Pagpabaskog sang Aton Kaugalingon Paagi sa Katumanan sang mga Pinamulong ni Jehova

“Ang tawo mabuhi, indi lamang sa tinapay, kundi sa tagsa ka pinamulong nga nagaguwa sa baba ni Jehova.”—MATEO 4:4.

1. Paano nga si Jehova amo ang Daku nga Manug-aman sang Pagkaon, apang ano ang ginsiling ni Jesus tuhoy sa mga kinahanglanon sang tawo?

SI Jehova amo ang Daku nga Manug-aman sang Pagkaon. Ginpakilala niya ang iya kaugalingon sa tawo subong amo sina sa nahauna mismo nga kapitulo sang Biblia. (Genesis 1:29, 30) Sa ulihi pa gid, ang salmista nga si David mapasalamaton nga nagsiling kay Jehova: “Ang mga mata sang tanan nagahulat sa imo, kag ginahatagan mo sila sang ila kalan-on sa nagakaigo nga panag-on. Ginahumlad mo ang imo kamut kag ginabusog ang handum sang tagsa ka butang nga buhi.” (Salmo 145:15, 16) Huo, si Jehova nag-aman sing bugana nga pagkaon para sa tawo kag sapat. Apang may yara kinatuhayan. Samtang ang mga sapat nagakinahanglan lamang sing pisikal nga pagkaon, ginpakita ni Jesus nga ang tawo nagakinahanglan sing labi pa sang sa pisikal nga tinapay, ukon pagkaon. Sia ‘dapat man mabuhi sa tagsa ka pinamulong nga nagaguwa sa baba ni Jehova.’—Mateo 4:4.

2. Ano ang dapat naton mahibaloan nahanungod sa kahulugan sang ginsiling ni Jesus sa Mateo 4:4?

² Ginsiling ini ni Jesus bilang sabat kay Satanas, nga nagtinguha sa pagsulay sa Iya nga himuon sing milagruso ang mga bato nga tinapay. Wala pag-ipilit sang Yawa ang punto kundi hinali nga nagsaylo sa isa pa ka pagsulay. Nagahukom sa sayop nga paagi gin-aplikar niya nian ang Salmo 91:11, 12, ayhan wala mahangpi ni Satanas kon ano ang buot silingon ni Jesus sa Iya sabat sa nahauna nga pagsulay. (Mateo 4:3-7) Apang kita nga mga alagad ni Jehova interesado katama sa ginsiling ni Jesus. Kita nga nalipay sa pag-usisa sing dugang pa sa Biblia agod matigayon ang pinakadaku nga espirituwal nga kaayohan sarang makapamangkot: Ang buot bala silingon ni Jesus nga agod matigayon ang bugana sing eksperiensia nga kabuhi, dapat ton-an kag ayhan saulohon sang tawo ang “tagsa ka pinamulong nga nagaguwa sa baba ni Jehova”? Ukon ano gid ang buot niya silingon?

Mga Pinamulong ni Jehova

3, 4. Ano ang duha ka kahulugan sang Griego kag Hebreo nga mga tinaga para sa “pinamulong”? Iilustrar.

³ Bilang sabat kay Satanas, ginkutlo ni Jesus ang Deuteronomio 8:3 suno sa Griego nga Septuagint nga badbad sining Hebreo nga kasulatan. Ang Griegong tinaga nga ginbadbad “pinamulong” (rheʹma) may duha ka kahulugan. Kon kaisa ginabadbad ini nga “pulong,” “ekspresyon,” ukon “pinamulong.” Apang, kaangay sang iya Hebreo nga katumbas (da·varʹ), nagakahulugan man ini sing “butang.”

⁴ Sa Lucas 1:37 aton mabasa: “Kay sa Dios wala sing deklarasyon [rheʹma] nga indi mahimu.” Ang Lucas 2:15 mabasa: “Ang mga manugbantay sang karnero nagsinilingay: ‘Makadto kita karon sa Betlehem kag tan-awon naton ining butang [rheʹma] nga nahanabo, nga ginpahayag ni Jehova sa aton.’” Gani, labi na kon ginagamit may kaangtanan kay Jehova, ining Griegong tinaga nagapahangop sang “pulong,” “deklarasyon,” ukon “pinamulong” sang Dios. Ukon nagapahangop ini sang “butang,” nga nagapatuhoy sa isa ka “hitabo,” ukon “buhat” nga ginlaragway, ang resulta sang kon ano ang ginsiling, busa ang natuman nga pulong.

5. Ano ang kahulugan sang Lucas 1:37?

⁵ Nahangpan sing amo, ang Lucas 1:37 wala nagakahulugan nga ang Dios makasiling sing bisan ano lang. Mahimu matuod ina sa tawo, bisan pa ang ginsiling niya indi mahimu nga matabo ukon wala sing kahulugan. Apang nahanungod sa ginsiling sang Dios, ang kahulugan sang Lucas 1:37 amo nga wala sing pulong ukon deklarasyon ni Jehova ang indi matuman. Ang deklarasyon nga ginsiling sang anghel kay Maria gintuyo nga magaligad. Ang panghunahuna sa likod sang Hebreo kag Griego nga tinaga nga gingamit para sa “pulong,” “pinamulong,” “ekspresyon,” ukon “deklarasyon” ni Jehova matahom nga ginpabutyag sa tolon-an ni Isaias. Si Jehova nagasiling: “Kay subong sang ulan nga nagakahulog, kag sang nieve, gikan sa langit kag wala nagabalik didto, kundi nagatubig sang duta kag nagapabunga sini kag nagapasalingsing, kag nagahatag sing binhi sa manugsab-ug kag kalan-on sa manugkaon, mangin subong sini ang akon pulong [Hebreo, da·varʹ; Griego, rheʹma] nga nagaguwa sa akon baba. Indi magbalik ini sa akon sa wala sing pulos, kundi magatigayon ini sang akon nahamut-an, kag magauswag ini sa butang nga akon ginpadal-an sini.”—Isaias 55:10, 11.

“Indi Lamang sa Tinapay”

6, 7. Ano ang maragtason kag geograpiko nga kon­teks­to sang Deuteronomio 8:2, 3?

⁶ Karon, balik liwat sa punto, ano ang buot silingon ni Jesus sang, ginkutlo ang Deuteronomio 8:3, nagsiling sia “ang tawo mabuhi, indi lamang sa tinapay, kundi sa tagsa ka pinamulong nga nagaguwa sa baba ni Jehova”? (Mateo 4:4) Nagasiling bala sia nga ang diosnon nga tawo ginapabaskog paagi lamang sa mga pinamulong, mga pulong, ukon mga deklarasyon? Sampat na bala ang ihibalo sa ulo sa sinang balaan nga mga ekspresyon? Usisaon naton ang maragtason nga konteksto sang pulong nga ginkutlo ni Jesus gikan sa Deuteronomio.

⁷ Ang bulig sa pagtuon sang Biblia nga “All Scrip­ture Is Ins­pired of God and Be­ne­fi­cial” nagapahibalo sa aton, sa pahina 36: “Ang tolon-an sang Deuteronomio nagaunod sang dinamiko nga mensahe para sa katawhan ni Jehova. Sa tapos maglibotlibot sa kamingawan sa kap-atan ka tuig, ang mga anak sang Israel nagtindog karon sa talakdangan sang Duta nga Ginsaad.” 1473 B.C.E yadto nga tuig. Ang lugar? Ang kapatagan sang Moab. Sa iya ikaduha nga diskurso sa nagtilipon nga mga Israelinhon, si Moises nagsiling: “Dumdumon mo ang bug-os nga dalanon nga gintuytuyan sa imo ni Jehova nga imo Dios sa sining kap-atan ka tuig sa kamingawan, agod mapapaubos ka niya, sa pagtilaw sa imo sa pagkilala sang yara sa imo tagipusuon, kon bala bantayan mo ang iya mga sugo ukon indi. Kag ginpapaubos ka niya kag ginpagutoman ka kag ginpakaon ka sang manna, nga wala mo makilala ukon makilala sang imo mga ginikanan; agod nga mapakilala ka niya nga indi lamang sa tinapay nagakabuhi ang tawo kundi paagi sa tagsa ka pulong nga nagaguwa sa baba ni Jehova nagakabuhi ang tawo.”—Deuteronomio 8:2, 3.

8. Ano anay ang sitwasyon sang mga Israelinhon, kag ngaa ginpahanugotan ina ni Jehova?

⁸ Hunahunaa lamang! Linibo ka mga Israelinhon—tigulang kag bata, mga lalaki, mga babayi, kag mga kabataan—nga nagpanlakatan sa sulod sang 40 ka malawig nga tuig sa “daku kag makakulugmat nga kamingawan, diin may mga man-ug nga dalitan kag mga iwiiwi kag duta nga kigas nga walay tubig.” (Deuteronomio 8:15) Kinahanglan nila ang tubig nga mainom kag kalan-on nga makaon. Si Jehova, kon kaisa, nagpahanugot sa ila nga mauhaw ukon magutom. Ngaa? Agod ipatudok sa ila mga painoino nga “indi lamang paagi sa tinapay nagakabuhi ang tawo kundi paagi sa tagsa ka pulong nga nagaguwa sa baba ni Jehova.”

9. Paano ginpun-an sang mga pinamulong ni Jehova ang mga kinahanglanon sang mga Israelinhon?

⁹ Ano ang kaangtanan sa ulot sang mga kinahanglanon sang mga Israelinhon kag sang mga pulong, ukon mga pinamulong, nga nagaguwa gikan sa baba ni Jehova? Bueno, anong pisikal nga mga butang ang nahanabo sa mga Israelinhon subong resulta sang mga pinamulong ni Jehova? Si Moises nagsiling: “Ang imo panapton wala maglapat sa imo, ukon nagbanog ang imo tiil sining kap-atan ka tuig. . . . [Si Jehova] nagpatubod sing tubig gikan sa bato nga santikan; [kag sia] nga sa kamingawan nagpakaon sa imo sang manna.” (Deuteronomio 8:4, 15, 16) Ang kaangtanan amo ini: Wala kuntani mabaton sang mga Israelinhon ining mga butang kon si Jehova wala magsugo sini nga mahanabo. Sa amo, ang mga Israelinhon literal nga nagkabuhi sa “tagsa ka pulong [ukon, mando] sang baba ni Jehova.”

Ginpabaskog sang mga Pinamulong ni Jehova

10, 11. Sa anong iban pa nga mga paagi ang mga Israelinhon ginpabaskog sang mga pinamulong ni Jehova?

¹⁰ Luwas sa pagdepende kay Jehova sa sinang materyal nga mga kaayohan subong sang kalan-on, tubig kag panapton, paano pa ginpabaskog ang mga Israelinhon sang mga pinamulong ni Jehova? Yara man ang espirituwal nga mga kaayohan. Ginsilingan ni Moises ang mga Israelinhon nga ginpahanugot ni Jehova nga maagihan nila ining mga eksperiensia sa desyerto ‘agod papaubson sila, agod tilawan sila sa paghibalo kon ano ang yara sa ila tagipusuon, kon bala bantayan niya ang iya mga sugo ukon indi.’ Nagdugang sia: “Nahibaloan mo gid sa imo tagipusuon nga subong nga ang tawo nagatadlong sa iya anak, si Jehova nga imo Dios nagatadlong sa imo . . . sa paghimu sa imo sing maayo sa kaulihian mo.”—Deuteronomio 8:2, 5, 16.

¹¹ Huo, kon ginhimuslan sing bug-os sang mga Israelinhon ang ila mga inagihan sa kamingawan, naton-an nila kuntani nga ‘mabuhi sa tagsa ka pulong sang baba ni Jehova,’ indi lamang paagi sa pagtuon nga tumanon ang iya nasulat nga mga sugo kundi aktuwal nga maagihan ang mga resulta sang mga pinamulong ni Jehova sa ila kabuhi subong isa ka pungsod ukon sa ila indibiduwal nga pagkabuhi. Ginhatagan sila sing nagakaigo nga kahigayunan nga “tilawan kag tan-awon nga si Jehova maayo.” (Salmo 34:8) Ining makapalig-on nga mga eksperiensia may kahilabtanan sa pulong ni Jehova—nga ginhambal kag natuman—dapat kuntani nagpabaskog sa ila sa espirituwal.

12, 13. Paano ginpamilyar ni Josue sa iya kaugalingon ang mga pinamulong ni Jehova, kag sa ano sia nagapanaksi?

¹² Si Josue, nga nagbulos kay Moises subong pangulo sang Israel, nagpahibalo sa iya kaugalingon sang mga pinamulong ni Jehova paagi sa pagpuno sang iya hunahuna sini. Ang iya pagtuo napabakod paagi sa pagtan-aw sa katumanan nila. Sang mapatay si Moises, si Jehova nagsiling kay Josue: “Ining tolon-an sang kasugoan indi magbulag sa imo baba, kundi magpamalandong ka sa iya sa adlaw kag gab-i, agod nga makabantay ka sa paghimu suno sa tanan nga nasulat sa sini; kag nian mahimu mo ang imo dalanon nga madinalag-on kag nian magapanghikot ka sing maalamon.”—Josue 1:8.

¹³ Sang talipusposan sang iya kabuhi, sa tapos matuman sing matinumanon ang pulong ni Jehova kag makita ang mga katumanan sa katawhan ni Jehova, si Josue nakapamatuod: “Gani ginhatag ni Jehova sa Israel ang bug-os nga duta nga ginsumpa niya nga ihatag sa ila mga ginikanan, kag ginpanag-iyahan nila ini kag nagpuyo didto. Dugang pa, si Jehova naghatag sa ila sing kapahuwayan sa palibot, suno sa tanan nga ginsumpa niya sa ila mga ginikanan, kag wala sing tawo sang tanan nila nga kaaway nga nagtindog batok sa ila. Gintugyan ni Jehova sa ila mga kamut ang tanan nga kaaway nila. Walay bisan ano nga saad [Hebreo, da·varʹ; Griego, rheʹma] nga nakulang sa bisan anong maayong panaad nga napamulong ni Jehova sa balay sang Israel; nahanabo ang tanan.” (Josue 21:43-45) Si Josue nagkabuhi sa pagkamatuod kag ginpabaskog, indi sang literal nga tinapay lamang, “kundi sang tagsa ka pinamulong nga nagaguwa sa baba ni Jehova.”—Mateo 4:4.

Pagkabuhi Karon Paagi sa mga Pinamulong ni Jehova

14. Paagi sa pag-usisa sing dugang pa sa Mateo 4:4, ano ang mahangpan naton sing mas maayo pa nahanungod sa kon ano ang buot silingon ni Jesus? (b) Ano ang nagpabakod sa mainapresyahon nga mga Israelinhon?

¹⁴ Sa tapos mausisa sing dugang pa ang mga pulong nga ginkutlo ni Jesus bilang sabat sa pagsulay sang Yawa, nahangpan naton sing maathag pa kon ano ang buot silingon ni Jesus. Ang maragtason kag geograpiko nga konteksto sang kasaysayan ni Moises, nga ginkutlo ni Jesus, nagapakita nga ang mga pinamulong ni Jehova nga paagi sa amo ang diosnon nga mga lalaki kag mga babayi dapat magkabuhi indi lamang mga pulong nga naton-an paagi sa memorya lamang. Para sa sadtong mga Israelinhon, ang “tagsa ka pulong sang baba ni Jehova” gin-angot sa manna, sa tubig, kag sa panapton nga wala nagadaan. Huo, ang mga pinamulong nagalakip sang ila katumanan, sang makatilingala nga mga butang nga ginhimu ni Jehova para sa iya katawhan. Ang ila pag-eksperiensia sining mga butang, bilang katumanan sang mga pinamulong ni Jehova, ang nagpabakod sa mainapresyahon nga mga Israelinhon.

15. Sa ano kita ginapabaskog sang mga pinamulong ni Jehova?

¹⁵ Sing kaanggid man karon, indi lamang ang pagbasa kag pagtuon sa pinamulong ni Jehova ang nagapabaskog sa katawhan ni Jehova, subong nga kinahanglanon man ini. Kundi amo ang pag-eksperiensia, sing tingob kag sing indibiduwal, sang makatilingala nga paagi diin nagapakig-angot si Jehova upod sa aton kag nagapanghikot upod sa aton. Kon labi nga nabalaka kita sa mga pagpakig-angot ni Jehova sa aton, labi pa nga inang natuman nga mga pinamulong magapabaskog sa aton, nagapabakod sang aton pagtuo, sang aton espirituwalidad.

16. (a) Sa ano nabalaka ang salmista? (b) Paano man naton ini himuon, kag paano ini magabulig sa aton?

¹⁶ Ang salmista nagsulat: “Dumdumon ko ang mga binuhatan ni Jah; kay dumdumon ko ang imo katingalahan nga ginhimu nga dumaan. Kag pamalandungan ko man ang tanan mong aktibidad, kag painoinohon ko ang imo hinimoan.” (Salmo 77:11, 12) Kon ginakabalak-an naton ang mga binuhatan, mga ginhimu, mga aktibidad, kag mga hinimoan ni Jehova tungod sa iya katawhan, nakahibalo nga sila pisikal nga ekspresyon sang iya mga pinamulong, ining balaan nga aman mangin kaangay sang espirituwal nga tinapay para sa aton. Magapapalapit pa gid ini sa aton sing personal kay Jehova. Mangin kaangay kita kay Jesus. Wala niya paghimoa ang mga bato nga mangin mga tinapay sa hingyu sang Yawa. Atipanon man naton nga indi pagpahanugotan ang materyal nga mga butang ukon indi nagakaigo nga pagkabalaka sa materyal nga kinahanglanon nga magapahulog sa aton sa siod sang Yawa kag sikwayon ang pagsimba kay Jehova.

17. Sa anong paagi nga si Jesus isa ka matahom nga halimbawa?

¹⁷ Si Jesus nagsiling: “Ang akon kalan-on amo ang paghimu sang kabubut-on niya nga nagpadala sa akon kag sa pagtapos sang iya hilikuton.” (Juan 4:34) Isa sia ka matahom nga halimbawa, nagapakita sa aton sang praktikal nga paagi nga “ang tawo mabuhi, indi lamang sa tinapay, kundi sa tagsa ka pinamulong nga nagaguwa sa baba ni Jehova.”—Mateo 4:4.

Nagahulat sing Dugang nga mga Instruksion

18. Anong balaan nga pinamulong ang nagakatuman karon?

¹⁸ Si Jehova, paagi sa iya Anak, nagsiling nga “ining maayong balita sang ginharian ibantala sa bug-os napuy-an nga duta” antes magakari ang katapusan. (Mateo 24:14) Inang balaan nga pinamulong isa ka dalanon sang katumanan subong resulta sang bug-os kalibutan nga pagbantala sang mga Saksi ni Jehova. ‘Nagakabuhi’ ka bala sa sinang pinamulong sa baba ni Jehova paagi sa pagpakigbahin sing bug-os sa hilikuton nga pagbantala kag sa amo nagabaton sing espirituwal nga pagpabaskog bangod ginahimu mo ang iya kabubut-on?

19, 20. Anong iban pa nga balaan nga pinamulong ang mahanabo sing makakulonyag sa dili madugay?

¹⁹ Ang iban pa nga mga pinamulong ni Jehova magapahanabo sang makagalanyat nga mga hitabo sa malapit nga palaabuton. Ang “napulo ka sungay” kag “sapat nga mapintas” magabalikid sa “bigaon,” ang Babilonia nga Daku. Huo, ang paglaglag sa sinang tugob kalibutan nga emperyo sang butig nga relihion sang batok sa relihion nga mga elemento sa sulod sang Nasyones Unidas mangin talalupangdon nga aksion nga nagaresulta gikan sa katumanan sang isa sa mga pinamulong ni Jehova.—Bugna 17:16, 17.

²⁰ Ang isa pa ka talalupangdon nga balaan nga pinamulong matuman kon si Jehova malaragwayon nga magabutang sing “kaw-it” sa sulang ni Gog, ukon ni Satanas, nagahangkat sa iya kag sa iya “puersa militar” nga salakayon ang Iya katawhan sa duta. (Ezequiel 38:2-4, 8-12) Apang ang isa pa ka balaan nga pinamulong magapahanabo sang pagkalaglag sang mga kabon ni Gog. (Ezequiel 39:1-6)a Magakahulugan ini sang “inaway sang dakung adlaw sang Dios nga Labing Gamhanan” sa Har–Magedon. (Bugna 16:14, 16; 19:11-21) Daw ano ka makalilipay para sa matutom nga mga katawhan ni Jehova nga makita ang katumanan sining balaan nga mga pinamulong kag, sa tunga sang inaway, mabatian sing malaragwayon ining dugang nga mga pinamulong: “Pahimunong kamo kag tan-awa ang pagluwas ni Jehova sa inyo.”—2 Cronica 20:17.

21. Anong mga hitabo ang pahanabuon sang katumanan sang mga pinamulong ni Jehova?

²¹ Nian, nagatuman sang isa pa ka balaan nga pinamulong, si Cristo magagapos kay Satanas kag sa iya mga demonyo kag magatagbong sa ila sa kadadalman sa “isa ka libo ka tuig.” (Bugna 20:1-3) Inang isa ka libo ka tuig magapahanugot nga matuman ang iban pa nga pinamulong ni Jehova, lakip ang pagbanhaw sa minatay kag “pagbulong sa mga pungsod,” sa matinumanon nga katawhan. (Bugna 20:11-15; 22:1, 2) Sa sulod sining isa ka libo ka tuig nga panag-on sang paghukom, si Jehova maathag nga magahatag sing dugang nga mga instruksion, nga wala karon naton mahibaloi pa, samtang ang bag-ong “mga linukot” ginabuksan. (Bugna 20:12) Daw ano ka makatilingala para sa mga nakalampuwas sa “dakung kapipit-an” kag sa ginbanhaw nga minatay nga matigayon ang instruksion kag panuytoy para sa sining dugang pa nga mga instruksion nga ginpahamtang sa wala pa mabuksi nga “mga linukot” ni Jehova kag tumanon ini sing makalilipay!

22. Ano ang ginapalig-on sa aton nga himuon karon?

²² Paagi sa sinang makatilingala nga palaabuton sa atubangan naton, kabay nga himuslan naton sing bug-os ang kahigayunan nga hibaluon katon ang mga pinamulong ni Jehova kag ton-an sing tudok sing personal ang iya Pulong kag pakigbahinan ang pagbantala nga hilikuton nga may dugang pa nga pagkabalaka sa mga binuhatan ni Jehova tungod sa aton.

[Footnote]

Madumduman Mo Bala?

◻ Paano naton-an sang mga Israelinhon nga magkabuhi “paagi sa tagsa ka pulong sang baba ni Jehova”?

◻ Paano ang mga Israelinhon nagakaon sing espirituwal sa mga pinamulong ni Jehova?

◻ Paano kita karon magakabuhi paagi sa mga pinamulong ni Jehova?

◻ Anong mga pinamulong ni Jehova ang matuman pa?

[Laragway sa pahina 14]

Ano ang kahulugan sa imo sang sabat ni Jesus sa pagsulay ni Satanas?

[Laragway sa pahina 16]

Ang pagkabuhi sang mga Israelinhon sa “tagsa ka pulong sang baba ni Jehova” may direkta nga mga kaayohan sa lawas