Pag-abot sing Husto sa Oras kag Ikaw

ISA ka Cristianong manugtatap sa isa ka kongregasyon sa South America ang madamo sing maayong mga kinaiya. Apang ang iya suod nga mga abyan malinahugon nga nagatawag sa iya sing Armagedon. Ngaa? “Nahibaluan namon nga magaabot sia,” siling nila, “apang Dios lamang ang nakahibalo kon san-o!”

Huo, ang pag-abot sing husto sa oras​—⁠ukon ang indi​—⁠may daku nga labot sa reputasyon sang isa. Gin-ilustrar ini sang maalam nga si Hari Solomon sa sining paagi: “Ang mga langaw nga patay nagapalang-og sang lana sang manugpahumut. Sa amo ang diutay nga kabuangan nagasamad sang kaalam kag dungog.” (Manugwali 10:1) Ang isa ka Cristiano mahimo nga may madamong maayo nga mga kinaiya, apang ginadagtaan niya ang iya maayo nga ngalan kon indi sia mahunahunaon sa oras.

“Ang mga tawo nga nagaabot sing husto sa oras nagahatag sa aton sing pagsalig,” siling sang isa ka manugtatap. “Sila ang luyag ko nga makaupod.” Ginaapresyar man sila sa kalibutan sang negosyo. “Magkadto sa palamugnan sing husto sa oras; mangin temprano sa mga miting; maghatag sing report sa gintalana nga tion,” laygay sang Emily Post’s Etiquette. Sing kaanggid ang The New Etiquette (1987) nagasiling nga, sa kabilugan, “ang mga tawo nga nagaabot sing ulihi mga tawo nga nagaabot sing dimatinahuron.” Nian ang awtor nagsiling: “Ang relihioso nga mga serbisyo isa pa ka dinagakaigo nga okasyon nga mag-abot sing ulihi.”

Ginaapresyar naton tanan kon ang iban nagaabot sing husto sa oras. Amo man sina ang balatyagon ni apostol Pablo, kay nagsulat sia sa mga Cristiano sa Colosas: “Sa espiritu yara ako sa inyo, nga nagakalipay kag nagatan-aw sang inyo kahusay.” (Colosas 2:5) Kag ugyon gid kita sa balatyagon ni Hari David nahanungod sa mga saad ni Jehova sang nagsulat sia sa Mga Salmo: “Dili ka magdugay, O Dios ko.”​—⁠Salmo 40:​17; 70:⁠5.

“Mangin Manug-ilog sang Dios”

Sa pagkamatuod, si Jehova wala gid nagakaulihi. Tumalagsahon sia sa iya pagkaalisto sa tion. Ginpakita ini sa iya tanan nga hilikuton sa pagpanuga. Kutob sa dimatakus nga uniberso pakadto sa pinakadiutay nga butang nga buhi, sila tanan nagapanghikot nga daw ginagamhan sang dikitaon nga relo. Halimbawa, ang isa ka sahi sang sea lily sa Japan nagapaguwa sang iya selula sing makaisa kada tuig kon Oktubre sa mga alas tres sang hapon sa adlaw sang una ukon ikatlo nga lati sang bulan. Sa tigpamulak ang diutay nga grunion nagaoras sang iya siklo sa pagbuad sa sulod sang pila ka minuto sang taub sa baybayon sang California.

Ang pag-oras ni Jehova eksakto man kon tuhoy sa pagtuman sang iya saad. Halimbawa, aton mabasa sa Exodo 12:​41 nga “sa katapusan sang apat ka gatus kag katloan ka tuig, sa amo gid nga adlaw, nagguwa ang tanan nga kasoldadosan ni Jehova gikan sa duta sang Egipto.” Busa gintuman ni Jehova ang saad nga ginhimo niya mga siglo antes kay Abram.​—⁠Genesis 15:​13-16; Galacia 3:⁠17.⁠a

Ginpadala ni Jehova ang iya Anak, ang Mesias, sa kalibutan sa eksakto nga tion nga gintagna ni manalagna Daniel sing kapin sa lima ka siglo ang nagligad, amo kon ngaa sia “napatay sa nagakaigo nga panag-on tungod sa mga didiosnon.” (Roma 5:​6; Daniel 9:25) Tuhoy sa katapusan sining sistema sang mga butang, ginapakita sang Biblia nga nahibaluan ni Jehova ang “adlaw kag takna.” (Mateo 24:36) Indi sia maulihi. Sing maathag, ang halimbawa ni Jehova sa pagkamahunahunaon sa tion takus nga ilugon naton.​—⁠Efeso 5:⁠1.

“Sa Ila Nagakaigo nga Panag-on”

Pirme ginapaabot ni Jehova ang iya mga alagad nga mangin mahunahunaon sa tion, labi na kon nahanungod sa iya pagsimba. Ang “adlaw-adlaw nga iskedyul” ginsunod sang ang mga Israelinhon nagdulot sing mga halad. Ginsugo sila ni Jehova: ‘Hiwaton ninyo ang pagdulot sa akon . . . sa ila nagakaigo nga panag-on.’ Ginhatag man niya ini nga sugo kay Moises nahanungod sa mga miting: “Ang bug-os nga katilingban dapat magtuman sang ila iskedyul.”​—⁠Levitico 23:​37; Numeros 10:​3; 28:⁠2.

Sang ulihi, ang mga Judiyo nagtuman sang “takna sang paghalad sing incienso.” (Lucas 1:10) Ang “tion sa pangamuyo, nga ikasiam nga takna,” gintuman sang mga Judiyo kag sang iban. (Binuhatan 3:​1; 10:​3, 4, 30) Kag nahanungod sa Cristianong mga miting, si Pablo nagsulat: “Ang tanan nga butang himuon sing nagakaigo kag mahusay.”​—⁠1 Corinto 14:⁠40.

Ano ang ginakinahanglan sining tanan sa mga Israelinhon kag sa unang mga Cristiano? Nga dapat sila gilayon nga magtuman sang ila mga iskedyul, labi na kon nahanungod sa pagsimba nila. Wala sing rason sa paghunahuna nga si Jehova wala nagapaabot sina sa iya mga alagad sa karon.

Kon Ngaa Nabudlayan ang Iban

Ang panimuot sa oras lainlain sa tanan nga bahin sang kalibutan. Ang isa ka misyonero nagareport nga sa isa ka diutay nga banwa sa South America, ang iya asawa amo lamang kon kaisa ang tawo sang ginpahibalo niya ang nagabukas nga ambahanon sa umpisa sang Cristianong miting. Apang sang ginpahibalo niya ang katapusan nga ambahanon, 70 ka tawo ang yara. Sa pihak nga bahin, sa isa ka pungsod sa Katundan nga Europa, mga isa ka libo ka tawo ang ginpamangkot: “Kon gin-agda kamo sa sinalusalo sa alas 7:​00 s.g., magaabot bala kamo sing lima ukon napulo ka minuto nga temprano, ukon lima ukon napulo ka minuto nga ulihi, ukon sing eksakto sa oras?” Ang kalabanan nagsabat nga “ang pagkamatinahuron nagakinahanglan sing daku nga respeto para sa tagbalay kag pag-abot sa eksakto nga minuto.”

Apang, ang pag-abot sing husto sa oras indi lamang bangod sang luyag sang isa ka rehiyon. Isa ini ka batasan, subong nga ang pagkamatinlo, mahipid, ukon matinahuron batasan. Sa pagkamatuod, wala kita matawo nga may amo sina nga mga batasan; dapat naton ini palambuon. Kon gintudluan kita nga mangin mahunahunaon sa oras sang bata pa, isa ina ka pagpakamaayo. Apang madamo ang naghalin sa mga pamilya kag mga ginhalinan diin diutay lamang ang mga dead­line kag diutay ang kinahanglanon nga ipahituhog ang mga panikasog sa iya sang iban. Sang nangin bahin lamang sang Cristianong kongregasyon kag sang nakigbahin sa mga miting sini kag dayag nga ministeryo nga ang pagkakinahanglanon sang pag-abot sing husto sa oras nangin katunayan para sa ila. Mahimo sila mabudlayan sa pagtadlong sang batasan nga pirme ulihi mag-abot nga naton-an nila sang bata pa. Apang, ang gugma kay Jehova kag sa isigkatawo magapahulag sa isa sa pagbaylo. Apang, ngaa kinahanglan nga magbaylo?

Ngaa Dapat Mangin Maaga?

“Ginahigugma mo bala ang kabuhi?” pamangkot anay ni Benjamin Franklin. “Nian indi pag-usiki ang tion, kay amo sina ang ginahuman sang kabuhi.” Nahibaluan naton tanan ang kamatuoran sa sinang pinamulong. Apang, importante man sa mga Cristiano ang indi pag-usik sa tion sang iban. “Ang ulihi pirme mag-abot,” siling sang misyonero, “daw nagasiling paagi sa iya buhat, ‘Ang akon tion mas bilidhon sang sa imo, gani mahimo ka makahulat tubtob handa na ako.’ ” Ang tawo nga indi mahunahunaon sa oras indi lamang nga disorganisado kag dimasaligan tan-awon kundi daw tikalon kag dimapatugsilingon. Luyag sang matuod nga mga Cristiano nga ‘indi paghimuon ang bisan ano gikan sa pagkamaiyaiyahon ukon pagpadayawdayaw, kundi sa pagpaubos sang hunahuna nga nagabilang sang iban nga maayo pa sa inyo kaugalingon.’​—⁠Filipos 2:⁠3.

Ayhan ang iban nagabatyag nga indi nila luyag magkabuhi sa relo, nga ang tagsa ka hulag ginagahuman sini. Apang, ang mangin temprano indi lamang isa ka butang nga kontrolado sang relo. Isa ini ka butang nga nagadumdom sang mga interes kag kaayuhan sang iban, nga ‘wala nagatamud sang ila kaugalingon nga mga butang, kundi man sa mga butang sang iban.’​—⁠Filipos 2:⁠4.

Binagbinaga, halimbawa, ang laygay sang Biblia: “Magbinatonay kamo, subong nga si Cristo man nagbaton sa aton.” (Roma 15:7) Bisan pa maaplikar ini sa literal nga mga panamyaw, maathag nga mas mabudlay ini himuon kon ang isa kinabatasan nga nagakaulihi sa mga miting. Paagi sa pag-abot sing temprano para sa mga miting, makaamot ka sa mahigugmaon, mainabyanon, kag maabiabihon nga espiritu sa mga pagtilipon sing labi pa. Kag ang mga benepisyo madamo gid. Ang pag-abot sing temprano nagapaposible sa imo nga makig-ambit sa nagabukas nga ambahanon kag pangamuyo​—⁠isa ka importante nga bahin sang nahiusa nga pagsimba sang kongregasyon. Ang pagpamati sa tema ukon titulo nga gin-anunsio magabulig sa imo nga masundan sing maayo pa ang programa.

Ang imo pag-abot sing husto sa oras nagapaposible sa iban nga mahituhog ang ila mga panikasog, kag daku ang mahimo subong resulta. Sang ginsalakay ang siudad sang Ai, ginpadala ni Josue ang iban nga bahin sang iya puwersa sa pagganyat sa kaaway palayo sa siudad samtang ang iban niya nga tinawo nagsalakay agod agawon ang siudad. Nian, sa ital-ital nga panag-on, si Josue naghatag sing senyales. Ang iya mga tinawo “nagdalagan sa gilayon nga nauntay niya ang iya kamot,” kag ang siudad napukan sa atubang nila. Mahanduraw mo bala kon ano kuntani ang natabo kon wala sila gilayon maghulag?​—⁠Josue 8:​6-8, 18, 19.

Ang Cristianong mga ministro karon madamo gid sing rason nga mangin mahunahunaon sa oras. Ang pagpakigbahin sa pagbantala sang Ginharian sa iban, pag-ensayo sang mga bahin sa asambleya ukon mga miting, bisan ang pagtinlo sa King­dom Hall, tanan nagakinahanglan sa aton nga ipahituhog naton ang aton mga buhat sa iban. Paagi sa pag-abot sing husto sa oras, mas madamo kita sing mahimo. Matuod man ini bisan sa simple nga mga butang subong sang pagreport sang hilikuton sa pagbantala sa katapusan sang bulan. Kon ang tanan nagabuligay sa paghimo sini sa gilayon, nian ang husto kag makapalig-on nga mga report sa kongregasyon kag sa bug-os nga kalibutan sarang matipon.

Ang pagkamahunahunaon sa oras nagalakip man sang pagsunod sa mga appoint­ment kag mga dead­line sang miting, nga sa kada adlaw madamo ini. Ang iban importante katama, ang iban indi. Ang imo kasal, halimbawa, dapat magsugod sa gintalana nga oras. Ayhan luyag mo lagaon ang imo itlog sa pila lamang ka minuto. Bisan ano man ini, ang tawo nga mahunahunaon sa oras indi kinahanglan nga magdalidali sa paghimo sang lainlain nga butang, nga ulihi sa tanan. Sa baylo, sia kalma kag organisado. Mas madamo sia sing mahimo bangod gina­plano niya ang iya adlaw kag nagasugod sa oras ukon sing temprano pa.

Sa pagkamatuod, may madamong mga rason kon ngaa ang mga Cristiano dapat mangin mahunahunaon sa oras. Labaw sa tanan, isa ini ka paagi sa pagpakita sang aton dimakagod nga gugma para sa mga masigka Cristiano kag sang aton pagtahod para sa teokratiko nga mga kahimusan para sa matuod nga pagsimba.

Apang, paano mapalambo sang isa ang batasan nga pag-abot sing husto sa oras?

‘Hibalua ang Pinat-od nga mga Tion’

“Bisan ang tulabong . . . nakahibalo sang iya pinat-od nga mga tion” sa pagsaylo, kag ang subay “nagatigana sang iya kalan-on sa tingadlaw” agod mangin handa sa tigtulugnaw, siling sang Biblia. (Jeremias 8:​7; Hulubaton 6:8) Diri sini napasad ang sekreto sang pag-abot sing husto sa oras kag pagtapos sang mga hilimuon.

Dapat man naton ‘hibaluon ang aton pinat-od nga mga tion.’ Bisan pa indi estrikto ukon panatiko, dapat kita mangin mahunahunaon sa oras. Dapat naton hibaluon indi lamang kon ano ang hilimuon naton kundi kon san-o man naton ini himuon. Dapat naton palambuon ang batasan nga nagahunahuna sa unahan, nagahatag sing tion para sa posible nga mga pagpalantang, kag handa untaton ang ginahimo sa karon para sa butang nga mas importante, subong sang aton mga miting, pag-alagad sa latagon, kag iban pa teokratiko nga mga hilikuton.

Nahanungod sini, kinahanglan ang kooperasyon sang pamilya. Napanilagan nga masunson ginatugyan sang amay sa asawa ang paghanda sang pamilya. Nian nagalakat sia sing isahanon, nga nagasinggit, “Dalian ninyo, basi maulihi kamo!” Indi amo sina si Jacob; mabuligon sia nga “nagtindog kag ginpasakay ang iya mga anak nga lalaki kag ang iya mga asawa sa mga kamelyo” sang tion na nga inuglakat.​—⁠Genesis 31:⁠17.

Kon amo, paano mabuligan sang amay ang iya pamilya? Ang mga kabataan sarang matudluan sa paghatag sing tion agod makahanda para sa importante nga mga butang sa baylo nga himuon ang tanan sa tion nga nagadalidali na. Sarang sila mabuligan sa pagpalambo sing balatyagon nga may salabton kag bugal sa paghimo sa gilayon sang mga hilimuon. Subong isa ka pamilya, binagbinaga ang mga halimbawa sa Biblia nga nagapakita sang importansia sang pagkamangin handa kag husto sa oras. (Genesis 19:​16; Exodo 12:​11; Lucas 17:31) Ayhan ang labing maayo ukon pinakaepektibo nga leksion ginahatag paagi sa nagakaigo nga halimbawa sang mga ginikanan.

Sarang man mabuligan sang Cristianong mga manugtatap ang kongregasyon paagi sa pagpahamtang sing nagakaigo nga halimbawa. Indi sila kuntani gintangdo kon sila indi “mahim-ong.” (1 Timoteo 3:2) Ang iban nga mga utod nga lalaki kag mga utod nga babayi mahimo nga mas temprano mag-abot kon nahibaluan nila nga ang mga gulang didto na nga magatamyaw sa ila kag magapanguna. Gani ang mahunahunaon nga mga gulang magapanikasog sa pag-abot sing temprano sa Kingdom Hall sa pagbulig sa kongregasyon. Ang ministeryal nga mga alagad nga nagaabot sing temprano sa pagtamyaw sa ila mga kauturan kag nagaalagad sa ila mga kinahanglan ginaapresyar gid sing daku.

Sa pagkamatuod, ang pag-abot sing husto sa oras nagakinahanglan sing pagpugong sa kaugalingon kag disiplina. Indi, indi tungod sa pagtigayon sing pagkasibu militar, kundi tungod sa gugma para sa aton mga masigka Cristiano nga pagtahod para sa teokratikong kahimusan. Bahin ini sang bag-ong personalidad nga ginapanikasugan naton nga ipalambo. (Colosas 3:​10, 12) Labaw sa tanan, luyag naton nga mangin kaangay sang aton langitnon nga Amay, nga si Jehova nga Dios, nga nagatudlo sa aton nga “sa tagsa ka butang may panag-on.”​—⁠Manugwali 3:⁠1.

[Footnote]