Magtipon Sing Kasidla Sa Paghimo Sing Mga Pagduaw Liwat
1 Nalipay ka bala sa paghimo sing mga pagduaw liwat? Madamo nga manugbantala ang nalipay sa paghimo sini. Ayhan mahimo nga nagapangalag-ag ka sa primero, ilabi na kon nagaduaw liwat sa mga tagbalay nga nagpakita sing diutay lamang nga interes sang una sila nga masugilanon. Apang samtang ‘nagatipon ka sing kasidla paagi sa aton Dios agod mapamulong ang maayong balita’ sa mga pagduaw liwat, mahimo ka makibot kon daw ano gali kahapos kag makapaladya ini nga hilikuton. (1 Tes. 2:2) Paano?
2 Ang matuod, may daku nga kinatuhayan sa tunga sang isa ka pagduaw liwat kag sang nahauna nga pagduaw. Ang pagduaw liwat ginahimo sa isa ka kilala, indi sa isa ka estranghero, kag kinaandan na nga mas mahapos nga makigsugilanon sa isa ka kilala sangsa isa ka estranghero. Tuhoy sa bugana nga mga padya nga resulta sang pagpakigbahin sa sining hilikuton, ang mga pagduaw liwat mahimo magadul-ong sa produktibo nga mga pagtuon sa Biblia sa puluy-an.
3 Kon kita nagapamalaybalay, nagaduaw kita sing sulit-sulit sa mga tawo nga indi interesado sang nagligad naton nga pagduaw sa ila. Ti, ngaa padayon kita nga nagaduaw? Nahibaluan naton nga ang mga kahimtangan sang mga tawo nagabalhin kag ang indibiduwal nga wala nagasapak ukon nagapamatok pa gani sa nagligad nga pagduaw mahimo nga mangin interesado na sa masunod naton nga pagduaw. Ginahunahuna ina, nagahanda kita para sa aton pagduaw liwat kag nagapangamuyo sing pagpakamaayo ni Jehova agod mangin maayo ang resulta sang ihambal naton.
4 Kon, sa aton pamalaybalay nga hilikuton, nagabantala kita sing kinabubut-on sa mga tawo nga wala gid magpakita sing interes sang nagligad, indi bala nga labi pa gid kita nga magaduaw liwat sing kinabubut-on kay bisan sin-o nga nagapakita sing interes sa mensahe sang Ginharian?—Binu. 10:34, 35.
5 Madamo sa aton ang yara karon sa kamatuoran bangod sa mapailubon nga mga pagduaw liwat sang isa ka manugbantala sa aton. Kon isa ikaw sa ila, mahimo nimo pamangkuton ang imo kaugalingon: ‘Ano ang akon una nga impresyon sa sadto nga manugbantala? Gilayon ko bala nga ginbaton ang mensahe sang Ginharian sang una ko ini nga mabatian? Mahimo bala nga wala ko ini pagsapaka?’ Sa baylo, dapat kita malipay nga ang manugbantala nga nagduaw liwat sa aton nagkabig sa aton nga takus sa isa ka pagduaw liwat kag ‘nagtipon sing kasidla paagi sa [iya] Dios,’ nagduaw, kag nagtudlo sa aton sang kamatuoran. (1 Tes. 2:2) Kamusta naman ang mga indibiduwal nga nagpakita primero sing interes apang daw nagalikaw sang ulihi sa aton? Ang positibo nga panimuot kinahanglanon, subong sang ginapakita sang masunod nga eksperiensia.
6 Samtang nagapanaksi sa dalan sang isa ka aga, nasugilanon sang duha ka manugbantala ang isa ka lamharon nga babayi nga nagatulod sa isa ka bata sa stroller. Ang babayi nagkuha sing isa ka magasin kag gin-agda niya ang mga utod nga babayi nga magduaw sa iya balay sang masunod nga Domingo. Nag-abot sila sa gintalana nga tion, apang ginsilingan sila sang tagbalay nga wala sia sing tion nga makighambal. Apang, nanaad sia nga puwede na sia sa madason nga semana. Nagduhaduha ang mga utod nga babayi kon bala tumanon niya ang iskedyul, apang ang babayi nagahulat na sa ila sang magbalik sila. Isa ka pagtuon ang nasugdan, kag ang pag-uswag sang babayi tumalagsahon. Sa malip-ot lamang nga tion, nagtambong na sia sa mga miting sing regular kag nakigbahin sa pag-alagad sa latagon. Sia karon nabawtismuhan na.
7 Ipasad ang Sadsaran sa Nahauna nga Pagduaw: Ang sadsaran para sa isa ka madinalag-on nga pagduaw liwat masunson nga ginapasad sa nahauna nga pagduaw. Pamatii sing maayo ang mga komento sang tagbalay. Ano ang ginasiling nila sa imo? Relihioso bala sia? Nabalaka bala sia sa sosyal nga mga isyu? Interesado bala sia sa siensia? sa maragtas? sa palibot? Sa hingapusan nga bahin sang pagduaw, mahimo ka magpautwas sing nagapahunahuna nga pamangkot, kag manaad nga ipaathag ang sabat sang Biblia sa imo pagbalik.
8 Halimbawa, kon ang tagbalay interesado sa saad sang Biblia tuhoy sa paraiso nga duta, ang dugang pa nga paghambalanay tuhoy sa topiko mahimo nga nagakabagay. Antes ka maghalin, mahimo ka mamangkot: “Paano kita makasiguro nga tumanon sang Dios ini nga saad?” Nian magdugang: “Ayhan makahapit ako sa tion nga ang iban pa nga miembro sang pamilya yari sa balay, kag nian mapakita ko sa inyo ang sabat sang Biblia sa sining pamangkot.”
9 Kon ang tagbalay wala magpakita sing interes sa bisan anong partikular nga tema, mahimo mo mapautwas ang isa sa mga pamangkot nga makita sa mga presentasyon sa likod nga pahina sang Ang Aton Ministeryo sa Ginharian kag gamiton ina subong sadsaran para sa inyo masunod nga paghambalanay.
10 Hupti ang Husto Nasulat nga mga Rekord: Ang imo house-to-house record dapat nga husto kag kompleto. Isulat ang ngalan kag direksion sang tagbalay paghalin mo sa balay. Indi pagpalagpati ang numero sang balay ukon ang ngalan sang kalye—usisaa ang impormasyon agod siguruhon nga husto ini. Isulat kon ano sia nga sahi sang tawo. Isulat man ang topiko nga inyo ginhambalan, ang mga kasulatan nga inyo ginbasa, ang literatura nga imo ginbilin, kag ang pamangkot nga pagasabton mo sa imo pagbalik. Ilakip ang adlaw kag oras sang nahauna nga pagduaw kag kon san-o ang ginsiling mo nga magabalik ka. Karon nga kompleto na ang imo rekord, indi ini pagdulaa! Ibutang ini sa isa ka maayo nga lugar agod matan-aw mo sa ulihi. Pirme hunahunaa ang tuhoy sa indibiduwal kag kon ano ang imo himuon sa masunod nga pagduaw.
11 Hibalua Kon Ano ang Imo mga Tulumuron: Una, paagi sa imo kapagsik kag pagkamainabyanon, himua ang imo bug-os nga masarangan nga mangin komportable ang tagbalay. Ipakita nga interesado ka sa iya subong isa ka tawo, nga indi naman mangin tuman ka pamilyar. Masunod, pahanumduma sia sang pamangkot nga ginpautwas mo sang nagligad nga pagduaw. Pamatii sing maayo ang iya opinyon, kag hanuot sia nga pasalamati sa iya mga komento. Nian, ipakita kon ngaa ang pagtamod sang Biblia praktikal. Kon mahimo, ipakita sa iya ang may kaangtanan nga punto sa libro nga Ang Ihibalo nga Nagadul-ong sa Kabuhi nga Walay Katapusan. Dumduma gid nga ang imo panguna nga tulumuron sa mga pagduaw liwat amo ang pagtinguha nga makasugod sing isa ka pagtuon sa Biblia.
12 Ang pagkaprangka nga gingamit sa Ihibalo nga libro nag-inspirar sa madamo sa aton nga ‘magtipon sing kasidla’ sa mga pagtuon sa Biblia agod palig-unon ang mga estudyante nga magtambong sa mga miting kag makig-upod sa organisasyon ni Jehova. Sang nagligad, nagahulat kita anay nga makatuon sing malawiglawig ang mga indibiduwal antes sila agdahon nga makig-upod sa aton. Karon, madamong estudyante ang nagatambong sa mga miting sa gilayon nga nagsugod sila sa pagtuon, kag nagauswag sila sing mas madasig subong resulta.
13 Isa ka mag-asawa ang nagpanaksi sing di-pormal sa isa ka kaupod sa trabaho. Sang nagpakita sia sing interes sa kamatuoran, gin-agda nila sia nga magtuon sing Biblia sa Ihibalo nga libro. Sa amo man nga tion, ginsugiran nila sia nga dapat sia magtambong sa mga miting, diin ang madamo niya nga pamangkot masabat. Wala lamang ginbaton sang tawo sing kinabubut-on ang ila imbitasyon nga magtuon kundi nagtuon man sing makaduha sa isa ka semana kag nagtambong sa mga miting sing regular sa Kingdom Hall.
14 Gamita ang Brosyur nga Ano ang Ginapatuman sang Dios sa Aton?: Sa “Mga Mensahero sang Diosnon nga Paghidait” nga Distrito nga mga Kombension, nabaton naton ang brosyur nga Ano ang Ginapatuman sang Dios sa Aton? Ini nga brosyur makabulig sa pagsugod sing mga pagtuon sa Biblia upod sa mahinadlukon sa Dios nga katawhan bisan kon daw ano man sila ka edukado. Nagaunod ini sing komprehensibo nga kurso sa pagtuon, nga nagatuptop sa sadsaran nga mga panudlo sang Biblia. Ang publikasyon mangin isa gid ka epektibo nga galamiton sa pagpaambit sang ihibalo sang Dios. Ginapaathag sini ang kamatuoran sing tuman kaathag kag sing simple nga sarang ini magamit sang halos tanan sa aton sa pagtudlo sa iban sang mga ginapatuman sang Dios. Mahimo nga madamo nga manugbantala ang may pribilehiyo nga makadumala sing isa ka pagtuon sa Biblia sa sining brosyur.
15 Ang pila ka indibiduwal nga nagahunahuna nga wala sila sing tion sa pagtuon sa Ihibalo nga libro mahimo nga handa magtuon sa malip-ot nga mga sesyon sa Ginapatuman nga brosyur. Makunyag gid sila sa matun-an nila! Sa duha ukon tatlo lamang ka pahina, masapwan nila ang mga sabat sa mga pamangkot nga siniglo na nga ginpaligban sang mga tawo: Sin-o ang Dios? Sin-o ang Yawa? Ano ang katuyuan sang Dios para sa duta? Ano ang Ginharian sang Dios? Paano mo masapwan ang matuod nga relihion? Bisan pa ginapresentar sang brosyur ang kamatuoran sa simple nga mga tinaga, ang mensahe sini tuman gid ka kusog. Ginatuptupan sini ang yabi nga mga punto nga ginarepaso sang mga gulang upod sa mga kandidato sa bawtismo kag mangin isa ka paagi padulong sa mas maid-id nga pagtuon sa Ihibalo nga libro.
16 Sa pagtanyag sing isa ka pagtuon sa pagduaw liwat, makasiling ka sing simple: “Nakahibalo ka bala nga paagi lamang sa paghinguyang sing pila ka minuto, matigayon mo ang sabat sa isa ka importante nga pamangkot sa Biblia?” Nian, ihatag ang pamangkot nga makita sa pamuno sang isa sa mga leksion sa brosyur. Halimbawa, kon nagaduaw ka sa isa ka tigulang nga tawo, mahimo ka makasiling: “Nakahibalo kita nga gin-ayo ni Jesus ang mga tawo sang nagligad. Apang ano bala ang himuon ni Jesus sa palaabuton sa mga masakiton? sa mga tigulang? sa mga minatay?” Ang sabat makita sa leksion 5. Ang isa ka relihioso nga tawo mahimo nga mawili sa pamangkot: “Ginapamatian bala sang Dios ang tanan nga pangamuyo?” Ginasabat ini sa leksion 7. Ang mga katapo sang pamilya maluyag makahibalo: “Ano bala ang ginapatuman sang Dios sa mga ginikanan kag sa mga kabataan?” Mahibaluan nila ini samtang ginatun-an nila ang leksion 8. Ang iban nga mga pamangkot amo: “Mahimo bala makahalit ang mga patay sa mga buhi?” nga ginapaathag sa leksion 11; “Ngaa tuman kadamo nga relihion ang nagapangangkon subong Cristiano?” nga ginahambalan sa leksion 13; kag “Ano ang dapat mo himuon agod mangin abyan sang Dios?” nga ginatuptupan sa leksion 16.
17 Buligi ang mga Lain sing Hambal: Kamusta ang mga tagbalay nga lain sing hambal? Kon mahimo, dapat sila tudluan sa hambal nga nahibaluan gid nila. (1 Cor. 14:9) Kon may kaingod nga kongregasyon ukon grupo nga nagagamit sina nga hambal, ang ila mga ngalan mahimo mapadala sa mga gulang didto. Kon wala sing kaingod nga mga kongregasyon ukon mga grupo kag wala sing lokal nga mga manugbantala nga may pareho nga hambal sa tagbalay, sarang tilawan sang manugbantala nga magtuon upod sa tagbalay, nga nagagamit sing Ginapatuman nga brosyur sa duha ka hambal.
18 Isa ka nagahambal sing Ingles nga manugbantala ang nagtuon sa isa ka tawo nga nagahambal sing Vietnamese kag sa iya asawa, nga nagahambal sing Thai. Ang mga publikasyon kag mga Biblia sa Ingles, Vietnamese, kag Thai gingamit sa pagtuon. Bisan pa nga mabudlay ini sa primero, ang manugbantala nagsulat: “Ang espirituwal nga pagtubo sang mag-asawa madasig. Nakita nila ang kinahanglanon nga magtambong sa mga miting upod sa ila duha ka anak, kag ginabasa nila ang Biblia sa gab-i subong isa ka pamilya. Ang ila seis anyos nga anak nga babayi may iya kaugalingon nga pagtuon sa Biblia.”
19 Kon nagatuon sa mga tawo nga lain sing hambal, maghambal sing malagday, ginamitlang sing maathag ang mga tinaga, kag maggamit sing simple nga mga tinaga kag mga prase. Apang, dumduma, ang tawo nga lain sing hambal dapat tamdon sing talahuron. Indi sila dapat tamdon subong nga daw mga lapsag.
20 Gamita sing maayo ang matahom nga mga laragway sa Ginapatuman nga brosyur. Agdaha sia nga basahon ang mga kasulatan sa iya kaugalingon nga Biblia. Kon ang pagtuon sarang mahiwat sa tion nga yara ang isa ka katapo sang pamilya nga makapatpat, pat-od gid ina nga mapuslanon.
21 Magduaw Liwat sa Gilayon: Daw ano kadugay ka dapat maghulat antes magduaw liwat? Ang pila ka manugbantala nagaduaw liwat sa sulod sang isa ukon duha ka adlaw sang nahauna nga paghambalanay. Ang iban nagabalik sa amo man nga adlaw! Tuman bala ina kadali? Sa kinaandan, ang mga tagbalay wala nagapamatok. Sa masami ang manugbantala nga nagaduaw amo ang dapat magpalambo sing mas positibo nga panimuot, lakip ang diutay nga kasidla. Binagbinaga ang masunod nga mga eksperiensia.
22 Isa ka 13-anyos nga manugbantala ang nagapamalaybalay isa ka adlaw sang nakita niya ang duha ka babayi nga nagalakat sing magkaupod. Nagahinumdom sang pagpalig-on nga bantalaan ang mga tawo bisan diin man naton sila makita, ginpalapitan niya ang mga babayi sa dalan. Nagpakita sila sing interes sa mensahe sang Ginharian kag ang tagsa nagkuha sing Ihibalo nga libro. Ginkuha sang lamharon nga utod nga lalaki ang ila mga direksion, ginbalikan pagligad sang duha ka adlaw, kag ginsugdan ang isa ka pagtuon sa Biblia sa kada isa sa ila.
23 Ang isa ka utod nga babayi nagaduaw liwat pagkadason nga semana. Apang isa ukon duha ka adlaw pagkatapos sang una nga pagduaw nagahapit sia agod hatagan ang tagbalay sing isa ka magasin tuhoy sa topiko nga ginhambalan nila sang nagligad. Ginasilingan niya ang tagbalay: “Nakita ko ining artikulo kag nahunahuna ko nga luyag mo ini mabasa. Daw luyag ko na makigsugilanon, apang mabalik na lang ako liwat sa Mierkoles sang hapon subong sang gintalana naton. Okey pa bala gihapon sa imo ina nga tion?”
24 Kon ang indibiduwal nagapakita sing interes sa kamatuoran, makapat-od kita nga makasumalang sia sing lainlain nga sahi sang pagpamatok. Ang gilayon naton nga pagduaw liwat pagkatapos sang nahauna nga pagduaw magapabakod sa iya nga batuan ang bisan ano nga mga pag-ipit nga ginaatubang niya gikan sa mga himata, suod nga mga abyan, kag iban pa.
25 Palambua ang Interes Sadtong Nasugilanon sa Publiko nga mga Lugar: Madamo sa aton ang nalipay magbantala sa mga dalan, sa mga paradahan sang salakyan, sa publiko nga transportasyon, sa mga shopping center, sa mga parke, kag sa iban pa. Dugang sa pagpahamtang sing literatura, dapat naton palambuon ang interes. Bangod sina, dapat panikasugan nga makuha ang ngalan, ang direksion kag, kon mahimo, ang numero sang telepono sang tagsa ka interesado nga tawo nga masugilanon naton. Indi gid man mabudlay subong sang sa ginahunahuna mo ang pagkuha sini nga impormasyon. Samtang nagahingapos ang paghambalanay, kuhaa ang imo kuwaderno kag mamangkot: “May paagi pa bala nga mapadayon naton ini nga paghambalanay sa iban nga tion?” Ukon magsiling: “Luyag ko nga mabasa mo ang isa ka artikulo nga napat-od ko nga mawili ka. Mahimo ko bala ini madala sa imo balay ukon opisina?” Ang isa ka utod nga lalaki nagapamangkot sing simple: “Sa anong numero sang telepono kita mahimo matawgan?” Sia nagareport nga sa tatlo ka bulan tatlo ka tawo ang malipayon nga naghatag sa iya sang ila numero sang telepono.
26 Gamita ang Telepono sa Pagpangita kag sa Pagpalambo sing Interes: Isa ka payunir nga utod nga babayi ang nagagamit sing telepono agod malab-ot ang mga tawo nga nagapuyo sa estrikto sing seguridad nga mga tinukod. Nagahimo man sia sing mga pagduaw liwat sa amo man nga paagi. Sa nahauna nga pagduaw, sia nagasiling: “Nahibaluan ko nga indi mo ako kilala. Nagahimo ako sing pinasahi nga panikasog nga masugilanon ang mga tawo sa inyo lugar agod mapaambit ang isa ka panghunahuna halin sa Biblia. Kon may tion ka, luyag ko basahon ang saad nga masapwan sa . . .” Pagkatapos mabasa ang kasulatan, sia nagasiling: “Indi bala makalilipay kon makita naton ang pag-abot sina nga tion? Nalipay ako nga mabasa ini sa imo. Kon naluyagan mo man ini, manawag ako liwat kag magapaathag sing lain naman nga kasulatan.”
27 Sa masunod nga pagtawag sa telepono, ginapahanumdom niya ang tagbalay tuhoy sa ila nagligad nga paghambalanay kag nagasiling nga luyag niya basahon gikan sa Biblia kon ano ang mangin kahimtangan kon ang kalautan madula na. Nian nagapakigsugilanon sia sing malip-ot sa Biblia upod sa tagbalay. Sa sulod sang madamong pagpakigsugilanon sa telepono, 35 ka tawo ang nag-agda sa iya sa ila balay kag pito ka pagtuon sa Biblia ang nasugdan! Mabudlay bala kon kaisa para sa imo ang magduaw liwat sa mga interesado sa mga binulan sang tigtulugnaw bangod sang dimaagihan nga mga dalan, mayelo nga mga kahimtangan, ukon balatian? Kon amo, ngaa indi sila pakig-angutan paagi sa telepono?
28 Tatapa ang Interes nga Nasapwan sa mga Duog sang Negosyo: Indi lamang pagtanyag sing mga magasin ang nadalahig sa pagpangabudlay sa mga balaligyaan. Madamong tag-iya sang balaligyaan ang hanuot nga interesado sa kamatuoran, kag ina nga interes dapat palambuon. Sa pila ka hitabo, ayhan posible nga maghambalanay sa Biblia ukon magtuon sa ila mismo balaligyaan. Sa iban nga mga hitabo, mahimo kamo magkitaay sang interesado sa tion sang pahuway sa udto ukon sa iban pa kombeniente nga tion.
29 Ginduaw sang nagalakbay nga manugtatap ang tag-iya sang isa ka diutay nga tiangge kag ginpanugda nga ipasundayag sa iya ang isa ka pagtuon sa Biblia. Sang ginpamangkot kon daw ano kalawig ang pasundayag, ang nagalakbay nga manugtatap nagsiling nga magalawig lamang ini sing 15 ka minuto. Bangod sina, ginsab-it sang tag-iya sang tiangge ang isa ka karatula sa ganhaan: “Magabukas Liwat Pagligad sang 20 Minutos,” nagkuha sing duha ka bangko, kag ginhambalan nila nga duha ang nahaunang lima ka parapo sang Ihibalo nga libro. Naluyagan gid sining sinsero nga tawo ang iya natun-an sa bagay nga gintambungan niya ang Miting Publiko kag Pagtinuon sa Lalantawan sadto nga Domingo kag nagpasugot nga padayunon ang pagtuon pagkadason nga semana.
30 Sa pagtanyag sing pagtuon sa duog sang negosyo, mahimo nimo ini masiling: “Ang amon programa sa pagtuon sa Biblia nagakinahanglan lamang sing 15 minutos agod ipasundayag. Kon kombeniente sa imo, nalipay ako nga ipakita sa imo kon paano ini ginahimo.” Nian, sunda ang ginhatag nga tion. Kon indi posible nga makahambalanay sing malawig sa duog sang negosyo, ayhan mas nagakaigo nga duawon ang tag-iya sang tiendahan sa iya puluy-an.
31 Magbalik Bisan Pa nga Wala sing Napahamtang nga Literatura: Ang tanan diutay nga interes nagakabagay nga duawon liwat, nakapahamtang man sing literatura ukon wala. Sa pagkamatuod, kon makita nga ang tagbalay indi gid interesado sa mensahe sang Ginharian, labing maayo nga gamiton ang imo mga panikasog sa iban pa.
32 Sa pamalaybalay nga hilikuton, nasugilanon sang isa ka sister ang isa ka babayi nga tuman ka mainabyanon apang malig-on nga wala magbaton sang gintanyag nga mga magasin. Ang manugbantala nagsulat: “Mga inadlaw ko sia nga ginpamensar kag namat-od ako nga hambalon sia liwat.” Sang ulihi, ang utod nangamuyo, nagtipon sing kaisog, kag nanuktok sa ganhaan sang balay. Sa iya kalipay ginpasulod sia sang tagbalay. Isa ka pagtuon sa Biblia ang nasugdan, kag gindumalahan ini liwat sang masunod nga adlaw. Sang ulihi, ang tagbalay nagsulod sa kamatuoran.
33 Magplano sing Abanse Agod Maayo Gid ang Matigayon: Ginarekomendar nga maghinguyang kita sing pila ka tion kada semana sa paghimo sing mga pagduaw liwat. Madamo ang mahimo paagi sa maayo nga pagplano. Maghimo sing kahimusan nga magduaw sa amo gihapon nga duog nga pamalaybalayan mo agod indi mauyang ang madamo nga tion sa paglakbay.
34 Ang mga madinalag-on sa paghimo sing mga pagduaw liwat kag sa pagsugod sing mga pagtuon sa Biblia sa puluy-an nagasiling nga kinahanglan magpakita sing hanuot personal nga interes sa mga tawo kag pirme sila hunahunaon bisan pagkatapos sang pagduaw. Kinahanglan man nga may yara makagalanyat nga tema sa Biblia nga mahambalan kag mapasad ang sadsaran para sa pagduaw liwat antes maghalin sa nahaunang pagduaw. Dugang pa, importante nga makabalik dayon agod matatap ang interes. Ang tulumuron nga makasugod sing isa ka pagtuon sa Biblia dapat pirme dumdumon.
35 Ang importante nga kinaiya para sa kadalag-an sa hilikuton nga pagduaw liwat amo ang kasidla. Paano ini matigayon? Si apostol Pablo nagasabat paagi sa pagsiling nga ‘magtipon kita sing kasidla’ sa pagbantala sang maayong balita sa iban “paagi sa aton Dios.” (1 Tes. 2:2) Kon kinahanglan nga mag-uswag ka sa sining bahin, mangamuyo sing bulig kay Jehova. Nian, suno sa imo mga pangamuyo, tatapa ang tanan nga interes. Pat-od gid nga pakamaayuhon ni Jehova ang imo mga panikasog!
[Kahon sa pahina 3]
Kon Paano Magmadinalag-on sa mga Pagduaw Liwat
◼ Magpakita sing hanuot personal nga interes sa mga tawo.
◼ Magpili sing makagalanyat nga tema sa Biblia nga mahambalan.
◼ Magpasad sing sadsaran para sa tagsa ka masunod nga pagduaw.
◼ Pirme sia hunahunaa sa paghalin mo.
◼ Magbalik mga isa ukon duha ka adlaw sa pagtatap sang interes.
◼ Dumduma pirme ang imo tulumuron nga makasugod sing pagtuon sa Biblia.
◼ Mangamuyo sing bulig nga makatipon sing kasidla para sa sining hilikuton.