Ano ang Himuon Naton sa Sining Tuig sang Pag-alagad?
1 Samtang nagasulod kita sa 1994 nga tuig sang pag-alagad, nagakaigo nga tion karon para sa aton tanan subong katawhan ni Jehova nga ipatudok sing maathag sa aton hunahuna kon ano ang luyag naton nga himuon subong mga indibiduwal kag subong isa ka organisasyon sa sining bag-ong tuig sang pag-alagad.
2 Magpadayon nga Nagatubo sa Espirituwal: Kon bag-o lang kita sa kamatuoran, luyag naton nga maglig-on sa pagtuo. (Heb. 6:1-3) Kon malig-on na kita sa espirituwal, indi lamang nga dapat naton buligan ang mga bag-uhan kag ang iban kundi dapat man naton talupangdon ang aton kaugalingon nga espirituwalidad, wala gid nagabatyag nga may yara kita sang tanan nga kinahanglanon nga ihibalo sa Biblia kag eksperiensia sa Cristianong pagkabuhi. Ginabinagbinag bala naton ang adlaw-adlaw nga teksto, ginasundan ang programa sa pagbasa sa Biblia nga ginhatag sa Theocratic Ministry School Schedule, kag ginahandaan ang Pagtinuon sa Libro sang Kongregasyon kag Pagtinuon sa Lalantawan? Ina dapat ang pinakamanubo nga tulumuron naton tanan. Dapat kita magpadayon sa pagtubo sa espirituwal kon luyag naton makalampuwas sa pagkalaglag sining malauton nga sistema sang mga butang kag maamligan pasulod sa bag-ong kalibutan sang Dios.—Ipaanggid ang Filipos 3:12-16.
3 Magpabilin nga Matinlo sa Espirituwal: Agod mangin bug-os nga kalahamut-an sa atubangan ni Jehova, dapat kita natinluan sang “tanan nga kadagtaan sang lawas kag espiritu.” (2 Cor. 7:1) Kon natinluan na, ngaa luyag pa naton nga ‘magtubog [liwat] sa lunang’ sining malauton nga daan nga kalibutan? (Ipaanggid ang 2 Pedro 2:22.) Dapat kita mangin determinado nga magpabilin nga malig-on kag matinlo sa espirituwal. Nian indi kita mangin ignorante sa malaut nga mga padugi ni Satanas kag masulay, mahulog sa sala kag mapahilayo sa kahamuot ni Jehova.—2 Cor. 2:11.
4 Pamatii ang Maalamon nga Laygay: Ang Hulubaton 15:22 nagasiling: “Sa kadam-an sang mga manuglaygay may hinimuan.” Apang, dumduma nga ang tawo nga nagpamulong sina, si Solomon, nagtugot sang ulihi ‘sa iya mga asawa nga patalangon ang iya tagipusuon sa pagsunod sa iban nga mga dios’ bangod wala niya pagpamatii ang laygay sang Dios nga indi magkuha sing dumuluong nga mga asawa. (1 Hari 11:1-4) Gani kon indi naton pagpamatian sing personal ang maalamon nga laygay, paano kita makapaabot nga mangin epektibo sa pag-alagad kay Jehova ukon makapahamtang sing halimbawa nga takus ilugon? (1 Tim. 4:15) Ang laygay sang Biblia magabulig sa aton nga amligan ang aton tagipusuon. (Hulu. 4:23) Ang paghigugma sa ginahigugma ni Jehova, pagdumot sa ginadumtan niya, dalayon nga pagpangita sang iya panuytoy kag paghimo kon ano ang kalahamut-an sa iya pat-od gid nga pangamlig.—Hulu. 8:13; Juan 8:29; Heb. 1:9.
5 Ang aton pagsimba kay Jehova indi lamang isa ka dagway sang diosnon nga debosyon kaangay sang iya sang nagaangkon nga mga Cristiano sa kalibutan, kundi mapagsik, aktibo, kag buhi nahisuno sa kamatuoran sang Pulong sang Dios.—Juan 4:23, 24.
6 Ang aton determinasyon nga himuon ang kabubut-on sang Dios mahimo tilawan sa adlaw-adlaw. Dapat kita mapalig-on sang ihibalo nga si Jehova nagapabakod sa aton. (1 Ped. 5:9, 10) Busa mahimo naton sing bug-os ang aton ministeryo sa 1994 nga tuig sang pag-alagad.—2 Tim. 4:5.