“Ano ang Dapat Ko Himuon?”
1 Subong isa ka pamatan-on nga manughamtong, mahimo nga mamangkot ka, ‘Ano ang dapat ko himuon sa akon kabuhi?’ Luyag pasangkaron sang Cristianong mga pamatan-on ang ila pag-alagad kay Jehova sa ministeryo. Apang paano mo ini himuon samtang ginahimo ang mga responsabilidad sang pagkahamtong, nga nagalakip sang pag-aman sa imo mismo materyal nga mga kinahanglanon? Ang sabat sa sini mahimo nga indi mahapos.
2 Ang pila ka pamatan-on nagakabalaka kon makita nila ang kahimtangan sa ekonomiya sang kalibutan kag ang mga pakotpakot para sa palaabuton. Nagapamangkot sila: ‘Dapat bala ako magkuha sing dugang pa nga sekular nga edukasyon? Magasulod bala ako gilayon sa bug-os tion nga pag-alagad?’ Agod makadesisyon sing husto, dapat sabton sing bunayag sang isa ka tawo ini nga pamangkot, ‘Ano gid bala ang pinakaimportante sa akon kabuhi?’ Dapat niya usisaon ang iya mga motibo.
3 Ano ang napalambo mo subong imo panguna nga ginakabalak-an sang pamatan-on ka? Interesado ka lang bala kon paano makakuwarta, ukon luyag gid bala nimo gamiton ang imo kabuhi sa pagpauswag sa mga intereses sang Ginharian? Ang titulo nga nakatapos sa unibersidad wala nagagarantiya sing trabaho. Subong alternatibo, madamo ang nakaangkon sing mga ikasarang sa trabaho paagi sa pagtuon sa bokasyonal ukon teknikal nga eskwelahan, ukon sa malip-ot nga kurso sa kolehiyo nga nagakinahanglan sing pinakamanubo nga tion kag kasakuon.
4 Magsalig sa Saad ni Jehova: Ang importante gid nga katunayan nga dapat binagbinagon amo ang pasalig gikan kay Jehova nga Dios nga amanan niya ang mga nagauna sang mga intereses sang Ginharian sa kabuhi. (Mat. 6:33) Indi ini isa ka wala pulos nga saad. Madamong utod nga lalaki nga nag-eskwela sa Ministerial Training School ang nakatapos sa kolehiyo antes makatuon sing kamatuoran. Apang ano ang nangin trabaho nila? Pila lamang ang nagatrabaho suno sa gintun-an nila. Madamo ang nagapangabudlay sa latagon sang pagserbisyo, nagaatipan sing maayo sang ila pinansial nga mga kinahanglanon samtang nagapayunir. Paagi sa pagpasangkad sang ila hilikuton sa ministeryo, nagabaton sila sing mga pagpakamaayo nga labaw pa sa kuwarta.
5 Kon nagapamat-od kon ano ang dapat mo himuon paggradwar sa hayskul, tulutimbanga ang tanan nga butang kag usisaa sing maayo ang imo mga motibo. Para sa timbang nga pagtamod sa imo mga napilian, binagbinaga ang impormasyon subong sang makita sa Marso 8, 1998 nga Awake!, pahina 19-21. Makighambal sa imo mga ginikanan, sa mga gulang, sa inyo manugtatap sang sirkito, kag sa madinalag-on nga mga payunir sa inyo lugar. Magabulig ini sa imo sa pagdesisyon sing maalamon kon ano ang dapat mo himuon sa imo kabuhi.—Manugw. 12:1, 13.