Pagkalipay sa Inyo Sagrado nga Pag-alagad
1 Nagbalik sila nga “may kalipay.” Ang kasaysayan sang Biblia nagasugid kon ano ang balatyagon sang 70 ka disipulo sang nagreport sila liwat kay Jesus, pagkatapos sang isa ka malawig nga paglakbay sa pagbantala. Nakabatyag sila sing nasulod nga kalipay bangod sa paghimo sa kabubut-on sang Dios. (Luc. 10:17) Ano ang makabulig sa inyo agod matigayon ang amo man nga kalipay sa sagrado nga pag-alagad?
2 Isa ka Positibo nga Panimuot: May pribilehiyo kamo nga ginhatag sang Dios nga sugiran ang mga tawo sang makalilipay nga katuyuan ni Jehova. Paagi sa inyo pagbantala, mahimo nga mabuligan ninyo ang isa ka indibiduwal nga mahilway sa malaw-ay nga mga buhat sining kalibutan kag sa kadena sang butig nga relihion. Matanyagan ninyo ang mga tawo sing paglaum nga magkabuhi sa kalibutan nga hilway sa pinuyas nga nagapalibot karon sa aton. Hunahunaa ang kalipay ni Jehova kon madinalag-on ninyo nga natanom ang mga binhi sang kamatuoran sa isa ka tagipusuon nga nagapamati. Mangin positibo sa pagpangamuyo nga ang espiritu sang Dios magpatubas sa inyo sang bunga sang kalipay samtang ginahimo ninyo ang ministeryo sing tinagipusuon.
3 Praktikal nga Paghanas: Ang sesyon sa pagtudlo nga ginhimo ni Jesus sa 70 ka disipulo ginpaanggid sa modernong-adlaw nga Miting sa Serbisyo. Naghatag sia sing paghanas agod matuman nila sing epektibo ang ila ministeryo. (Luc. 10:1-16) Sa karon ang Miting sa Serbisyo nagahanas sa inyo kon paano magpalapit sa mga tawo, kon paano magsugod sing mga paghambalanay, kag kon paano magsugod kag magdumala sing mga pagtuon sa Biblia sa puluy-an. Paagi sa pagsunod sa sini kag sa pagpauswag sang inyo mga ikasarang sa pagbantala, masapwan ninyo nga ang bisan ano man nga balatyagon sang pagkabalik-awot ukon pagkadi-sangkol mabuhinan kag matabunan sang pagsalig kag kalipay.
4 Magkonsentrar sa Palaabuton: Si Jesus nakasapo sing kalipay sa iya sagrado nga pag-alagad walay sapayan sang mga pag-antos nga ginbatas niya. Ngaa? Bangod ginhuptan niya ang iya mata nga nakakonsentrar pirme sa mga pagpakamaayo kag mga pribilehiyo nga yara sa iya unahan. (Heb. 12:2) Mahimo man ninyo ini paagi sa paghupot sang inyo hunahuna kag tagipusuon nga nakakonsentrar sa ngalan ni Jehova kag sa mga pagpakamaayo nga magaabot sa bag-ong kalibutan sang Dios. Magadugang ini sing kalipay kag sing kahulugan sa inyo ministeryo.
5 Ang paghimo sing sagrado nga pag-alagad kay Jehova amo ang labing daku nga pribilehiyo nga matigayon ninyo karon. Busa, kabay nga magsiling kamo: “Sa paghimo sang imo kabubut-on, O Dios ko, nagakalipay ako.”—Sal. 40:8.