Gamita sing Maayo ang mga Magasin
1 Sa pagduaw mo sa newsstand, makita mo ang madamong magasin nga nagahinun-anon sang tanan nga butang halin sa komiks tubtob sa sientipiko nga teknolohiya. Indi mo gid mabasa ini tanan. Samtang ang pila ka magasin may mapuslanon nga impormasyon, ang kalabanan may mapangduhaduhaan nga kabilihanan.
2 Kabaliskaran gid kon ipaanggid sa Magmata! Ini nga magasin gin-aman sa pag-usisa kag sa pagpahayag sang kamatuoran nga sarang magamit para sa kaluwasan sang tanan nga nagahulag sa gugma sang Dios.
3 Epektibo nga malab-ot sang Magmata! ang tanan nga sahi sang mga tawo bangod sang daku nga kasangkaron kag nanuhaytuhay nga mga artikulo sini. Subong sang ginapaathag sa pahina 4 sang tagsa ka guwa, ini “para sa kasanagan sang bug-os nga pamilya.” Nagahinun-anon ini sang mga artikulo tuhoy sa lainlain nga mga topiko, nga nagalakip sa tawo, relihion, kag siensia. Ginausisa sini indi lamang ang kadaygan kag ginapakita ang matuod nga kahulugan sa likod sang karon nga mga hitabo. Labaw sa tanan, “nagapalig-on [ini] sing pagsalig sa saad sang Manunuga tuhoy sa isa ka malinong kag may kalig-unan nga bag-ong kalibutan.”
4 Sa Oktubre ipatuhoy naton ang igtalupangod sa Magmata! nga magasin sa aton pag-alagad sa latagon. Ang tulumuron naton amo ang pagpasuskriber sa sining magasin agod yadtong mga interesado direkta nga makabaton sini sing regular paagi sa koreo.
5 Ang Oktubre 8 nga guwa sang Magmata! nagahinun-anon sang topiko nga “Amligi ang Inyo mga Anak.” Madamong panimalay karon ang may mga problema may kaangtanan sa ila mga anak kag malipayon nga magabaton sang suno-sa-tion nga laygay nga nalakip sa magasin. Tuhoy sa Oktubre 22 nga guwa, may magapamati sa aton paagi sa pagpatalupangod sang artikulo nga “Is a New World Near?”
Mga Presentasyon nga Nagapukaw sing Interes
6 Sa tapos mapakilala ang imo kaugalingon, mahimo ka makasiling:
◼ “Madamong ginikanan karon ang nabalaka tuhoy sa mga problema nga ginaatubang sang ila mga anak. Nagapati ka bala nga matuod ini karon? [Pasabta sia.] Ano sa banta mo ang labing maayo nga panuytoy para sa mga ginikanan karon? Yari sa Oktubre 8 nga guwa sang Magmata! ang pila ka praktikal nga mga panugda kon paano lubaron ining mga problema.” Nian buksi ang magasin kag ipakita ang mga artikulo tuhoy sa “Amligi ang Inyo mga Anak.”
7 Ukon ayhan makasiling ka:
◼ “Ano ang masiling mo sa palaabuton nga isa ka bag-ong sistema diin ang tanan nga inaway kag kagamo dulaon? [Pasabta sia.] Agod ipakita sa imo nga indi lamang ini isa ka dalamguhanon may dala ako nga magasin (Oktubre 22 nga guwa) nga nagapaathag sining makadalayaw nga paglaum gikan sa punto-de-vista sang Biblia.” Nian mahimo mo buksan ang artikulo nga natig-uluhan: “Is a New World Near?”
8 Luyag naton mangin positibo sa aton pagpalapit kon nagatanyag sing Magmata! sa mga tawo. Kombinsido kita sa kabilihanan sini. May dala kita nga butang nga maayo, kag luyag naton ini ipaambit sa iban.—Hulu. 3:27.