Sin-o ang Mamati sa Aton Mensahe?

¹ Subong sang wala pa gid anay matabo sa tawhanon nga maragtas, ang mga tawo ginabahaan sing impormasyon, ang kalabanan sini indi importante kag nagapatalang pa gani. Subong resulta, madamo ang naayawan na, kag gani mabudlay para sa aton nga papamation sila sa mensahe sang Ginharian. Indi nila mahangpan ang positibo nga epekto sa ila sang pagpamati nila sa Pulong sang Dios.​—Luc. 11:28.

² Nalipay kita nga sa madamong bahin sang kalibutan, linaksa ka tawo ang nagapamati sa sinang mensahe kag nagabaton sang tanyag naton nga mga pagtuon sang Biblia sa puluy-an. Apang, sa iban nga mga teritoryo, ang sabat indi subong ka talalupangdon. Madamo sang mga pagduaw nga ginahimo naton sa ministeryo ang wala sing positibo nga mga resulta, kag mahimo kita magapalibog kon sin-o ang magapamati sa aton mensahe.

³ Dapat kita mag-andam batok sa pagluya sing buot. Si Pablo nagpaathag: “‘Ang bisan sin-o nga magtawag sa ngalan ni Jehova maluwas.’ Apang, paano bala ang pagpanawag nila sa iya . . . nga wala nila mabatii? Kag, paano bala ang pagkabati nila kon walay manugwali? . . . ‘Daw ano katahom sang mga tiil sang mga nagabantala sang maayong balita!’” (Roma 10:​13-15) Kon makugi kita nga magsab-ug sing binhi sang Ginharian, patubuon ini sang Dios sa mga may bunayag sing tagipusuon.​—1 Cor. 3:6.

⁴ Ang Sekreto Amo ang Tayuyon nga mga Pagduaw Liwat: Sa mga teritoryo diin diutay lamang ang nagapamati sa aton mensahe, dapat naton palambuon ang bisan anong interes nga masapwan naton, nakapahamtang man kita sing literatura ukon wala. Ngaa magmaabtik sa paghinakop nga wala kita sing matigayon? Kon magsab-ug kita sing binhi, wala kita makahibalo kon diin ini magamadinalag-on. (Manugw. 11:6) Kon magbalik kita liwat nga may nakahanda nga ipaambit gikan sa Kasulatan, bisan sa makadali lamang, mahimo naton malab-ot ang tagipusuon sang tawo. Sarang naton mabilin ang tract ukon matanyag ang bag-ong mga magasin. Sa ulihi, mahimo naton mapasundayag ang pagtuon sa Biblia. Pakamaayuhon ni Jehova ang aton mga panikasog.​—Sal. 126:​5, 6.

⁵ Isa ka babayi nga nagpakita sing diutay lamang nga interes ang ginbilinan sing tract. Naabtan sia liwat sa balay pagligad sang duha ka bulan, apang tuman gid sa iya kasako para masugilanon. Ginbilinan sia liwat sing amo gihapon nga tract. Walay sapayan sang mahimud-uson nga mga panikasog sang manugbantala, nasugilanon sia pagligad sang tatlo pa ka bulan, kag natabuan pa nga nagamasakit sia. Nagduaw liwat ang utod nga babayi pagkadason nga semana, kag malip-ot nga ginhambalan nila ang tract. Sang nagbalik ang utod nga babayi sang masunod nga semana, ang babayi nagpakita sing tunay nga interes. Ang mga pagbalhin sang mga kahimtangan sa iya kabuhi nagpahunahuna sa iya sang iya espirituwal nga kinahanglanon. Nasugdan ang pagtuon sa Biblia, kag ginpadayon kada semana pagkatapos sadto.

⁶ Kaangay sang bisan anong butang nga luyag naton makita nga nagatubo, bulak man, utanon, ukon interes sa mensahe sang Ginharian, ang pagpalambo kinahanglanon. Nagakinahanglan ina sing tion, panikasog, matinatapon nga panimuot, kag determinasyon nga indi mag-untat. Kon magpadayon kita sa pagbantala, pat-od gid nga makasapo kita sing madamo pa nga magapamati sa aton mensahe.​—Ipaanggid ang Galacia 6:9.