Ang Tanan nga Sahi sang mga Tawo Maluwas
1. Sa ano nasandig ang aton tindog sa Dios?
1 Ang di-bagay nga kaayo sang Dios nagbukas sang dalan padulong sa kaluwasan. Kabubut-on ni Jehova nga “ang tanan nga sahi sang mga tawo maluwas kag makadangat sa sibu nga ihibalo sang kamatuoran.” (1 Tim. 2:3, 4) Ang aton tindog sa Dios wala nasandig sa aton rasa, kahimtangan sa katilingban, mga ikasarang, ukon nagua nga dagway, kundi sa aton nga pagtuo sa halad gawad ni Jesus. (Juan 3:16, 36) Subong mga masigkamanugpangabudlay sang Dios, kinahanglan dulaon naton ang bisan ano nga pagpasulabi, nga mahimo mag-impluwensia sa aton sa pagsikway sa mga tawo nga handa batunon ni Jehova.
2, 3. Ano ang makabulig sa aton nga indi paghukman ang mga tawo sa ila nagua nga panagway?
2 Likawi ang Paghukom: Ginatan-aw ni Jehova kon ano ang tawo sa sulod, nga wala sing malain nga tuyo ukon pagpasulabi. (1 Sam. 16:7) Nakit-an man niya ang ila mga potensial. Sa amo, ginatamod niya yadtong luyag magpahamuot sa iya subong kalahamut-an. (Hag. 2:7) Ginatamod bala naton ang iban kaangay sa pagtamod sang Dios?
3 Mahimo nga makulbaan kita sa pila ka tawo nga masugata naton sa aton ministeryo bangod sang ila panagway. Mahimo lamugo ukon di-maugdang ang ila pamayo, wala makapamarbas, ukon may aritos sa ilong ukon sa bibig. Ang pila mahimo nga wala sing balay nga ilistaran. Ang iban mahimo indi maayo ang pagbaton sa aton. Sa baylo nga hukman nga indi na gid sila mangin mga sumilimba ni Jehova, dapat nga huptan ang positibo nga panimuot, “kay kita man sang una mga buangbuang, di-matinumanon, [kag] ginpatalang.” (Tito 3:3) Ginahunahuna ini, mangin malangkagon kita sa pagbantala sa tanan, bisan pa sa mga tawo nga ang panagway daw indi takus.
4, 5. Ano ang matun-an naton sa halimbawa ni Jesus kag ni Pablo?
4 Unang-Siglo nga mga Halimbawa: Naghinguyang si Jesucristo sing tion agod buligan yadtong para sa iban wala na gid sing paglaum nga mangin sumilimba ni Jehova. (Luc. 8:26-39) Samtang wala nagakunsinti sa paghimo sing mga sayop, nahibaluan niya nga ang mga tawo mahimo nga madalahig sa sayop nga dalanon sang pagkabuhi. (Luc. 7:37, 38, 44-48) Sa amo, nagpakita sia sing paghangop, kag “napahulag sia sang kaluoy sa ila, bangod subong sila sang mga karnero nga wala sing manugbantay.” (Mar. 6:34) Mailog bala naton sing labi pa ang iya halimbawa?
5 Si apostol Pablo ginbato, ginbunal, kag ginbilanggo. (Binu. 14:19; 16:22, 23) Ining mapait bala nga mga inagihan naghimo sa iya nga madinumtanon kag sa paghinakop nga iya lang ginauyangan ang iya tion sa mga pungsod kag etniko nga mga grupo? Wala gid. Nahibaluan niya nga ang bunayag sing tagipusuon nga mga indibiduwal masapwan sa tunga sang tanan nga etniko nga mga grupo, kag determinado gid sia nga pangitaon sila. Amo man bala sina ang pagtamod naton sa mga tawo sa aton teritoryo nga may tuhay nga mga ginhalinan kag mga kultura?
6. Ano ang epekto sang aton panimuot sa mga bag-uhan sa mga miting sa kongregasyon?
6 Pagbaton sa Iban Karon: Madamo sang katawhan sang Dios ang malipayon nga ginabaton sa kongregasyon sang mga kauturan nga nagatulok indi sa ila nagua nga dagway. Isa ka tawo nga wala makapamarbas, may malaba sing buhok, kag lamugo, ang nagkadto sa Kingdom Hall sa Alemanya. May malain sia nga reputasyon. Walay sapayan sini, mainit sia nga gin-abiabi sa miting. Nagdayaw gid sia amo nga pagkadason nga semana nagbalik sia. Sa malip-ot nga tion, ginbag-o niya ang iya pamayo kag pamustura, nag-untat sia sa pagpanigarilyo, kag nagpakasal sa iya ginapuyopuyo nga babayi. Wala magdugay, sila kag ang ila kabataan nag-alagad kay Jehova subong nahiusa nga pamilya.
7. Paano naton mailog ang aton walay pinasulabi nga Dios?
7 Sa pag-ilog sa aton walay pinasulabi nga Dios, kabay nga aton ipalab-ot ang pangagda sa tanan sa pagbenepisyo sa di-bagay nga kaayo sang Dios.
[Blurb sa pahina 3]
“Ang Dios wala sing ginapasulabi, apang sa tagsa ka pungsod ang tawo nga nagakahadlok sa iya kag nagahimo sing pagkamatarong kalahamut-an sa iya.”—Binu. 10:34, 35.