang “Dios gugma”?
◻ Paano ginbalusan ni Moises ang mga pagpahayag sang gugma sang Dios?
◻ Sa anong mga paagi ginbalusan ni David ang gugma ni Jehova nga Dios?
◻ Anong huwaran ang ginhatag ni Jesucristo sa pagbalos sa gugma sang Dios?
[Piktyur sa pahina 10]
Nahibaluan bala ninyo kon paano ginbalusan ni Moises ang gugma sang Dios?
[Piktyur sa pahina 12, 13]
Nagbalos si Jesus sa gugma sang Dios paagi sa pagbulig sa iban sa espirituwal kag pisikal kag paagi sa paghatag sang iya kabuhi subong gawad