Ang Labing Importante nga Hitabo sa Maragtas sang Tawo
1 Si Jesus nagkari sa duta sa sugo sang iya Amay nga magpanaksi sa kamatuoran nga mahimo magdul-ong sa aton sa kabuhi nga walay katapusan. (Juan 18:37) Ang iya katutom tubtob sa kamatayon naghatag sing kadungganan kay Jehova, nagpakabalaan sang ngalan sang Dios, kag nag-aman sing gawad. (Juan 17:4, 6) Amo ini ang naghimo sang kamatayon ni Jesus subong ang labing importante nga hitabo sa bug-os nga maragtas sang tawo.
2 Sugod sang gintuga si Adan, duha lamang ka himpit nga tawo ang nabuhi sa sining duta. Si Adan yara anay sa posisyon nga magdala sing makatilingala nga mga pagpakamaayo sa iya wala pa nabun-ag nga kaanakan. Sa baylo, makagod sia nga nagrebelde, nagtagudili sa ila sa isa ka makaluluoy nga pagkabuhi nga nagadangat sa kamatayon. Sang nagkari si Jesus, ginpakita niya ang himpit nga pagkamainunungon kag pagkamatinumanon, nagbukas sing kahigayunan para sa kabuhi nga walay katapusan sa tanan nga nagapakita sing pagtuo.—Juan 3:16; Roma 5:12.
3 Wala na sing iban pa nga hitabo ang mapaanggid sa mahalaron nga kamatayon ni Jesus. Ginbayluhan sini ang lakat sang maragtas sang tawo. Nag-aman ini sing sadsaran para sa pagbanhaw sa binilyon ka tawo gikan sa minatay. Nagpasad ini sing sadsaran para sa walay katapusan nga Ginharian nga magatapos sang kalautan kag magahimo sang duta nga isa ka paraiso. Magahilway ini sa ulihi sa bug-os nga katawhan gikan sa tanan nga dagway sang pagpigos kag pagkaulipon.—Sal. 37:11; Binu. 24:15; Roma 8:21, 22.
4 Ini tanan nagabulig sa aton sa pag-apresyar kon ngaa ginsugo ni Jesus ang iya mga disipulo nga dumdumon ang iya kamatayon paagi sa pagsaulog sang Memoryal kada tuig. (Luc. 22:19) Nagaapresyar sang pagkaimportante sini, ginakalangkagan naton ang magtipon upod sa mga kongregasyon sang mga Saksi ni Jehova sa bug-os nga kalibutan pagtunod sang adlaw sa Biernes, Abril 14. Antes sina nga tion, maayo nga basahon sing dungan subong isa ka pamilya ang rekord sang Biblia nahanungod sa katapusan nga mga adlaw ni Jesus sa duta kag sa iya maisugon nga tindog para sa kamatuoran. (Ang ginarekomendar nga mga teksto makita sa aton 1995 Calendar, Abril 9-14.) Naghatag sia sa aton sing sulundan sang debosyon sa aton Manunuga. (1 Ped. 2:21) Himuon naton ang aton bug-os nga masarangan sa pag-agda sa aton mga abyan kag pamilya, subong man sa mga estudyante sa Biblia kag sa iban pa nga mga interesado, sa sining importante nga pagtinipon. Ipaathag sing una kon ano ang mahanabo kag ang importansia sang mga emblema.—1 Cor. 11:23-26.
5 Dapat magplano sing abanse ang mga gulang agod pat-uron nga ang Kingdom Hall mahipid kag matinlo. Dapat himuon ang mga kahimusan nga may isa nga magatigayon sing mga emblema. Ang pagserbe sang mga emblema dapat organisahon sing maayo. Ang mapuslanon nga mga panugda kon paano naton mapakita ang pagtahod para sa Panihapon sang Ginuo ginhatag sa The Watchtower sang Pebrero 15, 1985, pahina 19 (Agosto 15, 1985 sa Hiligaynon). Nagakaigo para sa kongregasyon nga maghimos sing masangkad nga mga hilikuton sa pag-alagad sa latagon mga pila ka adlaw antes sang pagsaulog subong man mga pila ka adlaw pagkatapos sini.
6 Sang nagligad nga tuig, may kabug-usan nga 12,288,917 nga nagtambong sa bug-os kalibutan nga pagsaulog sining importante nga hitabo. Sanglit amo ini ang labing importante nga hitabo sa aton kalendaryo, tanan kita dapat magtambong.