Nakabenepisyo Kita Gikan sa “Dalanon sang Dios sa Kabuhi” nga mga Kombension
1 Mga pila ka bulan pa lang ang nakaligad, nagplano kita sa pagtambong sa 1998-99 nga “Dalanon Sang Dios sa Kabuhi” nga Distrito nga mga Kombension. Karon nangin dulumdumon ini nga okasyon sa teokratiko nga maragtas sang organisasyon. Naluyagan gid naton ang dagaya nga espirituwal nga pagkaon nga nabaton naton sa sadtong tumalagsahon nga pagtilipon.
2 Ang internasyonal nga bahin sang mga kombension makakulunyag gid. May yara man ukon wala sing mga misyonero kag iban pa nga mga delegado halin sa mga pungsod sa luwas sa kombension nga aton gintambungan, nakabati kita tanan sing maayong mga eksperiensia sang Biernes sang hapon sa bahin nga natig-uluhan sing “Pag-alagad sa Misyonero nga Latagon.” Ang adlaw-adlaw nga “Mga Report Tuhoy sa Pag-uswag Sang Hilikuton sa Pagpangani” gikan sa bug-os nga kalibutan makapalig-on gid.
3 Matahom nga Bag-ong mga Release: Ginsabat sang katapusan nga pamulongpulong sang Biernes ang pamangkot sang dimaisip nga mga tawo nga wala makahibalo sang kamatuoran: “May Kabuhi Pa Bala Pagkatapos Sang Kamatayon?” Yadtong makawiwili nga diskurso naghinakop paagi sa pagpaguwa sing bag-o nga brosyur, Ano ang Nagakatabo sa Aton Kon Mapatay Kita? Samtang ginatun-an naton ini sa Pagtinuon Sang Kongregasyon sa Libro sini nga bulan kag sa Marso makita naton kon daw ano ka importante ini nga brosyur sa pagbulig sa mga tawo nga makita ang kamatuoran tuhoy sa kahimtangan sang mga minatay. Ang paglaum nga pagkabanhaw magalugpay man sa mga namatyan.
4 Ang programa sang Sabado sang hapon natapos sa pamulongpulong nga “Ang Manunuga—Ang Iya Personalidad kag ang Iya mga Dalanon.” Makatarunganon ini nga nagdul-ong sa aton sa konklusion nga may Manunuga gid. Agod mabuligan naton ang iban nga mahangpan ini nga katunayan, ang libro nga Is There a Creator Who Cares About You? ginpaguwa. Samtang ginadugangan sini ang aton pagtuo kay Jehova kag ang aton apresasyon sa iya personalidad kag mga dalanon, ang libro gindesinyo ilabi na para sa mga wala nagatuo sa Dios bisan pa nga sila may mataas nga edukasyon.
5 Isa ka Tinagipusuon nga Resolusyon: Ginpadaku sang katapusan nga pamulongpulong sang kombension ang kinahanglanon para sa aton tanan nga “Padayon nga Maglakat sa Dalanon ni Jehova.” Nagakaigo gid nga ipabutyag sing dayag sa resolusyon ang aton indibiduwal nga determinasyon nga pirme sundon, sakdagon, kag pasanyugon ang pagkasuperyor sang dalanon sang Dios sa kabuhi! (Isa. 30:21) Dapat kita karon mangin determinado nga magkabuhi suno sa sining mga pamat-od. Isa gid ka matahom nga espirituwal nga pag-uswag ang nabaton naton paagi sa pagtambong sa “Dalanon Sang Dios sa Kabuhi” nga Kombension!