Gintuman Nila ang Ila Pangako!

SI Antonio, nga yara na sa iya katapusan nga tuig sa hayskul, luyag magpanaksi sing di-pormal sa iya mga kabutho. Busa nagpanugda sia sa iya maestra sa maragtas nga ipatan-aw ang vid­eo nga Jehovah’s Wit­ness­es Stand Firm ­Against ­Nazi Assault. Bisan pa nagaduhaduha, nagpasugot ang maestra, nagasiling nga ipatan-aw niya ang vid­eo sa masunod nga adlaw.

“Sang primero,” sugid ni ­Antonio, “ang maestra nagtan-aw sang vid­eo sing matinaastaason; apang sang nakita niya nga kilala nga mga istoryador ang nagasaysay sang kasaysayan sang mga Saksi ni Jehova sa mga kampo konsentrasyon, namati sia sing maayo. Sang matapos nagpasalamat sia sa akon tungod sang pagpanugda sang vid­eo.”

Sang masunod nga leksion, gintinguhaan sang maestra nga ipaathag ang hilikuton sang Bibelforscher, subong amo ang pagkilala sa mga Saksi ni Jehova sa Alemanya sa sadto nga tion; apang narealisar niya nga mas maayo kon si Antonio ang magpaathag sini. Ginpaathag ni Antonio ang papel sang mga Saksi sa katilingban kag ang ila pila ka doktrina. Naghinakop sia paagi sa pagsiling: “Sing maathag gid, ang mga tawo indi makakuha sing bisan ano man nga benepisyo gikan sa hamili nga mensahe nga amon ginadala kon indi sila mamati sa amon, kon takpan nila kami sing ganhaan, ukon kon indi nila pagbasahon ang amon mga publikasyon.”

Ang tanan nga kabutho ni Antonio nag-ugyon sa sini nga panghunahuna, kag ang manunudlo nagpanugyan sing isa ka resolusyon sa klase. Sa una nga kahigayunan, pamatian nila ang mga Saksi kag batunon ang ila mga publikasyon. Nagpadayon pa sa pila ka tion ang paghambalanay sang klase tuhoy sa vid­eo. Mahanduraw mo ang kalipay ni Antonio sang nagsunod nga mga adlaw sang nakita niya ang iya pila ka masigka-estudyante nga nag-abot sa klase nga may dala nga mga publikasyon sang Watch­tow­er kag nabatian niya ang kada isa sa ila nga nagsiling kag nagyuhom: “Nakita mo, gintuman ko ang akon pangako!”