Tudlui ang Iban nga Makabenepisyo

¹ Luyag ni Jehova nga ang tanan nga tawo makabenepisyo. (Isa. 48:17) Nahibaluan niya kon ano ang nagahatag sa aton sing matuod nga kalipay. Handum gid niya nga malikawan sang mga tawo ang kasisit-an kag maagom ang kabuhi paagi sa pagtuman sa iya mga sugo. Nagabenepisyo kita sing daku paagi sa aton pagkabuhi suno sa dalanon sang Dios. (Sal. 34:8) Paano naton matudluan ang iban nga makabenepisyo man?

² Ano ang Luyag sang mga Tawo? Ano ang ginakabalak-an sang mga tagbalay sa inyo lugar? Indi bala ang seguridad sang ila puluy-an, ang kalig-on sang ila pag-asawahay, ang palaabuton sang ila mga anak, kag ang kaanggid nga mga butang? Kon may mga problema sila, diin sila nagapangayo sing bulig? Mahimo sila magsalig sa ila kaugalingon, sa mga programa kon paano buligan ang kaugalingon, ukon sa panuytoy sang iban. Sa amo man nga tion, madamo gihapon ang ginaligban bangod sang indi palareho kag indi praktikal nga mga ideya kon paano sila makabenepisyo. Dapat naton sila kumbinsihon nga ang panuytoy nga ginahatag sang Pulong sang Dios maayo gid. (Sal. 119:98) Sarang naton ini mahimo paagi sa pagpakita sa ila kon paano nila mapauswag ang kalidad sang ila kabuhi bisan karon kon manikasog sila nga tun-an ang Biblia kag iaplikar ang ginasiling sini.​—⁠2 Tim. 3:​16, 17.

³ Napauswag nga Pagkabuhi sang Pamilya: Pila lamang ang nakahibalo kon daw ano ka epektibo ang inspirado nga laygay sa Efeso 5:​22⁠–​6:4 sa paglubad sa mga problema sang pamilya. Amo sini ang natabo sa isa ka mag-asawa nga, pagkatapos sang napulo ka tuig nga pag-asawahay, namat-od sila nga magbulagay. Apang, isa ka pagtuon sa Biblia ang nasugdan upod sa asawa, nga gintudluan sang Makasulatanhon nga mga prinsipio nahanungod sa pag-asawahay. Gilayon nga nakita sang bana ang mga pagbalhin sang asawa samtang ginaaplikar niya ang mga prinsipio sang Biblia, kag nagbuylog sia sa pagtuon. Ang bana nagsiling sang ulihi: “Nakita na namon karon ang sadsaran para sa malipayon gid nga pagkabuhi sang pamilya.”

⁴ Matuod nga Katuyuan sa Kabuhi: Sang ang isa ka pamatan-on nga nagiyan sa droga nangayo sing bulig sa mga Saksi, gintudluan sia nga si Jehova nagaulikid sa iya sing personal. Sia nagsiling: ‘Natun-an ko nga ang Manunuga may katuyuan gali para sa tawo kag nagahatag sing kabuhi nga walay katapusan sa mga nahamut-an niya. Indi ninyo mahanduraw kon daw ano nga kalipay ang nabatyagan ko tuhoy sini. Sa karon maayo na ang akon panglawas, malinong ang hunahuna, kag suod ang kaangtanan sa Dios.’

⁵ Ang tanan sarang makabenepisyo gikan sa praktikal nga bulig nga masapwan sa Pulong sang Dios. Paagi sa paggamit sini subong giya naton, ginapamatud-an naton nga ang dalanon ni Jehova nagalabaw gid sa mga dalanon sang kalibutan. (Sal. 116:12) Pribilehiyo naton nga ipaalinton ini nga mensahe sa iban, nagatudlo sa ila nga makabenepisyo. Samtang ginahimo naton ini, makita naton ang madamong maayo nga resulta.