Ipahayag ang Makakulunyag nga Mensahe sang Bugna
1 Ang Revelation nga libro nagbulig sa aton nga mahangpan ang makakulunyag nga mensahe nga narekord sa tulun-an sang Bugna. Buligi ang iban nga maapresyar ina nga mensahe paagi sa paggamit sini nga libro sa ministeryo sa Marso. Ayhan masapwan mo ang masunod nga mga panugda nga mabuligon sa paghanda sang imo presentasyon.
2 Pagkatapos sang nagakaigo nga panamyaw, mahimo mo ini masiling:
◼ “Nakabati ka na bala nahanungod sa apat ka manugkabayo sang Apokalipsis? [Pasabta sia.] Nakahibalo ka bala nga ining malaragwayon nga mga manugkabayo bahin sang tagna sang Biblia nga nagatagna sang mga hitabo sa panahon naton? [Pasabta sia.] Interesado ka bala nga mahangpan ining tagna kag kon ano ang kahulugan sini sa aton?” Kon may interes, matudlo mo ang mga ilustrasyon sa kapitulo 16 sang Revelation nga libro kag mapaathag ang pila sa mga bersikulo sa madukot nga mga letra. Ukon mahimo ka makakomento sa pila ka bahin sang palanan-awon paagi sa paggamit sang tract nga Ini Bala nga Kalibutan Makalampuwas? Itanyag ang libro kag maghimos sa pagbalik agod mahambalan sing dugang pa ang nahanungod sa palanan-awon kag sa kahulugan sini.
3 Ukon ayhan luyag mo tilawan ang pagpalapit nga kaangay sini:
◼ “Nabatian mo na bala ang termino nga ‘Armagedon’? [Pasabta sia.] Madamo ang nagahunahuna nga nagapatuhoy ini sa nuklear nga inaway sa ulot sang mga kagamhanan sa kalibutan. Ang matuod, tuhay ang Armagedon. Suno sa Biblia, magakahulugan ini sing daku nga mga pagbalhin, nga magaresulta sa isa ka kalibutan sang mapinadayunon nga paghidait.” Depende sa iya sabat, matudlo mo ang kasulatan subong sang Bugna 16:16 ukon Salmo 37:10, 11 kag nian buksi ang kapitulo 39 sang Revelation nga libro. Kon may interes, itanyag ang libro. Kon wala, binagbinaga ang nagakaigo nga mga punto sa tract nga Ini Bala nga Kalibutan Makalampuwas?
4 Ayhan mapukaw mo ang interes paagi sa paggamit sini nga panugda:
◼ “Sini nga bulan, madamo nga mga tawo ang nagahunahuna sa kamatayon kag pagkabanhaw ni Jesucristo. Napaligban mo na bala kon ano ang ginahimo niya kutob sang ginbanhaw sia? Madamong mga hitabo sa panahon naton ang ginaangot sa karon nga katungdanan ni Jesus sa katuyuan sang Dios. Ang iban sini ginalaragway sa tulun-an sang Bugna. Luyag mo bala mahibaluan ang labi pa nahanungod sa katuyuan sang Dios sa pagpadala sang iya Anak sa duta kag kon ano ang kahulugan sina para sa imo kag sa imo mga hinigugma?” Mahimo mo mapatalupangod ang mga parapo 1 kag 2 sang kapitulo 41 sang Revelation nga libro ukon mapadaku ang nagakaigo nga mga punto gikan sa ulihi nga mga guwa sang Ang Lalantawan kag Magmata! Ukon ayhan luyag mo gamiton ang tract nga Kabuhi sa Mahidaiton nga Bag-ong Kalibutan sa pagpukaw sang dugang nga interes.
5 Pat-ura nga agdahon ang bisan sin-o nga nagapakita sing interes sa pagtambong sa Memoryal. Sa pagpakamaayo ni Jehova, ayhan mabuligan ninyo ang isa nga ‘makabati sang mga pulong sining tagna kag makatuman sang mga butang nga nasulat sa sini.’—Bug. 1:3.