Kahulugan sang Balita

Ginakinahanglan sang mga Ospital ang mga Saksi

Ginabalita sang prensa nga ang pila ka mga ospital sa California aktibo nga nagakinahanglan karon sang mga Saksi ni Jehova subong mga pasyente. Ang iban nga mga ospital natahap sa pag-opera sa mga Saksi bangod wala sila nagapatughong sang dugo tungod sa relihioso nga rason. Ngaa nagbag-o ang panimuot? Sanglit may problema sa ekonomiya sa industriya sang mediko, ang mga administrador nagapangita sing dugang pa nga makuartahan. Ang isa ka rason ginhatag. “Ang sining ulihi lang nga pag-uswag sa mediko nga nagahimu sing wala sing dugo nga pagbusbos—ang termino nga ginagamit sa operasyon diin wala sing pagtughong sang dugo ukon sing mga bahin sang dugo—nga mas indi makatalagam naghimu man sa mga ospital kag mga doktor nga nadalahig nga labi pa nga mangin handa sa pag-opera sa mga Saksi,” report sang Dai­ly News sang Van Nuys, California. “Ang kalabanan nga paagi sa pagbusbos sarang mahimu nga wala nagagamit sang dugo kon ikaw tuman ka mainandamon kag mapailubon sa pasyente,” siling sang heneral nga manugbusbos nga si Dr. Shel­don N. Lip­shutz.

Bisan pa nga ang mga Saksi ni Jehova nagabaton sing indi dugo nga mga tal-us, subong sang sa­line so­lu­tions, nagadumili sila sa ‘pagsikway sang ila pagtuo kag sang maayong konsiensia’ bangod sang medikal nga mga buhat nga indi makasulatanhon. (1 Timoteo 1:19; Binuhatan 15:20) Nasapwan nila nga ang pagtuman sa mga kasugoan sang Dios maayo man sa mediko. “Sang nagligad nga napulog-lima ukon 20 ka tuig, indi ko luyag ang (mga Saksi) sa akon ospital,” siling sang isa ka administrador sa Dai­ly News. “Karon tuman kadamu ang kaso sa AIDS kag hep­a­ti­tis nga nagalapnag paagi sa pagtughong indi na pagpamangkuton pa ang kaluyag sa naandan na nga pagtughong sang dugo. Ang pagtamod sang mga Saksi ni Jehova nagahatag sing dugang nga kahulugan.”

Pagtuon sa Paghimu sing Maayo

Ngaa ginbutang sa katalagman sang pila sa Nazi Germany ang ila kabuhi agod luwason ukon buligan ang mga tawo nga yara sa katalagman sang paghingabot ukon kamatayon samtang ang iban nga makabulig kuntani naghimu sing lain? Si Dr. Samuel Oliner, isa ka sosyologo sa Hum­boldt ­State University sa Arcata, California, kaupod sang iya mga kaupdanan, nagapanikasog sa pagtukib. Ang The New York ­Times nagareport, nga ang ila mga natukiban “natingob sa impormatibo nga mga eksperiensia sang mga tawo sang pagkabata, nga naghimu sa ila, madamung tinuig sang ulihi, nga mas labi pa nga natiklod sang sa iban nga buligan ang mga nasit-an.”

Ang nagaugyon amo si Ervin ­Staub, isa ka sikologo sa University of Massachusetts. “Ang mga ginikanan nga nagapaliton sing dimakagud nga pagtahod sa ukon debosyon sa kaayohan sang iban (altruismo) sing mas epektibo,” siling ni Dr. ­Staub, “nagakontrol sing malig-on sang ila kabataan. Bisan pa nga sila matinatapon, indi sila matinuguton. Ginagamit nila ang kombinasyon sang pagkalig-on, pagkainit kag pagpangatarungan. Ginapakita nila sa kabataan ang mga resulta sa iban sang indi maayo nga pamatasan—kag sang maayo nga pamatasan. Kag aktibo nila nga ginatuytuyan ang mga kabataan nga maghimu sing maayo, nga makig-ambit, nga magmabuligon.”

Indi katingalahan, nian, nga ang mga ginikanan ginsugo nga pada­kuon ang ila mga kabataan sa ­“disiplina kag painoino ni Jehova” bangod “sia nga nagahimu sing maayo naghalin sa Dios.”—Efeso 6:4; 3 Juan 11.