Report sang mga Manugbantala sang Ginharian

Mga Eksperiensia Gikan sa Tuvalu

ANG maayong balita sang Ginharian ginabantala sa matahom nga kapuluan sang Tuvalu, sa Bagatnan nga Pasipiko, kag maayong panaksi ang nahatag bisan sa mga tawo nga may mataas nga posisyon. Ang isa ka taga-Australia nga utod nga lalaki nga upod sa iya asawa nagaalagad sa paglakbay nga hilikuton sa Tuvalu nagasugid sa aton sang iya eksperiensia:

“Ang akon asawa kag ako gin-agda sa pagkaon sa puluy-an sang Primer Ministro sang Tuvalu. Ang okasyon amo ang pagduaw sang Minister for Foreign Affairs sang Australia. Sang nagakaon kami, ang akon asawa kag ako nakatigayon sing maayong kahigayunan sa pagpanaksi sa Australiano nga ministro kag sa iya asawa. Sang ginapakilala kami, ginsambit sang Primer Ministro ang dalayawon nga hilikuton nga ginahimo sang mga Saksi ni Jehova sa Tuvalu, labi na tuhoy sa pagbadbad sang aton literatura sa Tuvaluan nga hambal. ‘May kopya ako sang tanan nila nga publikasyon sa akon librarya, kag ekselente gid sila!’ siling niya. Ang ministro kag ang iya asawa interesado sa pagpamati tuhoy sa pag-uswag sang aton hilikuton sa Tuvalu.

“Sang gab-i na, nagtan-aw kami sing tradisyonal nga mga saot subong lokal nga kalingawan. Pagkatapos ginpalapitan kami sang Gobernador Heneral sang Tuvalu kag nagsiling sia nga sang nagligad nga semana ginduaw sia sa iya balay sang pila ka Saksi kag ginbilinan sing pila ka kopya sang mga magasin nga Ang Lalantawan kag Magmata! Natalupangdan niya sa likod sang isa sang mga magasin ang pasayod tuhoy sa New World Translation of the Holy Scriptures kag luyag niya mahibaluan kon paano sia makatigayon sini. Nagsiling kami nga malipay kami sa paghatag sa iya sing isa ka kopya. Sang masunod nga Domingo, nagkadto kami sa iya balay nga dala ang Biblia, kag maayo ang paghambalanay namon sa mga isa ka oras. Nagsiling sia nga ginaapresyar gid niya ang aton hilikuton kag ang aton mga publikasyon. Sa kamatuoran, sang mag-abot kami sa iya puluy-an, ang iya asawa nagabasa sang libro nga Mabuhi sing Dayon nga libro sa Tuvaluan. Gani nalipay gid kami sa pagpanaksi sa iban ‘nga yara sa mataas nga katungdanan.’ ”​—⁠1 Timoteo 2:​1-4.

Sa isa pa okasyon ang Primer Ministro sang Tuvalu nagduaw sa Solomon Islands. Ang komunidad sang mga taga-Tuvalu nga nagapuyo didto naghiwat sing piesta para sa iya kadungganan. Lakip sa mga gin-agda sa piesta amo ang isa ka utod nga babayi, nga nagreport sang masunod nga eksperiensia:

“Sang matapos ang piesta, ang Primer Ministro naghatag sing kahigayunan sa pagpamangkot nahanungod sa pinakaulihi nga mga hitabo sa Tuvalu. Ang isa ka pamangkot nga ginpamangkot amo, ‘May bag-o bala nga relihion sa Tuvalu?’ Ang Primer Ministro nagsabat nga ‘may yara pila ka bag-ong mga relihion nga gintugutan sa Tuvalu apang isa lamang ang maayo.’ Sang ginpamangkot kon ano yadto, sia nagsabat, ‘ang mga Saksi ni Jehova.’

“Nakibot ang tanan sa iya sabat, kag nag-utwas ang maathag nga pamangkot kon ngaa mga Saksi ni Jehova ang ‘lamang maayo nga relihion.’ Sia nagsiling: ‘Bangod ang aton mga pastor nagapungko sa puluy-an sa bug-os nga adlaw kag nagabagting lamang sang lingganay kon Domingo agod magkadto kita kag mamati sa ila. Apang ang mga Saksi ni Jehova aktuwal nga nagakadto sa inyo, kag bisan pa indi ka magkadto sa simbahan, tudluan ka nila nahanungod sa Biblia sa imo puluy-an.’ ”

Gani, bisan pa ginamulay sang iban ang aton pagministeryo sa mga ganhaan, maathag nga ginaapresyar sang iban ang aton pagdala sing mensahe sa ila mga puluy-an.​—⁠Binuhatan 5:⁠42.