Nadumduman Mo Bala?

Nalipay ka bala sa pagbasa sang nagligad nga mga guwa sang Ang Lalantawan? Kon amo, wala sing duhaduha nga mawili ikaw sa pagdumdom sang masunod:

▫ Anong makakombinsi nga pamatuod ang ginhatag sang nanuhaytuhay nga mga pagpanghikot sang balaan nga espiritu sang unang siglo? Ining mga pagpanghikot naghatag sing kitaon nga pamatuod nga wala na ginagamit sang Dios ang 1,500 anyos nga kongregasyon sang Israel subong iya pinasahi nga katawhan, kundi ang iya kahamuot yara na karon sa bag-ong Cristianong kongregasyon, nga gintukod sang iya bugtong nga Anak. (Ipaanggid ang Hebreo 2:2-4.)—8/15, pahina 5.

▫ Ano ang kabangdanan sang tumalagsahon nga pag-uswag sang mga Saksi ni Jehova? Una sa tanan, bangod ini sang pagpakamaayo sang Dios. Hilikuton ini sang Dios. Ang ginatudlo sang mga Saksi ni Jehova sa ila pag-ebanghelyo nga hilikuton napasad sa Biblia. Ang isa pa ka sekreto sang ila kadalag-an amo ang ila bug-os nga pagkilala kay Cristo Jesus subong tinangdo nga Ulo sang Cristianong kongregasyon.—9/1, pahina 19.

▫ Ngaa ginpakitaan ni Jehova si David sing kaluoy may kaangtanan sa iya daku nga sala upod kay Bat-seba? Bangod ini labi na sang katipan para sa Ginharian nga ginhimo sang Dios kay David, apang bangod man ini sang pagkamaluluy-on ni David mismo kag sang iya matuod nga paghinulsol. (1 Samuel 24:4-7; 2 Samuel 7:12; 12:13; Salmo 51:1, 2, 17)—9/15, pahina 10, 11.

▫ Anong tatlo ka sahi sang pamatuod ang ginahatag sang Cristianong Griegong Kasulatan bilang panakdag sa pagka-Mesias ni Jesus? Ang linya sang kaliwatan ni Jesus amo ang una nga pamatuod. (Mateo 1:1-16; Lucas 3:23-38) Ang isa pa ka pamatuod amo ang natuman nga tagna. Madamo gid sing tagna, subong sang masapwan sa Daniel 9:25, ang nagapakilala kay Jesus subong ang Mesias. Ang ikatlo nga pamatuod amo ang testimoniya sang Dios mismo; ginhatag niya ini sa tatlo ka okasyon paagi sa iya kaugalingon nga tingog. (Mateo 17:5; Lucas 3:21, 22; Juan 12:28)—10/1, pahina 10, 12.

▫ Ano ang buot silingon ni Jesus sang magsiling sia, subong sang narekord sa Mateo 24:37: “Subong sang mga adlaw ni Noe, amo man sa pag-abot sang Anak sang tawo”? Si Noe nagatukod sing arka kag nagapaandam sa malauton sa sulod sang mga dekada antes mag-abot ang Anaw kag naglaglag sa malaut nga sistema sang kalibutan. Subong man, ang dikitaon nga pag-abot ni Cristo magadugay sing pila ka dekada, nga sa sini nga tion ang tugob-globo nga panaksi ginhatag, antes ini magadangat sa putukputukan sa isa ka dakung kalaglagan.—10/1, pahina 16.

▫ Ano ang pila sang kinahanglanon nga mga butang para sa isa ka maayong pangpamilya nga pagtuon sa Biblia? Dapat baklon ang tion para sa pagtuon. Indi naton dapat tugutan ini nga buslan sang TV ukon iban pa nga mga dibersion. Ang partikular nga mga kinahanglanon sang pamilya dapat binagbinagon. Gamita ang punto-de-vista nga mga pamangkot agod mapat-od nga nahangpan sang kabataan ang ila ginatun-an. (Mateo 17:25) Hupti nga matawhay ang espiritu. Mangin mapagsik, kag ilakip ang tagsatagsa sa pagtuon.—10/15, pahina 17.

▫ Dapat mangin ano ang kabalaka sang mga Cristiano nga basi gindugangan sing mga elemento sang dugo ang pagkaon? Dapat magbantay ang mga Cristiano nga matublag sang posibilidad lamang ukon kunokuno, kag kinahanglan ang pagkarasonable bisan sa pag-usisa sang mga etiketa ukon sa pagpamangkot sa mga manug-ihaw. Apang, kon nahibaluan nga ang dugo lapnag nga ginagamit sa lokal—sa pagkaon ukon sa medikal nga pagpamulong—dapat mangin mahalungon ang mga Cristiano nga ginatuman nila ang sugo sang Dios nga maglikaw sa dugo. (Binuhatan 15:28, 29)—10/15, pahina 30-1.

▫ Paano ginapadaku sang tulun-an sang Hulubaton ang espirituwal nga kadalumon sang mga metodo sa pagpanudlo nga gingamit sa Israel? Ginapakita sang tulun-an sang Hulubaton nga ang katuyuan sini amo ang pagtudlo sa “mga wala sing eksperiensia” sing mataas nga mga butang subong sang kaalam, disiplina, paghangop, paghantop, paghukom, pagkamainandamon, ihibalo, kag ikasarang sa paghunahuna—ang tanan sa “pagkahadlok kay Jehova.” (Hulubaton 1:1-7; 2:1-14)—11/1, pahina 12.

▫ Anong balanse nga pagtamod sa edukasyon ang dapat huptan sang mga pamatan-on karon? Dapat kabigon sang mga Cristiano ang edukasyon subong paagi padulong sa tulumuron. Ang ila katuyuan sa sining katapusan nga mga adlaw amo ang pag-alagad kay Jehova sing daku kag epektibo nga mahimo sa bug-os tion nga pag-alagad kon masarangan nila.—11/1, pahina 18.

▫ Ngaa ginpatuman ni Jehova sa pungsod sang Israel ang pagbayad sing ikapulo? Una, agod mapakita nila sa materyal nga paagi ang ila apresasyon sa kaayo ni Jehova. Ikaduha, agod makabulig sila sa pagsakdag sa mga Levinhon, nga makakonsentrar man sa ila mga obligasyon, lakip ang pagtudlo sing Kasuguan. (Tan-awa ang 2 Cronica 17:7-9.)—12/1, pahina 9.

▫ Ano nga ikapulo ang ginaagda sa mga Cristiano nga dalhon? (Malaquias 3:10) Ang ikapulo nagarepresentar sa bahin sang aton mga butang nga ginadala naton kay Jehova ukon ginagamit sa pag-alagad sa iya. Tanda ini sang aton gugma sa iya kag sang aton pagkilala nga iya kita.—12/1, pahina 15.