Buligi Sila nga Maghikot Suno sa Mensahe

¹ Ang aton pagbantala nga hilikuton nagahatag sa mga tawo sing kahigayunan nga ‘makabati sang mga pulong sang tagna sang Bugna.’ (Bug. 1:3) Apang agod makalampuwas sila sa “dakung kapipit-an,” dapat man sila maghikot suno sa sini. (Bug. 7:14) Nadalahig ang kabuhi! Gani pat-ura nga balikan ang mga nagpakita sing interes.

² Kon nakabilin ka sing “Revelation” nga libro, mahimo ka makasiling:

◼ “Maayo nga makita ka liwat. Sang nagligad nga paghambalanay naton, ginhambalan naton ang nahanungod sa mga tagna sa Bugna, kag ginbilin ko sa imo ang isa ka publikasyon nga nagapaathag sini. Ayhan natalupangdan mo nga bisan nga ang tulun-an sang Bugna madalom, mahimo ini mahangpan sa kapawa sang mga hitabo sa karon nga mga adlaw. Luyag ko ipaathag sa pila ka minuto ang ginasiling sang Biblia nahanungod sa panahon naton.” Nian magliton sa publikasyon nga sarang mo magamit sa pagsugod sing isa ka pagtuon sa Biblia.

³ Kon nakabilin ka sing tract nga “Ini Bala nga Kalibutan Makalampuwas?” sa nahauna nga pagduaw, mahimo mo masiling ini:

◼ “Nalipay ako nga maabtan ka sa imo puluy-an karon. Sang ginduaw ko ikaw sining karon lang, ginhambalan naton ang nahanungod sa isa ka tanda nga mahanabo antes gid sang katapusan sang kalibutan. [Repasuha ang nagakaigo nga mga bahin sang tanda sa Mateo 24:​3-14.] May natalupangdan ka bala nga hitabo sining karon lang sa kalibutan nga ayhan katumanan sang bahin sina nga tanda?” Nagagamit sang mga ilustrasyon sa kapitulo 16 sang Revelation nga libro, magkomento sa katumanan sang pila sining mga tagna sa Biblia.

⁴ Kon gin-agda mo ang tagbalay sa Memoryal, magsiling:

◼ “Sang nagligad ko nga pagduaw sa imo, ginhambalan naton kon daw ano ka importante ang kamatayon ni Jesus sa katawhan. Gin-agda ko man ikaw nga magtambong sa Memoryal sang iya kamatayon, nga pagasaulugon sang mga Cristiano sa bug-os nga kalibutan sa Marso 26. Nagkari ako karon agod ipahanumdom sa imo nga ginaagda ka sa sinang importante nga hitabo. [Ihatag ang oras kag lugar nga hiwatan sang selebrasyon.] Makabulig ini sa imo sa pag-apresyar sang pagkaimportante sang okasyon kon repasuhon naton ang pila sa mga pagpakamaayo nga ginaagom naton karon subong resulta sang ginhimo ni Jesus para sa katawhan, subong man ang mga pagpakamaayo nga magaabot pa.” Nian hambali ang nagakaigo nga mga punto gikan sa kapitulo 41 sang Revelation nga libro. Mahimo mo man mapadaku ang mga ilustrasyon sa pahina 294, 299, kag 308. Kon mahimo, maghimos nga buligan ang interesado sa pagtambong sa Memoryal.

⁵ Kon maayo lamang sia nga tagpalamati, ayhan epektibo ini:

◼ “Nalipay gid ako sa aton paghambalanay sining karon lang nahanungod sa Biblia. Nagbalik ako bangod luyag ko nga maagom mo ang ginsaad sang Dios para sa mga maluyag makatuon sing dugang pa nahanungod sa iya.” Basaha ang Juan 17:​3, nian patuhuyi ang tract nga Kabuhi sa Mahidaiton nga Bag-ong Kalibutan.

⁶ Kabay nga ang imo apresasyon sa gawad magapahulag sa imo nga duawon liwat ang mga interesado. Buligi sila nga maghikot suno sa makakulunyag nga mensahe sa Bugna. Dumduma, “ang gintalana nga tion malapit na”!​—Bug. 1:3.