Mangin Bug-os Kalag sa Inyo Pag-alagad

¹ Subong mga disipulo ni Jesus, gintangduan kita nga ibantala ang maayong balita sang Ginharian sang Dios kag maghimo sing mga disipulo ni Jesucristo. (Mat. 24:14; 28:​19, 20) Wala na sing iban pa nga hilikuton sa sining duta nga mapaanggid sa pagkahilingagawon ukon pagkaimportante sini. Ang kabuhi sang minilyon ka tawo nadalahig. Nagakabagay ini sang aton pinakamaayo gid nga panikasog. Ang laygay ni Pablo maaplikar gid: “Bisan ano ang inyo himuon, himua ini sing bug-os kalag kay Jehova.” (Col. 3:23) Ang “bug-os kalag” ginasaysay subong may “mainit nga kapagsik ukon isa sing hunahuna nga debosyon.” Bug-os kalag bala kamo sa inyo pag-alagad?

² Ano ang ginakinahanglan sa aton sang pagkabug-os kalag? Ginapatuhuyan ni Jehova ang kalahamut-an nga pag-alagad subong ikapulo, ukon ikanapulo nga bahin. (Mal. 3:10) Sa baylo nga magtalana sing espesipiko nga kantidad, ang ikanapulo nga bahin nagalaragway sa tion kag panikasog nga ginahugod naton sa pag-alagad kay Jehova subong pagpakita sang aton gugma sa iya kag bilang pagkilala sa aton debosyon sa iya. (l92 12/1 p. 15) Ang aton hilikuton dapat magapabanaag sing pagkatudok sang aton debosyon kag gugma kay Jehova. Ang tawo nga bug-os kalag nagabatyag nga ginatiklod sa pag-alagad kay Jehova sing bug-os kon mahimo tubtob sa ginatugot sang iya panglawas kag kahimtangan.

³ Gindayaw ni Pablo ang mga Cristiano nga “nagapangabudlay sing lakas kag nagapanikasog” pasad sa paglaum. (1 Tim. 4:10) Ginapadyaan sila sing pagpakamaayo ni Jehova, nga ‘nagapamanggad sa ila.’ (Hulu. 10:22) Sa kabaliskaran, yadtong nagahatag sing maiwat ukon sing paganot wala nagaagom sing kalipay nga matigayon paagi sa paghatag. (Binu. 20:35) Ang indi paghatag sang aton pinakamaayo aktuwal nga nagakawat kay Jehova sang “ikapulo” nga nagakaigo sa iya.​—Mal. 3:8.

⁴ Paghatag sang Aton Pinakamaayo: Kon nagapakigbahin kita sa pag-alagad sa latagon kag nagahatag sang aton report, husto bala ang report? Ang Aton Ministeryo nga libro, pahina 104, nagasiling: “Ang imo oras sa pag-alagad sa latagon dapat magsugod kon ginsugdan mo ang imo hilikuton sa pagpanaksi kag natapos kon mag-untat na sa ulihi nga pagduaw sa tagsa ka panag-on sang pagpanaksi. Ang panahon nga ginhinguyang sa pagpabugnaw ukon pagkaon sa tion sang pag-alagad indi dapat isipon.” Ang maayo nga pagplano kag panikasog kinahanglanon agod mahimo ang pinakadaku sa tion nga nagaalagad kita sa latagon.

⁵ Ang paghatag sang aton pinakamaayo nagakahulugan nga ginahimo naton ang aton bug-os nga masarangan kon nagaguwa sa latagon. Ang isa nga bug-os kalag indi matinuyuon nga magalatid sang iya pagbantala sa talagsa nga panikasog nga makapanaksi sing dipormal sa baylo nga makigbahin sa pamalaybalay nga hilikuton. Ang bug-os kalag, pamatan-on, dibawtismado nga manugbantala indi magaguwa sa latagon bangod lamang sang pagpamilit sang iya mga ginikanan, nagapakita sing diutay nga interes sa pagduaw sa mga ganhaan ukon sa pagpakigbahin sa paghatag sing panaksi.

⁶ Si Pablo nagalaygay sa aton nga huptan ang aton kapisan agod indi mangin matamad. (Heb. 6:​11, 12) Daw ano nga kalipay repasuhon ang aton personal nga pag-alagad kag wala sing rason nga magkahuya​—bangod bug-os kalag kita! (2 Tim. 2:15) Ang aton pinakadakung kalipay matigayon kon makita naton sa tunga sang mga makalampuwas sa dakung kapipit-an yadtong personal nga ginbuligan naton. Sing pat-od, si Jehova bugana nga magapadya sadtong nagaalagad sa iya sing bug-os kalag.