Ibantala ang Maayong Balita Bisan Diin

¹ Ginbantala sang dumaan nga mga Cristiano ang maayong balita bisan diin. Makugi gid sila sa bagay nga sa sulod sang 30 ka tuig sang pagkabanhaw ni Jesucristo, ang mensahe sang Ginharian “ginwali sa bug-os nga tinuga sa idalom sang langit.”​—Col. 1:23.

² Ang makugi nga mga alagad ni Jehova karon may amo man nga tulumuron​—ang paglab-ot sa tanan kon mahimo pa sang maayong balita sang Ginharian. Ano ang makabulig sa aton agod matuman ini nga tulumuron? Dugang kag dugang nga mga tawo ang bug-os tion nga nagatrabaho kag masunson nga wala sa balay sa pagduaw naton. Kon wala naman sila nagatrabaho, nagalakbay sila, nagapamalaklon, ukon nagalingawlingaw. Paano malab-ot sing mensahe sang Ginharian ang mga takus sa tunga nila?​—Mat. 10:11.

³ Ang iban napakig-angutan sa ila palamugnan. Bisan sa diutay nga mga banwa may mga lugar sang negosyo diin ginahinguyang sang madamo nga tawo ang halos bug-os nga adlaw. Sa dalagku nga mga dakbanwa, ang mga tawo nga nagatrabaho sa mga palatikangan ukon sa mataas nga mga tinukod sang mga opisina kag ang mga nagapuyo sa ginaguardiahan sing maayo nga mga apartment nakabaton sing panaksi​—ang madamo sa nahauna nga tion. Sa talipuspusan sang mga semana, ang pila nga nasugilanon samtang nagapahunayhunay sa mga parke, sa mga duog-kalingawan, ukon samtang nagahulat sa mga paradahan ukon sa mga shopping mall nasapwan nga interesado sa maayong balita.

⁴ Dugang kag dugang nga mga manugbantala ang pinasahi nga nagapanikasog nga makapanaksi sa publiko nga mga duog, sa bisan diin nga may mga tawo. Sang primero, ining mga Saksi nagapangalag-ag kag daw ginakulbaan bangod naanad sila sa pagbantala sa balay-balay. Kamusta na sila karon?

⁵ “Ginpapagsik sini ang akon ministeryo!” tu-aw sang isa ka eksperiensiado nga utod nga lalaki. Ang isa pa nagadugang: “Naghupot ini sa akon nga nakakonsentrar.” Ang isa ka may edad nga payunir nagsiling: “Makapapagsik gid ini sa hunahuna, sa lawas, kag sa espirituwal, . . . kag nagauswag pa gihapon ako!” Ang isa ka manugbantala nagsiling nga nalab-ot niya karon ang madamong tawo nga wala pa gid anay makasugilanon sa mga Saksi ni Jehova. Ang mga pamatan-on mapagsik man nga nagapakigbahin sa sining hilikuton. Ang isa ka pamatan-on nagpabutyag sang iya kaugalingon sa sining paagi: “Makalilipay ini bangod masugilanon mo ang tama kadamo nga tawo!” Ang isa pa nagsiling: “Mas madamo ako sing napahamtang nga literatura sangsa nagligad!” Tanan ini natabo sa teritoryo nga liwat-liwat nga ginapangabudlayan!

⁶ Ang Nagalakbay nga mga Manugtatap Nagapanguna: Sa pagkahibalo nga “ang danyag sining kalibutan nagabalhin,” ginpanugda sang Sosiedad sining karon lang nga ipasibu sang nagalakbay nga mga manugtatap ang ila iskedyul sa pag-alagad sa latagon sa lainlain nga semana agod mas madamo nga tawo kon mahimo ang mapalab-utan sang maayong balita. (1 Cor. 7:31) Sa sulod sang mga tinuig, gintigana sang mga manugtatap sang sirkito ang mga aga sang ordinaryo nga mga adlaw sang semana sa pamalaybalay nga hilikuton, samtang ang mga hapon ginhugod sa mga pagduaw liwat kag sa pagdumala sing mga pagtuon sa Biblia. Sa iban nga mga lugar, ina nga iskedyul mahimo nga praktikal gihapon. Sa iban naman, mahimo nga diutay lamang ang matigayon paagi sa pagpamalaybalay sa mga aga sang ordinaryo nga mga adlaw sang semana. Sa sina nga kahimtangan, ayhan mamat-od ang nagalakbay nga manugtatap nga mas maayo magbantala sa mga balaligyaan ukon magpanaksi sa dalan sa maaga nga bahin sang adlaw. Ukon ayhan magahimo sia sing kahimusan para sa diutay nga mga grupo nga makapanaksi sa mataas nga mga tinukod sang mga opisina, mga balaligyaan, mga paradahan, ukon iban pa publiko nga mga duog. Paagi sa mas epektibo nga paggamit sang tion sa pag-alagad sa latagon, mas madamo nga tawo ang masugilanon.

⁷ Ginapakita sang report nga ining pagbalhin ginbaton sing maayo sang nagalakbay nga mga manugtatap kag sang mga manugbantala. Madamong hubon sang mga gulang ang nangabay sa manugtatap sang sirkito nga hanason ang pila ka manugbantala sa mga bahin sang hilikuton nga nagakinahanglan sing igtalupangod. Nabuligan ining mga manugbantala paagi sa pag-upod sa nagalakbay nga manugtatap samtang nagahimo sia sang isa sining mga hilikuton. Nian, ginhanas man nila ang iban. (2 Tim. 2:2) Subong resulta, mas madamo nga tawo karon ang nalab-ot sang maayong balita.

⁸ Siempre pa, indi na kinahanglan nga hulaton ninyo nga magduaw ang manugtatap sang sirkito agod tilawan ang pila sining iban pa nga mga paagi sa pagbantala. Yari ang nanuhaytuhay nga mga ideya nga masapwan ninyo nga praktikal sa inyo teritoryo:

⁹ Pagpanaksi sa Dalan: ‘Diin na ang tanan nga tawo?’ pamangkot naton kaisa kon magduaw kita sa waay-tawo nga mga puluy-an sa aga sang ordinaryo nga adlaw sang semana. Ayhan ang iban nagapamalaklon. Natilawan mo na bala nga lab-uton sila paagi sa pagpanaksi sa dalan? Kon ginahimo sing nagakaigo, ining bahin sang ministeryo mahimo nga mangin tuman ka mapatubason. Sa baylo nga magtindog sa isa ka lugar nga nagauyat sing mga magasin, labing maayo nga palapitan ang mga tawo kag sugdan ang mainabyanon nga pagpakighambal. Indi kinahanglan nga panaksihan ang tanan nga nagalabay. Sugilanuna ang mga wala nagadali, subong sang mga nagatulatan-aw lamang sa mga eskaparate sang balaligyaan, sang mga yara sa nagadulog nga mga salakyan, ukon sang mga tawo nga nagahulat sing pangpubliko nga transportasyon. Sa primero, ayhan mainabyanon ka lang nga magatamyaw kag maghulat sing sabat. Kon handa sia makighambal, pangayua ang iya opinyon nahanungod sa isa ka tema nga ginahunahuna mo nga makawiwili sa iya.

¹⁰ Sang nagduaw sa isa ka kongregasyon, gin-agda sang nagalakbay nga manugtatap ang anom ka manugbantala nga mag-upod sa iya kag sa iya asawa sa pagpanaksi sa dalan. Ano ang resulta? “Makalilipay gid ang amon aga!” report niya. “Wala sing mga wala-sa-balay. Kawaluan ka magasin kag madamong tract ang napahamtang. May pila kami ka makapapagsik nga mga paghambalanay. Ang isa sa mga manugbantala, nga nakigbahin sa hilikuton sa dalan sa nahaunang tion, nagtu-aw: ‘Tinuig na ako sa kamatuoran kag wala ko gid mahibalui kon daw ano ang akon nawasi!’ Pagkatapos sang semana, ang madamong suplay nga magasin sang kongregasyon naubos.”

¹¹ Samtang nagaalagad sa masunod nga kongregasyon, nabalitaan sini man nga nagalakbay nga manugtatap nga may pila ka manugbantala nga nagpanaksi sa dalan sing maaga pa apang may limitado lamang nga kadalag-an. Duha lamang ka tawo ang nasugilanon sang isa ka utod nga babayi sa bug-os nga panag-on sang pagpanaksi, kay ang tanan nga nasumalang niya nagadalidali pakadto sa trabaho. Ginpanugda sang nagalakbay nga manugtatap nga magbalik sila tanan sa sina man nga dalan sing uluadlaw na. Nagbalik matuod sila, kag nagtener sila tubtob mag-udto. Ang utod nga babayi nga nakapakighambal sa duha lamang ka tawo sing maaga pa mas maayo ang nahimo sang nagbalik sia. Nakapahamtang sia sing 31 ka magasin kag 15 ka brosyur, nakakuha sang ngalan kag direksion sang pito ka indibiduwal, kag nakasugod sing duha ka pagtuon sa Biblia sa puluy-an! Ang iban pa sa grupo may kaanggid man makapalig-on nga mga resulta.

¹² Kon may nakita ka nga nagapakita sing interes, tinguhai nga kuhaon ang iya ngalan, direksion, kag numero sang telepono. Sa baylo nga pangayuon dayon ang impormasyon, ayhan makasiling ka: “Nalipay gid ako sa sining paghambalanay. May paagi pa bala nga mapadayon naton ini sa iban nga tion?” Ukon mamangkot: “Mahimo ko bala ikaw makadtuan sa balay?” Madamo sang nasugilanon sa sining paagi ang nagpasugot sa isa ka pagduaw liwat. Pat-ura nga may nagakaigo ikaw nga suplay sang handbill para kay bisan sin-o nga maluyag magtambong sa aton mga miting.

¹³ Kon masugilanon mo ang isa ka interesado nga nagapuyo sa teritoryo nga natangdo sa iban nga kongregasyon, dapat mo ihatag ang impormasyon agod matatap sang mga kauturan didto ang interes. Ang pagpanaksi bala sa dalan mahimo mangin isa ka epektibo nga paagi sa pagpalapnag sing maayong balita sa inyo lugar? Kon amo, repasuha ang artikulo nga “Pagpangita sa mga Interesado Paagi sa Epektibo nga Pagpanaksi sa Dalan” sa Hulyo 1994 nga guwa sang Ang Aton Ministeryo sa Ginharian. Nian maghimo sing kahimusan sa pagpakigbahin sa pagpanaksi sa dalan sa nagakaigo nga tion sang adlaw nga magapaposible sa imo nga malab-ot ang mas madamo nga tawo kon mahimo.

¹⁴ Pagpanaksi sa Pangpubliko nga Transportasyon: Isa ka aga ang pila ka payunir namat-od nga manaksi sa mga tawo nga nagahulat sing bus malapit sa lokal nga kolehiyo. Walay sapayan nga makalilipay sila nga nakasugilanon, may isa ka problema. Sa tion nga maayo na ang paghambalanay, nagaabot ang bus, nga nagautod sang paghambalanay. Ginlubad sang mga payunir ang problema paagi sa pagsakay sa bus kag sa pagpadayon sang pagpanaksi sa mga pasahero samtang nagalakbay sila sa bug-os nga banwa. Paglab-ot sa katapusan nga ruta sang bus, ang mga payunir nagasakay liwat pabalik, nga nagapanaksi samtang nagalakbay. Pagkatapos sang pila ka biyahe pakadto-pakari, gintingob nila ang resulta sang ila mga panikasog: Kapin sa 200 ka magasin ang napahamtang kag anom ka pagtuon sa Biblia ang nasugdan! Ang pila ka pasahero kinabubut-on nga naghatag sang ila direksion kag numero sang telepono agod maduaw sila sa puluy-an. Pagkadason nga semana, ang mga payunir nagbalik sa paradahan sang bus kag ginhimo ang amo gihapon nga paagi. Nakapahamtang sila sing 164 ka magasin kag nakasugod sing isa pa ka pagtuon sa Biblia! Sa isa ka paradahan ang isa ka pasahero nagsakay sa bus kag nagpungko sa lamang bakante nga pulungkuan​—sa tupad sang payunir. Gintulok niya ang utod nga lalaki kag nagsiling nga nagayuhum: “Nahibaluan ko, may Lalantawan ka para sa akon!”

¹⁵ Madamong manugbantala ang nakapanaksi sing epektibo samtang nagalakbay sa bus, tren, ukon eroplano. Paano mo masugdan ang pagpakighambal sa katupad mo nga pasahero? Ang 12-anyos nga manugbantala nagsugod paagi lamang sa pagbasa sing isa ka kopya sang Magmata! sa bus, nagalaum nga makapukaw ini sa pagkamausisaon sang isa ka tin-edyer nga babayi sa tupad niya. Epektibo ini! Ginpamangkot sia sang lin-ay kon ano ang iya ginabasa, kag ang pamatan-on nagsabat nga ginabasa niya ang nahanungod sa solusyon sa mga problema nga ginaatubang sang mga pamatan-on. Nagsiling pa gid sia nga nabuligan gid sia sing daku sang artikulo kag nga mahimo man ini makabulig sa lin-ay. Malipayon nga ginbaton sang lin-ay ang mga magasin. Nabatian sang duha pa ka pamatan-on ang ila paghambalanay kag nangabay man sing mga kopya sang mga magasin. Sa sini, ginpahigad sang tsuper ang bus kag namangkot kon ngaa daku gid ang pagkawili sa sining mga magasin. Sang mahibal-an niya, nagkuha man sia sing mga kopya. Siempre pa, wala kuntani ini natabo kon ang pamatan-on nga manugbantala wala magdala sing nagakaigo nga kadamuon sang magasin agod mapaambit sa tagsatagsa nga nagpakita sing interes!

¹⁶ Pagpanaksi sa mga Parke kag mga Paradahan: Kon ginatugot sang paniempo, ang pagpanaksi sa mga parke kag mga paradahan isa ka labing maayo nga paagi sa paglab-ot sa mga tawo. Natilawan mo na bala ang manaksi sa paradahan sang shopping center? Pag-abot mo sa paradahan, panilagi anay ang imo palibot sa pila ka tion. Pangitaa ang isa nga wala nagadali ukon nga nagahulat sa nagadulog nga salakyan kag tinguhai nga sugdan ang mainabyanon nga paghambalanay. Kon ang paghambalanay nagapadayon, isal-ot ang mensahe sang Ginharian. Tinguhai nga mangabudlay sing isahanon apang nga may kaupod pa nga manugbantala sa palibot. Likawi ang pagbitbit sing daku, balik-awot nga bag ukon sa iban nga mga paagi ang pagganyat sing igtalupangod sa imo hilikuton. Mangin mainandamon. Labing maayo nga magtener lamang sing malip-ot nga tion sa isa ka paradahan kag nian magsaylo sa pihak. Kon may indi luyag makighambal sa imo, matinahuron nga maglakat kag mangita sing iban nga masugilanon. Nagagamit sini nga mga paagi, ang isa ka utod nga lalaki nakapahamtang sing 90 ka magasin sa isa ka bulan samtang nagapanaksi sa mga paradahan!

¹⁷ Ang iban nga mga tawo nagakadto sa parke agod magpahunayhunay; ang iban naman nagakadto didto agod maghampang ukon maghinguyang sing tion kaupod sang ila kabataan. Magbantay sing kahigayunan nga makapanaksi nga wala nagatublag sing dinagakaigo sa ila ginahimo. Ang isa ka utod nga lalaki nakigsugilanon sa hardinero sang isa ka parke kag natukiban niya nga nabalaka sia nahanungod sa droga kag sa buwas-damlag sang iya kabataan. Isa ka pagtuon sa Biblia ang nasugdan kag ginhiwat ini sing regular sa parke!

¹⁸ Dipormal nga Pagpanaksi sa mga Shopping Mall: Walay sapayan nga indi pirme posible nga makabantala sing pormal sa mga balaligyaan sa mga shopping mall bangod sang lokal nga mga pagdumili sa sining hilikuton, ang pila ka manugbantala nakatuga sing mga kahigayunan nga makapanaksi didto sing dipormal. Nagapungko sila sa bangko kag mainabyanon nga ginasugilanon ang iban nga nagadulog agod magpahuway. Kon may interes, mainabyanon sila nga nagatanyag sing tract ukon magasin kag nagapanikasog nga makahimo sing mga kahigayunan para sa isa ka pagduaw liwat. Pagkatapos sang pila ka minuto nga pagpanaksi sa isa ka seksion sang mall, nagasaylo sila sa lain nga lugar kag nagasugilanon sa iban naman. Siempre pa, dapat maghalong nga wala kamo nagaganyat sing dinagakaigo nga igtalupangod samtang nagapanaksi sing dipormal sa sining paagi.

¹⁹ Kon nagatamyaw sa tawo, sugdi ang paghambalanay sing mainabyanon. Kon magsabat sia, pamangkuta sia kag nian mamati sing maayo samtang nagahambal sia. Magpakita sing personal nga interes sa iya ginahambal. Ipakita nga ginapabilihan mo ang iya opinyon. Kon posible, ugyuni sia.

²⁰ Isa ka utod nga babayi ang nakapakigsugilanon sing makalilipay sa isa ka tigulang nga babayi paagi sa paghinambit kon ano na ka mahal sang balaklon. Gilayon nga nag-ugyon ang babayi, kag nagresulta ini sa masadya nga paghambalanay. Nakuha sang utod ang iya ngalan kag direksion, kag ginduaw sia liwat sina man nga semana.

²¹ Pagbantala sa mga Balaligyaan: Ang pila ka kongregasyon may mga distrito sang palatikangan subong bahin sang gintangdo sa ila nga teritoryo. Ang utod nga nagaatipan sang teritoryo mahimo maghanda sing pinasahi nga mga kard sang mapa sining madamo sing negosyo nga mga seksion. Dapat ipakita sing maathag sang mga territory map card sang kabalayan nga nagasakop sini nga ang mga palatikangan dapat pangabudlayan sing tuhay. Sa iban nga mga teritoryo, ang mga duog-palatikangan mahimo pangabudlayan sing dungan sa mga pamalay. Mahimo agdahon sang mga gulang ang sangkol nga mga manugbantala nga mangabudlay sing regular sa mga teritoryo nga may negosyo agod ang hilikuton sa mga balaligyaan indi mapatumbayaan.

²² Kon gin-agda ikaw nga makigbahin sa sining hilikuton kag wala mo pa ini mahimo sang una, ang isa ka maayong paagi sa ‘pagtipon sing kasidla’ amo ang pagpangabudlay anay sa pila ka mas magagmay nga mga balaligyaan; nian, kon mas may kompiansa ka na, pangabudlayi ang mga mas dalagku. (1 Tes. 2:2) Kon nagapangabudlay sa mga balaligyaan, mamayo sing subong sa kon nagatambong ka sa miting sa Kingdom Hall. Kon mahimo, magsulod sa balaligyaan kon wala na sing mga kustomer nga nagahulat nga atipanon. Mangabay nga masugilanon ang manedyer ukon ang tawo nga tinugyanan. Mangin mainabyanon, kag labaw sa tanan, indi magdugay. Indi kinahanglan nga mangayo sing pasaylo. Madamong negosyo ang mahunahunaon sa mga kustomer kag nagapaabot sing mga tublag.

²³ Pagkatapos matamyaw ang nagabantay sang balaligyaan, mahimo mo ini masiling: “Ang mga negosyante may masako gid nga iskedyul amo nga talagsa lang namon sila maabtan sa puluy-an, gani ginaduaw ka namon diri sa imo puwesto agod bilinan ka sing makapahunahuna gid basahon nga artikulo.” Nian komentuhi ang bag-ong magasin.

²⁴ Ukon mahimo mo ini tilawan kon nagasugilanon sa manedyer: “Natalupangdan namon nga ginapanikasugan sang mga negosyante nga madamo sila sing nahibaluan. Ang pinakaulihi nga guwa sang Ang Lalantawan (ukon Magmata!) may isa ka artikulo nga nagaapektar sa aton tanan sing personal.” Ipaathag kon ano ini, kag maghinakop paagi sa pagsiling: “Napat-od namon nga malipay ka sa pagbasa sini.”

²⁵ Kon may mga empleyado, kag kon daw nagakaigo, mahimo mo isugpon: “Mahimo ko man bala masugid ining malip-ot nga presentasyon sa imo mga empleyado?” Kon magpasugot sia, dumduma nga nangako ka sa pagdali lamang, kag ginapaabot sang manedyer nga tumanon mo ang imo hinambalan. Kon may mga empleyado nga luyag makigsugilanon sing malawig, labing maayo nga duawon sila sa ila puluy-an.

²⁶ Sining karon lang ginbuylugan sang pila ka manugbantala sa isa ka diutay nga banwa ang manugtatap sang sirkito sa hilikuton sa mga balaligyaan. Nangalag-ag primero ang pila ka manugbantala, kay wala pa gid nila ini mahimo sang una; apang dili madugay nangin relaks sila kag naluyagan ini. Sa kubos lang sa isa ka oras, nakasugilanon sila sa 37 ka tawo kag nakapahamtang sing 24 ka magasin kag 4 ka brosyur. Ang isa ka utod nga lalaki nagsiling nga sa kinaandan sa isa ka bulan nga pagpamalaybalay nga hilikuton, indi sila mahimo makasugilanon sa subong kadamo nga tawo kaangay sang nagbantala sila sa mga balaligyaan sa sadtong malip-ot nga tion.

²⁷ Pagpaluntad sing mga Kahigayunan nga Makabantala: Wala ginlimitehan ni Jesus ang iya pagpanaksi sa pormal nga mga kahimtangan. Ginpalapnag niya ang maayong balita sa tagsa ka nagakaigo nga okasyon. (Mat. 9:​9; Luc. 19:​1-10; Juan 4:​6-15) Talupangda kon paano nagpaluntad ang pila ka manugbantala sing mga kahigayunan nga makabantala.

²⁸ Kinabatasan na sang pila nga magpanaksi sa mga ginikanan nga nagahulat sa ila kabataan malapit sa ganhaan sang eskwelahan. Sanglit madamong ginikanan ang nagaabot sing tubtob sa 20 minutos sing maaga, may tion pa agod masugilanon sila sing makapulukaw nahanungod sa isa ka Makasulatanhon nga topiko.

²⁹ Madamong payunir ang mahunahunaon sa paglab-ot sa mga tawo nga mahimo nga may pinasahi nga interes sa isa ka partikular nga tema nga ginahinun-anunan sa aton mga magasin. Halimbawa, ang isa ka utod nga babayi nakatigayon sing maayong mga resulta sa pagduaw sa anom ka eskwelahan sa teritoryo sang iya kongregasyon nga nagagamit sang mga serye sa “Schools in Crisis,” nga nagguwa sa Disiembre 22, 1995, Awake! Ginduaw man niya ang mga sentro nga nagaatipan sang mga problema sa pamilya nga nagagamit sang mga magasin tuhoy sa pagkabuhi sang pamilya kag pag-abuso sa bata kag gin-agda sia nga magbalik kon may mga ulihi nga guwa nga nagahinun-anon sa kaanggid nga mga topiko. Ang sabat nga nabaton niya sa opisina sang mga wala sing palamugnan sa Marso 8, 1996, Awake! tuhoy sa pagkawalay palamugnan ginlaragway subong “makakilibot gid.”

³⁰ Ang isa ka manugtatap sang distrito nagareport nga sila sang iya asawa regular nga nagapanaksi sing dipormal kon nagapamalaklon sang ila groserya. Nagapamalaklon sila sa oras nga ang balaligyaan indi gutok, kag ang mga kustomer wala nagadali. Nagreport sila sing madamong matahom nga paghambalanay.

³¹ Madamong manugbantala ang nagareport sing maayong mga resulta samtang nagapanaksi sa mga tawo sa pangpubliko nga duog-lalabhan. Wala lamang sila nagabilin sing mga magasin kon wala sing mga kustomer. Ang ila tulumuron amo ang paglab-ot sa mga tawo paagi sa maayong balita, gani ginapanikasugan nila nga masugilanon sing personal ang mga nagagamit sang pasilidad.

³² Sa pila ka lugar, ang pinili nga mga manugbantala may pahanugot nga makapanaksi sa mga erport. Kon kaisa nalipay sila makapanaksi sa internasyonal nga mga manlalakbay nga nagapuyo sa mga pungsod diin diutay lamang ang katawhan ni Jehova. Kon interesado, nagatanyag sila sing tract ukon mga magasin.

³³ Kon wala ginatugutan sa pagpanaksi sing personal sa mga nagapuyo sa ginaguardiahan sing maayo nga mga apartment sa teritoryo sang kongregasyon, kinabatasan na sang iban nga panaksihan sing mataktika ang mga guardia ukon ang mga manedyer sa mga opisina. Ginagamit man ini nga paagi sa pribado kag may gawang nga mga komunidad. Ginduaw sang manugtatap sang sirkito kag sang pila ka manugbantala ang pito ka apartment sa sining paagi. Sa tagsa ka apartment, ginsugiran nila ang manedyer nga walay sapayan nga wala sila ginatugutan nga magduaw sa mga apartment sa kinaandan nga paagi, indi nila luyag nga mawasi niya ang impormasyon sa pinakabag-o nga mga balasahon. Ang mga manedyer sa tanan pito ka apartment malipayon nga nagbaton sing mga magasin kag nangabay sing masunod man nga mga guwa! Nian ang mga pumuluyo sa sining mga apartment ginpakig-angutan paagi sa telepono.

³⁴ Panikasugi nga Makabantala Bisan Diin: Ang pagpanghikot suno sa aton dedikasyon nagalakip sang balatyagon sang pagkahilingagawon nahanungod sa aton asaynment nga ibantala ang mensahe sang Ginharian. Agod malab-ot ang mga tawo sa oras nga kombeniente para sa ila, dapat naton ipahigad ang aton personal nga mga luyag agod “mahimo [naton] maluwas ang pila sa tanan nga paagi.” Luyag sang tanan nga dedikadong alagad ni Jehova nga makasiling, kaangay sang ginsiling ni apostol Pablo: “Ginahimo ko ang tanan nga butang tungod sa maayong balita, agod mangin tagaambit ako sini sa iban.”​—1 Cor. 9:​22, 23.

³⁵ Si Pablo nagsulat sing dugang: “Gani, sa labing daku nga kalipay magapabugal ako sa akon mga kaluyahon, agod nga ang gahom ni Cristo magapabilin sa akon kaangay sang tolda. . . . Kay kon maluya ako, nian gamhanan ako.” (2 Cor. 12:​9, 10) Sa iban nga hambal, wala sing isa sa aton ang makahimo sining hilikuton sa aton lamang kaugalingon nga kusog. Dapat kita mangamuyo kay Jehova para sa iya gamhanan nga balaan nga espiritu. Kon mangamuyo kita sing kusog sa Dios, makasalig kita nga sabton niya ang aton mga pangamuyo. Nian ang aton gugma para sa tawo magapahulag sa aton sa pagpangita sing mga kahigayunan nga mabantala ang maayong balita sa ila, bisan diin man sila makita. Sa masunod nga semana, ngaa indi ninyo tilawan ang isa sa mga panugda nga ginhatag sa sining suplemento?