Leksion 8
Ang Pagkabuhi sang Pamilya nga Nagapahamuot sa Dios
Ano ang katungdanan sang bana sa pamilya? (1)
Paano dapat pakig-angutan sang bana ang iya asawa? (2)
Ano ang mga responsabilidad sang isa ka amay? (3)
Ano ang katungdanan sang isa ka asawa sa pamilya? (4)
Ano ang ginapatuman sang Dios sa mga ginikanan kag sa mga kabataan? (5)
Ano ang pagtamod sang Biblia tuhoy sa pagbulagay kag diborsio? (6, 7)
1. Ang Biblia nagasiling nga ang bana amo ang ulo sang iya pamilya. (1 Corinto 11:3) Ang isa ka bana dapat nga may isa lamang ka asawa. Dapat sila nakasal suno sa kasuguan.—1 Timoteo 3:2; Tito 3:1.
2. Dapat higugmaon sang bana ang iya asawa subong sang paghigugma niya sa iya kaugalingon. Dapat niya sia pakig-angutan kaangay sang pagpakig-angot ni Jesus sa iya mga sumulunod. (Efeso 5:25, 28, 29) Indi gid niya dapat pagsakiton ang iya asawa ukon abusuhan sia sa bisan anong paagi. Sa baylo, dapat niya sia pakitaan sing dungog kag pagtahod.—Colosas 3:19; 1 Pedro 3:7.
3. Ang amay dapat maghimakas sa pag-atipan sang iya pamilya. Dapat sia mag-aman sing pagkaon, panapton, kag puluy-an sa iya asawa kag mga kabataan. Ang amay dapat man magaaman sang espirituwal nga mga kinahanglanon sang iya pamilya. (1 Timoteo 5:8) Nagapanguna sia sa pagbulig sa iya pamilya sa pagtuon tuhoy sa Dios kag sa Iya mga katuyuan.—Deuteronomio 6:4-9; Efeso 6:4.
4. Ang asawa dapat nga isa ka maayo nga kabulig sang iya bana. (Genesis 2:18) Dapat niya buligan ang iya bana sa pagtudlo kag sa paghanas sa ila mga kabataan. (Hulubaton 1:8) Si Jehova nagasugo sa asawa nga atipanon ang iya pamilya sing mahigugmaon. (Hulubaton 31:10, 15, 26, 27; Tito 2:4, 5) Dapat niya tahuron sing tudok ang iya bana.—Efeso 5:22, 23, 33.
5. Ang Dios nagasugo sa mga kabataan nga tumanon ang ila mga ginikanan. (Efeso 6:1-3) Ginapaabot niya nga tudluan kag tadlungon sang mga ginikanan ang ila mga kabataan. Ang mga ginikanan dapat maghinguyang sing tion upod sa ila mga kabataan kag magatuon sang Biblia upod sa ila, nagaatipan sang ila espirituwal kag emosyonal nga mga kinahanglanon. (Deuteronomio 11:18, 19; Hulubaton 22:6, 15) Ang mga ginikanan indi gid dapat magadisiplina sang ila mga kabataan sa matigdas ukon mapintas nga paagi.—Colosas 3:21.
6. Kon ang magtiayon may mga problema sa pagsahuay, dapat nila tinguhaan nga iaplikar ang laygay sang Biblia. Ang Biblia nagalaygay sa aton sa pagpakita sing gugma kag pagpatawad. (Colosas 3:12-14) Wala ginapalig-on sang Pulong sang Dios ang pagbulagay subong isa ka paagi sa paglubad sa magagmay nga mga problema. Apang mahimo mamat-od ang isa ka asawa nga bayaan ang iya bana kon (1) matig-a sia nga nagadumili sa pagsakdag sa iya pamilya, (2) mapintas sia katama sa bagay nga ang iya panglawas kag kabuhi ginabutang sa katalagman, ukon, (3) ang iya sobra nga pagpamatok nagapaimposible sa iya sa pagsimba kay Jehova.—1 Corinto 7:12, 13.
7. Ang magtiayon dapat magmatutom sa isa kag isa. Ang panglahi isa ka pagpakasala batok sa Dios kag batok sa tiayon. (Hebreo 13:4) Ang paghulid sa guwa sang pag-asawahay amo lamang ang Makasulatanhon nga rason para sa diborsio nga nagatugot sang liwat nga pagminyo. (Mateo 19:6-9; Roma 7:2, 3) Si Jehova nagadumot kon magdiborsio ang mga tawo nga wala sing Makasulatanhon nga mga rason kag magaminyo sa iban.—Malaquias 2:14-16.
[Mga retrato sa pahina 16, 17]
Ang Dios nagapaabot nga tudluan sang mga ginikanan ang ila mga kabataan kag tadlungon sila
[Retrato sa pahina 17]
Ang isa ka mahigugmaon nga amay nagaaman sa iya pamilya sa materyal kag espirituwal