Pagbantala sang ‘mga Pulong sang Tagna’
1 Luyag mahibaluan sang madamong tawo ang kahulugan sang makatulubIag nga mga hitabo nga nagakatabo karon. Makabenepisyo sila gikan sa ‘pagpamati sa mga pulong’ sang tagna sang Bugna. (Bug. 1:3) Sa Marso, kahigayunan naton nga buligan sila paagi sa pagtanyag sing Revelation nga libro. Ano ang isiling naton?
2 Ini nga pagpalapit mahimo mangin epektibo:
◼ “Ang katawhan nasit-an sing inaway, gutom, kag balatian sining ika-20 nga siglo. Ngaa amo sini samtang madamo na nga teknikal nga pag-uswag ang nahimo sang tawo? [Pasabta sia.] Madamo ang nakibot nga mahibaluan nga gintagna ini sa Biblia. Ayhan nabatian mo ang nahanungod sa ‘apat ka manugkabayo sang Apokalipsis.’ Sa katunayan isa ini ka tagna nga nagakatuman karon. [Buksi ang Revelation nga libro sa kapitulo 16, kag ipakita ang mga ilustrasyon sa pahina 91-7.] Samtang ginatagna sang tagna ang panahon sang daku nga kalisang, nagahatag man ini sing paglaum. [Basaha ang Bugna 6:2 sa parapo 3.] Ang Nagasakay sa kabayo nga maputi amo si Jesucristo. Paagi sa iya Ginharian, nanaad sia nga daugon ang kalautan kag paluntaron ang isa ka kalibutan nga may kalipay kag paghidait.” Itanyag ang libro.
3 Ayhan ining pamangkot mahimo magadul-ong sa makawiwili nga paghambalanay:
◼“Ano sa banta mo ang ginakinahanglan agod madula ang malain nga mga kahimtangan sa kalibutan? [Pasabta sia.] Ang kalabanan nga mga tawo nagaugyon nga kinahanglan ang daku nga mga pagbalhin agod makalampuwas ining kalibutan. Ginapakita sang Biblia nga nahibaluan sang Dios kon ano ang pagahimuon kag nagsaad nga lubaron ang aton mga problema.” Buksi ang Revelation nga libro, pahina 171, kag basaha ang Bugna 11:15 sa parapo 1. Buksi ang mga ilustrasyon sa pahina 302 kag 308, kag ipakita ang mga pagpakamaayo sa idalom sang paggahom sa Ginharian ni Cristo. Nian ipaathag kon paano sila makabenepisyo sing personal.
4 Ayhan naluyagan mo ang magsiling sing kaangay sini:
◼ “Nasapwan sang madamong tawo nga nakabasa sang tulun-an sang Bugna sa Biblia nga mabudlay ini hangpon. Ginalaragway sini ang nanuhaytuhay nga dikinaandan nga mga karakter kag mga hitabo. Ining libro, Revelation—Its Grand Climax At Hand!, nagahatag sing bersikulo-por-bersikulo nga pagbinagbinag sa bug-os nga tulun-an sang Bugna kag nagapakita kon paano kita personal nga naapektuhan sang mga katumanan sini.” Buksi ang libro sa pahina 15, parapo 2, kag ipakita ang Bugna 1:1, sa madukot nga letra. Ipaathag nga ining sahi sang mga komento ginahatag para sa kada bersikulo sa tulun-an sang Bugna. Itanyag ang libro.
5 Kon ang tawo masako ukon indi mo sigurado nga may bastante nga interes, mahimo nimo mabilin ang isa ka magasin ukon isa ka tract. Kon sa pagbalik mo may ginpakita nga interes, ang libro mahimo matanyag.
6 Ang mensahe nga ginaunod sang Bugna nagaapektar sa tanan nga katawhan. Gani dapat mabatian sang tanan ang mga pulong sang tagna. Kabay nga himuon naton ang aton bug-os nga masarangan sa pagbantala sining importante nga mensahe.