Buligi ang Katulad-Karnero nga Katawhan sa Pagtukod sing Malig-on nga Sadsaran
1 Ang pagtukod sing balay nagakinahanglan sing mahalungon nga pagplano kag nahunahuna sing maayo nga panikasog. Sa tapos madesinyo ang balay, ang lugar nga patindugan dapat ihanda kag ang malig-on nga pundasyon ipasad. Ang proyekto amat-amat nga makita tubtob bug-os ini nga mahuman. Sa kaanggid, dapat naton buligan ang katulad-karnero nga katawhan sa pagtuon sang kamatuoran sing progresibo. Ginapanikasugan naton nga pukawon ang interes sa nahauna nga pagduaw. Pagkatapos sina, nagaduaw liwat kita, nagapasad sang pundasyon paagi sa pagtudlo sing sadsaran nga mga kamatuoran nahanungod sa Dios kag sa iya katuyuan para sa katawhan.—Luc. 6:48.
2 Sa bulan sang Nobiembre igatanyag naton ang “Mabuhi sing Dayon” nga libro sa mga interesado. Indi lamang ang pagpahamtang sing literatura ang tulumuron naton kundi kon may nabilin kita sa tawo, ayhan isa ka tract ukon iban pa nga publikasyon mangin interesado kita sa pagbalik agod makatukod sa ginpasad nga pundasyon. Sa pagbalik naton luyag naton nga may yara kita nahunahuna nga espesipiko nga mga punto, kag progresibo nga ipasad ang pundasyon. Sa tagsa ka pagduaw ang ihibalo sang tagbalay nagatubo kag ang iya pagtuo sa Dios nagadugang.
3 Kon nakapahamtang ka sing “Mabuhi sing Dayon” nga libro ayhan makasiling ka sa pagbalik mo:
◼ “Nalipay gid ako nga maabtan ka sa imo puluy-an. Ayhan nadumduman mo nga sadtong nagligad nga paghambalanay naton, ginhambalan naton ang nagausmod nga interes sa Dios sa aton lugar. Maathag nga ginapakita sang Biblia nga ang Dios interesado sa katawhan kag nga ang mga matarong pakamaayuhon paagi sa iya Ginharian. [Basaha ang Mateo 6:9, 10.] Paagi sa sining Ginharian, ang pagkamatarong kag katarungan magamadinalag-on.” Basaha ang Isaias 11:3-5, kag nian iliso ang igtalupangod sang tagbalay sa nahaunang duha ka parapo sang kapitulo 1 sang Mabuhi sing Dayon nga libro. Ipasundayag kon paano ang materyal mahimo tun-an.
4 Kon ang Mahidaiton nga Bag-ong Kalibutan nga tract ang napahamtang sa nahauna nga pagduaw, ang pangunang mga punto nga ginbinagbinag sang nagligad, mahimo marepaso. Ipadaku nga agod magkabuhi sa bag-ong kalibutan, dapat kita magkuha sing sibu nga ihibalo. Basaha ang Juan 17:3. Ipaathag nga pagkatapos makuha ina nga ihibalo, dapat naton himuon ang kabubut-on sang Dios. Basaha ang 1 Juan 2:17. Iliso ang igtalupangod sang tagbalay sa espesipiko nga mga punto gikan sa pahina 5 sang tract.
5 Kon tuhoy sa pamilya nga pagkabuhi ang ginpatalupangod mo sang napahamtang mo ang “Mabuhi sing Dayon” nga libro, sa pagbalik mo, mahimo ka makasiling:
◼ “Sang nagligad nga pagduaw ko, ginhambalan naton ang tuhoy sa pamilya nga pagkabuhi. Nag-ugyunay kita nga agod matigayon ang malipayon nga pagkabuhi sa pamilya, ang mga panuytoy nga masapwan sa Biblia dapat sundon. Ano sa banta mo ang kinahanglan agod magmadinalag-on ang pag-asawahay?” Pahanuguti sia sa pagsabat. Ipatalupangod ang espesipiko nga mga punto gikan sa impormasyon nga nabalay sa pahina 243-6 sa Mabuhi sing Dayon nga libro. Pangabaya ang komento sang tagbalay tuhoy sa mga ilustrasyon kag binagbinaga ang pinili nga mga punto kon nagakaigo.
6 Kon ibilin mo ang Magkalipay sa Pagkabuhi Subong Pamilya nga tract, sa pagbalik mo repasuha ang yabi nga mga prinsipio sa Biblia nga ginbalay sa pahina 4 kag 5. Kon ginpakita ang interes, itanyag ang Mabuhi sing Dayon nga libro. Ipakita ang kapitulo 29, “Paghimu nga Madinalag-on sa Pagkabuhi sang Pamilya,” kag ipakita kon paano ini mabinagbinag upod sa tagbalay kag sa iya pamilya.
7 Kita tanan dapat makigbahin sing tayuyon sa paghimo sing mga pagduaw liwat. Tatapa ang tanan nga interes nga ginpakita paagi sa paghimo sing epektibo nga mga pagduaw liwat sa Nobiembre.