Pagsugod sing mga Pagtuon sa Biblia sa Puluy-an
1 Ang isa sang labing makaalayaw nga mga eksperiensia para sa matuod nga mga Cristiano amo ang pagtudlo sa isa sang kamatuoran paagi sa pagtuon sa Biblia sa puluy-an. Apang, mahimo nga ang iban wala nagahimo sini nga bahin sang ministeryo bangod nagabatyag sila nga indi makasarang sa pagsugod kag sa pagdumala sing pagtuon sa Biblia. Madamong manugbantala kag payunir ang nagbatyag anay sing subong sina. Apang, paagi sa pagsalig kay Jehova kag paagi sa pag-aplikar sang mga panugda gikan sa Ang Aton Ministeryo sa Ginharian, natun-an nila kon paano sugdan kag dumalahan ang mga pagtuon sa Biblia. Matigayon mo man ang amo nga tulumuron.
2 Paggamit sing Direkta nga Paagi kag sing mga Tract: Ang isa sang pinakamahapos nga paagi sa pagsugod sing pagtuon amo ang direkta nga paagi. Ang kinahanglan lamang sang iban nga mga tawo amo ang mainit nga pangagda nga magtuon sa Biblia. Sarang ini mahimo paagi lamang sa pagpamangkot sa tagbalay: “Luyag mo bala nga may yara personal nga pagtuon sa Biblia sa puluy-an kag madugangan ang imo ihibalo sa Biblia kag sa katuyuan sang Dios sa duta?” Ukon masugiran mo ang tagbalay nga malipay ka sa pagpasundayag kon paano ginahimo ang isa ka pagtuon sa Biblia sa puluy-an. Hunahunaa ang kalipay mo nga makakita sing isa nga magabaton sini!
3 Ang isa pa ka paagi sa pagsugod sing pagtuon sa Biblia amo ang paggamit sing isa sang aton mga tract. Paano masugdan ang pagtuon sa isa ka tract? Paagi lamang sa paghatag sa tagbalay sing tract nga sa banta mo magawili sa iya. Nian, agdaha ang tagbalay nga basahon ang unang parapo upod sa imo. Pangitaa ang mga kasulatan nga ginsitar, kag ipaathag kon paano ini naaplikar sa materyal. Sa nahauna nga pagduaw, ayhan mabinagbinag ninyo ang isa ukon duha lamang ka parapo. Kon maapresyar na sang tagbalay ang ginatun-an niya, ayhan mapalawig mo ang tion nga ginahinguyang ninyo sa inyo paghambalanay.
4 Paggamit Lamang sang Biblia: Kon kaisa ang tawo sugot makighinun-anon sa Biblia apang daw nagapang-alag-ag sa pagbaton sing pormal nga pagtuon ukon sa paggamit sing isa sang aton mga publikasyon. Sa gihapon mahimo ka makasugod kag makadumala sing pagtuon sa Biblia paagi sa paghanda sing makawiwili nga mga paghambalanay sa Kasulatan pasad sa mga bahin sang Mabuhi sing Dayon nga libro ukon sa Reasoning nga libro apang ginagamit lamang ang Biblia kon nagaduaw sa interesado. Ina nga paghambalanay mahimo nga magalawig sing 15 ukon 20 minutos, ukon sing malawig pa, depende sa mga sirkunstansia. Kon ginahimo sing regular kag paagi sa progresibo nga paagi sang pagpanudlo sang kamatuoran sang Biblia, nakasugod ka na sing isa ka pagtuon sa Biblia, kag mahimo mo ini mareport. Kon ang tion nagakaigo, ipakilala ang Mabuhi sing Dayon nga libro, kag magdumala sing pormal nga pagtuon sa sini.
5 Dugang sa pagpangita sing mga kahigayunan sa ministeryo sa latagon, napanikasugan mo na bala ang magsugod sing mga pagtuon sa Biblia upod sa mga kaingod, mga kaupdanan, ukon mga katapo sang pamilya? Madugay na bala ini nga nakaligad? Natilawan mo bala liwat ini sining karon lang? Kon ang isa ka paagi wala magmadinalag-on, nabinagbinag mo bala ang pagtilaw sing lain pa?
6 Mahimo ka magmadinalag-on sa pagsugod sing mga pagtuon kon ginaaplikar mo ang mga panugda nga ginhatag, kag magsalig kay Jehova sa iya pagpakamaayo. Kabay nga magadugang ang imo kalipay paagi sa pagsugod kag sa pagdumala sing mga pagtuon sa Biblia sa puluy-an.