Ano ang Buot Silingon sang Paghigugma sa Dios?
MGA anom ka libo ka tuig na ang nakaligad, ang nahaunang tawhanon nga lapsag nabun-ag. Sa tapos sia mabun-ag, ang iya iloy, si Eva, nagsiling: “Nakabaton ako sing lalaki sa bulig ni Jehova.” (Genesis 4:1) Ang iya pinamulong nagapakita nga, walay sapayan nga gintagudili na sa kamatayon bangod sang ila pagrebelde, si Eva kag ang iya bana, si Adan, nakasayod gihapon sang pagka-Dios ni Jehova. Sang ulihi nakatigayon sila sang ikaduhang anak nga lalaki. Ang mga bata ginhingalanan nga Cain kag Abel.
Samtang nagadaku ang mga bata, pat-od gid nga madamo sila sing natun-an tuhoy sa gugma ni Jehova paagi lamang sa pag-usisa sa iya tinuga. Nagkalipay sila sa matahom nga mga duag sa kinaugali kag sa nanuhaytuhay nga mga sapat kag mga tanom. Indi lamang nga ginhatagan sila sang Dios sing kabuhi kundi ginhatagan man niya sila sing ikasarang nga magkalipay sa kabuhi.
Nahibal-an nila nga ang ila mga ginikanan gintuga nga himpit kag nga ang orihinal nga katuyuan ni Jehova amo nga ang tawo magakabuhi sing dayon. Ayhan ginlaragway nanday Adan kag Eva sa ila ang matahom nga katamnan sang Eden, kag bisan paano ginpaathag nila kon ngaa gintabog sila gikan sa sadtong paraiso nga puluy-an. Mahimo nga nahibal-an man nanday Cain kag Abel ang tuhoy sa balaan nga tagna nga narekord sa Genesis 3:15. Paagi sa sinang tagna ginpabutyag ni Jehova ang iya katuyuan nga tadlungon ang kahimtangan sa gintalana nga tion sa kaayuhan sang mga nagahigugma sa iya kag nagapamatuod nga matutom sa iya.
Ang pagtuon tuhoy kay Jehova kag sa iya mga kinaiya mahimo nga nagresulta sa paghandum nanday Cain kag Abel nga kahamut-an sang Dios. Gani nagpalapit sila kay Jehova paagi sa pagdulot sing mga halad sa iya. Ang rekord sang Biblia nagasiling: “Sa pag-alagisod sang panag-on nahanabo nga si Cain nagdala gikan sa bunga sang duta subong halad kay Jehova. Apang tuhoy kay Abel, nagdala man sia gikan sa mga panganay sang iya panong, bisan sang sapay nila.”—Genesis 4:3, 4.
Ang ila paghandum sing kahamuot sang Dios nagpatok sing sadsaran para sa isa ka kaangtanan upod sa iya. Si Cain nangin rebelde sa Dios, samtang si Abel padayon nga ginpahulag sang matuod nga gugma sa Dios. Wala gid kuntani mapalambo ni Abel ini nga kaangtanan sa Dios kon wala sia anay magkuha sing ihibalo tuhoy sa personalidad ni Jehova kag sa iya mga katuyuan.
Makilala mo man si Jehova. Halimbawa, matun-an mo sa Biblia nga ang Dios matuod nga persona, indi lamang wala sing kabuhi nga puwersa nga nagatuga sang mga butang sing aksidente lamang. (Ipaanggid ang Juan 7:28; Hebreo 9:24; Bugna 4:11.) Ang Biblia nagatudlo man nga si Jehova “Dios nga maluluy-on kag mainayuhon, makuli sa pagpangakig kag bugana sa mahigugmaon nga kaluoy kag kamatuoran.”—Exodo 34:6.
“Ang Pagtuman Maayo Pa Sangsa Halad”
Subong sang gin-ilustrar sang sugilanon tuhoy kanday Cain kag Abel, ang ihibalo sa Dios kag handum nga makatigayon sing suod nga kaangtanan sa iya indi bastante. Matuod, ang duha ka mag-utod nagpalapit sa Dios nga may mga dulot. Apang, “samtang gintan-aw ni Jehova nga may kahamuot si Abel kag ang iya halad, wala niya gintan-aw nga may bisan ano nga kahamuot si Cain kag ang iya halad. Kag si Cain nagsingkal sing tama, kag nahulog ang iya nawong.”—Genesis 4:3-5.
Ngaa ginsikway ni Jehova ang halad ni Cain? May malain bala sa kalidad sang iya halad? Naakig bala si Jehova bangod ginhalad ni Cain ang “mga bunga sang duta” sa baylo sang halad nga sapat? Indi amo sina ang rason. Sang ulihi, malipayon nga ginbaton sang Dios ang mga dulot nga uyas kag iban pa nga mga bunga sang duta gikan sa madamo niya nga mga sumilimba. (Levitico 2:1-16) Pasad sa matigayon nga pamatuod, nian, may indi maayo sa tagipusuon ni Cain. Nabasa ni Jehova ang tagipusuon ni Cain kag ginpaandaman sia: “Ngaa bala nga nagsingkal ka kag ngaa bala nga nahulog ang imo nawong? Kon nagahimo ka sing maayo, indi ka bala pagbayawon? Apang kon wala ka nagahimo sing maayo, ang sala nagapuot sa gawang, kag mangin sa imo ang iya handum.”—Genesis 4:6, 7.
Ang matuod nga paghigugma sa Dios indi lamang pagdulot sing mga halad. Amo sina kon ngaa ginpalig-on ni Jehova si Cain sa ‘paghimo sing maayo.’ Luyag sang Dios ang pagkamatinumanon. Yadto nga pagkamatinumanon sa Dios mahimo kuntani nga nakabulig kay Cain sa paghimo sing maayo nga sadsaran para sa mahigugmaon nga kaangtanan sa Manunuga. Ginapadaku sang Biblia ang balor sang pagkamatinumanon paagi sa sining mga pulong: “May daku bala nga kahamuot si Jehova sa mga halad-nga-sinunog kag mga halad subong sangsa pagtuman sang tingog ni Jehova? Yari karon! Ang pagtuman maayo pa sangsa halad, kag ang pagpamati sangsa sapay sang mga karnero.”—1 Samuel 15:22.
Ining panghunahuna napalig-on pa sang ulihi sa mga pinamulong sang 1 Juan 5:3: “Amo ini ang kahulugan sang gugma sang Dios, nga sundon naton ang iya mga sugo; apang ang iya mga sugo indi mabug-at.” Wala na sing maayo pa nga paagi sa pagpakita sang aton gugma kay Jehova sangsa pagpasakop sang aton kaugalingon sa iya awtoridad. Nagakahulugan ini sang pagtuman sa sulundan sang Biblia sa moralidad. (1 Corinto 6:9, 10) Nagakahulugan ini sang paghigugma sa kon ano ang maayo kag pagdumot sa kon ano ang malain.—Salmo 97:10; 101:3; Hulubaton 8:13.
Ang isa ka importante nga pagpadayag sang aton gugma sa Dios amo ang aton gugma sa isigkatawo. Ang Biblia nagasiling sa aton: “Kon ang bisan sin-o magasiling: ‘Ginahigugma ko ang Dios,’ apang ginadumtan ang iya utod, butigon sia. Kay sia nga wala nagahigugma sang iya utod, nga makita niya, indi makahigugma sa Dios, nga indi niya makita.”—1 Juan 4:20.
Ang Pagsuod sa Dios Posible
Ang iban mahimo magsiling, ‘Ginasimba ko si Jehova. Ginatuman ko ang iya mga kasuguan. Ginapakig-angutan ko sing maayo ang akon isigkatawo. Ginahimo ko ina tanan. Walay sapayan sina, indi ko gid mabatyagan nga suod ako sa Dios. Wala ako sing nabatyagan nga makusog nga gugma para sa iya, kag nagapabatyag ina sa akon nga nakasala.’ Ang iban mahimo maghunahuna nga indi sila takus makatigayon sining suod nga kaangtanan kay Jehova.
Pagligad sang halos 37 ka tuig sang dedikado nga pag-alagad kay Jehova, ang isa ka Cristiano nagsulat: “Madamong beses sa akon kabuhi nga ang pamatyag ko daw pakulahaw lamang ang akon pag-alagad kay Jehova, nga ayhan ang akon tagipusuon wala gani sa sini. Apang nahibaluan ko nga ang pag-alagad kay Jehova amo ang husto nga butang nga himuon, kag indi ko mahimo tugutan ang akon kaugalingon nga mag-untat. Apang, kada makabasa ako tuhoy sa isa nga nagasiling nga ang iya ‘tagipusuon puno sang gugma para kay Jehova,’ nagapalibog ako, ‘Ano bala ang sayop sa akon, sanglit wala ko gid ina mabatyagi?’ ” Paano kita mangin suod sa Dios?
Kon tunay nga ginahigugma mo ang isa, pirme mo sia ginahunahuna. Handum mo gid nga mangin malapit sa iya bangod ginaulikdan mo sia. Sa kapin nga makita mo sia, mahambal sia, kag mahunahuna sia, kapin pa nga nagadugang ang imo gugma sa iya. Ining prinsipio naaplikar man sa imo pagpalambo sang gugma sa Dios.
Sa Salmo 77:12, ang inspirado nga manunulat nagasiling: “Pamalandungan ko gid ang tanan mong binuhatan kag painuinuhon ko ang imo hinimuan.” Ang pamalandong kinahanglanon sa pagpalambo sing gugma sa Dios. Matuod ini ilabi na bangod sang katunayan nga dikitaon sia. Apang sa kapin nga paghunahuna mo sa iya, kapin sia nga nagamatuod sa imo. Sa sini lamang nga mapalambo mo ang tinagipusuon kag mapinalanggaon nga kaangtanan sa iya—bangod matuod sia sa imo.
Ang imo huyog nga pamalandungan sing masunson ang mga dalanon kag mga pagpakig-angot ni Jehova nasandig sa kon ano ikaw kasunson nagapamati sa iya. Nagapamati ka paagi sa tayuyon nga pagbasa kag pagtuon sang iya Pulong, ang Biblia. Ginapatuhuyan sang salmista ang malipayon nga tawo subong ang isa nga ang iya “kalipay yara sa kasuguan ni Jehova, kag sa iya kasuguan nagabasa sia sing mahinay sa adlaw kag gab-i.”—Salmo 1:1, 2.
Ang isa pa ka importante nga butang amo ang pangamuyo. Amo ina kon ngaa ang Biblia sulit-sulit nga nagalaygay sa aton nga magpangamuyo—“sa tanan nga higayon,” ‘nagahugod sing tion sa pangamuyo,’ “magpadayon sing malig-on sa pangamuyo,” kag “magpangamuyo sa walay langan.” (Efeso 6:18; 1 Corinto 7:5; Roma 12:12; 1 Tesalonica 5:17) Ang aton walay langan nga mga pangamuyo kay Jehova magapamahal sa aton sa iya, kag ang pasalig nga nagapamati sia magapasuod sa aton sa iya. Ginpamatud-an ini sang salmista, sang nagsiling sia: “Ginahigugma ko si Jehova, bangod nga nagapamati sia sang akon tingog, sang akon mga pag-ampo. Bangod nga ginlingig niya sa akon ang iya igdulungog, kag magapanawag ako sa iya tubtob nga nagakabuhi ako.”—Salmo 116:1, 2.
Pag-ilog sa Dios sang Gugma
Si Jehova maayo sa aton. Subong Manunuga sang uniberso, may madamong butang gid sia nga dumdumon kag atipanon. Apang, ang Biblia nagasugid sa aton nga bisan pa nga halangdon sia, nagaulikid gihapon sia sa iya tawhanon nga mga tinuga. Ginahigugma niya kita. (1 Pedro 5:6, 7) Ginapamatud-an ini sang salmista paagi sa iya mga pulong: “O Jehova Ginuo namon, daw ano ka halangdon ang imo ngalan sa bug-os nga duta, ikaw nga nagpahamtang sang imo himaya sa ibabaw sang kalangitan! Kon pamalandungan ko ang imo kalangitan, ang binuhatan sang imo mga tudlo, ang bulan kag ang kabituunan nga imo ginpatok, ano bala ang mamalatyon nga tawo nga ginasapak mo sia, kag ang anak sang tawo nga ginaulikdan mo sia?”—Salmo 8:1, 3, 4.
Paano pirme ginadumdom ni Jehova ang mamalatyon nga tawo? Ang Biblia nagasabat: “Sa sini ang gugma sang Dios ginpahayag sa aton kahimtangan, bangod ginpadala sang Dios ang iya bugtong nga Anak sa kalibutan agod maagom naton ang kabuhi paagi sa iya. Ang gugma yari sa sining butang, indi nga ginhigugma ta ang Dios, kundi nga ginhigugma niya kita kag ginpadala ang iya Anak subong nagatumbas nga halad sang aton mga sala.”—1 Juan 4:9, 10.
Paano ining nagatumbas nga halad amo ang labing daku nga pamatuod sang gugma sang Dios? Binagbinagon naton kon ano ang natabo sa katamnan sang Eden. Sanday Adan kag Eva dapat magdesisyon kon bala magpasakop sila sa kasuguan ni Jehova upod ang paglaum sang dayon himpit nga kabuhi ukon magrebelde batok kay Jehova nga ang resulta amo ang kamatayon. Ginpili nila ang magrebelde. (Genesis 3:1-6) Bangod sini gintagudili man nila ang bug-os nga katawhan sa kamatayon. (Roma 5:12) Matinaastaason nila nga ginkuha sa aton ang kahigayunan nga makapamat-od para sa aton kaugalingon. Wala sing isa sa aton ang may kahigayunan nga makadesisyon sa sini.
Apang, mahigugmaon nga gindumdom ni Jehova ang mamalatyon nga tawo, nakahangop sang iya palaligban. Sa kalalangan sang mahalaron nga kamatayon sang Iya Anak, nga si Jesucristo, si Jehova nag-aman sing matarong nga mga sadsaran agod ang tagsatagsa sa aton makapili para sa iya kaugalingon sang kabuhi ukon kamatayon, sang pagkamatinumanon ukon pagrebelde. (Juan 3:16) Daw subong bala nga ginhatagan kita ni Jehova sing aton kaugalingon nga adlaw sa hukmanan—sing kahigayunan nga makabalik sa Eden, kon sa aton pa, kag makahimo sang aton kaugalingon nga desisyon. Amo gid ini ang labing daku nga pagpahayag sang gugma.
Handurawa ang kasakit nga ginbatas ni Jehova samtang nakita niya ang iya panganay nga gin-insultuhan, ginsakit, kag ginlansang kaangay sang isa ka kriminal. Kag ginbatas ina sang Dios tungod sa aton. Ang pagkahibalo naton tuhoy sa ginhimo ni Jehova nga ginhigugma niya kita sing una dapat man magpahulag sa aton nga higugmaon sia kag magpukaw sa aton nga pangitaon sia. (Santiago 1:17; 1 Juan 4:19) Ang Biblia nagaagda sa aton nga ‘pangitaon si Jehova kag ang iya kusog. Pangitaon ang iya nawong sing dalayon. Dumdumon ang iya makatilingala nga mga binuhatan nga ginhimo niya, ang iya mga milagro kag ang hudisyal nga mga desisyon sang iya baba.’—Salmo 105:4, 5.
Ang pagtigayon sing personal kag mahigugmaon nga kaangtanan sa Dios, ang mangin abyan niya, indi direalistiko. Matigayon ini. Matuod, indi gid naton mapaanggid ang aton gugma sa Dios sa tawhanon nga mga kaangtanan. Ang gugma nga nabatyagan naton para sa aton tiayon, mga ginikanan, mga utod, mga kabataan, ukon mga abyan tuhay gikan sa aton gugma para sa Dios. (Mateo 10:37; 19:29) Ang paghigugma kay Jehova nagalakip sang aton debosyon, pagsimba, kag bug-os nga dedikasyon sa iya. (Deuteronomio 4:24) Wala sing liwan na nga mga kaangtanan nga nagalakip sina. Apang, mahimo naton mapalambo ang mabakod kag tudok nga mga emosyon para sa Dios sa matinahuron nga paagi, nga may kahayanghag.—Salmo 89:7.
Walay sapayan nga dihimpit, kaangay nanday Cain kag Abel may posibilidad ka nga mahigugma ang imo Manunuga. Si Cain nagpili, nagbuylog kay Satanas, kag nangin ang nahaunang tawhanon nga manugpatay. (1 Juan 3:12) Sa kabaliskaran, si Abel pagadumdumon ni Jehova subong isa ka tawo sang pagtuo kag pagkamatarong kag pagapadyaan sing kabuhi sa nagapakari nga Paraiso.—Hebreo 11:4.
May pililian ka man. Sa bulig sang espiritu sang Dios kag sang iya Pulong, mahimo gid nimo mahigugma ang Dios sa “bug-os mong tagipusuon kag sa bug-os mong kalag kag sa bug-os mong kusog.” (Deuteronomio 6:5) Si Jehova, man, padayon nga magahigugma sa imo, kay sia ang “manugpadya sang mga hanuot nga nagapangita sa iya.”—Hebreo 11:6.
[Retrato sa pahina 7]
Ang halad ni Abel ginkahamut-an sang Dios