Iskedyul sa Semana sang Enero 24

SEMANA SANG ENERO 24

Ambahanon 53 kag Pangamuyo

□ Pagtinuon sang Kongregasyon sa Biblia:

cf kap. 16 ¶15-20, kahon sa p. 171 (25 min)

□ Teokratikong Eskwelahan Para sa Ministeryo:

Pagbasa sa Biblia: Esdras 6-10 (10 min)

Num. 1: Esdras 7:1-17 (4 min ukon kubos pa)

Num. 2: Kon Paano Ginpamatud-an ni Jesus nga Takus Sia sa Paggahom Subong Hari (5 min)

Num. 3: Dios Gid Bala si Jesucristo?—rs-E p. 212 ¶1-2 (5 min)

□ Miting sa Serbisyo:

Ambahanon 30

5 min: Mga pahibalo. Sambita ang tanyag nga literatura sa Pebrero, kag ipasundayag ang isa ka presentasyon.

20 min: “Bulig Para sa mga Pamilya.”—Bahin 1. (Parapo 1-6 kag kahon sa pahina 6.) Pamangkot kag sabat. Palig-una ang tumalambong nga tilawan ang pila ka panugda sa kahon sa pahina 6 sa ila masunod nga Pangpamilya nga Pagsimba. Sa masunod nga semana, kon binagbinagon ang nabilin sa artikulo, may kahigayunan sila sa pagsugid kon paano nakabenepisyo ang ila pamilya.

10 min: Maghanda sa Pagtanyag sing mga Magasin sa Pebrero. Paghinun-anon. Maghinguyang sing isa ukon duha ka minuto sa pagrepaso sa kaundan sang mga magasin. Nian magpili sing duha ukon tatlo ka artikulo, kag agdaha ang tumalambong nga manugda sing mga pamangkot kag teksto nga magamit sa presentasyon. Ipasundayag kon paano itanyag ang kada gua.

Ambahanon 32 kag Pangamuyo

Bulig Para sa mga Pamilya

1. Paano nakabenepisyo ang Israelinhon nga mga pamilya sa Adlaw nga Inugpahuway?

¹ Ang Adlaw nga Inugpahuway isa ka mahigugmaon nga aman ni Jehova nga nabenepisyuhan sang mga pamilya. Nagapahuway ang mga Israelinhon sa ila mga hilikuton kag nagapamalandong sa kaayo ni Jehova kag sa ila kaangtanan sa iya. Ginakalitan sang mga ginikanan ini nga kahigayunan para mapatudok sa ila kabataan ang Kasuguan. (Deut. 6:6, 7) Nagaaman man ini sing tion sa katawhan ni Jehova kada semana para mahatagan sing igtalupangod ang ila espirituwalidad.

2. Ano ang ginatudlo sa aton sang Adlaw nga Inugpahuway parte kay Jehova?

² Siempre pa, wala na ginapatuman ni Jehova sa mga pamilya ang Adlaw nga Inugpahuway. Pero, ina nga kasuguan may ginatudlo sa aton parte sa Dios. Pirme gid sia interesado sa espirituwal nga kaayuhan sang iya katawhan. (Isa. 48:17, 18) Sa karon, ang isa ka paagi nga ginapabutyag ni Jehova ang iya mahigugmaon nga interes amo ang kahimusan sa Pangpamilya nga Pagsimba.

3. Ano ang katuyuan sang Pangpamilya nga Pagsimba?

³ Ano ang Katuyuan sang Pangpamilya nga Pagsimba? Sang Enero 2009, ang Pagtinuon sang Kongregasyon sa Biblia ginhiwat upod sa Teokratikong Eskwelahan Para sa Ministeryo kag Miting sa Serbisyo. Ang isa ka rason sa sini nga pagbag-o amo ang paghatag sing kahigayunan sa mga pamilya nga mapabakod ang ila espirituwalidad paagi sa paghimo sing espesipiko nga iskedyul kada semana para sa pangpamilya nga pagsimba. Kon praktikal, ginapalig-on ang kada pamilya nga gamiton ang ila tion sa pagtinuon sa libro sang una sa ila pangpamilya nga pagtuon, kag gamiton ini nga tion sa indi padali nga paghinun-anon kag pagtuon sa Biblia suno sa mga kinahanglanon sang pamilya.

4. Isa lang bala ka oras ang dapat ihinguyang sa Pangpamilya nga Pagsimba? Ipaathag.

⁴ Para makatambong sa Pagtinuon sang Kongregasyon sa Libro sang una, kinahanglan naton ang tion sa pag-ilis, pagbiyahe, kag iban pa. Bangod sini, madamo sa aton ang nagahinguyang sing kapin sa isa ka oras para makatambong sa sini nga miting. Bangod nagbag-o ang iskedyul sang aton miting, ini nga tion magamit na naton sa pagsimba kay Jehova subong pamilya. Gani indi kinahanglan nga limitahan naton ang aton Pangpamilya nga Pagsimba sa isa lang ka oras. Kundi, dapat naton hunahunaon ang mga kinahanglanon kag limitasyon sang aton pamilya kag ipahisuno ang kadugayon sini.

5. Dapat bala ihinguyang ang tanan nga tion sa paghinun-anon subong grupo? Ipaathag.

⁵ Kinahanglan Bala Ihinguyang ang Tanan nga Tion sa Paghinun-anon Subong Grupo? Kon nagahinun-anon ang mag-asawa kag ang pamilya nga may kabataan sa Makasulatanhon nga mga topiko, nagapalig-unanay sila. (Roma 1:12) Bangod sini, mangin suod sila sa isa kag isa. Gani, dapat nga nasentro sa Kasulatan ang paghinun-anon sa Pangpamilya nga Pagsimba. Pero, dapat man maghinguyang sing tion ang katapo sang pamilya para sa personal nga pagtuon. Halimbawa, pagkatapos sang paghinun-anon subong grupo, mahimo sila magpabilin para magtuon sing personal, ayhan tapuson ang ila paghanda para sa mga miting ukon magbasa sing mga magasin. Ang pila ka pamilya wala na nagapaandar sang TV pagkatapos sang pagtuon.

6. Paano dumalahan ang paghinun-anon?

⁶ Paano Dumalahan ang Paghinun-anon? Indi man gid kinahanglan nga puro lang pamangkot kag sabat. Para mangin masadya ang Pangpamilya nga Pagsimba, ang programa sang madamo nga pamilya ginahiwat kaangay sang aton mga miting sa tungatunga sang semana. Ginatunga nila ang paghinun-anon sa pila ka bahin kag ginadumalahan ini sa lainlain nga paagi. Halimbawa, basahon nila ang Biblia, handaan ang isa ka bahin sa mga miting, kag magpraktis para sa pagministeryo. Makita ang pila ka panugda sa pahina 6.

7. Ano nga sahi sang pagtuon ang dapat tinguhaan sang mga ginikanan?

⁷ Ano nga Sahi sang Pagtuon ang Tinguhaan sang mga Ginikanan? Makatuon sing maayo ang inyo pamilya kon mahigugmaon kag relaks ang pamaagi sang inyo pagtuon. Mahimo kamo magtuon sa gua sang balay kon maayo ang panahon. Mag-untat sing makadali kon kinahanglanon. Ang iban nga pamilya nagamerienda pagkatapos sang programa. Ginalikawan sang mga ginikanan nga gamiton ang Pangpamilya nga Pagsimba para akigan ukon disiplinahon ang ila kabataan, sa baylo ginahinguyang nila ini para mahatagan sing igtalupangod ang espesipiko nga problema. Mas maayo gid kon hinun-anunan sing pribado ang sensitibo nga mga problema upod sa bata sa iban nga tion sina nga semana para indi sia mahuy-an sa atubangan sang iya mga utod. Dapat indi mangin makatalaka ang Pangpamilya nga Pagsimba, ukon sobra ka serioso, kundi dapat ini mangin malipayon kaangay sang Dios nga aton ginasimba.—1 Tim. 1:11.

8, 9. Ano nga paghanda ang dapat himuon sang mga amay?

⁸ Paano Ini Handaan sang Ulo sang Pamilya? Makabenepisyo gid ang pamilya kon maghanda sing abanse ang amay para sa Pangpamilya nga Pagsimba paagi sa pagdesisyon kon ano ang hinun-anunan kag kon paano ini binagbinagon sing maayo. (Hulu. 21:5) Mahimo ini sang bana paagi sa pagpamangkot sa iya asawa. (Hulu. 15:22) Puede man pamangkuton sang mga amay ang ila kabataan kon ano ang ila mga panugda. Kon himuon ninyo ini, mahibaluan ninyo kon ano ang ila mga nanamian kag ginakabalak-an.

⁹ Indi kinahanglan nga maghinguyang ang amay sing malawig nga tion sa paghanda. Mahimo nga may nanamian ang pamilya nga mga pamaagi sang pagtuon, gani indi kinahanglan nga pirme bag-uhon sing bug-os ang programa kada semana. Basi masapwan niya nga may bentaha kon pagkatapos sang ila pagsimba, ihanda na niya ang masunod nga hinun-anunan samtang madumduman pa niya ang espirituwal nga kinahanglanon sang iya pamilya. Ang pila ka ulo sang pamilya may malip-ot nga mga agenda kag ginabutang ini sa lugar nga mahapos makita sang iya pamilya, halimbawa sa repredyeritor. Bangod sini, mahimo malangkag ang imo pamilya kag may tion sila para handaan ini kon kinahanglanon.

10. Paano gamiton sang mga nagaisahanon ang tion sa Pangpamilya nga Pagsimba?

¹⁰ Ano Abi Kon Nagaisahanon Ako? Gamiton sang mga nagaisahanon ang tion sang Pangpamilya nga Pagsimba sa ila personal nga pagtuon. Ang maayong programa sang personal nga pagtuon nagalakip sang pagbasa sing Biblia, paghanda para sa mga miting, kag pagbasa sing Ang Lalantawan kag Magmata! Ginadugangan man ini sang pila ka manugbantala sing pagpanalawsaw sa mga publikasyon. Kon kaisa, mahimo man nila agdahon ang iban nga manugbantala ukon pamilya nga magbuylog sa ila para sa makapabakod nga paghinun-anon sa Kasulatan.

11, 12. Ano ang pila ka benepisyo sang regular nga Pangpamilya nga Pagsimba?

¹¹ Ano ang mga Benepisyo sang Regular nga Pangpamilya nga Pagsimba? Mangin suod kay Jehova ang mga nagapakigbahin sing bug-os tagipusuon sa matuod nga pagsimba. Isa pa, mangin mabakod ang pamilya nga nagasimba sing tingob. Nagsulat ang mag-asawa tuhoy sa ila mga pagpakamaayo: “Subong mga payunir nga wala sing bata, nalangkag gid kami sa amon Pangpamilya nga Pagsimba. Nangin suod pa gid kami sa isa kag isa kag sa aton langitnon nga Amay. Karon, kon magbugtaw kami sa adlaw sang amon pagtuon, nagasinilingay kami: ‘May ano gani kita karon sa gab-i? Pangpamilya nga Pagsimba!’”

¹² Makabulig man sa masako nga mga pamilya ang pangpamilya nga pagsimba. Nagsulat ang isa ka regular payunir kag nagasolo nga iloy nga may duha ka bata: “Indi regular ang amon pagtuon sang una. Halos wala kami nagatuon bangod kapoy ako. Indi ako kahibalo kon ano ang himuon ko. Gani nagsulat ako sa inyo para magpasalamat gid sa Pangpamilya nga Pagsimba. Nangin regular ang amon pangpamilya nga pagtuon kag nakabenepisyo gid kami.”

13. Paano makabenepisyo sing maayo ang imo pamilya sa sini nga kahimusan?

¹³ Kaangay sang Adlaw nga Inugpahuway, ang Pangpamilya nga Pagsimba aman sang aton langitnon nga Amay para buligan ang mga pamilya. (Sant. 1:17) Ang pagsunod sa Adlaw nga Inugpahuway nakabulig gid sa mga Israelinhon sa espirituwal. Sing kaanggid, kon ginapanginpuslan gid naton ang tion sa Pangpamilya nga Pagsimba, makabenepisyo gid ang aton pamilya. (2 Cor. 9:6; Gal. 6:7, 8; Col. 3:23, 24) Paagi sa pagsunod sa sini nga kahimusan, makasiling man ang imo pamilya kaangay sa salmista: “Apang maayo sa akon nga magpalapit sa Dios; ginhimo ko nga akon dalangpan ang Ginoong DIOS.”—Sal. 73:28.

[Blurb sa pahina 5]

Dapat indi mangin makatalaka ang Pangpamilya nga Pagsimba, ukon sobra ka serioso, kundi dapat ini mangin malipayon kaangay sang Dios nga aton ginasimba

[Kahon sa pahina 6]

TIPIGI

Mga Panugda Para sa Pangpamilya nga Pagsimba

Biblia:

• Tingob nga pagbasa sa semanal nga pagbasa sa Biblia. Kon posible, mahimo mangin manug-asoy ang isa, kag ang iban magabasa sa ginhambal sang iban nga karakter.

• Magdramadrama base sa isa ka danyag sa pagbasa sa Biblia.

• Mag-asayn sang mga kapitulo sa Biblia nga basahon sang tanan nga katapo sang pamilya kag pasulaton sila sing isa ukon duha ka pamangkot parte sa ila nabasa. Nian magpanalawsaw sila sing tingob parte sa ila mga pamangkot.

• Kada semana magpreparar sing kard nga may teksto kag panikasugan nga sauluhon kag ipaathag ini. Tipuna ini nga mga kard, kag repasuha ini kada semana para mahibaluan kon daw ano kadamo nga teksto ang inyo madumduman.

• Magpamati sing audio rekording nga pagbasa sa Biblia kag sundan ini sa inyo Biblia.

Miting:

• Tingob nga handaan ang isa ka bahin sang mga miting.

• Magpraktis sing mga ambahanon parte sa Ginharian nga naiskedyul sa masunod nga mga miting.

• Kon ang isa may bahin sa Teokratikong Eskwelahan Para sa Ministeryo ukon pasundayag sa Miting sa Serbisyo, hinun-anuni kon paano ini ipresentar, ukon i-rehearse upod sa imo pamilya.

Kinahanglanon sang Pamilya:

• Binagbinaga ang materyal sa libro nga Young People Ask ukon Magtuon Gikan sa Daku nga Manunudlo.

• Magpraktis kon paano atubangon ang mga sitwasyon nga mahimo mag-utwas sa eskwelahan.

• Magbuslanay sing papel ang ginikanan kag kabataan. Manalawsaw ang mga kabataan sing isa ka topiko kag nian gamiton niya ini sa pagpangatarungan sa ila mga ginikanan.

Ministeryo:

• Magpraktis sang mga presentasyon para sa paggua sa latagon sa Sabado kag Domingo.

• Hinun-anuni kon ano ang realistiko nga mga tulumuron sang pamilya para mapasangkad ang ila pagministeryo sa tion sang Memoryal ukon sira klase.

• Hatagi sing pila ka minuto ang kada katapo sang pamilya sa pagpanalawsaw kon paano sabton ang lainlain nga pamangkot nga mahimo mag-utwas sa ministeryo, kag nian ipasundayag ini.

Dugang nga Panugda:

• Tingob nga pagbasa sing isa ka artikulo sa bag-o nga mga magasin.

• Iasayn sing abanse sa tagsa ka katapo sang pamilya ang isa ka makawiwili nga artikulo sa bag-o nga mga magasin, kag ipareport ini sa tion sang pangpamilya nga pagsimba.

• Sing panalagsa, agdaha ang isa ka manugbantala ukon mag-asawa nga magbuylog sa inyo pangpamilya nga pagsimba kag ayhan interbyuhon sila.

• Tan-awa kag hinun-anuni ang isa sa aton mga video.

• Hinun-anuni sing tingob ang “Pamangkot sang mga Pamatan-on” ukon “Para Binagbinagon sang Pamilya” nga mga artikulo sa Magmata!

• Hinun-anuni sing tingob ang “Tudlui ang Inyo Kabataan” ukon “Para sa mga Pamatan-on” nga mga artikulo sa Ang Lalantawan.

• Basaha kag hinun-anuni ang isa ka bahin sang bag-o nga Tuigan nga Libro ukon publikasyon nga ginpagua sang nagligad nga distrito nga kombension.

• Pagkatapos sang kombension ukon asembleya, repasuha ang mga punto.

• Obserbahi ang mga tinuga ni Jehova kag hinun-anuni kon ano ang ginatudlo sini parte sa Iya.

• Tingob nga magbuhat sang isa ka proyekto, subong sang paghimuhimo sang mga kagamitan sang una, mapa, ukon tsart.