Pagbulig sa Iban nga Himayaon si Jehova
1 Isa ka importante nga mensahe ang ginabantala sa mga tawo sa bug-os nga duta: “Kahadluki ninyo ang Dios kag hatagi sia sing himaya, kay nag-abot na ang oras sang iya paghukom, kag gani simbaha ninyo ang Isa nga naghimo sang langit kag duta, sang dagat kag mga tuburan sang tubig.” (Bug. 14:6, 7) Pribilehiyo naton nga makigbahin sa sining pagbantala. Ano ang dapat mahibaluan sang mga tawo tuhoy kay Jehova agod mahadlok sila sa iya kag simbahon sia?
2 Ang Iya Ngalan: Dapat mapatuhay sang mga tawo ang ngalan sang matuod nga Dios gikan sa madamo nga butig nga mga dios nga ginasimba karon. (Deut. 4:35; 1 Cor. 8:5, 6) Ang matuod, gingamit sang mga manunulat sang Biblia ang mahimayaon nga ngalan ni Jehova sing kapin sa 7,000 ka beses. Samtang nagagamit kita sing nagakaigo nga paghantop kon san-o naton ipakilala ang ngalan sang Dios, indi gid naton pagtaguon ini ukon likawan nga gamiton ini. Kabubut-on sang Dios nga mahibaluan sang tanan nga tawo ang iya ngalan.—Sal. 83:18.
3 Ang Iya Personalidad: Agod mahimaya si Jehova, dapat mahibaluan sang mga tawo kon ano sia nga sahi sang Dios. Dapat tudluan naton sila tuhoy sa iya tumalagsahon nga gugma, superlatibo nga kaalam, himpit nga hustisya, kag supremo nga gahom, upod sang iya kaluoy, mahigugmaon nga kaayo, kag iban pa nga makatilingala nga mga kinaiya. (Ex. 34:6, 7) Dapat matun-an man nila ang nagakaigo nga kahadlok kag pagtahod sa Dios, nagabaton nga ang ila mismo kabuhi nasandig sa kahamuot ni Jehova.—Sal. 89:7.
4 Mangin Suod sa Dios: Agod maluwas sa nagapakari nga paghukom sang Dios, dapat magtawag ang mga tawo kay Jehova sa pagtuo. (Roma 10:13, 14; 2 Tes. 1:8) Nagalakip ini indi lamang sang pagkuha sing ihibalo sa ngalan kag mga kinaiya sang Dios. Dapat buligan naton ang mga tawo nga makapalambo sing isa ka personal nga kaangtanan kay Jehova kag magsalig sa iya upod ang bug-os nila nga tagipusuon. (Hulu. 3:5, 6) Samtang ginaaplikar nila ang ila natun-an, nagapangamuyo sing hanuot sa Dios, kag nagatigayon sang iya bulig sa ila pagkabuhi, magalambo ang ila pagtuo kag magabulig ini sa ila nga mangin suod kay Jehova.—Sal. 34:8.
5 Kabay nga ibantala naton sing makugi ang ngalan sang Dios kag buligan ang iban nga magsalig sing bug-os sa iya kag magkahadlok sa iya. Mahimo nga madamo pa ang aton mabuligan nga makilala si Jehova kag mahimaya sia subong ila “Dios sang kaluwasan.”—Sal. 25:5.