Mga Lalaki nga “May Balatyagon Kaangay Naton”
ISA anay sia ka hari kag manalagna apang isa man ka mahigugmaon nga amay. Ang isa sang iya mga anak nga lalaki nangin malaut kag bugalon. Sa daku nga pagtinguha nga agawon ang trono, ini nga anak naglansar sing isa ka inaway sibil, sa tuyo nga mapatay ang iya amay. Apang sa inaway nga natabo, ang anak nga lalaki amo ang napatay. Sang mabalitaan sang amay nga napatay ang iya anak, nagsaka sia sa hulot sa ibabaw sang gawang kag naghibi: “Absalom anak ko, anak ko, Absalom anak ko! O maayo pa nga ako na lang ang napatay, Absalom anak ko, anak ko!” (2 Samuel 18:33) Ang amay amo si Hari David. Kaangay sa iban pa nga mga manalagna ni Jehova, sia “isa ka lalaki nga may balatyagon kaangay naton.”—Santiago 5:17.
Sang panahon sang Biblia ang mga lalaki kag babayi nga naghambal para kay Jehova mga ordinaryo nga mga tawo. Kaangay naton, may mga problema sila kag nag-antos bangod sa pagkadihimpit. Sin-o ang pila sining mga manalagna, kag paano nga ang ila balatyagon kaangay naton?
Si Moises Gikan sa Sobra nga Pagsalig sa Kaugalingon Padulong sa Pagkahagop
Ang isa ka bantog nga manalagna antes sang Cristianong panahon amo si Moises. Apang, bisan 40-anyos na sia, indi pa sia handa sa pag-alagad subong humalambal ni Jehova. Ngaa? Samtang ginapigos sang Paraon sang Egipto ang iya mga kauturan, si Moises ginpadaku sa panimalay ni Paraon kag “gamhanan sia sa iya mga pulong kag mga buhat.” Ginasugid sa aton sang rekord: “Naghunahuna sia nga mahangpan sang iya mga kauturan nga ang Dios nagahatag sa ila sing kaluwasan paagi sa iya kamot.” Sa sobra nga pagsalig sa kaugalingon, padasudaso nga ginpangapinan niya ang isa ka Hebreo nga ulipon, kag napatay niya ang isa ka Egiptohanon.—Binuhatan 7:22-25; Exodo 2:11-14.
Napilitan si Moises nga magpalagyo, kag apat ka dekada nga nagpuyo sia sa malayo nga duog sang Midian subong manugbantay sing mga karnero. (Exodo 2:15) Sang ulihi, sa edad nga 80 anyos, gintangduan ni Jehova si Moises subong isa ka manalagna. Apang nadulaan na sing pagsalig si Moises sa iya kaugalingon. Nagbatyag sia nga indi gid sia kalipikado amo nga ginduhaduhaan niya ang pagtangdo sa iya ni Jehova subong isa ka manalagna, nga nagasiling, “Sin-o bala ako nga magkadto ako kay Paraon?” kag, “Ano ang akon isiling?” (Exodo 3:11, 13) Paagi sa mahigugmaon nga pasalig kag bulig ni Jehova, madinalag-on gid nga ginhimo ni Moises ang iya komisyon.
Kaangay ni Moises, gintugutan mo bala ang sobra nga pagsalig sa kaugalingon nga magdul-ong sa imo sa paghimo ukon sa paghambal sing mga butang nga indi maalamon? Kon amo, batuna sing mapainubuson ang dugang pa nga paghanas. Ukon nagbatyag ka bala nga indi kalipikado sa paghimo sing pila ka Cristianong mga responsabilidad? Sa baylo nga magbalibad, batuna ang bulig nga ginatanyag ni Jehova kag sang iya organisasyon. Ang Isa nga nagbulig kay Moises makabulig man sa imo.
Si Elias May mga Balatyagon Kaangay Naton kon Nagapadapat sing Disiplina
“Si Elias isa ka lalaki nga may balatyagon kaangay naton, apang nangamuyo sia nga indi mag-ulan; kag wala sing nagtupa nga ulan sa duta sa sulod sang tatlo ka tuig kag anom ka bulan.” (Santiago 5:17) Ang pangamuyo ni Elias nahisuno sa katuyuan ni Jehova nga disiplinahon ang isa ka pungsod nga nagtalikod sa Iya. Apang, nahibaluan ni Elias nga ang tigpalamangag nga iya ginpangamuyo magapaantos sa mga tawo. Sa kabilugan, ang Israel nagadepende sa agrikultura; ang tun-og kag ulan amo ang kabuhi sang mga tawo. Ang malawig nga tigpalamangag magatuga sing daku nga pag-antos. Malayong ang mga gamhon; mahalitan ang mga talamnunon. Ang mahagop nga mga sapat nga ginagamit sa trabaho kag ginakaon mapatay, kag ang pila ka pamilya mahimo nga magutman. Sin-o ang labi nga magaantos? Ang kinaandan nga mga tawo. Sang ulihi ginsilingan sang isa ka balo si Elias nga isa ka hakop na lamang nga harina kag diutay nga mantika ang nabilin sa iya. Ginpaabot gid niya nga sa indi madugay sila sang iya anak nga lalaki mapatay sa gutom. (1 Hari 17:12) Agod mapangamuyo ini ni Elias, dapat nga may malig-on sia nga pagtuo nga atipanon ni Jehova ang Iya mga alagad—manggaranon man ukon imol—nga wala magbiya sa matuod nga pagsimba. Subong sang ginapakita sang rekord, wala mapaslawi si Elias.—1 Hari 17:13-16; 18:3-5.
Tatlo ka tuig sang ulihi, sang ginpatalupangod ni Jehova nga magapatupa sia sing ulan sa indi madugay, ang hanuot nga handum ni Elias nga makita nga matapos na ang tigpalamangag makit-an sa iya sulitsulit, hanuot nga mga pangamuyo samtang ‘nagadungok sia sa duta kag ginabutang ang iya nawong sa ulot sang iya mga tuhod.’ (1 Hari 18:42) Sing sulitsulit, ginsugo niya ang iya alagad: “Taklad ka, palihug. Tulok nayon sa lawod” para sa pila ka tanda nga ginpamatian ni Jehova ang iya mga pangamuyo. (1 Hari 18:43) Daw ano ang iya kalipay nga sang ulihi, subong sabat sa iya mga pangamuyo, “ang langit naghatag sing ulan, kag ang duta nagpatubas sang iya mga bunga”!—Santiago 5:18.
Kon isa ikaw ka ginikanan ukon isa ka gulang sa Cristianong kongregasyon, mahimo nga pakigbatuan mo ang hanuot nga mga balatyagon kon ikaw nagasaway. Apang, inang tawhanon nga mga balatyagon dapat kontrolon nga nagapati nga kon kaisa ginakinahanglan ang pagdisiplina kag kon ginapadapat ini nga may paghigugma, ‘magapatubas ini sing mahidaiton nga bunga, nga amo, ang pagkamatarong.’ (Hebreo 12:11) Ang mga resulta sa pagtuman sa mga kasuguan ni Jehova masami nga kalahamut-an. Kaangay ni Elias, tinagipusuon naton nga ginapangamuyo nga matuman ini.
Si Jeremias Nagpakita sing Kaisog Walay Sapayan sing Pagluya sang Buot
Sa tanan nga manunulat sang Biblia, ayhan si Jeremias amo ang may pinakamadamo nga ginsulat tuhoy sa iya mga ginbatyag. Subong pamatan-on nga lalaki, nangalag-ag sia nga batunon ang iya komisyon. (Jeremias 1:6) Apang maisugon nga ginpahayag niya ang pulong sang Dios, nga mabaskog nga ginpamatukan sang pareho niya nga mga Israelinhon—halin sa hari tubtob sa ordinaryo nga tawo. Ini nga mga pagpamatok nagpaakig kag nagpahibi sa iya kon kaisa. (Jeremias 9:3; 18:20-23; 20:7-18) Sa lainlain nga okasyon gingubat sia sang akig nga hubon, ginbunal, gingapos sa pandog, ginbilanggo, ginpahog nga patyon, kag ginhulog agod mapatay sa lunangon nga buho. Kon kaisa bisan ang mensahe ni Jehova nagapasubo kay Jeremias, subong ginailustrar sang iya mga tinaga: “Ang kasakit ko, ang kasakit ko! Nagakasakit ako sing tuman sa akon gid tagipusuon.”—Jeremias 4:19.
Walay sapayan, ginhigugma niya ang pulong ni Jehova, nga nagasiling: “Ang imo pulong nangin kalipay sa akon kag kasadya sa akon tagipusuon.” (Jeremias 15:16) Sa amo man nga tion, ang kabang-awan nagdul-ong sa iya nga magtuaw kay Jehova: “Matuod gid nga daw nangin malimbungon ikaw sa akon, kaangay sang tubig nga indi masaligan,” kaangay sang sapa nga madali nga nagakahubas. (Jeremias 15:18) Apang, nahangpan ni Jehova ang iya nagasumpakilay nga mga nabatyagan kag padayon nga ginsakdag sia agod matuman niya ang iya komisyon.—Jeremias 15:20; tan-awa man ang 20:7-9.
Ikaw bala, kaangay ni Jeremias, nagaatubang man sing kapaslawan ukon pagpamatok sa paghimo sang imo ministeryo? Magdangop kay Jehova. Sunda ang iya panuytoy sing padayon, kag padyaan man ni Jehova ang imo mga panikasog.
Si Jesus May mga Balatyagon Kaangay Naton
Ang pinakabantog nga manalagna sa tanan nga tion amo mismo ang Anak sang Dios, si Jesucristo. Walay sapayan nga himpit sia nga tawo, wala niya ginhinago ang iya mga nabatyagan. Masami naton mabasahan ang tuhoy sa iya nasulod nga mga balatyagon, nga mahimo nga makit-an sa iya nawong kag sa iya reaksion sa iban. Si Jesus pirme ‘ginpahulag sing kaluoy,’ kag gingamit niya ini man nga ekspresyon sa paglaragway sa mga katawhan sa iya mga ilustrasyon.—Marcos 1:41; 6:34; Lucas 10:33.
Mahimo nga nagtaas ang iya tingog sang gintabog niya ang mga manugbaligya kag ang mga sapat sa templo nga nagasiling: “Kuhaa ninyo ining mga butang diri!” (Juan 2:14-16) Ang panugda ni Pedro nga, “Mangin mainayuhon ka sa imo kaugalingon, Ginuo,” mabaskog nga ginsabat, “Palayo ka sa akon Satanas!”—Mateo 16:22, 23.
Pinasahi nga ginpalangga ni Jesus ang pila nga nangin suod gid sa iya. Si apostol Juan ginlaragway subong ang “disipulo nga ginhigugma ni Jesus.” (Juan 21:7, 20) Kag mabasa naton: “Ginhigugma ni Jesus si Marta kag ang iya utod nga babayi kag si Lazaro.”—Juan 11:5.
Mahimo nga nagsakit man ang balatyagon ni Jesus. Bangod sang kasubo sa kamatayon ni Lazaro, “si Jesus naghibi.” (Juan 11:32-36) Ginpabutyag ang kalain sang iya buot bangod sang pagluib sa iya ni Judas Iscariote, ginkutlo ni Jesus ang isa ka makatalandog nga pinamulong gikan sa mga Salmo: “Ang nagasalo anay sa akon tinapay nagbayaw sang iya tikod batok sa akon.”—Juan 13:18; Salmo 41:9.
Bisan sang nagaantos sing tuman nga kasakit sa usok, ginpakita ni Jesus ang iya hanuot nga balatyagon. Malulo nga gintugyan niya ang iya iloy sa “ginhigugma gid niya nga disipulo.” (Juan 19:26, 27) Sang makita niya ang paghinulsol sang isa sa mga malauton sa tupad niya, si Jesus maawaon nga nagsiling: “Mangin kaupod ko ikaw sa Paraiso.” (Lucas 23:43) Mabatyagan naton ang mabaskog nga emosyon sa iya pagsinggit: “Dios ko, Dios ko, ngaa ginpatumbayaan mo ako?” (Mateo 27:46) Kag ang iya nagatagumatayon nga mga pinamulong nagpakita sing tinagipusuon nga gugma kag pagsalig: “Amay, sa imo mga kamot ginatugyan ko ang akon espiritu.”—Lucas 23:46.
Daw ano nga pasalig ang ginahatag sining tanan sa aton! “Kay may yara kita mataas nga saserdote, indi ang isa nga indi mahanuklog sa aton mga kaluyahon, kundi isa nga natilawan na sa tanan nga butang kaangay naton, apang wala sing sala.”—Hebreo 4:15.
Ang Pagsalig ni Jehova
Wala gid maghinulsol si Jehova sa iya ginpili nga mga humalambal. Nahibaluan niya ang ila pagkamainunungon sa iya, kag maawaon nga ginkalimtan niya ang mga kaluyahon sang mga dihimpit. Apang ginpaabot niya nga tumanon nila ang ila komisyon. Paagi sa iya bulig nahimo nila ini.
Mapailubon nga ipakita naton ang aton pagsalig sa aton mainunungon nga mga kauturan nga lalaki kag babayi. Magapabilin sila nga dihimpit subong nga kita man dihimpit sa sining sistema sang mga butang. Apang, indi naton pagtamdon ang aton mga kauturan nga indi takus sang aton gugma kag igtalupangod. Si Pablo nagsulat: “Subong man, kita nga mabakod dapat magdala sa mga kaluyahon sang mga maluya, kag indi magpahamuot sa aton kaugalingon.”—Roma 15:1; Colosas 3:13, 14.
Nabatyagan sang mga manalagna ni Jehova ang tanan naton nga nabatyagan. Walay sapayan, nagsalig sila kay Jehova, kag ginbuligan sila ni Jehova. Labaw sa sina, ginhatagan sila ni Jehova sing rason nga magkalipay—isa ka maayo nga konsiensia, pagtigayon sang iya kahamuot, mainunungon nga mga kaupdanan nga nagbulig sa ila, kag ang pasalig tuhoy sa isa ka malipayon nga palaabuton. (Hebreo 12:1-3) Magmainunungon man kita kay Jehova nga may bug-os nga pagsalig samtang ginailog naton ang pagtuo sang dumaan nga mga manalagna, mga lalaki nga “may balatyagon kaangay naton.”