Ang Inyo Apresasyon Para sa Kamatayon ni Cristo
1 Wala na sing iban nga tawo nga nagkabuhi ang makahimo sang ginhimo ni Jesucristo para sa katawhan. (Mat. 20:28) Paagi sa iya pagkabuhi kag sa iya kamatayon, may kahigayunan kita nga makabaton sing pinakadaku nga dulot nga matigayon sang bisan sin-o, ang kabuhi nga walay katapusan. Apang, ang kalabanan nga mga tawo diutay lamang ang apresasyon sa ginhimo ni Cristo.
2 Binagbinaga ang pagkasumalang ni Jesus sa napulo ka aruon. Bisan ang tanan nga napulo gin-ayo ni Jesus, isa lamang ang nagbalik kay Jesus agod magpasalamat. Ang siam pa nga iban? Nagpadayon sila sa paglakat nga wala gid magpasalamat sa nagbulig sa ila. (Luc. 17:15-17) Sin-o ang aton ginalaragway? Luyag naton nga mangin kaangay sang tawo nga nagpakita sing matuod nga apresasyon.
3 Pagpakita sang Aton Apresasyon: Kada tuig ang Sosiedad nagapanugda nga basahon ang espesipiko nga mga bersikulo sa Biblia sa semana sang Memoryal. Makita ini sa aton kalendaryo sa ubos sang mga petsa nga Abril 1-6 kag subong man sa ubos sang Mga Pahibalo sa sining Ang Aton Ministeryo sang Ginharian. Sarang naton mapakita ang aton apresasyon paagi sa pagbasa kag sa pagpamalandong sa sining mga bersikulo.
4 Ang aton pag-alagad sa latagon may kaangtanan sa apresasyon para sa Memoryal. Masami nga isa ini ka bulan nga ang linibo nagapakigbahin sa pag-auxiliary payunir. Sang nagligad nga Abril 17,009 ang nakigbahin diri sa Pilipinas. Mahimo bala ninyo ini sini nga Abril? Kon wala kamo makapayunir, magplano nga dugangan ang inyo bahin sa pagbantala nga hilikuton samtang ginatugot sang kahimtangan.
5 Pabakura ang Apresasyon sa Iban: Kada tuig sa Memoryal, madamong interesado ang nagatipon kaupod naton. Halimbawa, sa 360,297 nga nagtambong sa Memoryal sang nagligad nga tuig, kapin sa 245,000 ang mga interesado.
6 Sa paggamit sang naimprinta nga mga imbitasyon sang Sosiedad, buligi ang mga interesado nga mahangpan kon ngaa ginpatok ang Memoryal, kon sin-o ang nagapakigbahin sa mga emblema, kag kon ano ang ginalaragway sang mga emblema. (1 Cor. 11:23-26) Subong man, ipaathag ang paglaum sadtong nagapakigbahin kag sadtong mga nagapanilag nga wala nagapakigbahin. (Juan 10:16; Bug. 14:3, 4) Magabulig ini sa ila nga mahangpan nga ang tanan kinahanglan ‘magtuo’ kag nga ang pagtambong lamang sa Memoryal sing makaisa sa tuig indi bastante.—Juan 3:16.
7 Ang Memoryal sang kamatayon ni Cristo pinasahi gid nga hitabo. Paagi sa maayo nga paghanda para sa sini, ginapakita naton nga ginaapresyar gid naton ang tanan nga ginhimo ni Jehova kag ni Cristo para sa aton.