Anong mga Tulumuron ang Ginapahamtang Mo Para sa Imo mga Kabataan?
1 Ang kadalag-an sa kabuhi nasandig sa pagpahamtang kag sa pagtigayon sing mapuslanon nga mga tulumuron. Nagakinahanglan sing kaalam para mahantop kon diin nga mga tulumuron ang lab-uton agod ‘makapanguyapot sing malig-on sa matuod nga kabuhi.’ (1 Tim. 6:19) Mapasalamaton gid kita nga ginapakita ni Jehova sa aton kon diin nga dalanon ang laktan!—Isa. 30:21.
2 Si Jehova nagapahamtang sing maayong halimbawa para sa mga ginikanan. Sa baylo nga pahanugutan ang ila wala sing eksperiensia nga mga kabataan sa pagpili kon diin nga dalanon ang labing maayo, ang maalamon nga mga ginikanan nagahanas sa ila sa dalanon nga dapat nila laktan, kag kon magtigulang na sila, “indi [sila] magtalikod sa sini.” (Hulu. 22:6) Nahibaluan sang Cristianong mga ginikanan gikan sa eksperiensia nga dapat sila magsalig kay Jehova. (Hulu. 3:5, 6) Ining kinahanglanon labi pa gid ka daku para sa mga kabataan, nga limitado sing ihibalo kag eksperiensia.
3 Ang mga ginikanan sarang makapahamtang sa atubangan sang ila mga kabataan sing mapuslanon nga mga tulumuron nga magabulig sa ila sa paghugod sa “mas importante nga mga butang.” (Filip. 1:10) Makasugod sila paagi sa pangpamilya nga pagtuon, nagapalig-on sa mga kabataan nga apresyahon ini. Maayo para sa mga kabataan nga matigayon ang batasan sa pagtuon sing abanse para sa mga miting sa kongregasyon kag sa paghanda agod makakomento sa ila kaugalingon nga mga tinaga. Ang regular nga pagpakigbahin sa pagbantala nga hilikuton importante. Ang lamharon nga mga kabataan sarang makaamot paagi sa pagtanyag sing mga tract, ukon sing mga magasin, ukon sa pagbasa sing mga kasulatan. Kon makabasa na sila, ang pagpalista sa ila sa Teokratikong Eskwelahan sa Pagministro makabulig sa ila espirituwal nga pag-uswag. Ang makalipikar subong isa ka dibawtismado nga manugbantala ukon ang mabaton para sa bawtismo isa ka dakung tikang sa pag-uswag.
4 Samtang nagadaku ang ila mga kabataan, ang mga ginikanan dapat makighambal sa ila sing realistiko tuhoy sa mga tulumuron nga karera. Ang mga manuglaygay sa eskwelahan kag mga kabutho mahapos nga makaimpluwensia sa ila pabor sa materyalistiko nga mga paghimud-os. Ang mga ginikanan dapat magbulig sa ila mga kabataan sa pagpili sing mga kurso sa eskwelahan nga nagaaman sing praktikal nga paghanas, nagasangkap sa ila sa pag-atipan sang ila materyal nga mga kinahanglanon nga wala ginasakripisyo ang mga interes sang Ginharian. (1 Tim. 6:6-10) Mahimo sila mapalig-on nga himud-usan ang “dulot” sang pagkadiminyo kag nian sa ulihi, kon mamat-od sila sa pagminyo, masarangan nila ang mabug-at nga mga responsabilidad sang pag-asawahay. (Mat. 19:10, 11; 1 Cor. 7:36-38) Ang paghambal sa positibo nga paagi tuhoy sa pagpayunir, makapatudok sa mga kabataan bisan sa lamharon nga edad sang handum nga gamiton ang ila kabuhi sa paagi nga nagapahamuot kay Jehova, nagabulig sa iban, kag sa ila kaugalingon.
5 Tuman kadamo sang aton mga pamatan-on sa organisasyon karon ang may mataas nga Cristianong mga kabilihanan kag nagahimud-os sing teokratikong mga tulumuron. Ang kalabanan sang ila kadalag-an sarang mapatungod sa mahigugmaon nga mga ginikanan. Kon ikaw isa ka ginikanan, diin magapadulong ang imo mga kabataan? Nagauswag bala sila padulong sa isa ka kabuhi nga nasentro sa mga interes sang Ginharian? Dumduma, ang isa sang labing importante nga mga butang nga mahimo nimo amo ang pagpatudok sang kamatuoran sa imo mga kabataan kag ang pagpamulong tuhoy sini sa kada adlaw. Mahimo kamo mapakamaayo sing panimalay nga matutom sa pag-alagad kay Jehova.—Deut. 6:6, 7; Jos. 24:15.