“Sa Diin Nagahalin ang Kuwarta?”

NAGDAYAW ang mga tumalan-aw sang vid­eo nga “Jehovah’s Witnesses​—⁠The Organization Behind the Name” sang ­Watch Tow­er So­ciety. Nakita nila ang desente nga mga dagway sang mga lalaki kag mga babayi gikan sa nagkalainlain nga rasa kag ginhalinan, nagayuhom kag nagapanghikot sing tingob sa paghiusa. Wala lamang nila matalupangdan ang linibo ka malipayon nga manugpangabudlay kundi ang dalagku man nagatinupad nga mga tinukod sa ulong-talatapan sang Sosiedad sa Brook­lyn kag sa ila mga ulumhan sa Wall­kill, New York. Ginapakita sang vid­eo nga sa sulod sining mga tinukod masalapuan ang moderno nga teknolohiya​—⁠tuman kadasig nga mga makina sa pag-imprinta kag pag­bind nga nagapatubas sing minilyon ka mga publikasyon kada bulan, ang nanuhaytuhay nga kompyuter, kag ang madamo nga departamento para sa pagbalhag sing mga literatura.

Nagapabanaag ini sing daku kaayo nga kagastuhanan. Gani ang iban nagapamangkot, “Sa diin nagahalin ang kuwarta?”

Nagadayaw man ang mga dumuluaw sa bug-os kalibutan nga ulong-talatapan sang Sosiedad. Nagalalaba ang ila mga liog sa pagtan-aw sa bag-o 30 ka panalgan nga ilistaran nga tinukod, isa sang madamong tinukod nga ginagamit sa pagpapuyo sa kapin sa 3,000 ka boluntaryo nga ministro nga nagapanghikot didto. Ang pagduaw sa bag-o nga Watch­tower Edu­ca­tion­al Cen­ter mga 110 kilometros sa naaminhan sang Brook­lyn nagapadayaw man sa madamo. Padayon pa nga ginatukod, nagapapuyo ini sa mga 1,200 ka manugpangabudlay. Duha ka klase sang mga misyonero ang pagahanason didto kada tuig kag ipadala sa ila mga asaynment sa iban nga pungsod. Gikan man sa sini nga lokasyon nga ang panuytoy ginahatag sa kapin sa 10,000 ka kongregasyon sang mga Saksi ni Jehova sa Estados Unidos. Madamong sanga sa bug-os nga kalibutan sining karon lang ang nagpasangkad man sang ila mga pasilidad ukon ginahimo pa lamang ini. Nagakinahanglan sing daku nga kantidad sang kuwarta ang paghimo sining tanan nga hilikuton. Ang mga tawo nagapamangkot, “Sa diin nagahalin ang kuwarta?”

Ang sabat amo nga nagahalin ini sa ordinaryo nga mga indibiduwal kaangay naton. Mga tawo sila, sa bug-os kalibutan nga luyag maghimo sing tanan nila nga masarangan sa pagpauswag sa importante nga Cristianong hilikuton sang pagbantala kag pagpanudlo. Ining kinabubut-on nga espiritu may ginsundan.

Ang Halimbawa nga Ginhatag sang Dumaan nga Israel

Kapin sa 3,500 ka tuig ang nagligad, nangin kinahanglanon ang maalwan nga pag-amot. Ginsugo ni Jehova si Moises sa pagtukod sing isa ka tabernakulo, ukon “layanglayang nga tilipunan,” agod gamiton sa Iya pagsimba. Ang ginhatag sang Dios nga desinyo nagakinahanglan sing nanarisari malahalon nga mga butang. Si Jehova nagsugo: “Gikan sa inyo kuha kamo sing dulot para kay Jehova. Ang tagsatagsa nga may maalwan sing tagipusuon magdala sini subong dulot kay Jehova.” (Exodo 35:​4-9) Paano nagsabat ang mga tawo? Ang rekord nagasugid sa aton nga “nag-abot sila, ang tagsatagsa nga ang iya tagipusuon nagtandog sa iya, kag nagdala sila, ang tagsatagsa nga may kabubut-on sa iya espiritu, sing dulot kay Jehova nga sa buluhaton sang layanglayang nga tilipunan kag sa tanan niya nga pag-alagdan kag sa mga panapton nga balaan.” Ining “kinabubut-on nga dulot” amat-amat nga nagdamo nga ‘labi pa [ini] kadamo sangsa kinahanglan nga buluhaton nga ginsugo ni Jehova nga himuon.’ (Exodo 35:​21-29; 36:​3-5) Daw ano ka dimakagod, maalwan nga espiritu ang ginpakita sang mga tawo!

Kubos sa 500 ka tuig sang ulihi, nagpanawagan liwat para sa maalwan nga amot gikan sa mga Israelinhon. Ang handum ni Hari David sa pagtukod sing permanente nga balay para kay Jehova sa Jerusalem madali na lang matuman paagi sa iya anak nga si Solomon. Si David mismo nagtipon kag nag-amot sing daku nga bahin sang mga kinahanglanon. Ang iban nagbuylog man sang nanawagan si David sa pagdala “sing dulot kay Jehova.” Ang resulta? ‘Ang katawhan nagkasadya bangod nakadulot sila sing kinabubut-on, kay sa himpit nga tagipusuon nagdulot sila sing kinabubut-on kay Jehova; kag bisan si David nga hari mismo nagkasadya sa dakung kalipay.’ (1 Cronica 22:14; 29:​3-9) Ang pilak kag bulawan lamang nagabili sing mga $50 bilyones (U.S.) sa karon!​—⁠2 Cronica 5:⁠1.

Matalupangdan naton gikan sa sining mga halimbawa nga wala sing isa nga ginpilit sa paghatag. “Kinabubut-on” gid ini kag ginhatag “sing bug-os tinagipusuon.” Mahamuot lamang si Jehova sa tinagipusuon nga amot. Sing kaanggid, sang nag-utwas ang kahigayunan sa pag-amot sing kuwarta agod buligan ang imol nga mga Cristiano, si apostol Pablo nagsulat nga indi ini mangin “subong butang nga ginpugos.” Sia nagdugang: “Maghimo ang tagsatagsa suno sa gintuyo niya sa iya tagipusuon, indi nga nagaduhaduha ukon sa pagpilit, kay ang Dios nagahigugma sa manughatag nga malipayon.”​—⁠2 Corinto 9:​5, 7.

Ang Kinahanglanon Karon

May kinahanglanon bala para sa pag-amot karon? Sa pagkamatuod may yara, kag may dugang pa gani samtang nagalawig ang tion. Ngaa?

Ang mga Cristiano ginhatagan sing espesipiko nga mga instruksion sa sining tion sang katapusan. Ginsugo ni Jesus ang iya mga disipulo: “Busa lakat kamo kag maghimo sing mga disipulo sa katawhan sang tanan nga kapungsuran, nga nagabawtismo sa ila sa ngalan sang Amay kag sang Anak kag sang balaan nga espiritu, nga nagatudlo sa ila sa pagtuman sang tanan nga butang nga ginsugo ko sa inyo.”​—⁠Mateo 28:​19, 20.

Ang pagtuman sining daku nga pagpanudlo kag pagbantala nga hilikuton samtang nagahilapit kita sa talipuspusan sang “katapusan sang sistema sang mga butang” nagakinahanglan sing daku nga panahon kag kagastuhanan. Ngaa? Bangod sang tanan nga nadalahig sa pagdala sing mensahe sang Ginharian sang Dios ‘sa pinakaukbong nga bahin sang duta.’ (Binuhatan 1:⁠8) Indi sunado sang kalabanan nga tawo ang Biblia subong sang unang siglo nga mga Judiyo. Sa katunayan, madamo sang mga pumuluyo sa duta ang indi pamilyar sa Biblia kag wala ini ginakabig subong Pulong sang Dios. Dapat hanason ang mga manugbantala kag ipadala sa malayo nga mga kadutaan. (Roma 10:​13-15) Kag hunahunaa ang kadamuon sang mga pamulong nga nadalahig! Yadtong nabantalaan kinahanglan nga may mga Biblia kag pasad sa Biblia nga mga publikasyon agod basahon kag tun-an sa ila kaugalingon nga hambal. Agod malab-ot ang tanan sing sistematiko kag madala sila sing progresibo sa espirituwal nga kahamtong agod makabulig sila sa iban pa, kinahanglan ang organisasyon sa daku nga kasangkaron.​—⁠2 Timoteo 2:⁠2.

Si Jesus nagsiling nga ang “maayong balita sang ginharian” dapat anay “ibantala sa bug-os napuy-an nga duta subong nga panaksi sa tanan nga kapungsuran; kag nian magaabot ang katapusan.” (Mateo 24:14) Gani karon na ang tion sa paghugod sang tanan naton nga masarangan agod himuon inang importante nga hilikuton. Ang aton kinitaan magamit sing labing maayo antes ang materyal nga kamanggaran mangin walay pulos.​—⁠Ezequiel 7:19; Lucas 16:⁠9.

Sa Diin Nagakadto ang Kuwarta?

Ang Watch Tower Society nagabalhag sing mga literatura sa Biblia sa kapin sa 230 ka hambal, subong man sa ­Braille para sa mga bulag kag mga vid­eo sa ­sign lan­guage para sa mga bungol. Nagakinahanglan ina sing mga grupo sang mga manugbadbad kag mga proof­reader sa kada hambal. Ang paghunahuna lamang sang paghimo sining tanan nga hilikuton, ilabi na ang Lalantawan nga magasin, nga ginabalhag kada bulan sa 121 ka hambal kag 101 sini ang dululungan, makahalawhaw. Apang kinahanglanon ini agod nga ang mga tawo sa bug-os nga kalibutan sarang makatigayon ukon makabasa sing pareho nga impormasyon. Kada tuig nagasaka ang bili sang papel kag iban pa nga mga materyal nga ginagamit sa pagpatubas sing mensahe sang Ginharian sa naimprinta nga porma ukon sa au­dio ukon vid­eo nga mga rekord. Ina nga mga kagastuhanan dapat abagahon paagi sa paggamit sing mga donasyon gikan sa mga kauturan.

Ang pagbantala kag pagpanudlo nga hilikuton ginahimo sa mga teritoryo nga ginakobrehan sang kapin sa 75,000 ka kongregasyon sang mga Saksi ni Jehova sa bug-os nga kalibutan. Agod mahiusa kag mapalig-on sila, ang nahanas nga nagalakbay nga mga manugtatap nagaduaw sa tagsa ka kongregasyon sing makaduha sa kada tuig. Ang mga asambleya importante man sa pagpaalinton sing instruksion. Dapat arkilahan ang dalagku nga mga pasilidad para sa makapalig-on gid nga mga kombension. Ang imo mga amot ginagamit man sa sining mga katuyuan.

Samtang ang mga asambleya masami nga ginahiwat lamang sing tatlo ka beses sa isa ka tuig, ang lokal nga mga kongregasyon nagatipon para sa lima ka semanal nga miting. (Ipaanggid ang Exodo 34:​23, 24.) Ang pagdugok sang mga bag-uhan nga nagabaton sing maayong balita nagakahulugan sing pagdugang sang linibo ka bag-o nga kongregasyon kada tuig. Sa bulig sang minilyon ka dolyar nga ginapautang paagi sa Sosiedad, ginatos ka bag-o nga Kingdom Hall ang ginatukod kada tuig, kag madamo pa ang ginapakay-o kag ginapadaku. Bisan pa nagalibutlibot ini nga pundo nga ginagamit sing liwat kag liwat, ang pagkinahanglan padayon nga nagadugang.

Ang isa ka duog nga may dimatupungan nga pag-uswag amo ang sa mga pungsod sa Nasidlangan nga Europa nga sakop sang anay Unyon Sobyet. Makalilipay gid ang mauswagon nga balita nga ang hilikuton ginbuksan na sa sining mga duog! Ginapadala karon ang mga misyonero sa madamo sining pungsod. Gintukod ang bag-o nga mga sanga sa pila ka kadutaan, nga nagpadamo sang boluntaryo nga mga ministro nga nagahuman sang bug-os kalibutan nga pamilya Bethel sa kapin sa 15,000. Sa pagkamatuod, dapat magbakal ukon magpatindog ang sanga sing mga tinukod agod puy-an nila. Ang imo mga amot nagabulig sa pagpuno sinang kinahanglanon.

Natalupangdan ni Satanas kag sang iya mga demonyo ining tanan nga hilikuton. Ginahimo nila ang tanan nila nga masarangan agod balabagan ang mga panikasog sang matutom nga mga alagad ni Jehova ukon nagatuga sing mga problema sa ila. (Bugna 12:17) Nagakahulugan ini sing dugang nga legal nga mga pagpakig-away nga dapat atubangon sa korte agod amligan ang mga kinamatarong sang katawhan sang Dios sa pagbantala kag pagkabuhi nahisuno sa iya matarong nga mga kasuguan. Dugang pa, ang mga halit sang inaway sa sistema sang mga butang ni Satanas, subong man ang kinaugali nga mga kalamidad, nagakahulugan nga ang bulig nga mga suplay pirme nga kinahanglanon para sa aton nahalitan nga mga kauturan nga lalaki kag babayi kag sa iban pa nga kaupod nila. Ang imo mga amot nagabulig sa paghatag sining kinahanglanon nga bulig.

Si Jehova Magapadya sa Imo

Ang maalwan nga paggamit sang aton tion kag kinitaan sa pagpauswag sa hilikuton sang Ginuo nagadala sing daku nga mga pagpakamaayo. Paano? Bangod ang Dios, nga nagapanag-iya gid sang tanan nga butang, magapadya sa aton. Ang Hulubaton 11:25 nagasiling: “Ang kalag nga maalwan magatambok, kag ang nagabunyag bunyagan man sia.” Mahamuot gid si Jehova kon himuon naton ang aton bahin sa pagpauswag sang iya pagsimba. (Hebreo 13:​15, 16) Ginpangakuan niya ang dumaan nga mga Israelinhon nga magadala sing mga amot nga ginpatuman sa idalom sang Kasuguan nga katipan: “ ‘Tilawi ako, palihug, sa sini,’ siling ni Jehova sang kasuldadusan, ‘kon indi ko pagbuksan sa inyo ang mga talambuan sang langit kag iula sa inyo ang pagpakamaayo sa bagay nga wala na sing masudlan.’ ” (Malaquias 3:10) Ang espirituwal nga kabuganaan sang mga alagad ni Jehova karon pamatuod nga ginatuman sang Dios ang iya saad.

Ining daku nga hilikuton sang pagpahayag sa tanan sing adlaw sang kaluwasan kag pagbulig sa mga bunayag sing tagipusuon sa dalanon padulong sa kabuhi indi magpadayon sa walay katapusan. (Mateo 7:14; 2 Corinto 6:⁠2) Apang yadtong tanan sang “iban nga mga karnero” sang Ginuo dapat tipunon. (Juan 10:16) Kinahanglanon gid nga matuman ina nga hangkat karon! Kag mangin malipayon gid ang tagsatagsa sa aton, kon sa sinang bag-ong kalibutan sang pagkamatarong, makasiling kita tuhoy sa nagligad, ‘Nakapakigbahin ako sing bug-os sa sadtong katapusan nga hilikuton sang pagtipon’!​—⁠2 Pedro 3:⁠13.

[Kahon sa pahina 30, 31]

Kon Paano Ang Iban Nagaamot sa Pagbantala sang Ginharian nga Hilikuton

MGA AMOT SA BUG-OS KALIBUTAN NGA HILIKUTON: Madamo ang nagapain ukon nagabadyet sing kantidad nga ginahulog nila sa mga kahon-alamutan nga may ngalan: “Mga Amot Para sa Bug-os Kalibutan nga Hilikuton sang Sosiedad​—⁠Mateo 24:14.” Kada bulan ginapadala sang kongregasyon ini nga kantidad sa bug-os kalibutan nga ulong-talatapan sa Brooklyn, New York, ukon sa lokal nga sanga talatapan.

MGA REGALO: Ang boluntaryo nga mga amot nga kuwarta mahimo ipadala sing direkta sa ­Watch ­Tower Bi­ble and ­Tract So­ciety of the Phil­ip­pines, P.O. Box 2044, 1099 Manila, ukon sa talatapan sang Sosiedad nga nagapangalagad sa inyo pungsod. Ang mga alahas ukon iban pa nga mga bahandi mahimo maamot. Ang isa ka malip-ot nga sulat nga nagasiling nga ini isa ka kinabubut-on nga regalo dapat ilakip sa sining mga amot.

KAHIMUSAN SA PAGDONAR NGA MAY KONDISYON: Mahimo ihatag ang kuwarta sa ­Watch ­Tower So­ciety subong patago tubtob mapatay ang nagdonar, upod ang kondisyon nga sa tion sang personal nga pagkinahanglan, ibalik ini sa nagdonar.

PASIGURO: Ang Watch Tower Society mahimo hingadlan subong benepisyaryo sang isa ka pasiguro sa kabuhi nga polisa ukon sang isa ka plano sang pagretiro ukon pension. Dapat pahibaluon ang Sosiedad tuhoy sini nga kahimusan.

MGA KUWENTA SA BANGKO: Ang mga kuwenta sa bangko, mga sertipiko sang deposito, ukon indibiduwal nga kuwenta sa pagretiro mahimo ipatago subong butang nga ginpiyar ukon ibayad sa tion sang kamatayon sa ­Watch Tow­er So­ciety, nahisuno sa mga kinahanglanon sang lokal nga mga bangko. Dapat pahibaluon ang Sosiedad sa sini nga kahimusan.

STOCKS KAG BONDS: Mahimo idonar ang stocks kag bonds sa ­Watch Tow­er So­ciety ayhan subong isa ka donasyon ukon sa idalom sang kahimusan diin ang kinitaan padayon nga ihatag sa nagdonar.

REAL ESTATE: Ang mahimo mabaligya nga real estate mahimo idonar sa ­Watch Tow­er So­ciety paagi sa paghimo sing direkta nga regalo ukon paagi sa pagtigana sing bug-os kabuhi nga propiedad sa nagdonar, nga padayon nga makaistar sa sini tubtob buhi sia. Dapat ang isa makig-angot sa Sosiedad antes himuan sing kasulatan ang bisan ano nga real estate sa So­siedad.

TESTAMENTO KAG MGA BUTANG NGA GINAPIYAR: Ang propiedad ukon kuwarta mahimo ipapanubli sa ­Watch Tow­er So­ciety paagi sa ginhimo sing legal nga testamento, ukon ang Sosiedad mahimo hingadlan subong benepisyaryo sang isa ka kasugtanan tuhoy sa mga butang nga ginapiyar. Ang pagpiyar sing isa ka butang sa isa ka relihioso nga organisasyon subong amo ang benepisyaryo mahimo may mga bentaha sa buhis. Ang isa ka kopya sang testamento ukon sang kasugtanan tuhoy sa butang nga ginapiyar dapat ipadala sa Sosiedad.

GINPLANO NGA PAGHATAG: Ang Sosiedad naghanda sing Ingles nga brosyur nga natig-uluhan sing “Planned Giving.” Ang mga nagaplano sa Estados Unidos sa paghatag sing espesyal nga regalo sa Sosiedad karon ukon magbilin sing palanublion sa tion sang kamatayon mahimo makasapo sining impormasyon nga mabuligon. Matuod gid ini kon luyag nila maghimo sing tulumuron sang pamilya ukon katuyuan sa pagpapanubli sing mga pagkabutang samtang nagahimulos sa legal nga mga probisyon agod mabuhinan ang balayran nga buhis.

Para sa dugang nga kasayuran nahanungod sa bisan diin nga nasambit, magsulat sa Treasurer’s Office, Watch Tower Bible and Tract Society of the Philippines Inc., P.O. Box 2044, 1099 Manila, ukon sa lokal nga sanga talatapan sang Sosiedad sa inyo duog.