Ang Tawhanon nga Kaluyahon Nagapadaku sa Gahom ni Jehova

“Ginkabig ako sang tanan subong isa ka malipayon kag mapagsik nga bug-os tion nga ministro. Ako pirme ang nagabulig sa iban sa ila mga problema. Apang, sa amo man nga tion, nagbatyag ako nga daw nagakaupos sa sulod. Ang makatulublag nga mga panghunahuna kag kalisang sa hunahuna nagahalit sa akon. Ginlikawan ko ang mga tawo. Luyag ko lamang magtener sa balay kag maghigda. Sa sulod sang mga binulan, nakiluoy ako kay Jehova nga tugutan ako nga mapatay.”—⁠Vanessa

SUBONG sang hitabo nga ginsambit sa ibabaw, natural lamang nga kon kaisa mabatyagan sang mga alagad ni Jehova ang mga epekto sang pagkabuhi sa sining “makahalanguyos nga mga tion nga mabudlay pakigbagayan.” (2 Timoteo 3:⁠1) Ang iban mahimo pa gani nga mapung-awan. (Filipos 2:​25-​27) Kon maglawig, ang kapung-aw makapaluya sa aton, kay ang Biblia nagasiling: ‘Naluyahan bala ikaw sing buot sa adlaw sang kapiutan? Ang imo kusog magadiutay.’ (Hulubaton 24:10) Huo, kon naluyahan kita sing buot, nagakinahanglan kita sing kusog​—⁠ayhan sing gintawag pa gani ni apostol Pablo nga ‘kusog nga labaw sa kinaandan.’​—⁠2 Corinto 4:⁠7.

Si Jehova nga Dios amo ang ginahalinan sing wala-latid nga gahom. Mapamatud-an ini kon usisaon naton ang iya pagpanuga. (Roma 1:20) Halimbawa, binagbinaga ang adlaw. Nagaabot sa duta ang tayuyon nga enerhiya nga mga 240 trilyones horsepower halin sa adlaw. Apang ining numero mga katunga lamang nga bahin sang isa ka bilyon nga enerhiya nga ginapaguwa sang adlaw. Kag magamay lamang ang adlaw kon ipaanggid sa mga bituon nga kilala subong mga supergiant. Isa sini amo ang Rigel, isa ka bituon sa Orion nga konstelasyon nga 50 ka pilo ang kadakuon sangsa aton adlaw kag nagabuga sing 150,000 ka pilo nga enerhiya!

Ang Manunuga sining enerhiya sa langit pat-od nga may “bugana dinamiko nga enerhiya.” (Isaias 40:26; Salmo 8:​3, 4) Sa pagkamatuod, si manalagna Isaias nagsiling nga si Jehova “wala ginapunaw ukon ginalapyo.” Kag handa ang Dios nga ipaambit ang iya gahom kay bisan sin-o nga, bangod sang tawhanon nga kaluyahon, nagabatyag nga ginalapyo sila. (Isaias 40:​28, 29) Ang kahimtangan sang Cristianong apostol nga si Pablo nagapakita kon paano ini ginahimo sang Dios.

Paglandas sa mga Kabudlayan

Ginsilingan ni Pablo ang mga taga-Corinto tuhoy sa kasablagan nga iya ginaantos. Gintawag niya ini nga “isa ka ungon sa unod.” (2 Corinto 12:⁠7) Ining “ungon” mahimo nga isa ka balatian, ayhan nagaburon nga panulok. (Galacia 4:​15; 6:​11) Ukon mahimo nga ginapatuhuyan ni Pablo ang butig nga mga apostoles kag ang iban nga mga masamok nga nagaduhaduha sa iya pagkaapostoles kag hilikuton. (2 Corinto 11:​5, 6, 12-​15; Galacia 1:​6-9; 5:​12) Ano man yadto, ining “ungon sa unod” nagpasubo gid kay Pablo, kag nagpangamuyo sia sing sulit-sulit nga dulaon ini.​—⁠2 Corinto 12:⁠8.

Apang, wala ginhatag ni Jehova ang ginpangabay ni Pablo. Sa baylo, ginsilingan niya si Pablo: “Ang akon dibagay nga kaluoy tuman na sa imo.” (2 Corinto 12:⁠9) Ano ang buot silingon sini ni Jehova? Bueno, kon binagbinagon naton ang ginhimo ni Pablo sang nagligad nga paghingabot sa mga Cristiano, paagi lamang sa dibagay nga kaluoy nga natigayon niya ang kaangtanan sa Dios​—⁠labi na ang iya pagkaapostol!a (Ipaanggid ang Zacarias 2:8; Bugna 16:​5, 6.) Mahimo nga ginsilingan ni Jehova si Pablo nga ang pribilehiyo nga pagkadisipulo “tuman na.” Indi ini pagaupdan sing milagruso nga pagdula sa personal nga mga problema sa kabuhi. Sa katunayan, ang pila ka kabudlayan mahimo nga resulta sang dugang nga mga pribilehiyo. (2 Corinto 11:​24-​27; 2 Timoteo 3:​12) Ano man ang matabo, dapat lamang batason ni Pablo ang iya “ungon sa unod.”

Apang, indi buot silingon nga walay kaluoy nga ginpabay-an ni Jehova si Pablo. Sa baylo nagsiling sia sa iya: “Ang akon gahom ginahimpit sa kaluyahon.” (2 Corinto 12:⁠9) Huo, mahigugmaon nga ginhatagan ni Jehova sing kusog si Pablo agod malandas ang iya kahimtangan. Sa amo, ang “ungon sa unod” ni Pablo nangin isa ka leksion. Gintudluan sia sini nga magsalig sa kusog ni Jehova sa baylo nga sa iya kaugalingon. Maathag nga natun-an gid ni Pablo ini nga leksion, kay pila ka tuig sang ulihi nagsulat sia sa mga taga-Filipos: “Natun-an ko, sa bisan ano nga kahimtangan nga yara ako, nga mangin kontento. Kay sa tanan nga butang may kusog ako bangod sa iya nga nagahatag sing gahom sa akon.”​—⁠Filipos 4:​11, 13.

Kamusta naman sa imo bahin? Nagabatas ka bala sing pila ka sahi sang “ungon sa unod,” ayhan isa ka balatian ukon isa ka kahimtangan sa kabuhi nga nagapahuol gid sa imo? Kon amo, magpakatawhay. Bisan pa mahimo nga indi pagdulaon ni Jehova sing milagruso ang kasablagan, makahatag sia sa imo sing kaalam kag kusog sa paglandas sini samtang padayon mo nga ginauna ang mga interes sang Ginharian sa imo kabuhi.​—⁠Mateo 6:⁠33.

Kon ang balatian ukon katigulangon nagaupang sa imo nga himuon ang luyag mo sa Cristianong hilikuton, indi maluyahan sing buot. Sa baylo nga tamdon ang imo kabudlayan subong latid sa imo pag-alagad kay Jehova, tamda ini subong isa ka kahigayunan nga mapauswag ang imo pagsalig sa iya. Dumduma man, nga ang pagka-Cristiano ginatakus, indi sa kadamuon sang iya hilikuton, kundi sa iya pagtuo kag tudok nga gugma. (Ipaanggid ang Marcos 12:​41-​44.) Ang paghigugma kay Jehova sa bug-os mo nga kalag nagakahulugan nga alagaron mo sia sa imo mismo labi nga masarangan​—⁠indi sa iya sang iban.​—⁠Mateo 22:37; Galacia 6:​4, 5.

Kon ang imo “ungon sa unod” nagalakip sing makapahuol nga kahimtangan sa kabuhi, subong sang pagkapatay sang isa nga hinigugma, sunda ang laygay sang Biblia: “Itungtong ang imo lulan kay Jehova, kag sia magaalay-ay sa imo. Indi gid sia magtugot nga malingkang ang matarong.” (Salmo 55:22) Ginhimo ini sang Cristiano nga babayi nga si Sylvia. Sa sulod lamang sang pila ka tuig, napatay ang iya bana pagkatapos sang 50 ka tuig nga pag-asawahay kag ang siam pa ka katapo sang iya pamilya​—⁠lakip ang duha ka lamharon nga apo. “Kon indi bangod kay Jehova,” siling ni Sylvia, “indi ko gid makontrol ang akon kasubo. Apang nakasapo ako sing daku nga kaumpawan paagi sa pangamuyo. Padayon ako nga nakighambal kay Jehova. Nahibaluan ko nga ginahatagan niya ako sing kusog agod mabatas ini.”

Daw ano ka makapasalig mahibaluan nga “ang Dios sang tanan nga paglugpay” makahatag sing kusog sa mga nagalalaw agod makabatas! (2 Corinto 1:3; 1 Tesalonica 4:​13) Ginaapresyar ini, mahangpan naton ang paghinakop ni Pablo sa sining butang. Sia nagsulat: “Nagakalipay ako sa mga kaluyahon, sa mga pasipala, sa mga kinawad-on, sa mga paghingabot kag mga kabudlayan, tungod kay Cristo. Kay kon maluya ako, nian gamhanan ako.”​—⁠2 Corinto 12:⁠10.

Paglandas sa mga Dikahimpitan

Tanan kita nakapanubli sing pagkadihimpit gikan sa aton una tawhanon nga mga ginikanan. (Roma 5:12) Subong resulta, nagapakig-away kita batok sa mga handum sang makasasala nga unod. Daw ano ka makapasubo nga matukiban nga ang mga kinaiya sang “daan nga personalidad” mas mabaskog nga nagahugakom sa aton sangsa ginahunahuna naton! (Efeso 4:​22-​24) Sa amo nga mga tion mahimo kita magbatyag subong sang nabatyagan ni apostol Pablo, nga nagsulat: “Nagakalipay gid ako sa kasuguan sang Dios suno sa akon nasulod nga pagkatawo, apang nakita ko sa akon mga bahin ang tuhay nga kasuguan nga nagapakig-away batok sa kasuguan sang akon hunahuna kag nagadala sa akon sa kabihagan sa kasuguan sang sala nga yara sa akon mga bahin.”​—⁠Roma 7:​22, 23.

Sa sini, man, makatigayon kita sing kusog gikan kay Jehova. Kon nagapakig-away batok sa personal nga kaluyahon, indi gid mag-untat sa pagdangop sa iya paagi sa pangamuyo, hanuot nga nagapangayo sang iya kapatawaran walay sapayan kon daw ano kasunson ikaw nagadangop sa iya tuhoy sa amo gihapon nga problema. Bangod sang iya dibagay nga kaluoy, si Jehova, nga “nagatimbang sing mga tagipusuon” kag makakita sa kadalumon sang imo pagkasinsero, magahatag sa imo sing matinlo nga konsiensia. (Hulubaton 21:⁠2) Paagi sa iya balaan nga espiritu, si Jehova makahatag sa imo sing kusog agod mapadayon ang pagpakig-away batok sa undanon nga mga kaluyahon.​—⁠Lucas 11:⁠13.

Nagakinahanglan man kita sing kusog gikan kay Jehova kon nagapakigbagay sa mga dikahimpitan sang iban. Halimbawa, ang isa ka masigka-Cristiano mahimo maghambal sa aton “sing dimapatugsilingon kaangay sang mga pagbuno sang espada.” (Hulubaton 12:18) Mahimo kita masaklaw gid, ilabi na kon nagahalin ini sa isa nga ginabatyag naton nga mas nakahibalo. Mahimo nga matublag gid kita. Ginagamit pa gani sang iban ang amo nga mga sayop subong rason nga magbiya kay Jehova​—⁠ang labing daku nga sala sa tanan!

Apang, ang timbang nga panimuot magabulig sa aton nga tamdon ang kaluyahon sang iban sing nagakaigo. Indi kita makapaabot sing kahimpitan sa dihimpit nga mga tawo. “Wala sing tawo nga wala nagapakasala,” pahanumdom sa aton sang maalam nga tawo nga si Solomon. (1 Hari 8:​46) Si Arthur, isa ka hinaplas nga Cristiano nga matutom nga nag-alagad kay Jehova sa sulod sang mga pito ka dekada, nagsiling: “Ang mga kaluyahon sang masigkaalagad nagahatag sa aton sing kahigayunan nga mapamatud-an ang aton integridad sa Dios, ginatilawan ang aton Cristianong panimuot. Kon ginatugutan naton nga masablagan ang aton pag-alagad kay Jehova sang ginasiling sang mga tawo ukon ginahimo, nagaalagad kita sa mga tawo. Dugang pa, ginahigugma man sang aton kauturan si Jehova. Kon tulukon naton ang maayo nga yara sa ila, makita naton sa gilayon nga indi gid man sila tuman kalain.”

Ang Gahom sa Pagbantala

Antes magkayab sa langit, ginsilingan ni Jesus ang iya mga disipulo: “Magabaton kamo sing gahom kon ang balaan nga espiritu mag-abot sa inyo, kag mangin saksi ko kamo sa Jerusalem kag sa bug-os nga Judea kag Samaria kag tubtob sa ukbong sang duta.”​—⁠Binuhatan 1:⁠8.

Subong sa pinamulong ni Jesus, ining hilikuton ginahimo na karon sang mga Saksi ni Jehova sa 233 ka kapungsuran sa bug-os nga globo. Sing tingob, nagahinguyang sila sing kapin sa isa ka bilyon ka oras kada tuig, nagabulig sa iban nga makatigayon sing ihibalo tuhoy kay Jehova. Ang pagtuman sining hilikuton indi pirme mahapos. Sa iban nga kadutaan ang pagbantala nga hilikuton sa Ginharian ginadumilian ukon ginalatiran. Binagbinaga man, kon sin-o ang nagahimo sing hilikuton​—⁠ang mahuyang, dihimpit nga mga tawo, nga ang tagsatagsa may iya kaugalingon nga mga problema kag mga kahuol. Apang ang hilikuton nagapadayon, kag subong resulta, sang nagligad nga tatlo ka tuig, kapin sa isa ka milyon ka tawo ang nagdedikar sang ila kabuhi kay Jehova kag ginsimbolohan ang ila dedikasyon paagi sa pagpabawtismo sa tubig. (Mateo 28:​18-​20) Matuod gid, ining hilikuton nagakatuman lamang paagi sa kusog sang Dios. Nagsiling si Jehova paagi kay manalagna Zacarias: “Indi paagi sa kusog militar, ukon sa gahom, kundi sa akon espiritu.”​—⁠Zacarias 4:⁠6.

Kon isa ikaw ka manugbantala sing maayong balita, may bahin ikaw​—⁠bisan pa kon daw ano ka diutay​—⁠sa sinang daku nga katumanan. Walay sapayan sang ‘ungon’ nga dapat mo batason, makasalig ikaw nga si Jehova indi magakalipat ‘sang imo binuhatan kag sang gugma nga imo ginpakita tungod sa iya ngalan.’ (Hebreo 6:⁠10) Gani padayon nga magsalig sa pagsakdag sang Ginahalinan sing tanan dinamiko nga enerhiya. Dumduma, paagi lamang sa kusog ni Jehova nga makabatas kita; ang iya gahom ginahimpit sa aton mga kaluyahon.

[Footnote]

[Kapsion sa pahina 26]

Ang pagbantala nga hilikuton matuman lamang paagi sa gahom ni Jehova