Pamangkot
◼ Ano ang pinakamaayo nga paagi sa paghatag sing mga amot para sa nagakinahanglan nga mga kauturan sa iban nga pungsod?
Kon kaisa, mabatian naton ang tuhoy sa mga kauturan sa iban nga pungsod nga nagapamigado bangod sang paghingabot, kalamidad, ukon iban pa mabudlay nga mga kahimtangan. Ginpahulag ang iban nga mga kauturan sa pagpadala sing mga amot direkta sa mga sanga talatapan sa sina nga pungsod. Mahimo ipangabay nga inang kuarta pagagamiton sa pagbulig sa isa ka indibiduwal, sa isa ka partikular nga kongregasyon, ukon sa isa ka proyekto sa pagtukod.—2 Cor. 8:1-4.
Samtang dalayawon inang mahigugmaon nga kabalaka para sa mga masigkatumuluo, sa masami may mas hilingagawon pa nga mga kinahanglanon sangsa ginahunahuna sang nagaamot. Sa pila ka sitwasyon, ang luyag buligan sang nagaamot mahimo nga nabuligan na. Siempre pa, makasalig kita nga kon ang mga amot napadala na sa sanga talatapan para sa bug-os kalibutan nga hilikuton, sa Kingdom Hall Fund, ukon sa pagbulig sa mga biktima sang kalamidad, yadtong mga amot pagagamiton suno sa gintuyo sang nag-amot.
Nahanas sing maayo ang tanan nga mga sanga sa madasig nga pagresponde sa wala ginapaabot nga mga kinahanglanon sang mga kauturan. Sa tanan nga hitabo, ginapahibalo pirme sang sanga ang Nagadumala nga Hubon tuhoy sini. Kon ginakinahanglan ang dugang pa nga bulig, ang Nagadumala nga Hubon mahimo mangabay sa kaingod nga mga sanga sa pagbulig ukon ang mga amot mahimo ipadala direkta gikan sa ulong talatapan.—2 Cor. 8:14, 15.
Gani, ang tanan nga mga amot nga gintuyo para sa bug-os kalibutan nga hilikuton, mga proyekto sa pagtukod sa iban nga pungsod, ukon bulig sa mga biktima sang kalamidad dapat ipadala sa sanga talatapan kon diin ka nagapuyo, mahimo nga direkta ukon paagi sa kongregasyon. Sa sini nga paagi, “ang matutom kag mainandamon nga ulipon,” paagi sa mga kahimusan sang organisasyon nga ginpahamtang sang Nagadumala nga Hubon, nagaatipan sa mga kinahanglanon sang bug-os kalibutan nga paghiliutod sa mahim-ong nga paagi.—Mat. 24:45-47; 1 Cor. 14:33, 40.