Pagpanghikot sa Masunson Ginakobrehan nga Teritoryo
1 Nalipay kami sa pagbaton sing mga report nga madamo nga kongregasyon ang nagapanghikot sing masunson sa ila teritoryo. (Mat. 24:14; 1 Tim. 2:3, 4) Bisan pa nga isa ini ka hangkat, sarang ini maatubang sing madinalag-on kon nakahanda kita sing maayo sa pag-atubang sa nanuhaytuhay nga kahimtangan nga nagautwas.
2 Ang Sekreto Amo ang Epektibo nga mga Pagpalapit: Importante gid ang mangin handa sa paggamit sang isa ukon kapin ka ginbinagbinag sing maayo nga mga introduksion. Nagalakip ini sing maathag nga mga pinamulong nga nagapaathag sang importante nga mga rason sang aton masunson nga pagduaw.
3 Ang Reasoning nga libro nagaaman sing madamong maayo nga halimbawa sang nagakaigo nga mga introduksion nga magamit. Tatlo ang nalista sa pahina 15 sa idalom sang tig-ulo nga “In Territory Often Worked.” Ensayuha ang isa nga luyag mo gamiton sa inyo teritoryo.
4 Ang iban nga mga manugbantala nangin madinalag-on sa paggamit sing mga balita gikan sa lokal nga mga pamantalaan sa pagsugod sang paghambalanay sa masunson ginakobrehan nga teritoryo. Ang Reasoning nga libro nagahatag sing tatlo ka halimbawa kon paano ini himuon. Binagbinaga ang ikaduha nga introduksion sa idalom sang tig-ulo nga “Crime/Safety” sa pahina 10 kag ang unang duha ka introduksion sa idalom sang tig-ulo nga “Current Events” sa pahina 10 kag 11.
5 Mga Introduksion nga Ginahanda Mo: Pasangkara kag gamita ang ang nagabukas nga mga komento nga yara sa Reasoning nga libro. Ihambal ini sa imo kaugalingon nga mga tinaga. Sarang mo ini maensayo upod sa isa ka eksperiensiado nga manugbantala antes gamiton sa latagon.
6 Halimbawa, masiling mo ang kasubong sini:
◼ “Sang pinakaulihi namon nga pagduaw sa imo, [sambita ang pinakabag-o nga mga hitabo nga ginahambalan sang mga tawo sa komunidad]. Bangod kita tanan naapektuhan, madamo sang aton mga kaingod ang nabalaka sing tuman. Ayhan ginhunahuna mo man ini sing serioso. [Magdulog sing makadali agod tugutan ang posible nga sabat.] Bangod sang mga kahimtangan sa kalibutan karon, nagaugyon ka bala sa ginsulat ni manalagna Jeremias sa kapitulo 10, bersikulo 23?” Pagkatapos mabasa ang kasulatan, pangayua ang obserbasyon sang tagbalay, nian patuhuyi ang isa ka kasulatan nga nagapakita kon paano lubaron ni Jehova ang isa ka partikular nga problema nga inyo ginahambalan.
7 Ukon makasiling ka:
◼ “Walay duhaduha nga natalupangdan mo sa balita karon nga adlaw [sambita ang espesipiko nga hitabo]. Ayhan magaugyon ka nga nagaapektar ini sa aton tanan. [Magdulog para sa posible nga sabat.] Makasalig kita nga ang mga panguluhan magahatag sing isa ka umalagi nga solusyon; apang, ginapakita sang Biblia kon paano malubad sing dayon ang problema.” Patuhuyi ang isa ka kasulatan nga nagapakita kon ano ang pagahimuon sang Dios.
8 “Ngaa Pirme Gid Kamo Nagaduaw?” Ang nagakaigo nga mga sabat sa sining pagpamatok masapwan sa Reasoning nga libro sa pahina 20 sa idalom sang tig-ulo nga “Why Do You People Call So Often?” Bisan pa wala ginapamangkot, mahimo naton mabuligan ang iban sa paghibalo nga ang tunay nga gugma sa Dios kag sa kaingod amo ang nagapahulag sa aton sa pagduaw sing masunson kon posible. Ang paghinun-anon sa mga pinamulong ni Jesus sa Juan 21:15-17 mahimo nga mapuslanon sa sini nga bahin.
9 Tubtob nga indi magsiling si Jehova nga tuman na, padayon naton nga atubangon ang hangkat nga magpanghikot sa masunson ginakobrehan nga teritoryo. Upod ini nga determinasyon, makasalig kita sang iya pagtuytoy, proteksion, kag pagpakamaayo tubtob sa katapusan.—Mat. 28:19, 20.