Masaylo Ninyo ang mga Bukid!

ANG Mayo 29, 1953, amo kuno ang unang tion nga ang tawo nakatindog sa ibabaw sang pinakamataas nga putukputukan sang bukid sa kalibutan​—⁠Bukid Everest, 8,848 metros ibabaw sang nibel sang dagat. Paagi sa bulig sang kapin sa 450 ka tawo, si Edmund Hillary sang New Zealand kag si Tenzing Norgay, isa ka taga-Nepal nga Sherpa, madinalag-on nga nakalampuwas sa mga katalagman sang madanlog nga yelo, nagapabulag nga nieve, kag kakulang sing oksiheno sa paglab-ot sa putukputukan sang ila lima-kag-tunga-ka-milya-kataas nga lalambuton.

Ang pagsaka sa putukputukan sang mataas nga mga bukid isa gid ka tumalagsahon nga hinimuan. Apang indi ini sarang mapaanggid sa kon ano ang ginlaragway ni Jesus sa iya mga disipulo: “Nagasiling ako sa inyo, kon kamo may pagtuo subong sa lamigas sang mostaza magasiling kamo sa sining bukid, ‘Saylo didto’, kag ini magasaylo; kag wala gid sing dimahimo ninyo.” Hunahunaa, indi pagsaka kundi pagsaylo sa bukid!​—⁠Mateo 17:​20, The Jerusalem Bible.

Ano ang nagpahulag kay Jesus nga isiling ini sa iya mga disipulo? Napaslawan sila bag-o lang sa pag-ayo sa bata nga lalaki nga ginsudlan sang yawa. Ginpadaku ni Jesus kon ngaa napaslawan sila: Kinahanglan nila ang dugang nga pagtuo. (Mateo 17:​14-20) Ginpaanggid niya ang pagtuo sa lamigas sang mostaza, isa ka butang nga pamilyar sila. Bisan pa isa sang “pinakadiutay,” ang lamigas sang mostaza pagligad sang pila ka bulan nga pagtubo mangin isa ka subong sang kahoy nga tanum. (Mateo 13:​31, 32) Busa, ginapadaku ni Jesus ang daku nga mahimo sang diutay nga pagtuo kon ginakultibar kag ginapalambo sing nagakaigo​—⁠ang daw imposible nangin posible.

Apang sa tapos mapalambo ina nga pagtuo, ano nga sahi sang mga bukid ang masaylo sang mga disipulo ni Jesus? Subong nga ang literal nga bukid sarang mangin makahalawhaw, ang kaangay sang bukid nga mga sablag sarang makabalabag sang aton pag-uswag sa pag-alagad kay Jehova. Ano bala inang “mga bukid” kag paano naton ini ‘masaylo’?

Si apostol Pablo isa ka halimbawa sang Cristiano nga nag-atubang sing madamong sablag. Sa 2 Corinto 6:​4-10 kag 2 Corinto 11:​23-28, mabasa mo ang tuhoy sa pag-eksperiensia niya sing mga pag-isahanon, mga pagsakit, pagkabilanggo, pagkalunod, kag madamo pa nga kapahamakan. Dugang sa sining mga butang, yara ang malaragwayon nga “ungon sa unod,” ayhan ang pila ka kabudlayan sa panulok. (2 Corinto 12:7; Binuhatan 14:15) Paano bala niya nalandas inang subong sang bukid nga mga sablag kag madinalag-on nga nahimo ang kabubut-on sang Dios para sa iya? “Makahimo ako sang tanan nga butang sa iya nga nagapabakud sa akon,” sulat ni Pablo. Amo ini ang “tama nga pagkadaku sang gahom nga iya sang Dios kag indi sa amon kaugalingon.” (Filipos 4:13; 2 Corinto 4:⁠7) Busa, si Pablo may bug-os nga pagsalig sa ikasarang ni Jehova sa pagpabakud sa iya sa ital-ital nga higayon. May pagtuo sia.

Pagsaylo sa mga Bukid Karon

Luyag mo bala nga pauswagon ang imo pag-alagad kay Jehova? Kaangay sang ginatos ka libolibo nga nagbuylog sa nagadugang nga kadamuon sang bug-os tion nga mga manugbantala (mga payunir), mahimo man ninyo mabatyagan ang kadagmit sang mga tion kag mahimo nga nagahunahuna sing serioso sa pagpasangkad sang inyo ministeryo. Apang, ang isa bala ka sablag daw indi malandas subong sang daku nga bukid sa atubangan mo? Kon amo, masaylo mo bala ang mga bukid? Linibolibo ang nakahimo sina sa panikasog nila nga mapauswag ang ila pag-alagad kay Jehova. Yari ang pila lamang sang mga eksperiensia nila.

Ang isa ka lamharon nga utod nga babayi nga manuggradwar sa eskwelahan nga nagapanguna sa iya klase maluyag sa pagpayunir, apang ang kakulang sing palamugnan amo ang iya bukid. Sia nagasugilanon:

“Ang akon mismo negatibo nga panghunahuna kag mga pangduhaduha nahanungod sa akon pagpayunir ang nangin sablag para landason ko. Bangod nabalaka gid ako nga makakita sing obra antes ako mag-umpisa sa pagpayunir, wala ko ginabutang ang akon bug-os nga pagsalig kag kompiansa kay Jehova kag sa iya ikasarang sa pag-aman para sa sadtong nagauna sang pagsimba sa iya. Pirme ako nagahunahuna, ‘Mangita ako anay sing obra, nian ihatag ko ang akon aplikasyon sa pagpayunir.’ Wala ako nagapayunir; gin-usikan ko gid ang bilidhon nga tion. Apang, ginpaathag sang isa sang mga gulang sa kongregasyon nga kon mas madugay ang hulaton ko sa pagsugod sa pagpayunir, mangin labi pa kaayo tan-awon ang bug-os tion nga mga obra, sanglit wala sing bisan ano nga butang nga nagapugong sa akon sa pagbaton sini.”

Ano bala ang ginhimo niya? “Nangamuyo ako kay Jehova sing hanuot para sa iya balaan nga espiritu sa pag-ubay kag sa pagtuytoy sa akon mga buhat kag panghunahuna.” Pagkatapos sang gradwasyon ining utod nga babayi nag-auxiliary payunir, kag nian nagsulod sia sa regular payunir nga ministeryo. Wala madugay pagkatapos sina, nakakita sia sing nagakaigo nga sekular nga palamugnan nga bagay sa iya iskedyul sa pagpayunir.

Ang isa ka gulang, nga ang asawa isa ka payunir kag may duha ka anak nga salaguron, nagbatyag nga dapat sia maghimo sing labi pa sang sa pagsakdag sa iya pamilya sa pinansial. Sa iban nga nagatan-aw, ang mga sirkuntansia nga nagabalabag sa iya gikan sa pagpayunir daw indi malandas, apang luyag niya nga pasangkaron ang iya ministeryo. Ano bala ang bag-uhon?

“Sa banta ko ang pinakadaku nga sablag nga dapat ko landason amo gid ang akon kaugalingon,” siling niya. “Ang pag-alagad sa latagon butang nga pirme ko naluyagan, kag sa pagpakigsugilanon sa mga yara sa bug-os tion nga ministeryo kag sa pagtan-aw sa ila mga pagpakamaayo, natukiban ko nga ang balaan nga espiritu nga ginpakita nila makalalaton. Nakita ko ang akon kaugalingon sa bug-os tion nga ministeryo sa pila ka adlaw. Ang problema sa akon panghunahuna amo nga ang pagpayunir isa lamang ka butang nga ginhunahuna ko. Apang wala ko gid paghatagan ang akon kaugalingon sing petsa sa kon san-o ko tumanon ang tulumuron.”

Pagkatapos sang mapangamuyuon nga pagbinagbinag, ginsugdan nga pangabudlayan sining utod ang iya tulumuron tuhoy sa bug-os tion nga pag-alagad. Ginsugilanon niya ang iya superbisor sa trabaho, ginpaathag ang iya mga tuyo, kag nangabay nga tugutan nga magtrabaho sing mas diutay nga oras kada semana. Kon tuhoy sa pagsulundan sang kompanya, ang sahi sang iskedyul nga luyag niya tumalagsahon.

Sia nagapadayon: “Gintapos sang akon superbisor ang paghambalanay paagi sa pagsiling nga mahimo gid nga indi ko matigayon ang iskedyul nga ginapangabay ko. Napat-od ko gid nga kon sia lamang ang mamat-od, ang sabat amo ang indi. Kag gani ang pagpasugot mahimo lamang nga matigayon paagi sa pagsakdag ni Jehova. Isa ka semana kag tunga sang ulihi, ang pagpasugot sa akon bag-ong iskedyul naghalin sa ehekutibo nga posisyon. Sa tapos mapasalamatan ang akon superbisor, nagkadto ako sa akon salakyan, nagmaneho sing pila ka bloke, nagpahigad, kag nagpabutyag sang akon pasalamat kag apresasyon kay Jehova. Huo, ang akon tulumuron nga bug-os tion nga pag-alagad nangin isa ka katunayan.”

Paano bala ‘ginsaylo’ sang isa ka minyo nga utod nga babayi ang iya bukid? Sugid niya: “Apat ang akon kabataan kag dimatinuohon ang akon bana. Sang ginhunahuna ko ang pagpayunir, may pila ako ka problema. Una, ang akon bana umalagi nga wala sing palamugnan, bangod ang iya trabaho pulupanag-on, kag nagatrabaho ako sing part-time agod makabulig sa mga galastuhon. Gani siling ko sa akon kaugalingon nga bisan pa luyag ko, indi ako makapayunir bangod sang akon mga sirkuntansia. Apang, diri sini nga dapat ko bag-uhon ang akon panghunahuna. Narealisar ko nga kon hunahunaon ko pirme nga indi ko mahimo, indi gid ako manikasog sa pagtilaw. Ang masunod nga importante nga pamangkot nga sabton ko amo, Diin ko bala kuhaon ang kabakud nga magpayunir? Nakita ko ang sabat sa Filipos 4:13. Indi lamang nga ginpangamuyo ko kay Jehova ang nahanungod sini kundi labi pa gid ako nga nagsalig sa iya. Ginhimo ko man ang praktikal nga mga tikang padulong sa paglab-ot ko sa akon tulumuron paagi sa paghimus sing maayong iskedyul kag pagpalista subong auxiliary payunir. Sa pagligad sang tion, padayon nga ginbuksan ni Jehova ang dalanon para sa akon sa pagsulod sa payunir nga pag-alagad. Ang akon bana nakabalik sa trabaho, kag nahimo ko nga latiran ang akon part-time nga trabaho sing isa ka adlaw sa isa ka semana. Wala madugay pagkatapos sini, nangin isa ako ka regular payunir.”

Dugang pa, ang pribilehiyo nga makatambong sa Pioneer Service School ginbuksan sa iya, nga nakabulig gid sing daku sa iya ministeryo. “Luyag ko isiling kay bisan sin-o nga nagahunahuna sa pagpayunir nga magpangamuyo kay Jehova kag itugyan ini sa iya mga kamot,” siling niya. “Nian manikasog, kag pakamaayuhon niya ikaw bangod sang pagpanikasog.”​—⁠Salmo 37:⁠5.

Indi bala nga ining mga eksperiensia nagabulig sa imo sa paghangop kon paano ang pagtuo kon ginahimo makabulig sa isa ka Cristiano sa paglandas sa kaangay sang bukid nga mga sablag? Busa, kon handum mo ang magpayunir, usisaa ang imo mga sirkunstansia. Makigsugilanon sa iban nga nagapayunir, kag magtuon gikan sa ila mga eksperiensia. Maghimo sing praktikal nga mga tikang padulong sa paglab-ot sa imo tulumuron. Kag labaw sa tanan, ipangamuyo kay Jehova ang nahanungod sa imo handum; nian magsalig sa iya nga pakamaayuhon ang imo mga panikasog. Huo, imo man masaylo ang mga bukid!