Ibantala ang Ginharian
1 Sa Hebreo 10:23, ginalaygayan kita sa “pagpanguyapot sing hugot sa dayag nga pagpahayag sang aton paglaum.” Kag ang aton paglaum yara sa Ginharian sang Dios. Si Jesus nagsugo nga ang maayong balita sang Ginharian dapat ibantala sa tanan nga kapungsuran. (Mar. 13:10) Dapat naton ini huptan sa hunahuna sa aton ministeryo.
2 Kon nagapakigsugilanon kita sa mga tawo, tinguhaan naton nga sugdan ang paghambalanay nahanungod sa butang nga nagahilabot sa ila. Sa masami ginahinambitan naton ang mga butang nga nakahibalo gid sila, subong sang krimen sa lugar, mga problema sang mga pamatan-on, mga kabalaka sa pangabuhi, ukon krisis sa mga hitabo sa kalibutan. Sanglit ang hunahuna sang kalabanan nga tawo nakasentro sa sining “mga kabalaka sa kabuhi,” kon hinambitan naton ini, ang mga tawo masunson nga nagapabutyag sang kon ano ang ginahunahuna nila. (Luc. 21:34) Mahimo ini magbukas sang dalan agod mapaambit naton ang aton paglaum.
3 Apang, kon indi kita maghalong, ang paghambalanay mahimo nga masentro na lang sa negatibo nga mga butang tubtob sa punto nga wala naton matigayon ang katuyuan sang aton pagduaw—ang pagbantala sang mensahe sang Ginharian. Walay sapayan nga ginapatalupangod naton ang malain nga mga kahimtangan, ang aton tulumuron amo ang pagpatuhoy sang igtalupangod sa Ginharian, nga magalubad sang tanan nga problema sang katawhan. May matahom kita nga paglaum nga dapat gid mabatian sang mga tawo. Gani walay sapayan nga mahimo naton hambalan primero ining “ital-ital nga mga tion nga mabudlay atubangon,” dapat kita gilayon magkonsentrar sa aton pangunang mensahe, ang “walay katapusan nga maayong balita.” Sa sining paagi matuman naton sing bug-os ang aton ministeryo.—2 Tim. 3:1; 4:5; Bug. 14:6.