Malipayon nga Pagbatas sa Natung-an nga Sidlangan

Ining makapulukaw nga report naghalin sa mga Saksi ni Jehova sa Lebanon

ANG amon 1990 nga tuig sang pag-alagad nagsugod nga may masingki nga pagbombahanay sa Bei­rut. Nian nagbulos ang kalinong nga nagdugay kutob sang katapusan sang Septiembre 1989 tubtob sang Enero 1990.

Sa sulod sadto nga binulan isa ka bag-ong kataason nga 2,659 ka manugbantala ang ginreport (sang Nobiembre), ipaanggid sa 2,467 sang 1989 nga tuig sang pag-alagad. Kap-atan kag apat ka tawo ang nabawtismuhan, kag kada bulan 65 ang promedyo nga nagapakigbahin sa pag-aux­iliary payunir. Sa nahauna nga tion, kapin sa 2,000 ka pagtuon sa Biblia ang ginreport, kag nagsugod kami sa pagplano kon ano ang sarang mahimo sa palaabuton.

Apang nagdabdab liwat ang inaway sa Sidlangan nga Bei­rut, nga sa diin nahamtang ang kalabanan sang mga kongregasyon, kag madamo sang aton kauturan ang nalagyo sa iban nga mga bahin sang pungsod. Sa sulod sang madamo nga adlaw wala kami sing pagpakig-angot sa mga kongregasyon sa naapektohan nga mga duog, kag indi kompleto ang mga report sang naalagdan sa latagon. Walay sapayan, ang mga kauturan nga nag-alaplaag nagbuylog sa mga kongregasyon sa mga duog nga ila gindangpan, kag ang pagpamalaybalay nga hilikuton nagpadayon nga may maayong mga resulta sa bug-os nga pungsod. Samtang, madamo sang mga balay sang aton kauturan ang nasunog ukon naguba sang pagpamomba. Isa ka utod nga babayi ang napatay.

Upod ang pagsalig nagasandig kami kay Jehova para sa bulig kag tuytoy. Ang maisugon nga mga payunir nagboluntaryo sa pagdul-ong sing espirituwal nga mga aman, lakip ang kalan-on kag tubig, sa aton kauturan sa mga rehiyon nga ginasalakay. Napahulag sang gugma kay Jehova kag sa kauturan, nangahas pa gani sila nga tabukon ang mga dalan nga ginlubngan sing mga bomba. Maayo nga panaksi ang nahatag sang makita sang mga tawo ang bulig nga nagaabot sa mga pamilya sang aton kauturan. Nakita nila kon ano ang mahimo kon ang tanan nahiusa sa pagsimba sa isa ka matuod nga Dios, nga si Jehova.​—⁠Juan 13:​34, 35; 15:⁠13.

Sa sulod sang tuig sang pag-alagad, wala sing bisan isa ka guwa sang aton mga magasin ang nawasi sang kauturan. Subong amo na ang kaso sa Ang Lalantawan, ang Magmata! nga magasin sa Arabe ginbalhag nga dungan sa Ingles, sugod sa guwa sang Enero 8, 1990. Nalipay sing daku ang mga Saksi kag ang mga interesado. Makakulunyag man nga makita ang bag-o nga mga publikasyon sa Arabe, subong sang brosyur nga Dapat Ka Bala Magpati sa Trinidad? kag sang mga libro nga The Bible​—⁠God’s Word or Man’s kag Ang Akon Libro sang mga Sugilanon sa Biblia.

Ginhatag ining espirituwal nga mga regalo walay sapayan nga nagsira ang madamo nga pabrika kag iban pa nga establisamento sa Bei­rut. Ang kahimtangan sang ekonomiya malain sa bug-os nga pungsod. Madamo nga lugar ang wala sing koryente, wala sing tubig, wala sing telepono. Karon, tuguti ang pila sang aton kauturan sa pagsugid kon paano sila nakasapo sing kalipay samtang nagapanikasog batok sa mga halit sang inaway nga nagapadayon sa 15 ka tuig.

“Ang Positibo nga Bahin”

Ang isa ka utod nga lalaki sa Bei­rut nagsulat: “Una sa tanan, nagapasalamat ako sing tinagipusuon kay Jehova bangod gin-amligan niya kami sa sulod sang iya organisasyon sang putli nga pagsimba walay sapayan sang mabudlay nga mga kahimtangan nga ginaatubang namon. Sa tion sang mga hitabo kasan-o lang, may pila ako ka eksperiensia nga naghatag sa akon sing kalipay, kag ginakabig ko ini nga positibo nga bahin sang inaway.

“Sa tion sang mabaskog nga pagbombahanay, nagpungko kami upod sa mga kaingod sa hagdanan, kay amo ini ang pinakaluwas nga duog kon may bombahanay. Pirme kami nagapakighambal sa ila nahanungod sa Ginharian sang Dios subong amo lamang ang solusyon sa mga problema sang katawhan, kag pirme kami nagapangamuyo sa amon Dios, nga si Jehova. Nahibal-an ini sang tanan.

“Kon kaisa ang pagbombahanay nagadugay sing mga inadlaw, kag indi kami makatambong sa mga miting. Gani ginadala ko ang Lalantawan nga magasin kag ginatun-an ini samtang nagapungko sa hagdan. Napukaw sina ang interes sang amon mga kaingod. Ang iban sa ila wala anay nagapakighambal sa amon bangod mga Saksi ni Jehova kami. Apang sang ang amon balay maigo sang bomba, nakibot sila sa gugma nga ginpakita sang amon kauturan. Karon luyag nila magpakighambal sa amon. Bangod sina, nakatigayon kami sing pila ka suskripsion sa Magmata!

“Ining mga eksperiensia naghimo sa akon nga mangin determinado sa pagpadayon sa paghambal nahanungod sa kamatuoran. Takus si Jehova sang tanan naton nga pagsimba kag sang tanan naton nga pagtahod kag sang tanan nga himaya.”

“Ginluwas sang Ngalan ni Jehova ang Akon Kabuhi”

Ang isa ka utod nga lalaki gikan sa Kongregasyon sang Ras Bei­rut nag-asoy: “Ginsugdan namon sang akon asawa, kag duha ka diutay nga kabataan nga lalaki ang amon adlaw paagi sa pagpamalaybalay sa nakatundan nga bahin sang Bei­rut. Pagkahapon, ginhiwat ang Ingles nga miting sa amon balay. Sang alas 6:​30 s.g. madulom na. Ang lamang nga mga tawo sa mga kalye amo ang naarmasan nga mga lalaki. Nagaulan ang bomba. Ang kalabanan nga nagapuyo sa amon tinukod nagpalagyo na. Wala sing tubig ukon koryente. Nian may nabatian kami nga nagapanuktok sa puwerta.

“Sa paghunahuna nga isa ini sang amon mga kaingod nga nagakinahanglan sing tubig ukon tinapay, ginbuksan sang akon asawa ang puwerta. Apat ka naarmasan nga lalaki ang nagatindog didto. Gintayaan nila sang ila pusil ang akon asawa kag ginpangita nila ako nga ginasambit ang akon ngalan. Sadto nga semana siam ka lalaki ang ginkuha sa ila balay sa sining paagi kag ginpatay sa gilayon. Sang makita ako sang naarmasan nga mga lalaki, gintaya nila ang ila awtomatiko nga mga riple sa akon ulo kag ginmanduan ako nga mag-upod sa ila. Ginsilingan ko sila: ‘Maupod ako sa inyo. Apang tuguti ninyo ako nga magsul-ob anay sing bayo.’ Nangamuyo ako kay Jehova sing bug-os tagipusuon, nga nagapangayo sang iya bulig. Sang makatapos ako pangamuyo, nagtawhay ang akon pamatyag kag sa panulok ko, ining naarmasan kag makahaladlok nga mga tawo daw kaangay lamang sang kinaandan nga mga tawo. Nakighambal ako sa ila nga wala sing kahadlok.

“Ginpamangkot ko sila: ‘Ano ang kinahanglan ninyo sa akon? Mahambalanay anay kita diri sa balay sa makadali antes kita maglakat.’ Sang didto na kami sa salas, ang ila puno namangkot sa akon: ‘Ano ang imo kinamatarong sa pagsulod sa mga balay kag sa pagbantala sa mga tawo?’ Nagsabat ako: ‘Nagadala kamo sing pusil sa pagpilit sang luyag ninyo, kag wala sing bisan sin-o nga nagabalabag sa inyo. Ginadala ko ang maayong balita sang paghidait nga ginsugo sa akon ni Jesus nga ibantala.’ Dayon ginpaathag ko ang mga pagtuluuhan kag hilikuton sang mga Saksi ni Jehova. Sang masambit ko ang ngalan nga Jehova, sila nagsiling: ‘Tuman na nga nausisa namon ikaw diri. Indi na kinahanglan nga mag-upod ka sa amon.’ Mahimo gid nga ang isa sa ila may kilala nga isa ka utod nga lalaki. Sia nagsiling: ‘Kaangay sia ni Jarjoura.’

“Nagpanaksi kami sa sadtong mga tawo nga may pusil kag ginsabat namon ang ila mga pamangkot sing isa ka oras kag tunga. Nian, sa baylo nga dalhon ako kag isakay sa buli sang ila awto subong sang ginhimo nila sa iban, nangayo sila sing pasaylo, ginhalukan ako, kag nagtanyag pa sang ila bulig kon kinahanglanon ko ini, kag naglakat. Sugod sa umpisa, nabatyagan ko ang pag-amlig ni Jehova. Ang pagpakigbahin sa pamalaybalay nga hilikuton sadto nga aga kag ang pagtambong sa miting sang hapon nagpalig-on sa akon nga magtindog sing mabakod. Sa pagkamatuod, ginluwas sang ngalan ni Jehova ang akon kabuhi.”​—⁠Hulubaton 18:⁠10.

“Ginlibutan Kami sang Pag-amlig ni Jehova”

Ang isa pa ka utod nagsulat gikan sa Bei­rut: “Mierkoles sadto, ika-31 sang Enero, 1990. Sang nagaobra kami upod sa akon utod nga lalaki sa balay sang isa ka utod nga babayi, nagsugod liwat ang inaway. Naglinupok ang bomba bisan diin. Bangod sang mabangis nga pag-inaway, indi kami makapauli. Nangin maabiabihon gid ang utod nga babayi bisan pa pila lamang ka bilog ang tinapay niya.

“Nabalaka gid ako sa akon asawa bangod Pilipino sia kag wala maanad sa kasingki sang inaway. Apang, sang ikaduha nga adlaw, nakapauli ako. May mga kasangkapan nga nagabalabag sa mga kalye, apang bangod kay Jehova, luwas ang akon pamilya. Sa tapos sang malip-ot nga paglinong, nagsugod liwat ang pagpaarakay. Nanago kami sa balay sang isa ka utod nga kaingod namon. Lima kami didto​—⁠ang akon asawa, ang akon dos-anyos nga anak nga lalaki, ako, ang akon utod nga lalaki, kag ang iya asawa. Nagkalahulog sa palibot namon ang mga bomba, mga bala, kag mga raket, apang ginlibutan kami sang pag-amlig ni Jehova. Duha ka adlaw sang pagpaarakay ang nagligad, samtang nagahigda kami sa duta nga ang aso sang mga bomba daw yara gid sa amon ilong.

“Samtang ginapamatian namon ang linupok, nadumduman namon ang ginsiling ni David sa Salmo 18:​1-9, 16-22, 29, 30. Sa sadtong mabudlay nga mga tinion, kag walay sapayan sang tanan nga nagakatabo, malipayon kami kag nakayuhom gihapon. Nangamuyo kami kay Jehova nga kon mapatay man kami, kabay nga mapatay kami sa mahapos nga paagi, nga indi na mag-antos. Mabaskog ang amon paglaum sa pagkabanhaw.

“Daw indi mapatihan ang masunod nga adlaw. Mga 25 ka bomba ang nahulog malapit sa balay nga amon ginapanaguan, apang wala sing bisan isa sa amon nga nasamad. Mahanduraw bala ninyo ang amon ginabatyag sang maeksperiensiahan namon ang pag-amlig ni Jehova? Pagkaaga, namat-od kami sa gilayon nga malagyo. Ang akon awto amo lamang ang isa sa kalye nga wala masunog. Nagpadalagan ako sa ulot sang mga mina kag mga bomba, kag bangod kay Jehova, nakapalagyo kami padulong sa isa ka duog nga malinonglinong sang sa amon. Didto, mahigugmaon nga ginhatagan kami sang amon kauturan sing mga panapton, kalan-on kag kuwarta.

“Walay sapayan sang tanan nga kabudlayan, malipayon kami bangod si Jehova kaupod namon. Daw subong bala nga ginpadala niya ang iya mga anghel agod ipalayo sa amon ang mga bomba. (Salmo 34:7) Huo, daku gid ang amon kalipay. Apang mangin labi pa ang amon kalipay sa tapos maluwas sa Armagedon.”

Nag-abot ang Emerhensya nga Bulig!

Ang iban nga mga bahin sang Bei­rut daw subong bala nga ginlinugan. Madamo nga balay sang amon kauturan ang naguba. Sang matabo ang krisis kasan-o lang, ang Komite sang Sanga nag-organisar sing komite para sa emerhensya nga bulig agod mag-atipan sa mga kinahanglanon sang kauturan. Nagsugod ini sa pagpanghikot sang Pebrero 16, 1990, nga amoamo gid ang tion nga sa katapusan sarang na kami makasulod sa naapektohan nga mga duog. Tatlo ang katuyuan sining komite: ang paghatag sing espirituwal nga pagpalig-on sa kauturan; ang pag-atipan sang ila kinahanglanon nga kuwarta, kalan-on, kag tubig; kag ang pagbulig sa ila sa pagkay-o ukon sa pagtukod sang ila balay.

Indi na kinahanglan nga magtawag sing mga boluntaryo. Kada adlaw madamo ang nag-abot sing aga pa agod magbulig. Yari ang pila ka komento sang mga ginbuligan:

Ang isa ka utod nga babayi, sang matinluan kag makay-o ang iya balay, nagsiling: “Nakabati ako nahanungod sa bulig nga ginahatag sang kauturan kon mag-abot ang kalamidad. Karon nakita ko ini kag nabatyagan.” Bisan gani ang iya kaingod, nga isa ka Muslim nga babayi, nagsiling sa sini nga utod: “Nagahigugmaanay gid kamo. Kamo ang matuod nga relihion. Malagyo ako karon padulong sa akon minuro kag sugiran ko ang tanan sang inyo ginahimo diri.” Ini nga kaingod nagdala sing kalan-on sa boluntaryo nga mga manugpangabudlay.

Ang isa ka tigulang nga utod nga babayi nagkomento: “Ginpaabot ko nga maabot kamo agod duawon ako, apang wala ako magpaabot nga ang Sosiedad magapadala sing utod agod dul-ungan ako sing tubig.” Nagahibi sia sang ginhalukan niya ang utod nga lalaki nga nag-abot sa pagbulig sa iya.

Ang isa ka pamilya sang tatlo​—⁠ang bana kag ang asawa nga indi bawtismado nga mga manugbantala kag ang ila magamay nga anak nga lalaki⁠—​ginduaw kag ginhatagan sing isa ka daku nga kahon sang gatas, pila ka bilog nga tinapay, ilimnon nga tubig, kag sing kuwarta. Sang ginsugiran sila nga ginhimo ini nga kahimusan sang mga Saksi ni Jehova, ang bana nagsiling: “Katapo ako anay sang Evan­gel­ical ­Church sing 11 ka tuig kag aktibo gid. Apang sa sulod sining 15 ka tuig sang inaway sa Lebanon, wala sila makahunahuna sa paghimo sing butang kaangay sini para sa ila mga katapo.” Nagpadayon sia: “Amo lamang ini ang organisasyon sang Dios.” Ang bana kag ang iya asawa ginbawtismuhan sa isa ka asambleya sang Mayo 1990.

Ang isa ka gulang nagkomento: “Kulang ang mga tinaga sa pagpabutyag sang amon pasalamat sa buhat sang gugma nga ginhimo ninyo para sa nasit-an nga kauturan. Nahamuot gid ako sa bagay nga nakahibi ako sang makita ko ang isa ka grupo sang lamharon nga kauturan nga lalaki, ang mga boluntaryo, nga nagtukod liwat sang balay sang akon mga ginikanan. Bisan gani ang amon mga kasilingan nga indi mga Saksi nagpabutyag sang ila apresasyon. Nagapasalamat gid kami kay Jehova kag sa iya organisasyon bangod sang praktikal nga sakdag nga ginhatag. Daw ano ka matuod ang mga pulong sang salmista sa Salmo 144:​15: ‘Malipayon ang katawhan nga ang ila Dios amo si Jehova.’ ”

“Ano nga Sahi sang mga Tawo Kamo?”

Ang isa ka utod nga babayi nga may pamilya nagsulat: “Luyag ko ipabutyag ang akon hanuot nga apresasyon sa gugma ni Jehova kag sang iya organisasyon. Ang akon balay naigo sang madamo nga bala kag nasunog. Madamo ang nagsugid sa amon nga indi na ini makay-o. Apang, nagatindog ini diri karon nga nakay-o sing bug-os nga subong bala daw wala sing natabo sa sini, nga ginalibutan sang ginatos ka balay sa amon kalye nga nasunog kag naguba.

“Bisan ang amon mga kasilingan, nga indi mga Saksi ni Jehova, nagapamangkot: ‘Sa diin nagahalin ini nga gugma? Ano nga sahi sang mga tawo kamo? Sin-o ining mga indibiduwal nga nagapangabudlay sing makugi gid kag mahipos kag mabuot? Bulahan ang Dios nga naghatag sa inyo sini nga gugma kag nagasakripisyo sang kaugalingon nga espiritu.’ Daw ano ka nagakaigo ang mga pulong sang Salmo 84:​11, 12: ‘Kay si Jehova nga Dios amo ang adlaw kag taming; bugay kag himaya ang iya ginahatag. Si Jehova indi magadingot sang bisan ano nga maayo gikan sa mga nagagawi sing matadlong. O Jehova sang kasuldadusan, malipayon ang tawo nga nagasalig sa imo.’ ”

Ang isa ka lalaki nga ang iya asawa kag kabataan mga Saksi ni Jehova nagsulat: “Luyag ko pasalamatan kamo bangod sang inyo bulig sa pagkay-o sang amon balay. Ang inyo binuhatan nagpakita sing sinsero nga Cristianong gugma nga malaka gid karon nga mga adlaw. Kabay nga pakamaayuhon sang Dios ang inyo mga panikasog.”

Sa tapos mapasag-uli ang balay sang isa ka gulang, sia nagsiling: “Indi mapabutyag sang amon mga baba kon ano ang yara sa amon tagipusuon. Indi kami makakita sing mga tinaga sa pagsugid sa inyo sang amon apresasyon kay Jehova kag sa iya organisasyon. Nabatyagan namon ang pagkalapit ni Jehova sa tion sang amon kalamidad. Ang inyo gugma nagpalig-on sa tanan nga katapo sang akon pamilya nga makigbahin sa pagbulig sa iban nga nagakinahanglan.”

Sang Abril, 194 ka tawo sa Lebanon ang nag-aux­iliary payunir. Ang gab-i sang Memoryal mas malinong sang sa iban nga mga gab-i, kag ang Memoryal ginhiwat nga may kabilugan nga tumalambong nga 5,034. Ang tanan nga asambleya nga ginplano nahiwat, kag ang kabilugan nga kadamuon sang mga tawo nga nabawtismuhan sa sulod sang tuig 121, walay sapayan sang kinagubot sa pungsod. Madamo nga pamilya sa kongregasyon ang nagguwa sa pungsod sing dayon. Apang ang bag-o nga mga interesado nagauswag padulong sa bawtismo, kag ang 2,726 ka manugbantala sang Ginharian padayon nga nagadugang. Sa tion sang 1990 nga tuig sang pag-alagad, ang tanan nga katawhan ni Jehova sa Lebanon nakaeksperiensia sang katutom ni Jehova kay gin-atipan niya kami kag gintuytuyan sa magamo nga mga tion.—Salmo 33:4, 5; 34:1-5.