Watchtower ONLINE NGA LIBRARY
Watchtower
ONLINE NGA LIBRARY
Hiligaynon
  • BIBLIA
  • PUBLIKASYON
  • MITING
  • be tulun-an 40 p. 223-p. 225 par. 3
  • Pagkasibu sang Pinamulong

Wala ang video nga ginpili mo.

Sorry, may error sa pag-load sang video.

  • Pagkasibu sang Pinamulong
  • Magbenepisyo sa Pagpanudlo sang Teokratikong Eskwelahan Para sa Ministeryo
  • Pareho nga Materyal
  • Sibu kag Makapakumbinsi
    Mag-ukod Ka sa Pagbasa kag Pagpanudlo
  • Kon Paano Himuon ang Pagpanalawsaw
    Magbenepisyo sa Pagpanudlo sang Teokratikong Eskwelahan Para sa Ministeryo
  • Magbenepisyo sing Bug-os sa Pagbasa sing Biblia
    Ang Lalantawan Nagabantala sang Ginharian ni Jehova—2013
  • Magbantala Agod Makahimo sing mga Disipulo
    Ang Lalantawan Nagabantala sang Ginharian ni Jehova—2003
Mangita sing Iban Pa
Magbenepisyo sa Pagpanudlo sang Teokratikong Eskwelahan Para sa Ministeryo
be tulun-an 40 p. 223-p. 225 par. 3

TULUN-AN 40

Pagkasibu sang Pinamulong

Ano ang dapat mo himuon?

Ihatag ang impormasyon suno gid sa mga katunayan.

Ngaa importante ini?

Ang pagkasibu sang imo ginasiling nagahatag sang maayo nga impresyon sa imo, sa organisasyon nga imo ginaalagaran, kag sa Dios nga imo ginasimba.

NGAA ang isa ka Cristiano mahimo makahambal sing indi matuod? Ayhan ginsulit lamang niya ang pila ka butang nga iya nabatian, nga wala maghinguyang sing tion nga usisaon ang mga katunayan. Ukon mahimo ginapasobrahan niya ang isa ka butang bangod, wala marealisar ini, nagsayop gali sia sa pagbasa sing materyal nga ginkuhaan niya sang impormasyon. Kon hatagan naton sing mahalungon nga igtalupangod ang pagkasibu bisan sa diutay nga mga butang, makita sang aton mga tagpalamati nga masaligan nila ang pagkamaminatud-on sang importante pa nga mga bahin sang aton mensahe.

Sa Ministeryo sa Latagon. Bangod narealisar nga madamo pa sila sing dapat tun-an, madamo ang nahadlok nga magsugod sa ministeryo sa latagon. Apang, nasapwan nila gilayon nga makapanaksi sila sing epektibo, bisan paagi lamang sa sadsaran nga ihibalo sa kamatuoran. Paano? Ang yabi amo ang paghanda.

Antes magguwa sa pag-alagad sa latagon, mangin pamilyar sa topiko nga luyag mo hambalan. Hunahunaa ang mga pamangkot nga mahimo ipautwas sang imo mga tagpalamati. Pangitaa ang makaalayaw nga mga sabat pasad sa Biblia. Magahanda ini sa imo sa paghatag sing sibu nga mga sabat nga relaks ang hunahuna. Magadumala ka bala sang isa ka pagtuon sa Biblia? Repasuha sing maayo ang ginatun-an nga materyal. Pat-ura nga nahangpan mo ang Makasulatanhon nga basihan sang mga sabat sa naimprinta nga mga pamangkot.

Ano abi kon ang isa ka tagbalay ukon kaupod sa trabaho mamangkot sang wala mo mahandaan nga pamangkot? Kon indi ka sigurado sang mga katunayan, indi magpakotpakot. “Ang tagipusuon sang matarong nagapamalandong agod makasabat.” (Hulu. 15:28) Mahimo masapwan mo ang kinahanglanon nga bulig sa libro nga Reasoning From the Scriptures ukon sa “Mga Topiko nga Mahambalan sa Biblia” kon matigayon ini sa inyo lenguahe. Kon wala ka sing dala sini, isiling nga magapanalawsaw ikaw kag magbalik. Kon sinsero ang nagapamangkot, wala sing kaso sa iya nga maghulat sang husto nga sabat. Sa katunayan, mahimo nga magdayaw pa sia sang imo pagkamapainubuson.

Ang pagpanghikot sa ministeryo sa latagon upod sa eksperiensiado nga mga manugbantala makabulig sa imo nga mapauswag ang ikasarang sa paggamit sing matadlong sang Pulong sang Dios. Panilagi kon ano nga mga kasulatan ang ila ginagamit kag kon paano sila nagapangatarungan sa sini. Batuna sing mapainubuson ang bisan ano nga mga panugda ukon pagtadlong nga ila ihatag. Ang makugi nga disipulo nga si Apolos nakabenepisyo sa bulig nga nabaton gikan sa iban. Ginlaragway ni Lucas si Apolos subong “talunsay maghambal,” “sampaton,” kag “mainit sa espiritu,” isa ka tawo nga “nagpamulong kag nagtudlo sing husto sang mga butang tuhoy kay Jesus.” Apang, may kulang sa iya paghangop. Sang natalupangdan ini nanday Priscila kag Aquila, “gin-upod nila sia kag ginpaathag sa iya ang dalan sang Dios sing mas husto pa.”​—Binu. 18:24-28.

“Nagapanguyapot Sing Malig-on sa Matutom nga Pulong.” Ang aton presentasyon sa mga miting dapat magpabanaag sing daku nga pagtahod sa papel sang kongregasyon subong “isa ka haligi kag pamakod sang kamatuoran.” (1 Tim. 3:15) Agod masakdag ang kamatuoran, importante nga mahangpan naton ang mga kasulatan nga ginaplano naton nga gamiton sa mga pamulongpulong. Binagbinaga ang konteksto kag kahulugan sini.

Ang imo ginahambal sa miting sa kongregasyon mahimo masulit. Sa pagkamatuod, “kita tanan nagakasandad sa madamong beses.” (Sant. 3:2) Apang makabenepisyo ka paagi sa pagpalambo sing mga batasan nga nagabulig sa sibu nga paghambal. Madamong utod nga lalaki nga nagpalista sa Teokratikong Eskwelahan Para sa Ministeryo ang mangin mga gulang sa ulihi. “Labaw pa sangsa kinaandan” ang ginapaabot sa mga ginhatagan sining responsibilidad. (Luc. 12:48) Kon ang isa ka gulang pataka nga nagalaygay sing sayop nga nagaresulta sa serioso nga mga problema sang mga katapo sang kongregasyon, maagom sang gulang ang di-kahamuot sang Dios. (Mat. 12:​36, 37) Sa amo, ang isa ka utod nga kalipikado subong gulang dapat kilala nga “nagapanguyapot sing malig-on sa matutom nga pulong may kaangtanan sa iya arte sa pagpanudlo.”​—Tito 1:9.

Maghalong nga ang imo mga pangatarungan nagaugyon sa “sulundan sang makapapagros nga mga pulong” nga makita sa bug-os nga kaundan sang Makasulatanhon nga kamatuoran. (2 Tim. 1:13) Indi ini dapat magpahadlok sa imo. Ayhan dapat tapuson mo pa ang pagbasa sa bug-os nga Biblia. Padayuna ang pagpanikasog sa sini. Apang, talupangda man kon paano ang masunod nga mga panugda makabulig sa imo nga maanalisar ang materyal nga imo ginahunahuna nga gamiton sa imo pagpanudlo.

Una, pamangkuta ang imo kaugalingon: ‘Ini bala nga materyal nahisanto sa akon na natun-an gikan sa Biblia? Magabuyok bala ini sa akon mga tagpalamati kay Jehova, ukon ginabayaw bala sini ang kaalam sang kalibutan, nga nagapalig-on sa mga tawo nga magpatuytoy sa sini?’ Si Jesus nagsiling: “Ang imo pulong kamatuoran.” (Juan 17:17; Deut. 13:​1-5; 1 Cor. 1:19-21) Masunod, gamita sing maayo ang mga galamiton sa pagtuon nga gin-aman sang matutom kag mainandamon nga ulipon nga klase. Magabulig ini sa imo indi lamang sa paghangop sing nagakaigo sa mga kasulatan kundi sa pag-aplikar man sini sing balanse kag sing makatarunganon. Kon ipasad mo ang imo mga pamulongpulong sa “sulundan sang makapapagros nga mga pulong” kag magsandig sa palaagyan ni Jehova kon nagapaathag kag nagaaplikar sang mga kasulatan, mangin sibu ang imo mga ginapamulong.

Pagpat-od Sang Pagkasibu Sang Impormasyon. Ang bag-o nga mga balita, mga kinutlo, kag mga eksperiensia makabulig kon nagailustrar kag nagaaplikar ikaw sang pila ka punto. Paano mo mapat-od nga sibu ini? Ang isa ka paagi amo ang pagtigayon sini nga mga impormasyon gikan sa masaligan nga mga tiliman-an. Pat-ura nga ang impormasyon bag-o. Ang mga estadistika nagadaan; ang mga nadiskobrehan sang siensia madali malabawan; kag samtang nagauswag ang paghangop sang tawo tuhoy sa kasaysayan kag dumaan nga mga lenguahe, ang mga konklusion nga napasad sa mga nahibaluan anay kinahanglan bag-uhon. Maghalong gid kon nagahunahuna ka nga gamiton ang impormasyon gikan sa mga pamantalaan, telebisyon, radyo, elektroniko nga sulat, ukon Internet. Ang Hulubaton 14:15 nagalaygay: “Ang bisan sin-o nga di-eksperiensiado nagatuo sa tagsa ka pulong, apang ang isa nga maalam nagabinagbinag sang iya mga tikang.” Pamangkuta ang imo kaugalingon: ‘Kilala bala nga masaligan ang ginhalinan sang impormasyon? Sarang bala mapamatud-an ang impormasyon sa iban nga paagi?’ Kon nagaduhaduha ka sa pagkamaminatud-on sang isa ka impormasyon, indi ini paggamita.

Dugang pa sa pag-usisa sa pagkamasaligan sang ginhalinan sang impormasyon, binagbinaga sing maayo kon paano mo planuhon ang paggamit sa impormasyon. Pat-ura nga ang paggamit mo sang mga kinutlo kag mga estadistika nagahisanto sa konteksto nga ginkuhaan sini. Sa pagpanikasog nga mapadaku ang imo punto, maghalong nga “ang pila ka tawo” indi mangin “ang kalabanan nga tawo,” nga ang “madamo nga tawo” indi mangin “tanan,” kag nga ang “sa pila ka higayon” indi mangin “pirme.” Ang sobra nga paghambal ukon pagpasobra sa mga report tuhoy sa kadamuon, kasangkaron, ukon pagkaserioso nagapautwas sing mga pangduhaduha tuhoy sa imo pagkamasaligan kag pagkamaminatud-on.

Kon pirme sibu ang imo ginasiling, makilala ka subong tawo nga nagatahod sang kamatuoran. Nagahatag ini sing maayo nga impresyon sa mga Saksi ni Jehova subong isa ka grupo. Sing labi pa ka importante, nagapadungog ini kay “Jehova nga Dios sang kamatuoran.”​—Sal. 31:5.

KON PAANO INI HIMUON

  • Pamatuki ang pag-ipit nga maghatag sing sabat kon indi ka sigurado.

  • Ipasad ang imo mga komento sa “sulundan sang makapapagros nga mga pulong” sa Biblia.

  • Magpanalawsaw sa imo topiko.

  • Usisaa ang pagkasibu sang mga estadistika, mga kinutlo, kag mga eksperiensia, kag gamita ini nga wala nagapasobra. Likawi ang magpakotpakot sang mga detalye nga indi mo madumduman sang maayo.

PAG-ENSAYO: Pangabaya ang isa ka hamtong nga Saksi nga pamatian kag bantayan ang pagkasibu sang imo ginasiling samtang ginapaathag mo ang mga masunod sa imo kaugalingon nga mga tinaga: (1) Ano nga sahi sang persona si Jehova, kag paano mo ini mahibaluan? (2) Ngaa ginhalad ni Jesus ang iya kabuhi, kag paano kita makabenepisyo sa sini? (3) Sugod sang paglingkod niya subong Hari, ano ang ginhimo ni Jesucristo?

    Hiligaynon Publications (1980-2025)
    Mag-log Out
    Mag-log In
    • Hiligaynon
    • I-share
    • Mga preference
    • Copyright © 2025 Watch Tower Bible and Tract Society of Pennsylvania
    • Mga Kasugtanan sa Paggamit
    • Privacy Policy
    • Privacy Settings
    • JW.ORG
    • Mag-log In
    I-share