Ngaa Maghatag kay Jehova?

SAMTANG nagatagiti ang init sang adlaw sa diutay nga banwa sang Sidon, ang Sarepta, isa ka balo nga babayi ang nagaduko sa pagtipon sing mga kahoy. Madabok sia sing kalayo agod lutuon ang diutay nga pagkaon—ayhan ang katapusan nga pagkaon nila sang iya anak nga lalaki. Nagtinguha sia nga mabuhi sila sang iya anak sa malawig nga tigpalamangag kag tiggulutom, kag nakadangat sila sa sining miserable nga kahimtangan. Ginagutom sila.

Isa ka lalaki ang nagpalapit. Elias ang iya ngalan, kag natalupangdan sang ulihi sang balo nga isa sia ka manalagna ni Jehova. Nabatian na niya ang tuhoy sini nga Dios. Si Jehova tuhay kay Baal, nga ang mapintas, tiko nga pagsimba sini lapnag sa iya pungsod nga Sidon. Gani sang mangayo sa iya si Elias sing tubig nga mainom, ginhatagan niya sia sa gilayon. Ayhan naghunahuna sia nga kahamut-an sia ni Jehova bangod sini. (Mateo 10:41, 42) Apang nangayo pa sing dugang si Elias—sing diutay nga pagkaon. Ginpaathag niya nga ang iya pagkaon hustuhan lamang para sa katapusan nga pagkaon. Apang, namilit si ­Elias, nagpasalig sa iya nga amanan sia sing milagruso ni Jehova sing pagkaon tubtob matapos ang tigpalamangag. Ano ang iya ginhimo? Ang Biblia nagasiling: “Naglakat sia kag naghimo suno sa ginsiling ni Elias.” (1 Hari 17:10-15) Ginalaragway sining simple nga mga tinaga ang daku nga buhat sang pagtuo—daku gid, nga sa katunayan, gindayaw pa gani ni Jesucristo yadto nga balo mga isa ka libo ka tuig sang ulihi!—Lucas 4:25, 26.

Apang, daw indi nagakaigo nga mangabay sing tuman si Jehova gikan sa isa ka imol gid nga babayi. Matuod gid ini kon binagbinagon naton ang pangamuyo anay sang isa ka prominente gid nga tawo. Ang pagpangayo sing mga amot ni David agod magamit sang iya anak nga si Solomon sa pagtukod sang templo nagpahulag sing daku nga kaalwan. Sa moderno nga katumbas, ang mga amot naglab-ot sa binilyon ka dolyar! Apang, si David, nagsiling sa pangamuyo kay Jehova: “Sin-o ako kag sin-o ang akon katawhan, nga sarang kami sa paghalad sining bagay sing kinabubut-on? Kay ang tanan nga butang naghalin sa imo, kag gikan sa imo kaugalingon nga kamot naghatag kami sa imo.” (1 Cronica 29:14) Subong sang ginsiling ni David, ang tanan nga butang iya ni Jehova. Busa kon nagahatag kita sa pagsakdag sa putli nga pagsimba, ginahatag lamang naton kay Jehova ang naghalin sa iya. (Salmo 50:10) Busa, ang pamangkot nagautwas, Ngaa luyag pa ni Jehova nga maghatag kita?

Isa ka Importante nga Bahin sang Matuod nga Pagsimba

Ang pinakasimple nga sabat amo nga kutob sang dumaan nga mga tion ginhimo ni Jehova ang paghatag nga isa ka importante nga bahin sang putli nga pagsimba. Ginhalad sang matutom nga si Abel ang pila sang iya hamili nga kasapatan kay Jehova, Ang mga patriarka nga sanday Noe, Abraham, Isaac, Jacob, kag Job naghimo sing kaanggid nga mga halad.—Genesis 4:4; 8:20; 12:7; 26:25; 31:54; Job 1:5.

Ang Mosaikong Kasuguan nagsugo kag nagpatuman pa gani nga maghatag sing mga amot kay Jehova. Halimbawa, ang tanan nga Israelinhon ginsugo nga maghatag sing ikapulo, ukon magdonar sing ikapulo nga bahin sang patubas sang duta kag sang pagdamo sang ila kasapatan. (Numeros 18:25-28) Ang iban nga mga kontribusyon wala ginpatuman sing estrikto. Halimbawa, ang tagsa ka Israelinhon ginsugo nga ihatag kay Jehova ang una nga bunga sang ila sapat kag patubas. (Exodo 22:29, 30; 23:19) Apang, gintugutan sang Kasuguan ang tagsa ka indibiduwal sa pagpamat-od kon daw ano kadamo sang iya una nga bunga ang iya ihatag, lamang ihatag niya ang pinakamaayo. Ginapatuman man sang Kasuguan ang mga halad sang pagpasalamat ukon mga halad sang panaad, nga ginahimo nga boluntaryo. (Levitico 7:15, 16) Ginpalig-on ni Jehova ang iya katawhan nga maghatag suno sa kadakuon sang pagpakamaayo niya sa ila. (Deuteronomio 16:17) Subong sang ginhimo anay sang gintukod ang tabernakulo kag sang ulihi ang templo, ang kada isa naghatag suno sa ginpahulag sa iya sang iya tagipusuon. (Exodo 35:21; 1 Cronica 29:9) Sing pat-od yadtong boluntaryo nga mga pag-amot ginkahamut-an gid ni Jehova!

Sa idalom sang “kasuguan ni Cristo,” ang tanan nga paghatag ginhimo nga boluntaryo. (Galacia 6:2; 2 Corinto 9:7) Wala ina nagakahulugan nga ang mga sumulunod ni Cristo mag-untat sa paghatag ukon maghatag sila sing kubos. Indi gid! Sang si Jesus kag ang iya mga apostoles nagbantala sa Israel, isa ka grupo sang mga babayi ang nag-upod sa ila kag nag-alagad sa ila gikan sa ila mga pagkabutang. (Lucas 8:1-3) Si apostol Pablo nagbaton man sing mga dulot nga nagsakdag sang iya misyonero nga hilikuton, kag ginpalig-on man niya ang pila ka kongregasyon sa pagbulig sa iban nga nagakinahanglan. (2 Corinto 8:14; Filipos 1:3-5) Ang nagadumala nga hubon sa Jerusalem nagtangdo sing responsable nga mga lalaki agod pat-uron nga ang gin-amot nga mga bulig mahatag sa mga nagakinahanglan. (Binuhatan 6:2-4) Sing maathag, ginkabig sang unang mga Cristiano nga isa ka pribilehiyo ang pagsakdag sa putli nga pagsimba sa sining mga paagi.

Sa gihapon, mahimo matingala kita kon ngaa ginhimo ni Jehova ang paghatag subong bahin sang pagsimba sa iya. Binagbinaga ang apat ka rason.

Kon Ngaa Nagahatag Kita

Una, ginahimo ni Jehova ang paghatag subong bahin sang matuod nga pagsimba bangod ang paghimo sini maayo para sa aton. Ginapakita sini ang aton pag-apresyar sa kaayo sang Dios. Halimbawa, kon ang isa ka bata nagabakal ukon nagahatag sing isa ka regalo para sa isa ka ginikanan, ngaa nagakalipay gid sing daku ang ginikanan? Ginahatag bala sang regalo ang isa ka daku nga kinahanglanon nga indi sarang matigayon sang ginikanan? Indi gid. Sa baylo, nalipay ang ginikanan sa pagtan-aw nga ang bata nagapalambo sing mapinasalamaton kag mahinatagon nga espiritu. Sa kaanggid nga mga rason ginapalig-on kita ni Jehova sa paghatag kag nalipay sia kon ginahimo naton ini. Amo ini ang paagi nga mapakita naton sa iya nga ginaapresyar gid naton ang iya walay latid nga kaayo kag kaalwan sa aton. Sia ang manughatag sang ‘tagsa ka maayong hatag kag tagsa ka himpit nga dulot,’ gani indi gid kita maubusan sing rason sa pagpasalamat sa iya. (Santiago 1:17) Labaw sa tanan, ginhatag ni Jehova ang iya hinigugma nga Anak, gintugutan sia nga mapatay agod mabuhi kita sing dayon. (Juan 3:16) Mapasalamatan bala naton sia sing lubos?

Ikaduha, kon ginahimo naton nga batasan ang paghatag, makatuon kita sa pag-ilog kay Jehova kag sa iya Anak, si Jesucristo, sa labing importante nga paagi. Si Jehova pirme nga mahinatagon, pirme nga maalwan. Subong sang ginasiling sang Biblia, ginahatagan niya kita sing “kabuhi kag ginhawa kag sing tanan nga butang.” (Binuhatan 17:25) Nagakaigo nga pasalamatan naton sia sa tagsa naton ka pagginhawa, sa tagsa naton ka pagkaon, sa tagsa ka malipayon kag makaalayaw nga tion sa kabuhi. (Binuhatan 14:17) Si Jesus, kaangay sang iya Amay, nagpakita sing espiritu sang pagkamahinatagon. Kinabubut-on nga ginhatag niya ang iya kaugalingon. Nahibaluan mo bala nga sang maghimo si Jesus sang mga milagro, ginhimo niya ini nga may nadula sa iya? Pila ka beses nga ginsugid sa aton sang Kasulatan nga sang gin-ayo niya ang may balatian nga mga tawo, may kusog nga ‘naguwa sa iya.’ (Lucas 6:19; 8:45, 46) Maalwan gid si Jesus sa bagay nga ginhatag niya ang iya kaugalingon nga kalag, ang iya kabuhi, tubtob sa kamatayon.—Isaias 53:12.

Gani kon nagahatag kita, sang aton tion, sang aton kusog, ukon sang aton mga pagkabutang, ginailog naton si Jehova kag ginapahalipay ang iya tagipusuon. (Hulubaton 27:11; Efeso 5:1) Ginailog man naton ang himpit nga huwaran para sa tawhanon nga pagginawi nga ginbilin sa aton ni Jesucristo.—1 Pedro 2:21.

Ikatlo, ang paghatag nagatuman sang matuod kag importante nga mga kinahanglanon. Matuod, mahapos matuman ni Jehova ang mga kinahanglanon sang mga intereses sang Ginharian nga wala ang aton bulig, subong nga mahimo niya pasinggiton ang bato sa baylo nga gamiton kita sa pagbantala sang pulong. (Lucas 19:40) Apang ginpili niya nga padunggan kita paagi sa sining mga pribilehiyo. Gani kon ginahatag naton ang aton mga ginapanag-iyahan agod pauswagon ang mga intereses sang Ginharian, matigayon naton ang dakung kaayawan sa paghibalo nga may matuod kita nga bahin sa labing importante nga hilikuton nga ginahimo sa sining kalibutan.—Mateo 24:14.

Maathag nga kinahanglanon ang kuwarta agod suportahan ang bug-os kalibutan nga hilikuton sang mga Saksi ni Jehova. Sang 1995 nga tuig sang pag-alagad, ang Sosiedad naggasto sing halos $60 milyones sa pag-atipan lamang sa mga espesyal payunir, misyonero, kag nagalakbay nga mga manugtatap sa ila mga asaynment sa pag-alagad sa latagon. Apang, diutay lamang ina kon ipaanggid sa kagastuhanan sa pagpatindog kag pagpanghikot sang mga sanga talatapan kag mga pasilidad sa imprinta sa bug-os nga kalibutan. Apang, ini tanan nangin posible paagi sa boluntaryo nga mga amot!

Ang katawhan ni Jehova wala nagasiling nga kon imol sila, itugyan na lang nila sa iban ang pagpas-an sang lulan. Ina nga panimuot magadul-ong sa aton nga mawasi ining bahin sang aton pagsimba. Suno kay apostol Pablo, ang mga Cristiano sa Macedonia nag-antos sing “tuman nga kaimulon.” Sa gihapon, nangayo sila sing pribilehiyo nga makahatag. Kag ang ila ginhatag, siling ni Pablo, “labaw sa ila matuod nga masarangan”!—2 Corinto 8:1-4.

Ikaapat, ginhimo ni Jehova ang paghatag subong bahin sang matuod nga pagsimba bangod ang paghatag magabulig sa aton nga mangin malipayon. Si Jesus mismo nagsiling: “May daku nga kalipay sa paghatag sangsa pagbaton.” (Binuhatan 20:35) Amo sina ang pagkadesinyo sa aton ni Jehova. Isa pa ini ka rason kon ngaa mahimo kita magbatyag nga bisan ano man kadaku ang ginahatag naton sa iya, indi gid naton matupungan ang apresasyon nga nabatyagan naton para sa iya sa aton mga tagipusuon. Apang, sing makalilipay, wala nagapaabot sing sobra si Jehova sangsa aton sarang mahatag. Makasalig kita nga nalipay sia kon malipayon naton nga ginahatag ang aton masarangan!—2 Corinto 8:​12; 9:⁠7.

Mga Pagpakamaayo Gikan sa Pagpakita sing Mahinatagon nga Espiritu

Bilang pagbalik sa aton halimbawa sa pa­nugod, hunahunaa nga ang balo sa Sarepta nangatarungan nga mahimo mahatag sang iban ang kinahanglanon nga pagkaon ni Elias. Daw ano nga pagpakamaayo ang iya kuntani nga nawasi!

Pat-od gid nga ginapakamaayo ni Jehova yadtong nagapakita sing mahinatagon nga espiritu. (Hulubaton 11:25) Ang balo sa Sarepta wala mag-antos bangod ginhatag niya ang ginhunahuna niya nga katapusan niya nga pagkaon. Ginpadyaan sia ni Jehova sing milagro. Subong sang ginsaad ni Elias, ang iya mga suludlan sang harina kag sang lana wala maubusan tubtob nga natapos ang tigpalamangag. Apang nakabaton sia sing daku pa nga padya. Sang napatay ang iya anak nga lalaki, ginbanhaw ini ni Elias, ang lalaki sang matuod nga Dios. Daw ano nga napalig-on sia sini sa espirituwal!​—⁠1 Hari 17:​16-24.

Sa karon wala kita nagapaabot nga pakamaayuhon sing mga milagro. (1 Corinto 13:8) Apang ginapasalig kita ni Jehova nga sakdagon niya yadtong nagaalagad sa iya sing bug-os kalag. (Mateo 6:33) Sa amo mangin kaangay kita sang balo sa Sarepta sa sinang paagi, nagahatag sing maalwan, nagasalig nga atipanon kita ni Jehova. Sing kaanggid, makatigayon kita sing dakung espirituwal nga mga padya. Kon ang aton paghatag bahin sang regular nga rutina, sa baylo sang talagsahon, natabuan lamang nga buhat, magabulig ini sa aton nga mahuptan ang aton mata nga simple kag nakasentro sa mga intereses sang Ginharian, subong sang ginpanugda ni Jesus. (Lucas 11:​34; ipaanggid ang 1 Corinto 16:​1, 2.) Magabulig man ini sa aton sa pagbatyag nga suod kay Jehova kag kay Jesus subong ila mga masigkamanugpangabudlay. (1 Corinto 3:9) Kag magadugang ini sa maalwan, mahinatagon nga espiritu nga nangin tanda na sang mga sumilimba ni Jehova sa bug-os nga kalibutan.

[Kahon sa pahina 31]

MGA PAAGI NGA GINPILI SANG IBAN SA PAGHATAG

MGA AMOT SA BUG-OS KALIBUTAN NGA HILIKUTON

Madamo ang nagapain ukon nagabadyet sing kantidad nga ginahulog nila sa mga kahon-alamutan nga may ngalan: “Mga amot Para sa Bug-os Kalibutan nga Hilikuton sang Sosiedad​—⁠Mateo 24:⁠14.” Kada bulan ginapadala sang kongregasyon ini nga kantidad sa bug-os kalibutan nga ulong-talatapan sa Brooklyn, New York, ukon sa lokal nga sanga talatapan.

Ang boluntaryo nga mga amot nga kuwarta mahimo man mapadala sing direkta sa Watch Tower Bible and Tract Society of the Philippines, P.O. Box 2044, 1099 Manila ukon sa talatapan sang Sosiedad nga nagapangalagad sa inyo pungsod. Ang mga alahas ukon iban pa nga mga bahandi mahimo maamot. Ang isa ka malip-ot nga sulat nga nagasiling nga ini isa ka kinabubut-on nga regalo dapat ilakip sa sining mga amot.

KAHIMUSAN SA PAGDONAR NGA MAY KONDISYON

Mahimo ihatag ang kuwarta sa Watch Tower Society subong patago tubtob mapatay ang nagdonar, upod ang kondisyon nga sa tion sang personal nga pagkinahanglan, ibalik ini sa nagdonar. Para sa dugang nga impormasyon, makig-angot palihug sa Treas­urer’s Office sa direksion nga yara sa ibabaw.

GINPLANO NGA PAGHATAG

Dugang sa direkta nga mga dulot nga kuwarta kag pagdonar sing kuwarta nga may kondisyon, may iban pa nga paagi sang paghatag nga makabulig sa pag-alagad sang Ginharian sa bug-os nga kalibutan. Ini nagalakip sa:

Pasiguro: Ang Watch Tower Society mahimo hingadlan subong benepisyaryo sang isa ka pasiguro sa kabuhi nga polisa ukon sang isa ka plano sang pagretiro ukon pension. Dapat pahibaluon ang Sosiedad tuhoy sini nga kahimusan.

Mga Kuwenta sa Bangko: Ang mga kuwenta sa bangko, mga sertipiko sang deposito, ukon indibiduwal nga kuwenta sa pagretiro mahimo ipatago subong butang nga ginpiyar ukon ibayad sa tion sang kamatayon sa Watch Tower Society, nahisuno sa mga kinahanglanon sang lokal nga bangko. Dapat pahibaluon ang Sosiedad tuhoy sini nga mga kahimusan.

Stocks kag Bonds: Mahimo idonar ang stocks kag bonds sa Watch Tower Society ayhan subong isa ka direkta nga donasyon ukon sa idalom sang kahimusan diin ang kinitaan padayon nga ihatag sa nagdonar.

Real Estate: Ang mahimo mabaligya nga real ­estate mahimo idonar sa Watch Tower Society paagi sa paghimo sing direkta nga regalo ukon paagi sa pagtigana sing bug-os kabuhi nga propiedad sa nagdonar, nga padayon nga makaistar sa sini tubtob buhi sia. Dapat ang isa makig-angot sa Sosiedad antes himuan sing kasulatan ang bisan ano nga real estate sa Sosiedad.

Testamento kag mga Butang nga Ginapiyar: Ang propiedad ukon kuwarta mahimo ipapanubli sa Watch Tower Society paagi sa ginhimo sing legal nga testamento, ukon ang Sosiedad mahimo mahingadlan subong benepisyaryo sang isa ka kasugtanan tuhoy sa mga butang nga ginapiyar. Ang pagpiyar sing isa ka butang sa isa ka relihioso nga organisasyon subong amo ang benepisyaryo mahimo may mga bentaha sa buhis. Ang isa ka kopya sang testamento ukon sang kasugtanan tuhoy sa butang nga ginapiyar dapat ipadala sa Sosiedad.

Ang Sosiedad naghanda sing Ingles nga brosyur nga natig-uluhan sing “­Planned ­Giving.” Ang mga nagaplano sa Estados Unidos sa paghatag sing ­espesyal nga regalo sa Sosiedad karon ukon magbilin sing palanublion sa tion sang kamatayon mahimo makasapo sining impormasyon nga mabuligon. Matuod gid ini kon luyag nila maghimo sing tulumuron sang pamilya ukon katuyuan sa pagpapanubli sing mga pagkabutang samtang nagahimulos sa legal nga mga probisyon agod mabuhinan ang balayran nga buhis.

Para sa dugang nga kasayuran nahanungod sa bisan diin nga nasambit, magsulat sa Watch Tower P.O. Box 2044, 1099 Manila ukon sa sanga talatapan sang Sosiedad sa inyo pungsod.