Mag-andam sa Paghatag sing Malain nga mga Motibo
MAYAGUTAON nga ginmulay sang isa ka kilala nga ebanghelisador sa telebisyon ang isa ka masigkamanugwali bangod sang pagpanglahi. Apang, sina man nga tuig, ang nagsumbong nga ebanghelisador nadakpan nga kaupod sang isa ka alpot.
Sa isa pa ka halimbawa, ang nagapanguna nga kagamhanan sa kalibutan nagpadala sing mga emisaryo agod maghambalanay tuhoy sa paghidait ang nagainaway nga mga partido. Sa sina man nga tion, ini man nga pungsod likom nga nagpadala sang iya mga manugbaligya sing armas sa dumuluong nga mga pungsod agod magbaligya sing binilyon dolyares nga bili sang mga hinganiban.
Sanglit ang dayag nga pagkasalimpapaw kinaandan na katama, katingalahan bala nga buslan sang duhaduha ang pagsalig? Para sa madamo, ang pagduhaduha sa mga motibo sang iban nangin batasan na.
Subong mga Cristiano, dapat kita maghalong nga indi pagtugutan ini nga mga panimuot nga makaapektar sa aton kaangtanan upod sa matutom nga mga masigkatumuluo. Bisan pa nga si Jesucristo naglaygay sa aton nga mangin “mainandamon subong sang mga man-ug” samtang sa tunga sang aton mga kaaway, wala sia magsiling nga mangin mapangduhaduhaon kita sa iya matuod nga mga sumulunod. (Mateo 10:16) Gani, nian, ano ang mga katalagman sang paghatag sing malain nga mga motibo sa iban? Sa anong mga bahin kita dapat labi na nga maghalong agod likawan ina nga huyog? Kag paano naton maamligan ang aton hamili nga kaangtanan upod sa mga masigka-Cristiano?
Isa ka Leksion Gikan sa Nagligad
Pareho lamang nga ginahukman mo ang iban kon hatagan mo sing malain nga kahulugan ang ila mga motibo nga wala sing makatarunganon nga rason. Daw subong bala nga nagahinakop kita dayon nga ang ila mga hambal ukon mga buhat isa lamang ka malimbungon nga pagtago sang pila ka butang nga malalangon kag mahaliton. Sa masami ang matuod nga problema amo ang sayop nga pagtamod sa mga bagay, subong sang makita gikan sa report sang Biblia nga masapwan sa Josue kapitulo 22.
Natapos sang mga Israelinhon ang ila pagsakop sa Ginsaad nga Duta kag bag-o lang nabaton ang ila teritoryo nga mga tribo. Ang mga tribo nanday Ruben kag Gad kag ang katunga nga tribo ni Manases nagpatindog sing halaran nga “daku tulukon” sa ubay sang Suba sang Jordan. Ginhangop ini sang iban nga mga tribo subong isa ka buhat sang apostasya. Ginhaumhaum nga gamiton sang tatlo ka tribo ining daku nga tinukod para halaran sa baylo nga magkadto sa kayangkayang nga ginatipunan sa Silo, ang gintangdo nga duog sa pagsimba. Sa gilayon, ang nagsumbong nga mga tribo naghanda para sa militar nga pagsalakay.—Josue 22:10-12.
Maayo na lang nga nakigsugilanon anay sila sa ila Israelinhon nga mga kauturan paagi sa pagpadala sing isa ka opisyal nga delegasyon nga ginpangunahan ni Finehas. Sang mabatian ang panumbungon nga pagkadimatutom, pagrebelde, kag pag-apostata batok kay Jehova, ginpaathag sang ginkunukuno nga nakasala nga mga tribo ang ila rason para sa sining daku nga halaran. Sa baylo nga isa ka altar nga halaran, ini “mangin saksi” sa paghiusa sang mga tribo sang Israel sa pagsimba kay Jehova. (Josue 22:26, 27) Ang delegasyon nagpauli nga kumbinsido nga wala sing sala ang ila mga kauturan. Busa nalikawan ang isa ka sibil nga inaway kag ang daku nga pagpatulo sing dugo.
Daw ano nga leksion para sa aton nga indi gid mangin maabtik sa paghatag sing malain nga mga motibo sa iban! Sa masami ang daw matuod sa hapaw lamang nga pagtan-aw tuhay gid gali kon usisaon sing mas maayo. Matuod ini sa madamo nga bahin sang kabuhi sang isa ka Cristiano.
Ang Aton Pagtamod sa mga Gulang
Sa pagtuman sang ila responsabilidad ‘sa pagbantay sa kongregasyon sang Dios,’ kon kaisa nakita sang mga gulang nga kinahanglan laygayan ang madamo nga indibiduwal sa kongregasyon. (Binuhatan 20:28) Halimbawa, naakig bala kita kon hambalon kita sang isa ka gulang tuhoy sa aton mga anak sa mga butang subong sang malain nga kaupdanan ukon dinagakaigo nga pagginawi upod sa tuhay nga sekso? Nagahunahuna bala kita nga may natago sia nga motibo kag nagasiling sa aton kaugalingon, ‘Wala gid niya maluyagi ang amon pamilya’? Kon magpaimpluwensia kita sa sina nga mga balatyagon, magahinulsol kita sa ulihi. Ang espirituwal nga kaayuhan sang aton mga anak mahimo nga mabutang sa katalagman, kag dapat naton pasalamatan ang mabuligon nga laygay sa Kasulatan.—Hulubaton 12:15.
Kon ginalaygayan kita sang isa ka gulang sa kongregasyon, indi kita mangita sing natago nga motibo. Sa baylo, dapat naton pamangkuton ang aton kaugalingon kon bala sa pila ka paagi mabuligan kita sang iya pasad-sa-Biblia nga laygay. Si apostol Pablo nagsulat: “Matuod, wala sing disiplina nga sa karon daw makalilipay, kundi masakit; apang pagkatapos ang mga nahanas sa sini nagapatubas sing mahidaiton nga bunga, nga amo, ang pagkamatarong.” (Hebreo 12:11) Gani dapat kita magpasalamat kag hunahunaon sing maayo ang mga bagay. Dumduma nga sa masami mas mabudlay para sa mga gulang ang laygayan kita sangsa para sa aton nga batunon ini.
Mga Balatyagon Tuhoy sa mga Ginikanan
Kon may mga pagdumili gikan sa mga ginikanan, ginaduhaduhaan sang pila ka pamatan-on ang mga motibo sang ila mga ginikanan. Ang pila ka pamatan-on mahimo magasiling: ‘Ngaa tuman kadamo nga pagsulundan ang ginapatuman sang akon mga ginikanan? Siguro indi nila luyag nga magkalipay ako.’ Apang, sa baylo nga maghinakop sing subong sina, dapat usisaon sing maayo sang mga pamatan-on ang kahimtangan.
Ang mga ginikanan nagaatipan sing madamong tinuig sa ila mga anak. Ginhimo ini nga may daku nga sakripisyo sa materyal kag sa iban pa nga butang. May rason bala sa paghinakop nga determinado sila karon nga mangin miserable ang pagkabuhi sang ila tin-edyer nga mga anak? Indi bala mas rasonable hunahunaon nga gugma ang nagapahulag sa sining mga ginikanan nga amligan ang ila kabataan kag ulikdan sila? Indi bala ini man nga gugma ang nagatiklod sa ila nga ipatuman ang pila ka pagdumili sa ila kabataan, nga nagaatubang karon sing bag-ong mga hangkat sa kabuhi? Daw ano kapintas kag walay kabalaslan nga hatagan sing malain nga mga motibo ang mahigugmaon nga mga ginikanan!—Efeso 6:1-3.
Ang Aton Panimuot sa mga Masigka-Cristiano
Madamo ang nahuyog nga hukman na nga daan ang iban kag may nauna na nga opinyon tuhoy sa ila. Ano kon kita mismo may amo sina nga panimuot kag nangin daw maduhaduhaon sa pila ka tawo? Mahimo bala kita maimpluwensiahan sang kalibutan sa sining bahin?
Halimbawa, ang isa sang aton espirituwal nga mga kauturan may matahom nga balay kag malahalon nga awto. Magahinakop bala kita gilayon nga materyalistiko sia nga wala nagauna sang mga interes sang Ginharian sa kabuhi? Ang pila ka Cristiano mahimo nga makasarang sing matahom nga mga butang, apang wala ina nagakahulugan nga may malain sila nga mga motibo ukon wala ‘anay nagapangita sang ginharian.’ Ayhan tuman sa ila kasako sa espirituwal nga mga hilikuton, maalwan nga nagagamit sang ila materyal nga mga pagkabutang sa pagpasanyog sang mga interes sang Ginharian, ayhan sa dikitaon nga mga paagi.—Mateo 6:1-4, 33.
Ang unang siglo nga Cristianong kongregasyon ginakatapuan sang tanan nga sahi sang tawo—manggaranon kag imol. (Binuhatan 17:34; 1 Timoteo 2:3, 4; 6:17; Santiago 2:5) Wala ginahukman sang Dios ang mga tawo pasad sa ila pinansial nga kahimtangan, kag dapat nga amo man kita. Dapat naton higugmaon ang aton natilawan na kag matutom nga mga masigkatumuluo, “wala nagahimo sing bisan ano suno sa may nadampigan nga huyog.”—1 Timoteo 5:21.
Sa sining kalibutan nga yara sa gahom ni Satanas, ang paghatag nga daan sing opinyon kag pagduhaduha makita sa lainlain nga paagi. Halimbawa, ang isa ka tawo mahimo tamdon subong masingki ukon materyalistiko bangod lamang sa iya ginhalinan. Apang, subong mga Cristiano, indi kita dapat mangin subong sina. Ang organisasyon ni Jehova wala sing duog para sa matig-a nga opinyon tuhoy sa iban kag sa pagkamaduhaduhaon. Dapat ilugon sang tanan matuod nga Cristiano si Jehova nga Dios, nga sa iya “wala sing dimatarong ukon pagdampig.”—2 Cronica 19:7; Binuhatan 10:34, 35.
Mapahulag sang Gugma
Ang Kasulatan maathag nga nagasiling nga “ang tanan nagpakasala kag nakulangan sing himaya sang Dios.” (Roma 3:23) Gani dapat naton tamdon ang aton mga masigkatumuluo subong mga nahiusa sa aton sa pagpanikasog nga makahimo sing kalahamut-an nga pag-alagad kay Jehova. Kon gintugutan naton ang duhaduha ukon iban pa negatibo nga mga balatyagon nga makaapektar sa aton relasyon upod sa isa ka espirituwal nga utod nga lalaki ukon babayi, mangamuyo kita sing bulig sa Dios nga mabatuan naton ini nga panimuot agod indi kita masiod ni Satanas. (Mateo 6:13) Ginkumbinsi niya si Eva nga si Jehova may malain nga mga motibo, indi interesado sa iya kaayuhan, kag nagadingot sing mga kahilwayan nga magapahalipay gid sa iya. (Genesis 3:1-5) Ginahimo naton ang iya mga katuyuan kon ginahatagan naton sing malain nga mga motibo ang aton mga kauturan.—2 Corinto 2:11; 1 Pedro 5:8.
Kon makita naton nga may huyog kita sa paghatag sing malain nga mga motibo sa iban, binagbinaga ang halimbawa ni Jesucristo. Bisan pa nga sia himpit nga Anak sang Dios, wala niya ginpangitaan sing malain nga mga motibo ang iya mga disipulo. Sa baylo, ginpangita ni Jesus ang maayo sa ila. Sang ang iya mga disipulo nagabaisay para sa mataas nga posisyon, wala sia maghunahuna nga may malain sila nga mga motibo kag ginbuslan sila sing 12 ka bag-ong apostoles. (Marcos 9:34, 35) Bangod dihimpit, mahimo naimpluwensiahan sila sa pila ka paagi sang kultura sang apostata nga Judaismo, nga nagapadaku sa bugal kag pagbahinbahin sang klase. Nahibaluan ni Jesus nga ang sadsaran nga nagpahulag sa iya mga sumulunod amo ang gugma kay Jehova. Bangod sang pagpakita sini nga gugma kag sang pagpabilin upod kay Jesus, ginpadyaan sila sing daku.—Lucas 22:28-30.
Kon tan-awon naton sing maduhaduhaon ang aton matutom nga mga masigkatumuluo, mangin kaangay ini sang pagtan-aw sa mga butang sa may depekto nga lente. Indi makita ang kon ano gid ini. Busa magtan-aw kita paagi sa lente sang gugma. Madamo sing pamatuod nga ang aton matutom nga mga masigka-Cristiano nagahigugma sa aton kag takus sang aton maluluy-on nga patugsiling. (1 Corinto 13:4-8) Gani kabay nga pakitaan naton sila sing gugma kag mag-andam batok sa paghatag sing malain nga mga motibo.
[Kapsion sa pahina 26]
Ano ang pagtamod mo sa iban nga nagasimba sing matutom sa Dios?
[Kapsion sa pahina 27]
Ang pagsalig kag pagtahod nagahimo sa mga Saksi ni Jehova nga isa ka malipayon nga pamilya