Bag-ong Programa sang Pinasahi nga Adlaw nga Asambleya
1 Ginpasangkad sang aton pagtuon sa Ang Pinakabantog nga Tawo nga Nagkabuhi ang aton apresasyon kay Jesucristo. Sing nagakaigo, ang programa sang pinasahi nga adlaw nga asambleya sugod sa Marso may yara tema nga “Pagsunod sing Suod sa Aton Dakung Huwaran,” nagabulig sa aton nga mahangpan sing lubos pa kon ano ang buot silingon sang pagsunod sa iya.
2 Walay sapayan sang edad ukon tinuig sa kamatuoran, ang tanan nga nagatambong sa asambleya mapalig-on nga labi pa nga mangin kaangay ni Cristo. Ang bahin sang programa magalakip sang laygay ilabi na para sa mga pamatan-on. Magasangkap ini sa ila sa pag-atubang sa mga hangkat may kaangtanan sa edukasyon, kalingawan, kag materyalismo. May mga pamulongpulong, mga eksperiensia, kag mga pasundayag nga nagapadaku kon paano batuan ang impluwensia sang kalibutan kag sundon si Cristo.—1 Ped. 2:21.
3 Ang bag-ong dedikado nga mga tawo may yara kahigayunan nga magpahayag sing dayag paagi sa pagpabawtismo nga sila mga sumulunod ni Cristo. Ang makapulukaw nga Makasulatanhon nga paghinun-anon sa tema magauna sa seremoniya sa bawtismo. Yadtong luyag magpabawtismo sa pinasahi nga adlaw nga asambleya dapat magsugid sang ila handum sa ila nagadumala nga manugtatap nga may bastante nga tion agod mahimos niya ang mga gulang nga magarepaso sang gintalana nga mga pamangkot para sa mga kandidato sa bawtismo.
4 Ang dumuluong nga humalambal, kon may yara, magahatag sang pangunang pamulongpulong, nga natig-uluhan “Pagsunod sa Aton Daku nga Huwaran—Sa Ano Kita Ginatuytuyan?” Pat-ura nga agdahon ang tanan nga interesado sa sining makapalig-on kag makapabakod sing pagtuo nga programa. Wala na sing daku pa ukon mas makapaladya nga dalanon sangsa pagsunod sa aton Dakung Huwaran, nga si Jesucristo.—Mat. 19:27-29.