Dili Kamo Magpaguta Upod sa mga Ditumuluo

“Dili kamo magpaguta sing indi timbang upod sa mga ditumuluo. Kay ano bala ang kalabtanan sang tumuluo sa ditumuluo?‘​—⁠2 CORINTO 6:​14, 15.

1. Ngaa nakapamana ang isa ka utod nga babayi sing ditumuluo?

NAPATAY ang bana sang isa sang mga Saksi ni Jehova sa tungatunga nayon sang nakatundan sang Estados Unidos bangod sang aksidente sa awto sang nagligad nga pila ka tuig. “Daku gid ang kasubo ko sang primero,” siling niya, “apang namat-od ako nga indi ini pagtugutan sa pagsablag sa akon pag-alagad kay Jehova. Apang, pagligad sang pila ka tuig, daw nangin subong ako sa ikalima nga ruyda sa palibot sang mga mag-asawa sa kongregasyon. Pirme lang nga wala kami ginaagda sang akon anak nga babayi sa mga pagpamasyar sang mga pamilya. Sang matalupangdan ko ang Cristianong mga mag-asawa nga nagapakita sing gugma sa isa kag isa, nagdaku pa ang pagbatyag nga wala ako ginasapak. Daw wala sing bisan sin-o nga nakamatikod nga nagaluya ako sa espirituwal. Gani sang ginpangabay ako sang isa ka kalibutanon nga lalaki nga kilala ko sa trabaho nga magkaon sa guwa, nag-upod ako. Antes ko marealisar ini, naghigugma ako sa iya. Sang ulihi, nagluya gid ako kag nalandas sang akon kasubo nga nagsugot ako sa pagpamana sa iya.”

2. Ngaa kinaugali ang handum nga magminyo, kag gindesinyo ang pag-asawahay sa pagporma sing ano?

² Huo, ang paghandom sing kaupod sa kabuhi mahimo nga mabaskog gid, kag kinaugali man ini. Subong ginsiling ni Jehova mismo: “Indi maayo nga ang tawo mag-isa lamang. Himuan ko sia sing kabulig, subong komplemento [“paris,” butang nga bagay sa iya] niya.” (Genesis 2:​18, New World Translation Reference Bible, footnote) Ang pag-asawahay gindesinyo sa pagporma sing isa ka suod kag permanente nga paghiusa sang lalaki kag babayi. Indi si Adan kundi si Jehova ang nagsiling: “Bayaan sang lalaki ang iya amay kag ang iya iloy kag magahiusa sa iya asawa kag mangin isa sila ka unod.” (Genesis 2:​22-24; ipaanggid ang Mateo 19:​4-6.) Mahimo nga ang imo tagipusuon nagakalangkag sa sina nga paris.

3, 4. (a) Paano ang Biblia nagapaandam batok sa pagporma sing suod nga relasyon sa mga ditumuluo? (b) Sa anong paagi ang laygay ni Pablo nahanungod sa indi timbang nga pagpaguta naaplikar sa pag-asawahay? (c) Paano nahangpan sang taga-Corinto nga mga Cristiano ang termino nga “mga ditumuluo”? (Tan-awa ang footnote.)

³ Apang, nagapaandam ang Biblia batok sa pagpatubo sing pagkasuod sa mga ditumuluo. Si apostol Pablo nagsiling: “Dili kamo magpaguta sing linibagon [“Dili kamo magbuylog sa indi timbang nga grupo,” The Jerusalem Bible] upod sa mga ditumuluo.⁠a Kay ano bala ang kalabtanan sang tumuluo sa ditumuluo.”⁠b (2 Corinto 6:​14, 15) Mahimo nga ginahunahuna ni Pablo ang pagdumili sang Mosaikong Kasuguan sa pagguta sa baka kag asno para sa pag-arado. (Deuteronomio 22:10) Mas gamay ang asno kag indi subong kabaskog kag gani mabudlayan ini sa sinang indi timbang nga pagguta. Sanglit ang pag-asawahay subong guta nga nagatingob sa bana kag asawa, ang pagminyo sang isa ka Cristiano sing ditumuluo magaresulta sa indi timbang nga pagguta. (Mateo 19:6) Ina nga guta masami nga nagadala sing dugang pa nga pag-ipit kag kahuol sa pag-asawahay.​—⁠Ipaanggid ang 1 Corinto 7:⁠28.

⁴ Apang, subong sang ginapakita sang eksperiensia kaina, ang iban nga mga Cristiano namat-od sa pagminyo sing ditumuluo. Ngaa nabudlayan ang iban sa pagminyo “lamang sa Ginuo”?​—⁠1 Corinto 7:⁠39.

Kon Ngaa Nagapangita ang Iban sa Guwa

5. Iilustrar kon ngaa ang iban nagakaluyag sa ditumuluo.

⁵ Indi buot silingon nga ginasikway nila sing hungod ang laygay sang Dios. Binagbinaga ang kahimtangan sang isa ka Cristianong babayi nga luyag makapamana. Mahimo nga nagakalangkag sia sa isa ka Cristianong bana, apang daw kulang ang soltero nga mga utod nga lalaki sa tunga sang iya tumuluo nga mga abyan. Nagakabalaka sia sa iya edad. Mahimo luyag niya magpamilya. Ang kahadlok nga magatigulang sia nga isahanon kag ang kinahanglanon nga higugmaon sia mahimo nga magapaluya sa iya. Gani, kon may kalibutanon nga tawo nga maluyag sa iya, mabudlay ini pamatukan. Mahimo nga ang lalaki daw mabuot kag mahagop. Mahimo nga wala sia nagapanigarilyo ukon nagagamit sing malaw-ay nga mga hambal. Nian mangatarungan ka: ‘Ti, mas maayo sia sang sa madamo nga kauturan nga lalaki nga kilala ko!’ ‘Interesado sia sa pagtuon.’ ‘May nahibaluan ako nga ang isa ka utod nga babayi nagpamana sing ditumuluo kag sang ulihi nangin tumuluo man sia.’ ‘May yara gani pila ka Cristianong pag-asawahay nga wala nagamadinalag-on!’​—⁠Tan-awa ang Jeremias 17:⁠9.

6, 7. (a) Paano ginlaragway sang isa ka dalaga nga utod ang iya kabang-awan? (b) Anong pamangkot ang takus naton binagbinagon?

⁶ Huo, makabalang-aw gid para sa isa ka diminyo nga Cristiano nga luyag magminyo. Ang iban nadulaan sing paglaum. “Diutay lamang ang soltero nga mga utod,” siling sang isa ka dalaga nga utod sa paglaragway sang kahimtangan sa iya duog. “Apang kadamo gid sang dalaga nga mga utod. Samtang ginatan-aw sang utod nga babayi nga ang iya pagpamatan-on madasig nga nagaligad, ang iya desisyon mahimo nga indi na magpamana ukon mamana dayon sa una nga kahigayunan.”

⁷ Apang, ang laygay sang Biblia maathag: ‘Dili kamo magpaguta upod sa mga ditumuluo.’ (2 Corinto 6:14) Matigdas bala ukon indi makatarunganon ining balaan nga paandam?

Isa ka Pagpabutyag sang Mahigugmaon nga Pag-atipan sang Dios

8. Paano ginpakita ni Jesus nga interesado sia sa aton kaayuhan?

⁸ Nagakabalaka gid si Jehova sa aton dayon nga kaayuhan. Wala bala, walay sapayan sang daku nga bili sa iya, ginhatag niya ang iya Anak subong “gawad sang madamo”? (Mateo 20:28) Indi bala ‘Sia ang nagatudlo sa aton kon paano kita makabenepisyo’? (Isaias 48:17) Wala bala sia nagasaad nga ‘indi niya kita pagtugutan nga sulayon sing labaw sa masarangan naton’? (1 Corinto 10:13) Sing makatarunganon, nian, kon ginasilingan niya kita nga indi magpaguta upod sa mga ditumuluo, interesado gid sia sa aton kaayuhan! Binagbinaga kon paano ining paandam isa ka pagpabutyag sang iya mahigugmaon nga pag-atipan sa aton.

9. (a) Anong paandam ang ginahatag ni Pablo batok sa pagporma sang isa ka Cristiano sing suod nga higot upod sa ditumuluo? (b) Ano ang kahulugan sang Griegong tinaga nga ginbadbad “harmoniya,” kag paano sini ginailustrar ang kabudlayan nga nagautwas kon ang isa ka Cristiano nagapaguta sang iya kaugalingon upod sa ditumuluo?

⁹ Ang pag-asawahay gintuyo sang Manunuga nga magaporma sing pinakasuod nga higot sa ulot sang mga tawo, kay ang bana kag ang asawa mangin “isa ka unod.” (Genesis 2:24) Maalamon bala para sa isa ka Cristiano nga magporma sinang suod nga higot upod sa ditumuluo? Si Pablo nagasabat paagi sa pagpautwas sing pila ka nagapangusisa nga mga pamangkot, nga ang tagsatagsa sini nagapahangop sing negatibo nga sabat: “Kay ano bala ang pag-updanay sang pagkamatarong kag kalautan? Ukon ano bala ang paghiambit sang kapawa sa kadudulman? Dugang pa, ano bala ang paghisugot [Griego, sym·phoʹne·sis] ni Cristo kag ni Belial [Satanas]? Ukon ano bala ang kalabtanan sang tumuluo sa ditumuluo?” (2 Corinto 6:​14, 15) Ang Griegong tinaga nga sym·phoʹne·sis literal nga nagakahulugan sing “dungan nga pagpatunog” (gikan sa syn, “may,” kag pho·neʹ, “tunog”). Nagapatuhoy ini sa harmoniya nga ginapatubas sang mga instrumento sa musika. Sa pagkamatuod, wala sing harmoniya ukon paghisugot sa ulot ni Cristo kag ni Satanas. Sing kaanggid, sa isa ka ditimbang nga guta, mabudlay gid para sa bana kag asawa nga ‘matandog ang pareho nga mga kuwerdas.’ Kaangay sila sang duha ka instrumento sa musika nga wala nagahisantuanay, nga nagapatubas sing magahod nga tunog sa baylo sang musika.

10. Ano ang kinahanglanon nga mga elemento sa malipayon nga pag-asawahay, kag anong mga bentaha ang nagaluntad kon timbang ang guta?

¹⁰ Paano, nian, ang isa ka espirituwal nga tawo mahisanto sing bug-os sa pisikal nga tawo? (1 Corinto 2:14) Ang pareho nga mga pagtuluohan, mga prinsipio, kag mga tulumuron kinahanglanon nga mga elemento sa isa ka malipayon nga pag-asawahay. Wala sing butang nga nagahatag sing daku nga kusog sa pag-asawahay luwas sa debosyon sang mag-asawa sa Manunuga. Kon timbang ang guta, ang bana kag ang asawa makapalig-unay sa isa kag isa sa pagsimba. Pareho sila makakonsulta sa Kasulatan sa paglubad sang ila mga indi paghangpanay. Indi bala maathag, nian, nga ginasilingan kita ni Jehova nga indi magpaguta upod sa mga ditumuluo bangod luyag niya nga maagom naton ang posible nga pinakasuod higot upod sa aton tiayon?

11. Ngaa gindumilian ang pagminyo sa mga indi sumilimba sa Israel, kag anong makapukaw sa hunahuna nga pamangkot ang ginapautwas?

¹¹ Ang pagpamati sa paandam sang Biblia nagaamlig man sa aton gikan sa masakit nga mga resulta nga sa masami nagaabot kon ang isa ka Cristiano magpaguta sang iya kaugalingon upod sa isa ka ditumuluo. Halimbawa, may posibilidad nga patalikuron sang ditumuluo ang Cristianong tiayon gikan sa pag-alagad kay Jehova. Binagbinaga ang paandam ni Jehova sa dumaan nga Israel. Gindumilian ang pagminyo sa mga indi sumilimba. Ngaa? “Kay patalikdon niya ang imo anak gikan sa pagsunod sa akon,” paandam ni Jehova, “kag magaalagad sila sa iban nga mga dios.” (Deuteronomio 7:​3, 4) Bangod sang pagpamatok sang ditumuluo nga tiayon, may posibilidad nga maanod ang isa padulong sa banas sang pagpasapayan. Mahapos hunahunaon, ‘Indi ini matabo sa akon!’ Apang natabo ini sa isa ka maalam nga tawo nga si Solomon. Indi ayhan matabo man ini sa imo?​—⁠1 Hari 11:​1-6; ipaanggid ang 1 Hari 4:​29, 30.

12. Paano ang sugo sang Dios nga nagadumili sang pagminyo sing mga dumuluong nangin proteksion para sa mga Israelinhon? Iilustrar.

¹² Bisan pa kon indi mapatalikod ang tumuluo gikan sa matuod nga pagsimba, yara gihapon ang mga problema kag mga pag-ipit nga sa masami may kaangtanan sa isa ka puluy-an nga nabahinbahin sa relihion. Binagbinaga, sa liwat, ang sugo sang Dios sa Israel. Ibutang ta nga ang isa ka Israelinhon nga lin-ay nagsugot sa pagpamana sing Canaanhon nga lalaki. Bangod sang seksuwal nga mga buhat nga lapnag sa duta sang Canaan, paano niya tahuron ang sugo sang iya Dios? Halimbawa, kinabubut-on bala nga magalikaw sia sa seksuwal nga paghiusa sa tion sang pamulanon, nga ginapatuman sang Mosaikong Kasuguan?⁠c (Levitico 18:​19; 20:​18; ipaanggid ang Levitico 18:⁠27.) Sa bahin sang isa ka Israelinhon nga lalaki nga nagpangasawa sing Canaanhon nga lin-ay, daw ano sia ka masinakdagon kon maglakbay sia sa Jerusalem sing makatlo kada tuig agod magtambong sa mga piesta? (Deuteronomio 16:16) Maathag nga ang sugo sang Dios nga nagadumili sina nga pag-asawahay nangin proteksion para sa mga Israelinhon.

13. (a) Ngaa ang kalibutanon nga tawo wala sing nahanas sa Biblia nga Cristianong konsiensia? (b) Anong mga pag-ipit kag mga problema ang ginaatubang sang iban sa mga puluy-an nga nabahinbahin sa relihion?

¹³ Kamusta naman karon? Ang mga talaksan sa moral sang kalibutanon nga mga tawo malayo gid sa mga talaksan sang Biblia. Bisan pa kon daw ano katinlo ang pila ka kalibutanon nga tawo kon tulukon, wala sila sing nahanas sa Biblia nga Cristianong konsiensia. Wala sila makahinguyang sing mga tinuig sa pagtuon sang Pulong sang Dios, nga ‘nagabag-o sang ila painoino’ kag ‘nagauba sang daan nga personalidad.’ (Roma 12:​2; Colosas 3:9) Busa, ang Cristiano nga nagapaguta sang iya kaugalingon upod sa isa ka ditumuluo masami nga nagapadayag sang iya kaugalingon sa daku nga kasubo kag pag-antos. Ang iban makapili nga ginaipit sa pag-ambit sa malaut nga mga buhat sa sekso ukon sa pagsaulog sang kalibutanon nga mga piesta opisyal. Kag ang iban nagareklamo pa gani nga masubo sila. Ang isa ka utod nga babayi nagsulat: “Ang kasubo nga imo ginabatyag kon ikaw ginkasal sa isa nga wala nagahigugma kay Jehova amo ang pinakadaku nga kasubo nga mahanduraw. Kay man, wala ka sing maambitan sing kamatuoran, nga amo ang labing importante nga butang sa imo kabuhi.”

14. (a) Sa nabahinbahin nga puluy-an, ngaa mabudlay padakuon ang kabataan sa “disiplina kag pagtuytoy ni Jehova sa hunahuna”? (b) Ano mahimo ang epekto sa kabataan sang isa ka puluy-an nga nabahinbahin?

¹⁴ Sa isa ka puluy-an nga nabahinbahin, mabudlay gid padakuon ang mga anak sa “disiplina kag pagtuytoy ni Jehova sa hunahuna.” (Efeso 6:4) Halimbawa, tugutan ayhan sang ditumuluo ang kabataan sa pagtambong sa mga miting ukon sa pagpakigbahin sa pag-alagad sa latagon? Masami nga ang kabataan natunga sa ila gugma​—⁠ginahigugma ang duha ka ginikanan, apang isa lamang ka ginikanan ang nagahigugma kay Jehova. Ang isa ka utod nga babayi nga nakapamana sing ditumuluo nagsiling: “Madamo nga kasakit ang gin-antos ko sa sulod sang 20 ka tuig nga pag-asawahay namon. Ang akon mga anak nga lalaki nagdaku nga may daku nga kagamo kag kagumon sa emosyon kag karon bahin na sila sang kalibutan. Ang akon anak nga babayi pirme lang nagapangakig nga mapahilayo sia sa akon bangod sang kinamatarong sang iya amay sa pagduaw. Ini tanan nga problema nagluntad bangod sang 18 ako, ginsikway ko ang isa sang mga prinsipio ni Jehova.” Ano nga prinsipio? Dili kamo magpaguta sang inyo kaugalingon upod sa mga ditumuluo!

15. Ngaa ginalaygayan kita ni Jehova nga indi magpaguta sang aton kaugalingon upod sa mga ditumuluo?

¹⁵ Maathag nga luyag ni Jehova nga matigayon naton ang labi gikan sa kabuhi. Ang iya ginapangabay sa aton, lakip ang iya laygay nga indi kita magpaguta sang aton kaugalingon upod sa mga ditumuluo, para sa aton kaayuhan. (Deuteronomio 10:​12, 13) Ang pagminyo sing ditumuluo isa ka pagsikway sa Makasulatanhon nga laygay, sa praktikal nga kaalam, kag sa masami nga masakit nga eksperiensia sang iban.

Mga Pamangkot nga Kinaandan nga Ginapamangkot

16, 17. (a) Kon indi kita maghalong, paano ang emosyon mahimo magsablag sa maligdong nga panghunahuna? (b) Dapat bala sikwayon ang laygay sang Dios bangod sang tumalagsahon nga mga kahimtangan nga sa diin ang isa ka Cristiano nagminyo sing ditumuluo kag karon sila nga duha lunsay nagaalagad kay Jehova? Ipaathag.

¹⁶ Apang, kon indi kita maghalong, ang emosyon mahimo nga magtublag sa maligdong nga painoino. Mahimo magasiling kita nga ang aton kaso lain. Binagbinaga ang pila sang kinaandan nga ginapamangkot.

¹⁷ Kamusta ang mga kahimtangan nga sa diin ang isa ka utod nga lalaki ukon utod nga babayi nagminyo sing ditumuluo, kag sila karon nagaalagad kay Jehova? Sa gihapon, ginlalis ang mga prinsipio ni Jehova. Ginapakamatarong bala sang katapusan ang paagi? Ang nagailustrar sang pagtamod sang Dios sa mga nagasikway sa iya laygay amo ang natabo sa mga Judiyo nga nagbalik gikan sa pagkabihag sa Babilonia. Sang ang iban nangasawa sing pagano nga mga babayi, ang mga manunulat sang Biblia nga sanday Esdras kag Nehemias wala maglipodlipod sa pagpakamalaut sang ila mga buhat. Yadtong mga Judiyo ‘naglapas,’ naghimo sila sing “daku nga kalautan,” kag “nakasala” sila. (Esdras 10:​10-14; Nehemias 13:27) May butang pa nga binagbinagon: Kon sikwayon naton ang laygay sang Dios, mahimo nga mahalitan naton ang aton kaugalingon sa espirituwal kag masamad ang aton konsiensia. Ang isa ka utod nga babayi nga ang iya ditumuluo nga bana nangin tumuluo sang ulihi nagsiling: ‘Ginalandas ko sa gihapon ang halit sa emosyon. Indi ko masugid sa inyo kon daw ano kalain ang ginabatyag ko kon ginatudlo kami sang iban kag magsiling, “Apang nagmadinalag-on sila.” ’

18. Ano ang dalanon sang kaalam kon naluyag ka sa isa nga wala pa mabawtismuhi, kag paagi sa sini ano ang ginapakita mo?

¹⁸ Ano kon naluyag ka sa isa nga nagatuon sing Biblia kag nagatambong sa mga miting, apang indi pa sia bawtismado? Nagakalipay kita kon ang isa nagapakita sing interes sa kamatuoran sang Biblia. Apang, ang pamangkot amo: Padayunon mo bala ang imo huyog? Sing prangka, ang dalanon sang kaalam amo nga maghulat ka sing pila ka tuin sa tapos mabawtismuhan ang imo abyan kag nagauswag sa pagpakita sing mga bunga sang espiritu sang Dios antes kamo mag-date. (Galacia 5:​22, 23) Mahimo nga indi mahapos sundon ina nga laygay, apang paagi sa paghimo sini mapakita mo ang imo debosyon sa mga prinsipio sang Biblia; magapasad ini sing maayong sadsaran para sa matuod nga kalipay sa pag-asawahay. Kon ang inyo abyan may matuod nga pag-ulikid sa imo kag nagahigugma gid kay Jehova, wala sing duhaduha nga mangin handa sia sa paghulat tubtob kamo nga duha yara na “sa Ginuo”​—⁠nakadedikar kag nabawtismuhan⁠—​⁠antes magnobyahanay. Dumduma man nga ang matuod nga gugma wala ginahalitan sang pagligad sang tion.​—⁠1 Corinto 7:​39; Genesis 29:⁠20.

19. Ano ang dapat mo tandaan kon nabudlayan ka sa pagpangita sing milinyuon sa tunga sang mga masigkatumuluo?

¹⁹ Ano kon nabudlayan ka sa pagpangita sing bagay sa imo nga milinyuon sa tunga sang mga masigkatumuluo? “Beinte-seis anyos ako, dalaga, kag masubo gid,” siling sang isa ka utod nga babayi. Matuod nga bangod kay dalaga ka nabudlayan ka, apang ang mga problema nga nagaresulta gikan sa indi timbang nga pagpaguta sa pag-asawahay mahimo nga mas mabudlay pa! Ang pagtuman sa laygay sang Dios mahimo nga nagakinahanglan sing pagtuo, pagpugong sa kaugalingon, kag pagpailob, apang saligi nga si Jehova nakahibalo kag nagahandum sang kon ano ang labing maayo para sa imo. (1 Pedro 5:​6, 7) Sambita ini sa pangamuyo, kag dayon maghulat kay Jehova. (Salmo 55:22) Sa sining sistema sang mga butang, wala sing isa nga may yara makaalayaw sing himpit nga kabuhi. Mahimo nga ang imo tagipusuon nagakalangkag sa isa ka tiayon. Apang, ang iban may mga problema man, nga ang iban sini wala sing solusyon sa sining sistema. Sa nagapakari lamang nga bag-ong kalibutan nga “ang handum sang tagsa ka buhi nga butang” paayawan sing bug-os.​—⁠Salmo 145:⁠16.

20. Paano ginpabutyag sang isa ka dalaga ang iya determinasyon, kag paagi sa amo man nga pagkadeterminado, ano nga kaayawan ang matigayon mo?

²⁰ Samtang wala pa ina, mangin determinado nga indi magpaguta sang imo kaugalingon sa isa ka ditumuluo. Ang 36-anyos nga dalaga nga utod nagpabutyag sang iya determinasyon sing subong sini: “Nagapangamuyo ako kay Jehova kada adlaw nga hatagan ako sing palamanhon. Wala ako nagahandum nga mangita sa guwa sang organisasyon ni Jehova, apang yara gihapon dira ang pagsulay. Samtang wala pa ina, nagaplano ako nga atipanon ang mga kinaiya nga magapauswag sa akon subong isa ka tawo agod nga mangin sahi ako sang espirituwal nga babayi nga ginapangita sang espirituwal nga lalaki.” Amo man bala ikaw sini? Kon amo, makatigayon ka sing kaayawan nga nagagikan sa pagpamatuod sang imo pagkatutom sa Dios sang balaan nga hustisya.​—⁠Salmo 37:​27, 28.

[Mga footnote]

Mapaathag Mo Bala?

◻ Paano ang Biblia nagapaandam batok sa pagporma sing suod nga relasyon sa mga ditumuluo?

◻ Ngaa ang iban sang dedikado nga mga Cristiano nagapangita sing milinyuon sa guwa sang kongregasyon?

◻ Paano ang paandam ni Jehova batok sa indi timbang nga pagpaguta isa gid ka pagpabutyag sang iya mahigugmaon nga pag-atipan sa aton?

◻ Anong mga pamangkot nahanungod sa pagpangita sing tiayon ang kinaandan nga ginapamangkot, kag paano mo sabton ini?