Mangin Alisto sa Pagpangita sa mga Bungol sa Inyo Teritoryo
1 Si Jehova nagaagda: “‘Kari!’ . . . Ang bisan sin-o nga maluyag sa pagkuha sing tubig sang kabuhi nga walay bayad.” (Bug. 22:17) Lakip sa mga nagabaton sa sini nga pangagda amo ang madamo nga bungol. Subong resulta, sa sulod sang nagligad nga 7 ka tuig, isa ka sign-language nga kongregasyon kag halos 15 ka sign-language nga grupo ang natukod sa Pilipinas.
2 Bisan pa ginakonsentrar sang sign-language nga mga kongregasyon kag mga grupo ang ila mga panikasog sa pagbantala sa pagpakigsugilanon sa mga bungol kag sa mga may diperensia sa palamatin-an sa ila mga teritoryo, madamo pa nga subong sa ila ang dapat makita kag mapanaksihan sa sining pungsod.
3 Paano Kamo Makabulig? Samtang yara sa publiko nga mga lugar, may nakita bala kamo nga mga tawo nga nagagamit sing sign language? May kilala bala kamo sa inyo trabaho ukon sa inyo eskwelahan nga may katapo sang pamilya nga isa ka bungol? Mangin alisto sa pagpangita sa mga tawo nga bungol samtang ginahimo ninyo ang inyo adlaw-adlaw nga mga hilikuton. Apang paano ninyo mapat-od nga mapanaksihan sila tuhoy sa Ginharian?
4 Magpanaksi: Kon nahibaluan ninyo nga may isa ka sign-language nga kongregasyon ukon grupo malapit sa inyo, dapat ninyo sila sugiran sang direksion sang isa ka tawo nga bungol. Madamo nga bungol ang nagauswag sing mas madasig sa pagtuon sang kamatuoran kon makapakig-upod sila sa mga bungol nga Saksi sa mga miting sang kongregasyon nga ginahimo sa Philippine Sign Language. Gani, kon may sign-language nga kongregasyon ukon grupo sa inyo lugar, dapat ipadala sang sekretaryo sang inyo kongregasyon ang impormasyon tuhoy sa tanan nga bungol sa inyo teritoryo.
5 Kamusta naman kon wala sing isa nga malapit sa inyo ang makahatag sing espirituwal nga bulig sa mga bungol sa inyo komunidad? Paano kamo makabulig? Ngaa indi maghimo sing pagduaw liwat kag sugilanunon ang bisan sin-o nga makabati nga katapo sang pamilya? Magpanugda nga ipasalida ang isa ka sign-language video agod mapukaw ang interes sang bungol. Madamo nga manugbantala sa Pilipinas ang nagapanikasog sa pagtuon sing sign language agod malab-ot sing mas epektibo ang mga bungol. (Binu. 16:9, 10) Ang Ginapatuman nga brosyur kag ang Ihibalo nga libro matigayon sa sign language sa video. Ang pagdumala sing mga pagtuon sa Biblia nga nagagamit sini nga mga gamit nagresulta na sa madamong maayo nga bunga.
6 Paagi sa alisto nga pagpangita sa mga bungol sa inyo lugar, mahatagan ninyo sila sing kahigayunan nga makakuha sing tubig sang kabuhi nga walay bayad.—Mat. 10:11.